TIFEN EK TIFIN

Henri Savy

Ti annan en fwa en fanm mesant kom pa posib, ki ti apel Tifin, son mari ti apel Tifen. Tifen ti en bon dimoun ki ou pa krwar i ti siport tou sa ki son bonnfanm Tifin ti dir li.

En zour ki zot ti dan bon lalin tou le de, zot ti fer zot en promes, ki ler enn ant zot de i a mor, sa ki a reste vivan i a vey serkey kanmarad tou lazournen konman lannwit.

En zour alor Tifin ti arive mor avan Tifen, i dir: “Promes se promes, alor mon bezwen tini mon promes.” Ou konn sa lepok la, pa ti annan per pour fer lanterman konman komela, alor Tifen i pran lekor Tifin son bonnfanm i met dan en zoli kavo, apre i asize i veye. Letan Tifen ti ape vey lekor son bonnfanm Tifin, i dir avek Tifin : “Kanmenm ou’n mor, mon gate, telman mon ti kontan ou, mon ti seri ou en kantite, nou ti viv nou ansanm pandan 99 an, ti mank nou zis enn-an pour nou selebre nou lanniverser, la ozordi ou ale ou kit mwan.”

Toudmenm i pa perd kouraz. Letan i ape vey lekor Tifin son bonnfanm, i santi en bon loder i lev son latet i vwar en gro tig asiz anler lo kavo Tifin. Sa tig i larg en zoli ponm ki ti tonm zis lo nennen Tifen, Tifen i bese i ramas sa ponm i pran i santi, i dir: “Zot, sa ponm mir i santi bon. Komela si mon bonnfanm ti ankor la li ki ti a kontan santi sa bon loder.” Sa tig i dir avek Tifen: “Tifen, sa ponm i apel lev lanmor.” Tifen i dir: “Ki sa, lev lanmor ?” Tifen i leve lo son ros kot i ti ete, i ale i ouver laport kavo i pran sa ponm i met obor nennen son bonnfanm Tifin. Ala Tifin ki leve, i dir avek Tifen: “Mon mari, ki ou fer mwan santi ? Selman i santi bon.” Tifen pa reponn e i pa dir naryen, zot kit kavo tou le de byen gayar.

A be! Ti’n pas apepre trwa mwan, en bato i koste dan por kot Tifen ek Tifin ti reste. Ou kapab krwar, ler Tifin ti’n vwar kaptenn sa bato, ala Tifin ki in vwar en mannyer pour kontan kaptenn. Ler Tifen i konnen i’n tro tar. Ler sa bato ti’n fer 5 zour dan por, Tifin i dir avek Tifen : “Mon anvi manz en ladob ziromon mir, al rod mwan en ziromon lao dan bitasyon.” Pov Tifen i ale, ler i retournen, napa bato, napa Tifin. Tifin i lwen avek kaptenn. Pov Tifen i pa kapab konsole ler i mazin son vye Tifin, malgre tou son defo ki i ti annan.

En zour Tifen i ganny en pasaz dan en pti bato peser pour li al driv zis dan en landrwa kot sa bato ki kaptenn ek Tifin i abor. Ler sa pti bato peser i koste ater, Tifen i demann avek bann dimoun lekel sa bato ki la, zot dir li bato kaptenn Jack, e li Tifin in vwar Tifen abor sa bato peser. I leve kot i ti ete, i al kasyet dan kabin kaptenn, pe mazinen ki mannyer i pou fer pour li kapab fer disparet Tifen.

Lannmen bomaten i pran bag kaptenn Jack, i donn avek en matelo i dir avek li: “Taler ler ou al ater, fer konmsi naryen ditou, pran sa bag, met dan pos Tifen, sa zonm ki ou a vwar li dan en lenz tout an kaki. Selman pa dir naryen.” Reelman sa matlo pa tarde, i desann ater, i fer tou sa ki madanm kaptenn in dir li fer.

Ver katr-er Tifin i dir avek kaptenn: “Tanto donn en parti abor, envit tou sa bann matlo ki ti arive yer dan sa pti bato peser.” Pa tarde kaptenn i donn en warning ater, ki i envit tou matlo ki ti arive yer abor sa pti bato peser abor son bato wit-er diswar.

Wit-er tou matlo ti’n ariv abor. Letan zot pe koze, bwar, riye, fer fars, danse, amiz zot, Tifin i dir avek kaptenn ki i’n perdi son bag. E li Tifen pa ankor vwar Tifin, selman i konnen pourdir Tifin i la abor. Ala kaptenn i konmans bat lazeneral pour vwar sa ki’n pran son bag. Move sans in tonm lo pov Tifen. Saler pov Tifen pa konn naryen ki’n arive. Kaptenn i kondann Tifen latet koupe. Tifen li ti annan en bon zanmi avek li, i dir avek son zanmi: “Mon zanmi, dan enn er-d-tan ankor mon pou mor, me demann kaptenn mon lekor, ou a va al anter mwan ater, mon pa oule ki mon lekor i zet dan dilo. Ou ava anter mwan ant de rasin dibwa. Avan ou anter mwan, ou ava lev en ta lapay, ou ava vwar en ponm. Pran sa ponm, fer mwan santi, me pa dir naryen personn.” Reelman kaptenn i fer koup likou Tifen. Avan kaptenn i fer zet lekor Tifen dan dilo, zanmi Tifen i dir avek kaptenn konmsa: “Mon kaptenn, donn mwan lekor Tifen pour mwan al antere ater.” Kaptenn i dir : “Pran si ou oule, me mon konnen ki mon’n touy li.”

En pti moman apre zanmi Tifen i desann avek lekor Tifen ater ; i fer tou sa ki Tifen ti dir li, en pti moman Tifen in vin en zoli bouldou, byen fre, ou a krwar ki i annan 20 an.

Me selman kanmenm Tifin ti fer li pas mizer, me zanmen Tifen ti oubliy li. Tou le zour i al lo lasose pour vwar si Tifin pa vini, napa Tifin.

En zour i arive ki fiy lerwa i mor. Lerwa i dir sa ki kapab lev mon fiy, mon fer li vin gouverner sa landrwa. Ler Tifen i tann sa nouvel, i souk son ponm i met dan son pos i al kot lerwa. An arivan kot lerwa i dir : “Bonzour, mon rwa.” Lerwa i dir: “Bonzour, mon garson.” Tifen i dir: “Pa dir mwan mon garson, dir mwan bonzour ‘lev lanmor’, i dir, mon rwa, fer mwan vwar ou fiy ki’n mor.” Lerwa i dir : “Mon garson, ou pe fou, bann dokter ki pli savan i’n pase, pa’n kapab fer keksoz. Apre sa ou, ou pou kapab lev mon fiy ?” – “Mon rwa, pa dir mwan mon garson, dir mwan ‘lev lanmor’.” Lerwa i fer li antre dan sa lasanm kot lekor i ete. Zis en sel kou fiy lerwa i leve i kriye : “Papa, oli ou ?” Lerwa byen kontan, alor i dir : “Dezormen msye Tifen ki gouvern pei.” Tou dimoun bat lanmen byen kontan.

Me Tifen kanmenm i ti’n vin gouverner, i ti pans touzour son Tifin, an dizan ki en zour i a retournen. Vreman. En zour kaptenn Jack i demann permisyon avek gouverner pour li vin pas ankor en sezour dan son por. Sa mesaz ti anvoye par en telegranm sifon ble. Alor gouverner Tifen ti reponn Kaptenn Jack li osi par en telegranm, an dizan ki i kapab vin ler i kontan. Son semenn apre, bato ki kaptenn Jack i abor i travers dan por. Gouverner Tifen byen kontan pour li vwar son Tifin. Me i ti mazinen osi ki i ti a bon fer zot en bon malis, sirtou avek kaptenn Jack. Ler bato kaptenn Jack ti ariv dan por, gouverner Tifen ti met li karantenn pour wit zour. Nevyenm zour gouverner Tifen ti envit kaptenn Jack avek son madanm se li. Kaptenn Jack avek son madanm byen kontan. Me kaptenn Jack pa konnen si sa gouverner Tifen, taler ki zot pou konnen.

Letan zot pe bwar en pti lasante, koze, riye, fer fars antre zot, Tifin, madanm kaptenn, i santi konmsi sa Tifen. Kot i ti’n asize i napa pozisyon, i ti konman en dyab dan delo beni. En ler, letan zot pe dinen, gouverner Tifen ti fer en diskour. Dan son diskour i ti fer Tifin rapel promes ki zot ti fer ansanm, apre son lanmor ki ti ariv li pour li vin vivan ankor, e ki matir zot ti fer li pase, anfen Tifen ti met tou zafer okler. Tifin letan Tifen pe koze i ti bes son latet anba i ti plere, e i ti bokou sagren, i ti demann pardon Tifen, i pran kaptenn i met li deor, e Tifin ti retourn ankor avek Tifen. Depi sa zour zot ti viv zot touzour ere. En matlo i dir avek kaptenn konmsa: “Mon kaptenn, ki ou’n gannyen ozordi, konmsi ou pa parey labitid.” Kaptenn i reponn e i dir: “Mon zanmi, mon’n perdi fanm.” Sa matlo i tonm dan kwen i mor riye: “Kwa, kwa, kwa, e i dir, ou a fer ou bet avek fanm ou kanmarad.”

Source:

Creolica, 26 juin 2007 – Sirandann ! Zanbaget ! Contes créoles des Seychelles, Sibylle Kriegel & Ingrid Neumann-Holzschuh (eds). Collectés par A. Bollée et I. Neumann-Holzschuh. pp. 44-46