NAE DAN PYE DIBWA SANDEGOU

Ti annan en madanm ki ti annan zis enn ti fiy ki ti apel Nae. Sa madanm ti en lavez. Tou le zour I lav son lenz byen bomaten epi I tal obor larivyer pour sek. En zour letan I ti’n fini tal son lenz deor lapli ti tonbe. Sa madanm ti dan lakwizin pe kwi manze, alor I ti dir avek Nae:

“Nae al larivyer, al anmas mon lenz avan lapli I tonm pli for.”

Vreman Nae I taye I al larivyer. Letan I ariv larivyer lapli I dir mon vini. Sa gro lapli gro gren, e mouy lenz en sel kou. Ti annan en gran pyedibwa ki ti apel “Sandegou”. Sa pye dibwa ti ouver fermen. Nae dan son pe rod en landrwa pou kasyet lapli I bag dan sa pye dibwa koman I ouver. Koman I antre, sa dibwa i fermen. Son manman I vey, veye napa Nae. I al larivyer I war tou lenz in mouye lo zerb me I pa war laparans Nae ditou. La I al fer deklarasyon, fer rod Nae me sa pye dibwa pa ouver ankor ditou pour les Nae sorti. Sa madanm ti’n telman perdi lespwar I dir:

• Bebet in manz mon Nae. Mon pa pou war li ankor.

En zour en bonnonm dan son pe rod bwazafe I arive pas obor sa pye dibwa ki apel “Sandegou”. I tap en koud lars lo sa pye dibwa I tann sa pye dibwa sante. I dir:

Bomaten mon leve .

Mon taye mon al larivyer .

Lapli tonbe dibwa la fermen

Nae, Nae, Nae o nanm Nae

Dibwa Sandegou

Nae, Nae, Nae o nanm Nae.

Tonton in sezi I ekoute, I dir dan li menm: “Enr en! Mon a desann anba dibwa ki sante. I a bezwen donn mwan enn ti larzan koman rekonpans”.

Toudmenm sa bonnonm I al kot pale lerwa. I akont li tou sa ki’n pase kot sa pyedibwa. Lerwa ki ti en onm byen kirye I mont avek detrwa solda. En kantite dimoun ki ti’n tann sa pe akont sa zistwar zot sivre deryer lerwa an montan pour zot al ekout sa pyedibwa ki sante. Ler zot ariv obor sa pye dibwa lerwa I demann avek sa bonnonm:

“Be sa pye dibwa I annan non li?”

Bonnonm I sote, I reponn:

“Wi ,mon wa. Zis ou tap li enn ti koud lars e I sante I nonm son non limenm dan son sanson. Enn ti moman I a sante ou a tann son non.”

Lerwa I dir avek li:

“Si sa pye dibwa pa sante e vi ki ou’n deranz mwan pour fer mwan mont isi avek tou sa bann dimoun, mon solda pou koup ou likou.’

Pov bonnonm ki ti’n sitan anvi larzan I tap sa pyedibwa avek son lars e I dir:

“Sante tou dimoun a tande. I annan en kantite dimoun ki’n vini. Lerwa osi ti la.”

Pyedibwa pa sant ditou. Bonnonm i konmans ganny en lafreyer.

I dir:

“Pye dibwa sante, sansan mon pou ganny koup likou.”

Pye dibwa i ndou. Lerwa I dir:

“Paryaz se paryaz. Nou pou bezwen koup ou likou. Ou’n deranz nou pour mont isi anler pour nanryen.”

La bann solda I koup likou sa pov bonnonm. Koman zot fini sot son likou sa pye dibwa I sante. I dir:

Mon leve bomaten

Mon kouri mon al larivyer

Lapli tonbe, dibwa la fermen

Nae, Nae, Nae o nanm Nae.

Zot lerwa leker in fini fermal akoz in koup likou sa bonnonm pour naryen. I dir avek sa bann dimoun:

“A wi, vre sa bonnonm ti dir poudir sa pyedibwa I sante. Me in sant tro tar. Pa koup sa dibwa avek lars pangar nou a touy sa ki ladan, sye par lao.”

Ler zot ti’n fini sye lao zot war latet enn pti fiy. La zot atrap li zot tir li dan sa trou dibwa. Zot mazinen poudir ti annan en madanm ki ti’n perdi son fiy. Zot ale zot apel sa madanm. Ler I vini I war son pti fiy I plere avek lakontantman. La I met a rakont zot son zistwar. I dir:

• “Letan manman ti anvoy mwan anmas lenz lapli ti tonm telman for ki mon ti bezwen rod landrwa maske. Sa pye dibwa menm moman ti ouver e mon ti bag ladan. I ti fermen e pa ti oule ouver ankor. Gran mersi sa bonnonm sankwa mon ti ava ankor ladan.”

Nae pa ti en bon pti fiy, akoz in les zot koup likou sa bonnonm avan I sante. Saler sa bonnonm menm ki’n sov li. I ti’n devret sante letan sa bonnonm pe persiste deor avek lerwa.