TI ZAN, LOULOU EK KOURPA

Alor ti annan en loulou. I ti reste anba en gro ros dan milye lafore. Ti trouv annan en garson ki ti apel Ti Zan. En zour dan son pe sase Ti Zan I al tonm kot loulou I reste. Menm moman lapli I komans tonbe. I antre anba sa ros pou kasyet lapli san konnen ki la lakaz en loulou. I war biskwi I pran I manze parske I ti’n lafen. Loulou osi koman lapli I tonbe I taye pou antre dan son lakaz. Koman I war Ti Zan anndan I dir:

Manrten Ti Zan! Be ki ou a pe fer la?

Ti Zan ti dir:

• Mon a pe kasyet lapli Pa Loulou.

Loulou I dir li:

• Be reste isi avek mwan. Nou a byen nou de. Mon a donn ou dekwa manze ki ou pa pou bezwen al lasas ankor.

Ti Zan byen dakor I reste kot Pa loulou I komans songn Ti Zan. I donn li manze an gran kantite. Parfwa menm lavyann dimoun Ti Zan I manze san konnen. Enler Ti Zan in vin gra anpenn si I ti kapab marse.

Pa loulou en zour I leve byen bomaten avek nide pour manz Ti Zan vi ki I ti’n byen gra. I pa oule manz sa lavyann gra li tousel. I bezwen al rod son bann dalon. Salerla en kantite zot partou anba ros dan lafore. Pa loulou I pran Ti Zan I ferm anba ros I ale pou al sers son bann kanmarad pour vin touye.

Letan Ti Zan I la anba ros I travers en kourpa. Kourpa I dir avek li:

• Ti Zan, be ki ou a pe fer la?

Ti Zan I reponn:

• Mon reste la avek Pa Loulou.

Kourpa I dir:

• Be ou konnen ozordi ou lanmor? Be la kot ou ete, les mwan mon a sov ou.

Ti Zan I dir:

E ou! Mwan mon kot Pa Loulou mon kapab mor. Pa loulou ki mannyer I angres mwan byen, gete ki mannyer mon’n gra ozordi. Letan mon ti vin isi mon ti meg. Ki sennla ki kapab touy mwan isi?

Kourpa I dir:

• Ti Zan, Ti Zan, ou pou mor mon dir ou. La ozordi ou dernyen zour. Sel rezon ki mon donn ou, bag dan mon lakok.

Ti Zan I dir:

• Sa lakok pour ou avek sa pake lagli, mwan mon a antre ladan?

Kourpa I persiste:- Ti Zan, antre avan I tro tar. Ou pou mor mon dir ou.

Anfen apre en bon pe diskisyon Ti Zan I adere pour antre anba lakok kourpa. I kontignen fer konplent:

• Zot be sa lagli la! Sa pake lagli ki bag mwan!

Kourpa I mont ek ros. I gangn brans dibwa I desann. I pran menm semen ki pa Pa loulou ti pran. Dan semen I zwenn en bann ti loulou pe vini. Kourpa I sant sa pti sanson avek zot:

• ‘Ou mars pou narnyen moulanm

• Pou nanryen

• Ton lavi I an de

• Ou lanmoure I dan mon lakok’ (de fwa)

Sa bann ti loulou I dir:

• Be ki sa kourpa pe santé la?

Zot fou en koudpye sa kourpa. Kourpa I drese I kontign son semen. I zwenn en dezyenm bann pe vini e I sant ankor sa pti sanson avek zot; me sa bann ti pe tro konsantre dan zot lavyann ki zot pe al manze, zot pa ni okip kourpa. Pli devan kourpa I zwenn bann gran tonton ek gran tantin. Tousala pe ale pou al manz Ti Zan. Zot koz antre zot letan zot pas obor kourpa:

• Ti Zan ozordi I fini avek lavi.

Saler Ti Zan I tande anba lakok. Kourpa I dir ek li :

• Ou tande. Ti pou ou lanmor ozordi. Ou war sa ki pe pase? Loulou ti pou manz ou.

Ti Zan saler I an pler dan lakok kourpa. I’n bengn dan sa lagli pov dyab. Pli devan zot zwenn sa bann gran tonton menm; bann bizael. En parti in enfirm, zot pe mars karte, labarb in file, en parti in menm pran baton. Ozordi zour lavyann fre, zot bezwen sorti dan trou ros. Kourpa I sant son sanson avek zot:

‘Ou mars pou nanryen moulanm

Pou nanryen ton lavi I an de

ou lanmoure I dan mon lakok’ ( de fwa)

Sa bann vye loulou ti kontan danse. Zot dir:

• Mon frer ki mannyer I dir? Ki mannyer I sante, mon frer kourpa?

La zot tou zot komans santé, danse. Sa bann ki pli pti in fini ariv kot lakour, zot pe esper bann granmoun arive. Be bann granmoun in obliy net poudir I annan lavyann fre pou al manze. Zot sivre kourpa an desandan, zot santé, zot danse. Bann manrmay laba zot komans rod dibwa pou alim dife, delo pou lav lavyann. Bann pli gran pe fer sesi, pe fer sela. Saler zot pa konnen poudir lavyann pe ale. Bann gran tonton nek zot santé menm:

• Ou lavi I an de

• Ton lanmoure I dan mon lakok’

Prezan ki bann loulou I gangn lansman; zot sivre deryer kourpa. Enler zot in fatige, zot aret danse e kourpa I al anmen Ti Zan kot son manman. I dir avek li:

• La sorti. Mon’n sov ou lavi.

Ti Zan I dir:

• Ah! Mersi kourpa. Nenport landrwa ki mon war en kourpa mon pou songnen. Mon pou rod tou manze ki annan pou mwan donn zot.

Ler loulou I ariv kot lakour sa enn ki’n songn Ti Zan, byen vantar I ale I al ouver ros… napa lavyann. Bann tonton ki pe espere deor zot dir:

• Anben, mon frer, oli sa lavyann? Anvoy deor nou a desire.

Zot in lafen telman zot in danse. Tousala I antre anba ros napa nanryen. Byen ankoler, zot bag sa menm sa enn ki ti songn Ti Zan, zot koup son likou. Sakenn I bag en morso zot desir, desire. En parti sa ki ti kapab anmenn se zot , zot foulkan avek en bout.