Alors en zour ti annan en Soungoula ki ti apel Dominik. I ti pe reste lao lo montanny dan en vye siko sandragon. Dan sa menm landrwa, ti osi annan en zoli sato kot ti reste ladan en lewa ek son boul kristal. Sa lewa ti annan en pouvwar mazik. Sa lewa ti annan en zoli fiy ki ti apel Liana. I ti tre zoli avek son lizye gri ek son seve long ki ti fer Soungoula anvi marye avek li. Pandan sa menm letan, Soungoula ti tande li lewa pe rod en prens pour fer marye avek son prenses. Soungoula ti konmans fer son nide me i pa ti ganny okenn solisyon. Ki i pou fer ? I ti byen anvi marye. Alafen i ti dir, “Mon ava al kot frer Kousoupa, mon a donn li en lalang. Mon annan en vye konnson long avek en trou, mon a servi sanmenm.ˮ
Alor i ti al kot son vye dalon ki pa ti reste tro lwen avek li. “Kousoupa mon frer, ou’n ganny nouvel ou ? ˮ
Kousoupa i reponn, “Me non, ki annan ?ˮ Kousoupa ti byen eksite.
“Be mon pe al marye avek en prenses,ˮ Soungoula ti reponn. Saler prezan ki i ti pe al demann maryaz.
Kousoupa ti annan son madanm. I ti kriye avek lazalouzi. “Kwa, ou pa envit mwan ?ˮ
“Byensir mon pe envit ou e mon’n vin sers palto.ˮ
Kousoupa ti dakor pour li pret li son palto. Soungoula ti eksplik li kote maryaz pou fer e ale byen vantar. I ti al sanze e anmas son gran lake, i ti met en pe lapay kot sa trou. Byento i ti pe ale byen vantar, me ti mank li en seval. Alor i ti pas kot msye Zezer ki ti son seval. I ti vey lanbeli, i ti vol en seval. I ti ale pli vantar ki avan, san konnen ki pour ariv li laba. Byento i ti ariv kot sato. Ler i ti ariv laba, sa seval ti dir mon lipye anmenn mwan. I ti taye kot i ale, lake lo ledo. Lerwa pe get tou zafer, i ti dir ek son bann solda, “Al atrap sa lenbesil laba deor. I krwar mon pa konnen i en Soungoula. Tyonbo li e bat li anmor.ˮ
Salerla Soungoula deor pe esper lerwa ek pasyans me olye war lerwa, ki i ti war? Devinen zanfan! Be wi! Solda! Solda ti konmans donn li maryaz. I ti kriye lasasen. Zot ti met en bonm dan son konnson e fer li al tonm zis dan pye sandragon. Salerla, msye ek madanm Kousoupa ti pe diriz ver sato. Ki zot ti war ? Palto msye Kousoupa pe anvole anler.