SOUNGOULA, TORTI EK BASIN LEROI

Ti trouv anan en soungoula ki ti bien rizé dan sa péi. Apré en létan, lasesres I arive é ti napa délo ditou. Alor Léroi I fer bat lazénéral dan péi antié. Sa lanons I dir tou dimoune fodré vine done lanmen fouy en pi pou anmas délo, koumsa dimoune koman zanimo, I a gagne delo. Alor tou dimoune ek zanimo zot vine édé pour fouyé. Dépi bef, kabri, torti, é meme fourmi ti vini.

Mé parmi tou lezot zanimo, zis Soungoula ki pa ti vine done en koudmen. Meme san son led, lezot zanimo ti nobou fouy en gran pi, bien fon. Ler zot fini, léroi ti désidé met en sendik pou vey pi é an menm tan, pour done rasion délo ziska katrer.

Abé li soungoula I véyé ler asoir ine fer pour li désane kot basen. Ler I ariv obor basen I dir:

• Bonsoir, bonsoir larivier.

Koman persone pa’n répone li, soungoula I pran son pti kalbas é I ranpli li bien plen avek sa bon délo prop. Epi I tir tou son lenz I anvoy lo en brans mang lameme obor basen, I sot ladan I komans nazé, koulé, koumsa I arive débarbouy li bien prop. Ler ine fini begnen, son move vis I pas dan son latet I fer son bézouen lameme dan basen avan I al sé li.

Dek ki lizour I fer, sendik I arive. I get dan basen é I oir malpropté dan dan délo. I balans son latet é I dir:

• Bé get malpropté la! Bé lékel kine kapab fer en zafer koumsa?

Toudsuit I désidé pou li al kot léroi pou al akont li sa. Malgré sa kine arive, lapopilasion ti bézouen boir sameme sa délo apré ki zot tine nétoiy pi. Koudtan lasesres ou bézouen boir sa ki ou nobou gangnen.

Apré sa maler, léroi I désidé pou met gardien kot basen pou véyé asoir. Mé prémié dimoune ki ti démandé pou al gardien ti kabri. Dek ki asoir ti arive, I al véyé. I al véyé. Prémié bout lanuit I véyé. Mé lo pti dizer disoir, I tane lapay sek kraké. Saler soungoula ki andésandan. Parey ier, I dir :

• Bonsoir, bonsoir larivier.

Li soungoula saler I douté poudir I anan kek dimoune par la. Kabri saler li I resté trankil. I pa bouz ditou kot I été. Alors li soungoula I komans santé.

Moua msié Soungoula

Koulanmandine kilanbo

Mon anan délo bondié

Koulanmandine kilanbo.

Kabri dan son trou laba pa kapab tini. Ine tane nome délo bondié I pa kapab pa kapab pa sorti pou li gout sa. Soungoula I kozé.

Bé koumsa ou ti la frer kabri? Koumsa ou ti la?

Kabri I répone:

• Oui mon pé vey basen. Bé Soungoula, dalon done mouan en pé sa délo bondié

Soungoula I dir li:

• Sa I tro serié. Pa pou kapab done bonavini. Pa tou dimoune ki kapab boir sa. Kabri li I ensisté ziska ler Soungoula I dir:

Bé moua done ou ene ti gine selman.

Salerla sa délo bondié sé dimiel ki Sougoula li ine met dan ene ti boutey.

Soungoula I les tonbé dé pti gout lo lalang kabri.

Amoudié! Kabri I komans bat labous é I dir:

• Frer Soungoula, selman sa I bon. Done mouan ankor ene ti morso.

Soungoula touzour ek son malen I répone li:

• Bé oui, Moua kapab done ou ankor en pé si ou oulé.

Mé i anan en kondision: mon bézouen anmar ou avan

• Bé eksplik moua bien sa Kondision?

• Sa I fasil. Sa délo bondié la, si ou boir li san pran prékosion ou a riské pous lézel épi kit later pour touzour. Savédir ki fodré mon amar ou.

• Mouan gardien isi. Mon bézouen resté ater. Alor anmar mouan apré done mouan sa ki mon oulé. Done mouan mon siro do roza.

Nenk prézan soungoula I anmar li é I komans kogne li. Telman I kogne li, kabri I mor. Apré sa, soungoula I ranpli son pti kalbas épi begnen é fer ankor son malpropté partou dan basen avan I alé.

Bomaten ler sendik I arive, I oir kabri ine red lameme ater I get dan basen I trouv en kantité malpropté. Toudsuit I tayé i al kot léroi pou al fer son rapor. Léroi ti anvoy plizier zanimo- bourik, bef, séval, lisien, sat, koson é meme zako.

Sak soir sakene sa zanimo ti pas parey kabri é tou lé bomaten sendik I dékouver en kadav obor pi. Soungoula li ine pase, ine alé. San blié pour kit son mark derier li. Sé pour sa rezon ki bane zanimo koman kok, kannar, poul, souri, lézar, dene kaméléon, koulev é meme sousouri pa ti oulé al vey basen.

Pa torti ki tine bézouen al dormi troi moi dan son trou labou pa ti la ler sa bane maler ti pé arive. Son repo ine fini, I sorti. Létan I pé marse I tane sa bane forfé kine pasé. I kontinien son sémen I al kot léroi. La I aprane ki napa persone ki oulé al vey basen. Alor li Pa Torti I ofer son servis. I dir léroi:

Mon roi, les mouan sey en kou.

Léroi I rié, I get Pa Torti épi I balans son latet I dir :

-Bé ou marsé meme ou pa kapab. Ou pran o mouen ene an pou al lameme la. Ou pou bézouen pran o mouen santan pou ariv kot basen.

Torti I antré en kou son likou. I kalkilé épi I sorti son likou avan I répone léroi:

Mon dakor ek sa ki oune dir. Mé zis fer solda met mouan dan en saret é amene mouan kot basen. Selman pa blié fer pas en bon pé blakine lo mon lédo.

Alor bane solda zot amene pa torti kot basen dan saret. Ler zot ine ariv laba, zot met li ater avan zot pene li bien avek blakine. Apré nenk zot dépoz li dan milié basen. Asoir Soungoula I vini parey son labitid é I pa trouv persone. Soungoula I koz li tousel.

• Zot! Manier mone amene zot, pa zouzou! Tou zoizo ine anvolé. Gété. Zot ine meme met en zoli pti ros verni dan milié basen pou mouan asiz lo la. Mon kroir poudir léroi pé komans kontan mouan.

Alor I pa tardé, I ranpli son kalbas, tir son lenz pour anvoy asé louen ek pi. É asiz lo sa pti ros bien verni. Apré ki I tine bien begnen I sey lévé pou li al fer son ensinifian, mé i pa kapab. Dan son léker I dir kisisa sa kalité zafer?

Ler Pa Torti tine santi poudir Soungoula tine kolé lo son lédo, I komans tir son likou déor. Prézan Frer Soungoula I rékonet poudir ine fer bétiz, mé I pa oulé kanmi. I dir:

• Koumsa ou ki ti la mon frer? Mon ti kroir en lot dimoune.

Bé Pa Torti I komans bouzé. Soungoula I dir ek li:

Bé Frer Torti kisisa sa zafer la? Ou komans fer mouan ankoler ou konnen?

Mé Pa Torti I alé meme. Saler Frer Soungoula ine komans konpran lentansion Pa Torti é I kozé:

• Frer Torti o, la oune fini fer mouan ankoler, la mon done ou.

Soungoula I tir son pti koudpouen, mé, kome dé maler, son lanmen I resté kolé lanmeme lo lédo Pa Torti. I sey son lot lamen. Napa narien, meme zafer meme. I done Pa Torti en koudpie gos sa osi I kolé. Tou sa letan saler. Pa Torti pé avansé meme. Soungoula I sey son pti koudpié drwat. Meme zafer. I dir :

• Frer Torti, sa latet si mon done ou, I a défons ou leker.

Bé tousala meme zafer meme. Pa Torti I alé, Pa Torti I alé. Soungoula I komans plédé toudilon sémen. Pa Torti I alé, Soungoula I komans pléde tou tou dilon sémen. Pa Torti son move vis I komans pas ek li. I pas anba tou bane pié prine dipéi ki annan pikan ki ou kapab zouene obor sémen. Zot Soungoula ine gagne son zafer! Pa fini, Pa Torti I pas anba en gro lakaz mous zone. A-aa mous zone I komans done li son komision…

Létan zot ariv kot pale léroi, Soungoula tine antierman anflé, i tine an konpot. La solda I tionbo li é amene li anedan kot léroi. Apré zot ziz li. Ler tine fini rane zizman, Soungoula I dir:

• Mon Roi, mon démane ou en sel ketsoz: dir ou solda pa bézouen anmar moua ek lakord bannann sek é pa met mouan dan soley.

Léroi, gran bet, I rode akoz Soungoula pa oulé al dan milié laplene dan soley, anmaré avek lakord bannann sek, alor I fer solda amar soungoula avek lakord bannann sek é met li dan laplene dan gro ker soley. Sa meme ki Soungoula ti apé espéré. Dan ene ti moman ou tane:

• Bare! bare! La Soungoula pé ale!

Soungoula li ine kas sa pti lakord sek san okene difikilté é i komans tayé é I dir :

• Mon lipié amene mouan.

Bane solda zot ine aplavant derier li. Soungoula saler kot I alé lapo patat. I antré dan en trou lafous. Mé, kome démaler, son lake ine resté déor é en solda ine tionbo sa ine bosé. Ler Soungoula I santi poudir zot ine tionbo son lake. I anvoy lavoi.

• E! Zot pane tionbo mon lake. Zot ine tionbo rasine lafous.

Solda nenk I larg lake Soungoula, pran en rasine lafous alaplas. Apré Soungoula I antortir son lake é I asiz lo la bien trankil dan son trou.

Sa bane solda zot diskité déor antre zot pou konen ki zot pou fer. Apré zot alé pou al raport kot léroi. Soungoula osi I profité. I pran son sémen I al sé li.