SOUNGOULA IN KOUP SON KOR

Lewa I koup koson. Pe fer son bann pep koup koson. I demann son bann pep, lewa I dir:

• Ki zot pe fer?

I dir:

• Pe koup koson.

I ale, I al kot son bann zanfan, I dir:

• Marmay anmar mwan pou koup mwan ozordi.

Marmay I dir:

• Papa, kapa koup ou?

I dir:

• Anmare, anmar mwan. Anmar mon de lipye, anmar mon lebra. Taler mon a gra.

Pou fer li gra. Manrmay in anmare. Relman tionbo son volay I koupe. Soungoula I kriye:

• Ayoyo, zot mon fouti ozordi, mon lafiev, lakranp, zot, ayoyo !

Manrmay relman in fini koup soungoula, I dir met li anba pannyen. Manrmay I pran pannyen I kouver li. Relman soungoula I la. Ti moman songoula I komanse I dir:

• Yeee..yeee.yeee..

• Ki ou gangnen papa?

• Mon gangn lafiev lakranp, mon koup mon denbo. Apel dokter. A wi zot mon gangn lafiev lakranp. Mon koup mon denbo, apel dokter.

Taye, al apel dokter, dokter I fini I dir:

• Ki ou gangnen bonnonm?

I dir:

• Mone pas kot lewa pe koup …bann manrmay… mone dir manrmay koup mwan… manrmay in koup mwan. La mon gangn lafiev lakranp dokter , mon pa konnen mon menm.

Dokter I dir:

• Grannwanr, ou al koup ou kor koumsa?

• Wi dokter, mon pa ni’n vey laline, laline pa ti bon. Mone koup mwan.

I dir:

• Grannwanr, be la ou danzere, ou malad I grav.

I dir:

• Dokter, vre I grav? Mon osi mon fer betiz dokter.

Kon, la, soungoula pa byen menm.

• Dokter anmenn mwan lopital, mon al laba kot dokter spesyalis, kanmenm ou koze, ou pa tarde ek malad.

I dir:

Be granmwanr, ou al koup ou bonnavini……

• Anmenn mwan kot dokter spesyalis, laba mon al get laba, kekfwa laba, ou kone kwa ou?….

Anmen li kot dokter spesyalis, pa ankor sorti pou al dan simen, soungoula I mor, koup li. Grannwanr ou koup ou lekor? Ou pa konnen poudir zonm pa koupe?