Alors en zour ti trouv anan frer Soungoula. Frer Soungoula dan son marse ti zouene frer Elefan. I ti’ne deza gagne en diskision avek elefan, la sameme ki i ti per elefan. I dir avek elefan :
“Mon frer, les nou fer en pariaz ris lakord. Ou, ou a debout lot kote montagne, moi, mon a debout bor lamer .”
Elefan i demane Soungoula: “Be kan sa pariaz?”
Soungoula i dir li lendi. Elefan bien dakor pour sa pariaz. La Soungoula i kit elefan i desane bor lamer. I zouene frer Balene, i dir avek balene: “A, koman ale, mon frer Balene?”
Balene i dir: “Mon la-meme, mon dalon, touzour pe vire devire la bor lamer.”
Soungoula i dir: “Mon frer Balene o, anou fer en pariaz ris lakord, ou a trouve si mon pa i a gagne ou.”
Balene bien kontan, i dir: “Me oui, frer Soungoula. Be kan sa pariaz ?”
Soungoula i dir: “Lendi. Selman moi, mon a debout lot kote montagne, ou, ou a debout la bor lamer .”
La prezan sakene i al se zot. Ler lendi i arive, Soungoula i’ne fini rod son kantite laliane. Ler Soungoula i ariv kote landroi randevou, elefan i’ne fini arive. I dir avek elefan : “Ou’ne pare?”
Elefan i dir oui. La i done elefan son bout laliane. I dir: “Prezan moi, mon a al bor lamer . Kan ou a antane en souflet ki soufle, ou a komans rise.”
Ler Soungoula i ariv bor lamer, balene i’ne fini pare. I done balene son bout, i dir: “Prezan moi, mon a al dan boi pour pran mon bout . Kan ou a antane en souflet ki soufle, ou a komans rise.” La Soungoula i kit balene, i mont dan boi.
Soungoula ti ‘ne rod en gro lakok kourpa, i’ne pers en trou pour fer en lansiv. Kan i’ne ariv lo montagne, i soufle son lansiv troi kou: bou-bourle, bou-bourle, bou-bourle. Balene avek elefan i komans ris zot lakord.
Li Soungoula i asiz lo latet montagne dan en manier ki i trouv tou le de kote. Kan balene i ris en kou, Soungoula i dir: “Rise, Baba!” Elefan i ris en kou, i dir: “Ale, Lele! Ale, Lele! Rise, Baba!”
Sa laliane telman ki i ti for, zot pa kapab kase. Me elefan i’ne kapab ris balene lo brizan, balene i’ne fini kros son lekor antie.
Ler Soungoula i gete, elefan i’ne amene balene lo brizan, i koup lakord. Soungoula i desane kot elefan, i dir: “Ki manier, mon dalon? Mon’ne gagne ou!” Soungoula i desane bor lamer, i zouene balene, i dir avek balene: “A be, ki manier, mon dalon? Mon’ne gagne ou!”
La Soungoula i al se li. Elefan dan pe desane bor lamer pour li al tranp son lekor, i oir balene lo sek. I dir: “Be frer Balene, be ki manier ou’ne fer pour la lo sek?”
Balene i dir: “Mon’ne fer en pariaz ris lakord avek Soungoula, telman ki Soungoula i for, i’ne trene
moi la. Lakord osi i’ne kase. La mon lekor antie i’ne tou krose.”
Prezan elefan i dir: “Alor sa pariaz la, nou ti pe fer nou de.”
Balene i dir: “Me narien, li Soungoula, zour mon a zouene li, i a pey moi ser.”
Elefan osi i dir parey.
Balene i dir avek elefan: “Ed moi pour moi ariv dan kanal.”
Dan tou son fatige, elefan ti bezouen ed pov balene. Balene i dir: “Mersi, mon frer.“
En zour pli tar, elefan i zouene frer Soungoula. Soungoula i’ne per elefan, ki manier i pou fer pour sove? I oir zis en gro ros, i mont lo la. Lo sa ros ti anan en gro trou ki ti anan delo. Elefan pa pou kit Soungoula. Soungoula i dir avek elefan : “Mon a al Lafrik.” I sot dan delo – plop – i fer en kantite tapaz avek delo. Kan i sorti i oir elefan i ankor la, i dir: “La mon a ale meme.” I sot ankor par latet, i kas son likou. Soun goula i’ne mor.