SOUNGOULA, ZAKO AVEK BALENN LEWA

Alors ti annan en lewa ki ti gangn en balenn koman en kado. I ti sitan kontan sa balenn ki I ti fer konstri en gran basen pou met li ladan. Balenn ti ankor ti pti me lewa in sogn li ziska in vin gro e gra. Be li soungoula tanzantan I pas dan bor basen kot balenn I ete e I asize I get balenn ler I mont en kou anler pou espire. Soungoula I dir dan limenm:

• “Manman! Get sa balenn ki mannyer I ouver son labous gran, I fer monte dilo sak fwa I mont anler! Be mwan soungoula mon annan en bon nide…… mon anvi manz en bon bout lavyann gra e sa balenn mon asire I annan dekwa pour manze dan li.”

Soungoula I al se li I pran son lasyet avek son kouto I retourn kot basen. I asize I esper balenn soufle. Be li balenn I soufle tou le vennkatrer. Koman I pet delo e I ouver son labous, soungoula I antre dan son vant parske li soungoula I ti en pti zafer, I ti fasil pour li antre. Vennkatrer apre ler balenn I remonte soungoula I sorti I al kot li son vant byen plen avek lavyann fre e menm en bon pe dan son lasyet pour li manze aswar. En zour dan son pe marse I zwenn frer Zako. Frer Zako I dir li:

• Be zot mon frère, kot ou I santi bon loder. Me akoz kot mwan pa santi bon loder koumsa? Sa loder lavyann fre sa!

Soungoula I dir:

• Kot mon gangn mon lavyann mon pa pou dir ou mwan. Pa zanmen bon donn ou kanmarad ou lakle. I a fer ou gangn bage!

Zako I plede:

• Me mon frer dir mwan, letan ki nou de nou dalon. Mwan osi si en zour mon zwenn kot lafous I mir mon a fer ou konnen. Partaz sekre don!

Soungoula I dir:

• Ou oule konnen kot lavyann fre I ete? Al sers ou lasyet avek en pti kouto, swiv mwan.

La zot ale zot de. Soungoula I anmenn li kot balenn. Never balenn I soufle. Zot bag anndan tou le de. Ariv anndan soungoula I dir avek zako:

• Mon frer, ou war kot sa pti sak la, pa koupe, kot leker sa. Lanmenm ki annan plis lagres la, me pa koupe! Sa son tiktak sa!

Soungoula I vir vir obor blad pisar avek blad kaka. I koup en bout par isi, I koup en bout par laba pou fer sir ki I pa tro afekte balenn. Zako li byen voras. I oule al anler kot sa “pandil”. I war gro boul lagres in anpandan. I pa kapab tenir, I al kot leker I koupe… “tyok”! Be soungoula anba laba kot blad kaka pe get tou son zes. Koman zako I koup leker soungoula I kriye, I dir:

• Ar wi mon frer! Be la ki ou’n fer? Be la ou’n al koup tiktak, be la ki mannyer nou pou fer pour nou sorti? Be la balenn prezan pou mor!

Vre balenn I mor, I koule e pran fon basen. Avan I byen mor I komans vomi disan, nek ou war disan pe flote lo delo. En boug dan son pe pas obor basen I war balenn pe mor, I taye I al dir lewa. Soungoula li anndan I konnen poudir taler lewa pou vin gete ki’n arive avek son balenn. I dir avek Zako:

• Mon frer ou konnen ki nou pou fer la ? Ou antre dan blad pisar, mwan mon a antre dan blad kaka ….. la I’n fini pour nou. Ou’n touy balenn, prezan I pa pou monte pou soufle pour nou kapab sorti. Ou war, ou tro voras. Mwan soungoula demen mon ava aprann mon leson, mon pa ti anvi dir ou mon sekre me ou’n fors mwan e la ou trouve dan ki labara ou’n met mwan?

Zako pa dir nanryen. I rod en pti trou e I antre dan blad pisar. Soungoula li I antre dan blad kaka. Eksa I malen I pran son lasyet avek son kouto I antre avek e I anploy son lake, I fer sir nanryen pa depase. Be dan blad kaka I kapab vir mannyer I oule parske trip balenn I gran e son blad I pli gran ankor, tandis ki zako i san pozisyon dan blad pisar akoz I annnan zis en pti trou.

Lewa I bat lazeneral pour apel dimoun pour fer palank balenn anler lo sek. I bat ankor en kou lazeneral e I dir:

• Selwi ki kapab dir mwan ki mon balenn ti gangnen I a marye avek mon fiy e osi a donn li lanmwatye mon fortin.

Zot! En pti moman pa konnen ki pour fer avek dimoun. Tousala in vini pour devinen ki balenn lewa ti gangnen. En bann pe sey konsol lewa akoz I ti byen sagren son balenn ki i’n songnen depi ki I ti pti ziska la ler in gro. En ler sa bann gran boug I dir fodre ouver vant. Solda taye ouver vant balenn.

Premye keksoz ki zot atrape se blad kaka avek bann trip. Solda I pran tousala I anvoy laba. Koman soungoula I santi poudir zot in zet blad kaka, I sorti I sot laba. I pa kapab taye, dimoun pou war li. I koste dan ta e I dir:

• Mon rwa ki mannyer ou kapab fer en keksoz koumsa? Ou dir vin devinen ki balenn ti gangnen, mwan dan mon pe vin sey ed ou, ou fer anvoy kaka lo mwan. Get ki mannyer mon sal prezan, en! Eksa byen pi …… zot pran tou kaka anvoy lo mwan, me alors pour ki ou pran mwan? Mon pa i en deviner mwan osi?

Lewa I dir:

• Ar! Soungoula, eskize, nou pa’n fer espre. La dimoun I dan sagren e nou pa’n mazin apre poudir ou ti kapab pe vini ler nou ti pe anvoy blad kaka laba. Mon a anvoy al rod en kannson ou a sanze.

Soungoula I fer konmsi I plenny ankor menm:

• Pa kannson ki tyen! La mon’n devinen ou fer anvoy en ta kaka lo mwan! Toudmenm les mon a devin en kou. Mon asir ou mon pou war ki sa ki’n mars mal avek ou balenn.

Be li Soungoula ki konnen poudir zako i la dan blad pisar. Pov Zako, i’n gangn ase dan blad pisar, I grouy en kou….. Soungoula I fer konmsi I mazinen apre I dir:

• Mon rwa be ou’n get byen dan sa blad pisar? Fann sa blad pisar nou a get en gou ladan. Mon asire sa dimal i vin dan son blad pisar.

Solda pa tarde, zot fann blad pisar e zot war zako pe grelote dan pisar. Zot tyonbo li met deor. Zako I oule koze. Soungoula I dir:

• Mon rwa, touy li vitman, pa les li koze!

Saler I per pangar zako I a koze e I dir poudir zot ti vin vol zot de. Zako I sey ouver labous me Soungoula I kriy pli for ki li:

• Touy li mon rwa, lontan I a pe manz dan vant ou balenn. Touy li en fwa, pa les li koze!

Solda nek I tir en bal lo zako … bang! Pov zako fini pour li. Soungoula li I vin en gran imsye. Lewa I donn li lanmwatye son fortin. Aswar lewa I pran li I met kot li, donn li en gran lasanm pour dormi ladan. Me Soungoula pa pou arete son vilen manni. Voler zanmen I a kite. Aswar I sorti dan gran lili pour li vol volay lewa. Sa ki I war, poul, zwa, kannar, nek I tyonbo I manze. En ler lewa I komans remarke I dir:

• Ou a dir mwan ki sennla ki vin vol mon volay aswar ? Soungoula pa ou sa?

Soungoula I sot en oter!

• Non, mon rwa, pa mwan ditou! Mon dir ou mon pa voler ditou mwan.

Lewa en zour swar I met solda veye e zot war Soungoula bag de gro poul e tay avek deryer lakaz. Zot tay ek li avek fizi, me Soungoula osi pa bezwen dir ou I zwe lipye. Soungoula I plat avek son de poul. Pa war li ankor.