TOM POUS

Jessy Hossen

Alors en zour ti annan en koup ki ti napa zanfan e tou le zour zot ti priy Bondye pour zot ganny en piti. Zot lapriyer ti egzose e zot ti ganny en pti garson pa pli gran ki pous lanmen en dimoun. Zot ti tre devoue anver zot pti kreatir e ti sonny li byen. Menm si i ti pti, Tonm Pous ti malen. Bann vwazen ti admir bann keksoz ki i ti fer e keksoz ki i ti dir.

Kan Tonm Pous ti ganny kenz an, e pandan ki i ti pe byen asize dan en lakok dizef lo latab obor son manman, son manman ti dir avek li, “Ou’n ganny kenz an, ki ou anvi vini?”

“En fakter,” Tonm Pous ti reponn.

Son manman ti mor riye e ti dir, “Ki sa badinaz! Ou en fakter! Ou pti lipye ava pran enn er pour al distans ki en dimoun ordiner ava fer dan en minit.”

“Pa fer naryen. Mon oule vin en fakter, zis anvoy mwan anmenn en let e ou a war mon ava fer sa dan en pti moman.”

“Bon,” son manman ti dir, “Al anmenn sa let kot ou tantin dan sa lot vilaz e anmenmtan dir li anvoy en penny pour mwan.”

Tonm Pous ti sorti dan lakok dizef e ti ale dan semen. I ti war en zonm lo son seval ki ti pe al dan lot vilaz. I ti grenp avek lapat seval, kasyet anba labrid e i ti pran en zepeng e pik sa seval. Sa seval ti galope, menm si son met ti sey aret li. Kan zot ti ariv dan vilaz, Tonm Pous ti aret pik seval e sa pov seval ti kontinyen son larout byen dousman. Tonm Pous ti profite, desann lo seval, al kot son tantin, donn let e demann en penny pour son manman. Pour li retournen, i ti zwenn en lot msye lo son seval e i ti fer menm zafer pour fer seval anmenn li vit. Kan i ti donn son manman sa penny, son manman ti etonnen e demann li, “Kimannyer ou’n fer pour ou al telman vit?”

“Ou war manman , ou a krwar mwan ler mon dir ki mon kapab vin en fakter.”

Son papa osi ti annan en seval ki i ti annan labitid anmenn dan laplenn pour manz zerb. En zour i ti kriy son pti garson e dir, “Reste isi e vey mon seval. Fodre mon al dir ou manman en keksoz e mon ava retournen deswit.”

Kan son papa ti’n ale, en voler ti pase e war sa seval pe manz lerb e i pa ti war personn pe veye. Byensir i pa ti kapab war Tonm Pous kot i ti pe debout dan zerb. Alor i ti mont lo seval e ale. Me Tonm Pous ki ti en pti kreatir vif, ti mont avek lake seval e ti konmans mord seval lo ledo. Sa seval ti telman ankoler ki i pa ti ni port atansyon dan ki direksyon voler ti anvi ale. I ti al drwat kot lakour Tonm Pous. Son papa ti etonnen letan i ti war en dimoun ki i pa konnen lo son seval, me Tonm Pous ti desann deswit e rakont Ii tou. Son papa ti fer aret sa voler e met Ii dan prizon.

En zour kan Tonm Pous ti’n ariv laz ven an i ti dir avek son paran, “Orevwar papa, orevwar manman, mon pe al rod mon fortin dan lemonn e osito ki mon ganny mon fortin, mon ava retourn dan lakour.”

Son papa ek son manman ti riye ler zot ti tann sa e get son pti grander. Zot pa ti krwar Ii ditou. Ler aswar ti fer Tonm Pous ti mont lo twa, kot ti annan bann gro zwazo ki ti’n fer zot nik. Bann zwazo ti pe dormi, e i ti mont lo ledo pli gro zwazo, anmar Ii avek lezel sa zwazo, e apre i ti kasyet dan plim e dormi.

Lannmen bomaten sa bann zwazo ti anvole pour al dan bann pei Lafrik. Zot ti ariv dan en gran lavil e la sa bann zwazo ti apoze lo twa en gran batiman. Tonm Pous ti desann e kan bann dimoun ti war Ii, zot ti anmenn Ii kot lerwa sa pei. Lerwa ti kontan sa pti garson e i ti gard Ii touzour obor Ii. I ti telman kontan Tonm Pous ki i ti donn Ii en dyanman kat fwa pli gro ki Ii. Tonm Pous ti anmar byen sa dyaman avek likou sa pli gro zwazo e anmar limenn avek sa zwazo.

Sa bann zwazo ti konmans zot voyaz pour retourn dan pei kot Tonm Pous ti reste. Ler zot ti arive, i ti delarg son lekor e apre i ti delarg dyanman. I ti anvoy dyanman ater e apre taye e kouver avek later. I ti taye e al dir son paran vin sers sa dyanman akoz limenm i pa kapab anmenn sa trezor.

La Tom Pous ek son paran ti vin ris e viv ere ansanm.