Antoine Abel, (1977) Contes et Poèmes des Seychelles. Paris : Editions Pierre Jean Oswald. pp. 7-10
Translated from French by Penda T. Choppy, 22nd April, 2021
En zour Sanmdi bomaten, Soungoula ti deside pour al fer en pti tournen dan vilaz parey labitid. Ler i ti’n fini fer son konmisyon, i ti diriz ver laboutik bouse, pe kont son larzan. Ler i ariv kot bouse, i ti war bann bel bel sosis. Msye Gazon, ki ti bouse, ti debout deryer son kontwar dan son tabliye blan an souriyan. Soungoula ti kalkil en kou, epi i ti dir,
« Sa bann zoli sosis. Mon krwar mon ava aste enn ou de liv pour lafanmir. »
Koman i dir sa, i ti antre dan laboutik.
« Bonzour Msye Gazon ! Sa bann sosis, ou pe vann ? »
« Me byensir. I kout sis roupi laliv. »
« Donn mwan de liv syouple. »
« La la. I fer douz roupi. »
« Ayoyo ! Mon annan zis dis roupi dan mon portmonnen. Donn mwan zis en liv edmi. »
« Napa problenm. La ou sosis ek ou larzan sanze. »
« Mersi bokou Msye Gazon. »
« Orevwar, e bonn apeti. »
Soungoula byen kontan ki in ganny en bon larazman, i kontiny son semen leker leze. I ti ozanz ler i ti mazin sa bon repa ki tidan son sak. Sirman, son madanm, Danm Sounga ti pou byen kontan. Dan bife lakwizin ti annan en pe lantir dan en vye bol emaye. Danm Sounga i a kwi sa sosis ek lantir. Delo ti vini dan labous Soungoula, ler i ti mazin sa. An aprosan se li, i ti soufle La Jeune Bergère.
Me ler i ti arive, ti annan en sirpriz pour li. Lelou ek Renar ti’n asize anba pye mang o bor langar. Depi enn erdtan zot ti pe esper li. Lelou ti dir,
« Ou a krwar mon santi loder sosis. »
« Sa voyaz, kot ou’n al pran ? » Renar ti demande.
« Nou konn ou byen dan kanton, » Lelu ti azoute. Napa pli gran voler ki ou ! »
Soungoula ti’n fini anmerde. I ti zet son saka ter e dir, « Zot kapab pa krwar si zot oule, me mon sosis mon’n aste kot bouse ! »
Sanmenm ki Lelou ek Renar ti pe espere. Koman sak soungoula i tonm ater, nek zot sot lo la e kouri dan lafore. Soungoula osi pa tarde – i tay deryer zot e i kasyet deryer en gro pye Bwarouz. Sa de voler ti’n aret kot en gro ros. Soungoula ti pret zorey e i ti ekout zot.
« Annou al dan lakour kot mwan, nou a gete ki annan dan sa sak, » Lelou ti dir.
« Kel bon lide, » Renar ti reponn. « Mon annan detrwa ponmdeter kot mwan. Kekfwa nou ava frir. Annou ale vitman!”
Soungoula in tan tou. I fer son lespri travay, epi i al rod en gran golet. I met en lanmson dan bout sa golet e i mont anler lo lakwizin Lelou. I ti depese e agrandi en trou parmi bann fey lo twa lakwizin.
Anndan dan lakwizin, sa de konper ti pe diskite ki mannyer pour partaz zot manze ler in kwi.
« Pour annan lazistis, sakenn i a manz en sosis alafwa, » Renar ti dir.
« Nou a mezir ponmdeter dan sa bol ki la, » Lelou ti dir. « Koumsa nou a ganny menm kantite. »
Letan ki zot pe fer tou sa bann palab, Soungoula pe fer monte son sosis, enn par enn lo son lanmson. Toudenkou, Lelou i antre dan lakwizin, e sa ki i ti vwar ti fer li kriye.
« Me Renar, oli sosis ? Ou’n manz tou, gran devoran ! »
« Me ditou ! Mon asir ou, mon pa’n tous nanryen. Pa nou tou le de nou ti pe debout lo peron ? »
« Non ! Mon pa krwar ou ! » Lelou ti kriye. « Ou a dir mwan kot ou’n mete, sansan mon a trangle ou ! »
Avek sa, Lelou ti sot lo Renar e donn li detrwa bon koudbalye dan ledo. Soungoula li, i ti profite koman zot ti pe fer zot bagar pour li manz tou sosis ek ponmdeter. Ler i ti pe desann lo twa, Lelou ti remark li, e i ti’n fini konpran son lerer. I ti vir ek Renar e kriye, « Zot, eskiz mwan ! Soungoula ki’n pran! Get li anler la! I’n kouyonn nou ankor en fwa. »
« Eski ou kapab vol ou prop keksoz ? » Soungoula ti rikannen.
Pour maske zot lakanmizri, sa de konper ti tay deryer Soungoula pour bat li, me Soungoula, malgre i ti’n fek manz en gro repa, ti taye lapo patat ! I ti disparet lo santye ki ti retourn ver vilaz. En pti letan apre, sa de konper ti abandonnen e retourn se zot byen kanmi.