Soungoula tricks Lion into eating his own backside.
Soungoula tricks Lion into eating his own backside.
Soungoula tricks Lion into eating his own backside.
All Right Reserved To UNISEY & CI
SOUNGOULA, LYON EK LAVYANN POUL
Soungoula en boug visye li. Lontan I pe rod en fason pou fer Lyon en move nis. Anfen I arive fer en bon plan. I pas kot en lakour, I koken en poul, I deplis sa poul olye plimen, apre I al asize lo en gro ros obor kot Lyon I abitye pase, sa poul anba li.
Ler Pa Lyon I pase, soungoula I fer konmsi I pa war li ditou. Lyon lontan in war soungoula I fer konmsi I pa war li ditou. Lyon lontan in war soungoula. Dan son leker I dir:
“Mon pou gangn en bouyon fre ozordi..! Soungoula pa war mwan!”
I apros soungoula, I dir:
Soungoula, bonzour!
Soungoula I sote. I dir:
Bonzour Pa Lyon!
Ki nouvel Soungoula?
Pa Lyon, napa nanryen. Mon war zis lafen menm. Kan ou war la mon bezwen mon deryer!
Soungoula I ris en bout poul anba son deryer. I kriye:
Ayoyo!
I manze. I dir:
Zot! Me ler ou manz ou deryer la, I fermal! Me Selman, I bon lavyann deryer!
Soungoula I ris ankor en bout. I kriye:
Ayoyoooo….!
Delo I koule dan labous Lyon ler I get Soungoula pe moule.
I dir:
Be soungoula, mon a gout en ptigin ou lavyann.
Soungoula pa tarde I reponn li:
Mon frer, ou si ou manz mon deryer, ou pou gangn en gou anmer dan ou labous. Fodre ou manz sa ki pour ou. Mon lavyann I pou anmer dan ou labous e ou lavyann I pou anmer dan sa ki pour mwan. Pa dir mon voras mon frer! Me selman koumsa I ete. Apre si ou oule, ler ou’n fini manz en pe ou deryer, mon a donn ou en bout pour mwan ou a goute, koumsa ou a dir mwan si mon’n manti ek ou.
Pa Lyon I dakor. I dir:
Be wi, mon a manz en pe sa ki pour mwan, apre mon a gout sa ki pour ou.
Pa Lyon I anvoy lanmen deryer li, I komans rise, I komans met dan labous. Apre ki Lyon I ris aposan trwa-kat gran gob avek son gran grif, in sengn en kantite. Avan ki I gangn lanvi gout lavyann soungoula, I tonbe mor lo ros. Soungoula I koup en bon pe lavyann ek Lyon, I anmenn kot li, I sale.