ZISTOIR LOLO EK TITIN

Henry Savy

Sirandane! Zan Baget!

Alors en zour koman en bo zour, ti anan en zome i apel Lolo ek son fame i apel Titine. Zot ti touzour bien ansame. Me en sel keksoz ti rane mekontan Lolo. Titine son fame ti anan en lalang tro long. I pa ti kapab gard narien pour li. Tou sa ki i ti antane rakonte, i ti touzour pe rakont sa partou, ziska tou dimone ti kone. Koman Lolo ti bien kontan son pti Titine, sa ti fer li lapene. I ti esey tou fason pour koriz son fame, me zame i ti vine abou.

En zour Lolo i ariv dan lakour Titine ek en ler trakase. Titine ki ti oir li trankil i demane li: “Lolo, ki i anan azordi? Ki ou gagne?”

Lolo i repone li: “Mon fame, mon a dir ou ki mon’ne gagne, me si ou promet moi ki ou pa pou dir persone.”

Titine i promet li avek serman ki zame i a dir persone, pa meme ek Zaza, son voizen ek ki i bavarde ler i gagne en pti moman letan. Alor Lolo i dir li: “Mon fame, mon fine touy troi pret yer soir. Mon’ne ferm zot laba dan lakaz mor.”

Ler Titine i tane sa, i ti gagne telman per ki i ti pre pour tome senkop. Ler i ti’ne retourn dan li-meme, Lolo i dir li: “Pangar ou al dir sa ek dimone, en? San koi nou a gagne met en konsigne, ou tande, en? Kan-meme ou a antane dir ki dimone fine touy troi pret, pa dir pour dir moi ki’ne fer, ou tande, en?” Lolo i leve, i met son lamen dan son pos, i al derier lakaz san dir narien.

Titine osi pa dir en mo ek sa sok ki i fine gagne. I ti reste telman trankil ki Zaza, son voizen, ti remark keksoz. Tou le zour Titine ti anan labitid kriy li bonzour. Me azordi i ti’ne ariv en pti pe tar, i pa ti ankor oir Titine. Alors Zaza i dibout anba lafnet, i kriye: “Bonzour, bonzour. Mon pa tane ou fer ou palab bomaten, ou malad?”

Titine i avans kot lafnet pour repone son zami Zaza. “Mon pa malad… me…”

Zaza ki fine remark keksoz drol i dir ek Titine: “Ou anan ler trakase. Ki ou anan?”

Titine ti ape bouz-bouz son lalang dan son labous pour li koze. Me tou-d-meme i dir ek Zaza: “Zaza, mon ser, mon a dir ou keksoz. Me pa dir avek persone.”

“Non, mon ser, Zaza i repone li.”

“Zaza, ou kone Lolo fine dir moi pa dir avek persone, meme avek ou.”

“Zame, mon ser, kont lo moi.”

Zaza i dres son lekor, i pik son zip, i ouver son lizie ek son zorey bien gran. Alors Titine i delarg son sekre. “Lolo fine touy troi pret yer soir, i’ne ferm zot dan lakaz mor.”

Zaza i etone, i met son lamen divan son labous, i dir: “Ah… Madame Lolo… Sa en keksoz pour Msie Lolo fer? Li ki touzour en bon dimone?”

Meme moman Titine i tane dimone marse dan lakaz. I tay vit, kit Zaza san dir narien.

Zaza apene i’ne kit Titine, i’ne al rakont sa nouvel ek son maman ki li osi fine al rakont ek en lot, e sa lot i’ne al rakont ek en lot ankor. Avan midi nouvel ti ariv dan zorey lapolis. Zis dan pti dez-er, de gard i antre dan lakaz Titine pour pran lanket avek Lolo. Lolo ti pe fime son gro pip ler gard ti arive. Gard i demane ek Lolo si i vre ki i’ne touy troi pret yer soir.

Lolo i repone i dir: “Oui, mon gard.”

Gard i tionbo li par son de lebra, i met li dan minot, i dir ek li: “Anou, al montre nou kot ou’ne met zot.”

Lolo i al ek gard ziska lakaz mor. I ouver laport, e la divan laport zot trouv troi pti poison mor ki apel “pret” ki Lolo ti touye lavey osoir pour li fer labouet.

Zistoir i aret la pour azordi. I pa dir nou plis. Me nou kapab mazine ki Titine si i pa ti koriz li pour touzour, i ti gagne li en bon leson lo son manier kontan rakont tou sa ki i tande.