TIZAN, ZANN EK LOULOU (versyon 2)

Elina François (Grand Anse Praslin)

Alors ti annan en madanm ek son imsye. Zot ti annan de zanfan – Zann ek Tizan. Zot ti mizer, mizer, mizer. Zot ti al dan bwa pour al travay dan bitasyon. Tanzantan zot manze ti en pti rasin mayok.

En zour, sa imsye ek son madanm ti pe koze aswar. Zot ti dir zot nepli kapab tenir zot de zanfan. Enn ti dir,

« Annou al ek zot par la, nou a larg zot en landrwa… »

Zann li i ti dormi. Me Zan ti tande. Son lannmen i ti dir ek son ser,

« Zann, met ou pare. Nou pe al marse ! »

Vre, ler manman ek papa ti leve, ti donnn zot en pti gadyak, apre zot ti pran zot sak zot ti ale avek sa de manrmay. Zot ti marse, marse, marse. Ler zot ti’n ariv dan en fore, manman ti dir, « Esper lanmenm marmay. Mon pe al en pe pli laba avek papa. »

Manrmay ti dir, « Wi manman ».

Zan ti may Zann, i ti dir, “Depi ozordi, nou’n fini perdi manman ek papa.”

Zann ti plere. Zot ti la dan bwa. Zot ti manz lagrenn dibwa. Zot ti marse pour apepre de semenn. En zour swar, Zan ti dir,

« Ozordi nou pa pou dormi ater, nou pou dormi anler lo pyedibwa. »

Lo granmaten, zot ti get en distans, zot ti war en landrwa konmos koman dimoun i reste. Zot ti ale. Zot ti tonm kot en larivyer. Me lanmenm ki Loulou ti vin sers delo. Zann nek ti sot lo delo, i ti bwar.

Zan ti dir li, “Pa bwar tro bokou!”

Ti vin de pti fiy. Piti loulou.

Zann i dir, « Bonzour, ser! Kote zot reste?»

Zot montre ledwa, zot dir, “Asiz lanmenm, nou pe vini. »

Saler zot ti annan kat lizye! Zot in al kot Manman Loulou. Manman Loulou i pran sifon i anmar lo sa de lizye deryer. Zot trounen zot anmenn Zan ek Zann kot zot manman. Manman Loulou ti byen kontan. I ti tret zot koman son zanfan. Saler Tizan pe fer son bann plan. I pe veye. Aswar i pa dormi. Ler Loulou i konnen manrmay pe dormi, zot fer zot bann danse. Zot fer plan pour manz manrmay. Li Zann, sa bann manze ki Loulou pe donn zot, i pe manz angran. Zan i dir li, pa manz angran, i pou vin tro gra. Zann i dir i pou al dir Manman Loulou. Zan i dir, “Pa al dir. Nou kot Loulou la ! »

Zann in fini per. Aswar zot in al dormi. Bomaten leve pour al plante dan bwa. Ler in ler pour komans trafik dinen, Zann in vreman gro. Tizan i dispit ek li.

Fernwanr i fer, sakenn dan son kaw. Tizan pa dormi. Loulou aswar i vin pas lanmen lo Zann. I dir,

« Fin gra ? Pa ankor gra ? »

Tizan i demann en bwat zalimet. I pran difil i anmar ek lipye Zann. I dir ek Zann,

“Mon pou fer ou war poudir Loulou ki son lentansyon. »

Aswar, ler Loulou i vini, Zan i ris difil. Zann i sote. Loulou i fer krwar, “Ar, Papa sa. Pa trakase ! »

Lannmen, Zan ek Zann pa ti al dan bwa. Zot ti reste deryer. Tizan ti dir ek Zann, “Pa tro per. Rod mwan en pannyen.”

Ler Loulou i vini, Zani dir, « Msye Alivala, nou ti annan en lide fer en zwe koman en pannyen. Nou kapab ganny en pe banbou ? »

Papa Loulou i dir wi.

Tizan i dir, “Be pou vin parey en balon sa, Papa.”

Ti annan en lasanm kot zot pa ti oule personn antre. Ti annan barik disan, tou lekipman ki touy dimoun. Tizan ti demann Papa en pe materyo. I demann Loulou. Tizan i dir i mank keksoz. I mank ler pou fer pannyen monte. I bezwen sa barik disan. Apre en gran dra.

Tizan i fer krwar i pou anmenn Zann dernyen.

Tizan i sante,

“Balon monte, balon desann

Balon monte, balon mont dan lezer ! »

Papa Loulou i dir, « Koman i gou koumsa! Kel gran plezir pour Papa!”

Papa i dir, « Tizan, me ou annan lespri ! »

Tizan i sante. Zot desann. Tizan i anbark Zann. I donn Papa Loulou lakord pour tenir. En lakord byen long. Tizan i sante,

“Balon monte, balon desann

Balon monte, balon mont dan lezer ! »

Papa Loulou i kriye, « E, desann ! »

Tizan i sante,

“Balon monte, balon desann

Balon monte, balon mont dan lezer ! »

E ! Papa Loulou i fou anba. Tizan i sant pli for. I koup lakord. Prezan ki i sante!

Me sa zour, manman ek papa Tizan ek Zann ti’n fer en rev. Zot ti’n al kot mon Per, zot ti’n demann en lanmes. Zot tann en tapaz deor dan lezer, zot tay deor. Tizan i sorti, i al kot son papa. Tizan i dir ek son manman, “Loulou pou vini. I’n met son bot atelye.¹ Ler mon fer de lepa, li i’n fer sis ! »

« Ler Msye Alivala i vini, met li dormi dan sa pti lasanm. Pa per. tou zafer i dan mon lanmen.”

Pa mank lontan, Msye Alivala i vini.

« Ou ! Ou ! Bonzour ! »

I komans rakonte. I ti aksepte pour zot zwe baton. La dernyen. i’n pran Zann in ale. Pa konnen oli zot. Manman i zwe plere. Papa i dir, “Nou a fer ou en pe dite. »

Fini fer dite, kwi dinen. Koz lo manrmay menm. Pe gele menm.

Fernwanr in fer, setaki dan son plas. Donn Msye Alivala son plas. Tizan i ekoute, i tann li pe ronfle. Tizan i vini ek son zalimet ek petrol. Zour Msye Alivala i pran kont, i’n anflanm ! I kriye ziska in fini. Zis lasann.

La Tizan i desann, i rakonte. Zot ti refer konesans zot fanmir. Tizan ti pardonn zot. I ti dir ek zot i’n tann tou sa ki zot ti dir.

Tizan ti dir, « Manman, kot sa Loulou in brile, pa antre personn. »

Me ti aport en zironmon. En zour Tizan, i kontan vize, dan son vize, i tap sa zironmon, i fann an de. I komans tay ek li. Tizan i sante,

« Ou zironmon, ou a mannga, mannga zironmon ! »

Zot zwenn en bef. Tizan i kriy, “Sov mwan!”

Bef i dir, “Me ou per en zironmon ? Antre dan mon labous ler mon kriye.»

Me ler bef i war sa groser zironmon, i dir, “Sorti, mon pa pou kapab!” I kaka Tizan, Tizan i taye menm. I komans sant ankor.

« Ou zironmon, ou a mannga, mannga zironmon ! »

I zwenn kabri. Kabri li osi i dir, “Ler mon fer berrr! Antre ! » Menm zafer i pase. Tizan i kont tou sa zannimo ki ou konnen. Pa’n kapab menm. Dernyen i war Frer Torti. Torti i dir, “Be mwan, mon manz byen zironmon! Tizan, antre naba mon lakok!”

Torti i gonfle, i kale. Zironmon i sote, i pete! I vin ankor, i kas an kat! Lafors i diminyen. Torti i komans manz lagrenn avan, apre i manz tou zironmon.

I ti dir, “Tizan, ou kapab sorti. Ou kapab pas dan mon karo e manz nenport ki zironmon ! »

E zistwar i fini lanmenm !