Trwa gran dalon

Alor enn fwa, ti annan trwa garson. Zot ti trwa gran zanmi. Tou sa ki zot ti fer zanmen zot ti kasyet kanmarad e osi avan pour fer en keksoz zot ti touzour dir enn ouswa lot, “Dalon, tanto mon pou al anvil,” e deswit tou le trwa ti sanze zot al anvil. Si enn i aste en keksoz lot osi i aste sa keksoz.

Me alor en zour enn i war en fiy ki i ti telman kontan sa fiy, alor ki i dir dan li menm, “Zot, sa disik ki mon’n vwar, sa wi mon pa pou tarde. Mon a bezwen demann li maryaz avan ki mon de zanmi i war. E mon pa pou dir zot naryen pangar zot a kapab tap mon lanmen.”

Salerla i pa ti konnen si son de zanmi osi ti’n war sa fiy e tou le trwa ti’n kontan menm fiy. E sa de zot osi gard zot sekre ki ni enn, ni lot pa konnen si zot kontan menm fiy. Alor enn i anvway son let demann. Sa fiy i rann repons deswit. Son lide i dir li ki sa trwa gran zanmi, parske i fin deza war zot plizyer fwa ansanm. I dir, “Bon mon a esper ankor mon a gete ki pou arive.”

Me son nide ti byen bon. Zis trwa zour apre, en lot let i arive i ouver i gete, i riye, i dir, “Mmm, sa mon ti konnen sa enn sa pour sa lot zanmi.” Toudmenm i ranmas ankor, i pa rann repons konmela e i tranp ankor trwa zour. Ankor en lot let ki arive, ouver pour lot zanmi, pour trwazyenm zanmi. Alor prezan sa fiy i dir, “La prezan mon a rann zot repons.” I ekrir premye i dir li, “Ariv kot mwan Lendi.” I ekrir dezyenm i dir li, “Ariv kot mwan Mardi.” I ekrir trwazyenm i dir li “Ariv kot mwan Merkredi.”

Alor tou le trwa i ganny zot let, e pa bliye, sekre sekre menm. Personn pa dir nanryen kanmarad. Tou le trwa ti’n tris, pe mazinen ki mannyer pour kas lakle ek kanmarad. Alor Lendi i arive, premye dalon i dir, “Zot mon bann zanmi, pa ankoler, tanto mon bezwen sorti en pti moman menm, mon pa pou tarde. Mon a tourn deswit.”

Alor le de dalon i get kanmarad anba lizye. Tou le de i dir, “Oke,” me salerla sa de zot dan zot leker, zot dir, ‘Demen mwan osi mon a kapab boure.’

Bon, bon, pas alor ler premye dalon in ariv kot sa fiy, sa fiy i dir li, “Mon byen kontan ou, mon gate dou. Lontan mon ti anvi koz ek ou. Nou a marye byen, me mon ti a byen kontan si ou ti a kapab fer en paryaz avek mwan. Si ou teni mon paryaz alor mon a marye avek ou.”

Pa bezwen dir ou zennzan agogo dan son soulye bout pwent, son kannson sere, ti’n vantar e i dir, “Be wi mon gate, sa pa nanryen pour mwan.”

Fiy pa ankor dir li ki kalite paryaz, alor fiy i dir li, “Zedi swar ou ava al dan simityer, ou a war en serkey. Lev son kouvertir antre ladan me fodre ou antre ladan zis si-z-er diswar. Si ou tenir ziska di-z-er edmi, alor mon a marye avek ou.”

Boug la i sorti en pe aflize, i dir “Bon, Zedi. Bay bay.”

Alor Mardi dezyenm dalon i vir vire, grat grat latet ziskan ler i dir les marse, sa ki pou arive les arive. I dir, “Zot, mon bann dalon, mon pou sorti en kou. Zot, pa ankoler, mon pa tarde, taler mon a vini.”

Premye dalon pa reponn. Son lespri i lwen, i pe mazin zedi swar ki pou ariv li. Trwazyenm dalon i dir li, “Oke my friend.”

Ler dezyenm dalon i ariv kot fiy, fiy i get li i riye, i dir li, “Alo love, come in.”

Dezyenm dalon i antre i asize. Alor fiy i dir li, “Mon byen kontan mon pti let ki ou’n anvwaye, me mon a dir ou en pti keksoz pour ou fer pour mwan, ou a kapab ?”

Dezyenm dalon i dir, “Me wi mon gate.”

Alor fiy i dir li, “En paryaz mon pou fer avek ou, si ou reisi, mon a marye. Zedi zis di-z-er dis diswar, ou ava al dan simityer, ou a vwar en serkey, ou a tonm azenou ou a fer en notre père avek en je vous salut Marie. Si ou fini fer sa, alor mon a marye avek ou.”

Dezyenm dalon i dir li, “Mon ti krwar en pli gran paryaz ki sa. Oke love see you tomorrow.” I sorti deor i ale. Merkredi, trwazyenm dalon son tour pour li fer son demann. I dir avek premye e dezyenm dalon, “Zot tanto mwan osi mon pou sorti en kou, zot pa ankoler.”

Zafer ti’n sal! Le de dalon pa reponn, sakenn ti pe fer son lespri. Alor trwazyenm dalon i ale, i ariv kot lakaz, i konny de kou, fiy i ouver. “Alo darling. Alo come in and sit down.”

Trwazyenm dalon i dir, “Ki i dir? Mon’n ganny en let pour en randevou ozordi, alor mon vin get ou desizyon.”

Alor fiy i dir li, “Pa tro prese, senpleman zis pour mwan dir ou ki mon byen kontan ou e mwa marye avek ou si ou kapab fer en paryaz avek mwan.”

“Right dear, why not.”

Alor fiy i dir li, “Demen zedi di-z-er ven diswar, ou ava al dan simityer, ou a pran en lasenn, anmar dan ou leren, ou a fer trwa letour simityer. Si ou kapab fer li, alor mon a marye avek ou.”

Dalon i mazinen i dir, “Oke sweetheart, bye bye, lets hope for the best.”

Alor Zedi i arive, premye dalon i fer son leskiz ankor, i sorti i ale. Son lespri pa avek li ditou. I pe mazin lwen. I ariv dan simityer, i vwar en serkey. I get isi, i get laba, leker dan gozye, i lev kouvertir, i bag dan serkey. I kouver li byen, i pe espere kel er sa dis minit pou pase, pour li boure. Salerla sa dis minit pour li i konman si-z-erdtan. Pti dalon i la, i tranpe menm.

Zot apenn senk minit, dezyenm dalon i arive, i vin dousman lo bout lipye, i get ater i war serkey, i koste. Ki ou a fer! Paryaz se paryaz. Avek de leker, i tonm azenou, i tranble, i komans son lapriyer. Apenn ki i ti’n dir de mo dan son notre père, dalon dan serkey i sote me i pa bouze, zis leker ki ronfle. I dir dan li menm, ‘ki sa badinaz ankor, paryaz pa ti konmsa. Pa ti dir mwan si pou annan dimoun pour fer lapriyer.’

Me deor dezyenm dalon pe sey rod mo pour li dir, i fin bliye koman pour fer notre père e i komans manz mo. Lavwa pe tranble, ‘notre père, je vous salut Marie, ar Mon Dye!’

Pti dalon dan serkey ankor pe ekout sa lapriyer, i dir “Mm Mm, pa mwan.” I aranz son lekor en kou. La la zafer, serkey pa’n al bouze! Dalon deor i dir, “Pa mwan, zafer pe sal akoz serkey i bouze. Pa ti dan kondisyon paryaz pour serkey bouze.”

Pa bezwen dir ou, prezan ki dezyenm dalon i manz mo lapriyer. Ki ler i fer kont, di-z-er ven i arive, i antann en tapaz. I vir deryer li. En boug tout an blan avek en gran bout lasenn dan son leren pe taye, me i vin tou drwat lo li. Pa bezwen dir ou dezyenm dalon prezan ki i manz lapriyer. Premye dalon dan serkey pa oze sorti, me ler li osi i antann sa dibri lasenn pe sonnen, i dir, “La napa nanryen pour fer les sante.” I fou koudpye dan kouvertir serkey, i dir, “Pa ek mwan! Goodbye simityer.” I plat.

Salerla letan premye dalon i donn koudpye dan kouvertir serkey, trwazyenm dalon osi in preski ariv avek dezyenm dalon, trwazyenm dalon i get devan li i war en boug leve ater e dan bor li lanmenm en lot boug sorti dan en serkey. “Aar, anmenn mwan mon lipye!” Trwazyenm dalon i plat li osi, taye san konnen kot i pe ale. Premye dalon deryer li ti annan dezyenm dalon e deryer trwazyenm dalon. Premye dalon pe taye an krwayan ki sa boug i deryer li pe galoup avek li. Dezyenm dalon i dir sa trwazyenm boug pe tay avek mwan. Tou le trwa zanmi byen fatige, byen per e san konesans. Ariv se zot, bat devan laport bouf. Landmen maten ler zot leve tou le trwa i regard kanmarad, zot dir avek kanmarad. “Be ki mannyer nou fer pour nou la?”

Alor tou le trwa, i komans rakont kanmarad ki’n arive. Enn i dir, “Nou parey trwa lenbesil. Si nou ti fer parey nou labitid, pa ti ava ariv nou sa. Prezan personn pa pou ganny fiy pour marye.”

E le landmen maten, tou le trwa i ganny zot let remersiman e zot ti reste parey zot labitid, touzour dir e rakont kanmarad tou zot keksoz avan fer.

E nou’n ariv alafen sa zistwar ki fotespere zot in war ase enteresan, anvwaye par Michel Cecile, Union Vale.