ZISTWAR FRER SOUNGOULA EK FRER SOUSOURI

Helen Pirame

Frer Soungoula avek Frer Sousouri ti de bon zanmi. I ariv en letan ki Frer Sousouri i desid pour marye. I swazi son fiy e i demann li maryaz. Frer Soungoula ti konn sa e i ti byen malis. Sak fwa ki Frer Sousouri i ariv kot sa fiy pour fer lanmour, Frer Soungoula osi in arive. Alor Frer Sousouri i desid rod en lot fiy e kit sa enn pour Soungoula. Son lannmen Frer Sousouri i demann an maryaz en lot fiy. Frer Soungoula i tann sa e i kit sa fiy li osi pour swiv Frer Sousouri. Ler Frer Sousouri i vwar li kot sa dezyenm fiy ki i’n demann an maryaz i pa konnen ki i pou fer. I kit sa enn ankor e i rod en lot. Me tou letan menm zafer i arive.

Frer Sousouri i aret sa zafer maryaz pour en letan. I pran detrwa zour, i asize i mazinen ki i kapab fer. En zour i ganny en bon lide. I dir dan li menm: “Soungoula pa kapab anvole. Mon pou al demann an maryaz sa fiy dan plannet Zipiter. – Alor ler mon ava al kot li dan dimans, Frer Soungoula pa pou kapab ale li osi parski i pa kapab anvole, i napa lezel. ” En bo zour Sousouri i fer son let demann, i anvoy kot fiy Zipiter e sa fiy Zipiter i aksepte. Enn de dimans i al fer lanmour li tousel. Frer Soungoula ti ankor pe mazinen kote i ale. En dimans maten Soungoula i maske dan bor lakaz Frer Sousouri pour li veye kote Sousouri i ale ki i pa konn ditou, e alafen defen i vwar Frer Sousouri i al dan ler avek en pti sak. An plis i veye e i remarke ki Frer Sousouri i tourn nek dan tanto. I dir: “Be sa i al lwen.”

Frer Soungoula i pran pasyans. Son dimans answit Frer Soungoula i tyek byen Frer Sousouri. Konman i poz son sak ater en pti kou pour li aranz byen son lenz, Frer Soungoula i pas deryer i sot ladan e i aranz li byen. Sa son premye dimans ki i rantre dan sak Sousouri. Ler Sousouri ti pran son sak pour li konmans son voyaz ver plannet Zipiter i ti trouv li en pe lour me toudmenm i pa ti pran plis ka avek sa. Ler i ariv anler dan plannet, konman i poz son sak ater, i tourn ledo pour aranz li en pti pe son lenz ki ti’n deranze avek divan, avan i rantre kot son lanmoure. Frer Soungoula i glis deor dousman e san ki Frer Sousouri i remarke i taye lapo patat i al asiz dan bor sa fiy. Fiy i pa antren i krwar parol Frer Soungoula ki dir li i’n vin an konpannyon avek Frer Sousouri. Ler Frer Sousouri i rantre pour vin asiz kot fiy i vwar Soungoula la. I en pti pe etonnen me i pa dir naryen. Pandan lazournen Frer Soungoula i vantar e i koz plis avek sa manmzel ki Frer Sousouri.

Ler Frer Sousouri i pre pour desann, Soungoula i veye konman i al lav son figir e i sot dan son sak. Frer Sousouri i trouv drol ki i pa vwar Soungoula ler i retournen, me sa fiy i dir li: “Ou zanmi i dir ou, ou ava zwenn li ater. ” Frer Sousouri i pran son sak e i desann en pe byen dan latristes. Ler i poz son sak ater i ti touzour al pran en pe dite e repoze. Frer Soungoula i profit sa letan e i sorti dan sak i tay se li.

Pandan plizyer dimans Frer Soungoula i zwe menm trik ek son dalon Frer Sousouri. I zwe son kannot pour Frer Sousouri anmenn li dan plannet Zipiter kot sa fiy. Sousouri ti pre pour degout son maryaz akoz mannyer Frer Soungoula ti fer kot sa fiy ti kas son leker, fer li zalou.

En dimans bomaten Frer Soungoula ti mank lapel akoz i ti’n al danse sanmdi swar ziska dan en pe gran maten. I pa ti ganny letan fer gran twalet. Tou ki i ganny letan fer se zis lav son figir e sot dan sak Frer Sousouri. Sa dimans Frer Soungoula pa ti santi li byen ditou, me toudmenm ler i’n ariv kot fiy Zipiter la i ti gayar. Ler i’n ariv ler pour desann, parey labitid Frer Soungoula dan sak Sousouri. Dan milye semen Frer Sousouri i santi en pti pe delo ki koule avek li. Frer Sousouri i dir: “Ay, ay, ay, mon boutey delo pe savire. ” I pa antren plis ki sa me pli ale pli delo pe mouy li, pe koule. Sa voyaz i dir: “Me pa posib mwan byen mouye ler mon a ariv anba. ” Alor i ouver son sak pour li aranz pozisyon son boutey, swadizan. Me ki i trouve: FRER SOUNGOULA! Ahhhhh! I dir: “Me Frer Soungoula, alor tou le dimans mwan ki anmenn ou anler kot fiy Zipiter. Partou kot mon pase ater ou esey deranz mon maryaz, mon mont isi dan plannet ou fer mwan anmenn ou. Ozordi nou a fini nou de. ” Frer Soungoula ki ti’n leve dan son sonmey i demann pardon. Me Sousouri in bebet menm i pa konpran. I plannen menm an desandan ziska ler i ariv par lao en landrwa ki annan en kantite ros kot en larivyer. I tyonbo Frer Soungoula par son lapo likou e i dir: “La mon fini menm avek ou. ” I larg Frer Soungoula dan ler e i get byen kot i tonbe. Frer Soungoula i kriye an desandan , “Tal payas, tal payas, la Piti Zipiter pe desann, tal payas, tal payas, Piti Zipiter pe desann! ” Frer Soungoula i kriye menm. Bann fiy ki ti pe lav lenz dan larivyer i lev latet, get anler. Zot vwar en nespes zafer pe desann. Sa ki tonm feb i tonbe e en bann i les zot lenz e zot bake deryer e zot taye. Frer Soungoula ti pe desann ek sitan vites e dan en pti moman en gran tapaz i fer … Frer Soungoula kraz lo ros larivyer. Frer Sousouri pandan sa letan ti’n tini anler pour get tou zafer ki pase. I mor riye. Son dimans answit Frer Sousouri ti mont en pe kot son lanmourez dan plannet Zipiter e i ti rakont li tou sa ki’n pase. Set zour apre Frer Sousouri ti fer son maryaz.

Source:

Creolica, 26 juin 2007 – Sirandann ! Zanbaget ! Contes créoles des Seychelles, Sibylle Kriegel & Ingrid Neumann-Holzschuh (eds). Collectés par A. Bollée et I. Neumann-Holzschuh. pp. 10-12