SOUNGOULA EK MALBAR

Akonte par: Wilvaine Dubois, 25 ans, Grand Barbe Silhouette.

Alor en zour ti annan soungoula. Be li soungoula li, son kot I pasé kot laboutik, zis I rod krédi. I dir I pare pou li péyé. Ki pa vine péyé.

Malbar I dir ek li:

• Tasion sougoula, pé desann, pe monte ou kont.

• A, pa trakase sa.

Prezan son manman I dir:

• Soungoula, tou lezour ou vini ou sou. Ou pa ni oule travay ni narnyen, kot ou gangnen larzan pour ou sou?

I dir ek son manman:

• Pa traka, mon kot mon louvraz I ete ou pa konnen. Ou, ou travay ou pa donn mwan larzan, bé pa bezwen dir mwan naryen.

Son manman I dir li:

• Be non soungoula, parski mwan ou manman, mon bezwen koz ek ou.

I dir ek son manman koumsa:

• Be a, mwan plito mon al pran en pti drinks.

I desann I al kot malbar.

• Alo, aya.

• We.

• Donn mwan ankor dé boutey.

• Sa, ma frer, sa sa kont pe monte, gété, ou menm. Yer pran de kartron la ozordi ankor trwa. Aya.

Be li soungoula I kriy son bann zanmi.

• Vini nou a bwar.

I donn son dalon, ensidsuit. Son dalon I bwar.

• Soungoula kot ou gangn larzan ou ?

• E ou la, bwar, mon’n donn ou bwar.

Bwar, bwar, bwar…..

• Zot ase?

• Be ase soungoula. Be ou en boug ou pa ni travay, bé la pre lafendimwan, ler nou a gangnen, nou a donn ou.

• Pa trakas sa zot, mon annan larzan, pa traka zot.

Soungoula I alé aswar kot son manman.

• Soungoula, mon’n tire ou manzé, I lanmenm la anndan dan lakuizin, ale al pran.

I ale, I manz son manze, I pran son ben, I tiek son manman kot pe dormi. I vini. Tieke,tieke, son manman pe ronfle.

• Waaaaaa………….

Li in gangnen en mayos, vini kas latet son manman. I touy son manman. Konmsi kot son manman I dormi laba, I apar opred marmay. Bann frer ek ser. Ou war. Kas latet manman, lévé, aswar menm al met apiye avek laboutik sa malbar ki li i’n pran krédi avek. Fini.

Ler n’al apiye laba ek laboutik sa malbar ki’n pran kredi, malbar pa konnen. Bane dimoun I pasé. Zot dilé pe vann. Zot pase. I war sa tantin pe apiyé, tantine pa kapa réponn, i’n mor. Li soungoula in kasiet dan lapay, pe ekout rezilta taler. Sa zonm I pase menm ek son dile I ale.

Malbar, in ariv son ler ouver laboutik, koman I ouver laboutik, I zet sa fanm mor ater. Soungoula I kriy:

• A mon dieu seigneur, ma bonn mer. Ki mannyer ou’n fer pour touy mon manman !

Malbar I dir ek li:

• Pa per, mon a pey ou.

Akoz ki li malbar, lontan ti per gard. I dir:

• Pa per ma pey ou, konmien I arive ou manman mor? Sa manman ki mon’n touye.

• Sa ou pa pou kapa fini pey mwan sa.

Prezan li sa kredi ki li soungoula in pran, I dir:

• Be fer pas lo lanmenm, aprezan, ou a fini pey mwan, mon kont mon manman mor.

La prezan, I dir ek li:

• Be la ki oule la anndan. Sey get en pti keksoz ki en pti pe so, ou a tir ou lafatig latet. Latet ape tourmant tro bokou.

Soungoula I dir ek sa aya:

• Be pa tro tarde.

• Be zot la ma frer, la gro traka lo mwan. Ki krim mon’n al fer. Azot. Kliyan vini, beze, touye la, kisisa sa. Arwi, pa konnen ki mon pou fer ek ma lekor la, arwi soungoula pa dir narnyen. Be kimanyer pou antere?

• Anter mon manman zot, la mon bezwen anmenn li laba, rod loto mwan anmennen.

• A zot, mon frer o, pa les gard konnen. Pou demande kisisa. Pou al rod papye nesans, laz. A zot!

Soungoula I dir:

• Be la mon krwar ou a bezwen pey mwan.

• Be la, ki oule la?

Zot Soungoula… Soungoula I dir:

• Be la I annan en tant ek mwan, met mon larzan ladan. Apre fouy en trou anter mon manman. Selman fodre mon trouve kot ou’n antere. Mon pa pou anter mwan menm. Ou rod ou dimoun, ou avar anter li.

Pran en pti boug pe pase laba. Konmsi bann vakarne, kriy zot laba.

Vini. Fouy trou met li ladan. Ler in fini met li ladan, soungoula I dir:

• Fini antere, be bon.

• Soungoula la gard pe pase la, gete soungoula, sanze parol, la enn. Pa tro donn sa bann parol la.

Soungoula I dir:

• Be zot mon leker I fermal. Mon manman. Get mon manman ozordi zour kot pe al antere dan sa gro ta fey bannann dan simityer.

• A soungoula, a gete la, fou en lape la en! Fou en lape.

Soungoula I konmans plere, e konmans lamante.

Malbar I dir:

• E ase sa zot. Fer fini sa. Taler gard vini, pou rode kestion ek mwan, pa konnen ki ma dir, a soungoula.

Soungoula I plere menm, I lamante.

• Kanmenm ou pe dir mwan tousala, mon, leker I fermal.

• A manze anndan. Soungoula manz anndan. Kisisa, pa dir ou a pey ou.

• Kanmenm ou a donn mwan tou sa larzan, sa mon manman sa. Ou ti a kontan dimoun touy ou manman ou ?

• A ma frer donn en lape, pa dir a peye larzan, donn ou larzan.

Prezan sa boug I dir ek li, I dir:

• O.k, ma pare pou donn ou larzan, sa larzan ki ma donn la, pou napa naryen ankor, dir ma ki oule dan laboutik?

• Mon oule en pe diri, en pe disik.

• Konmien ou oule? Ase, ma frer, ma met ankor de lo la.

I dir:

• Mete.

• Ma frer pa bezwen kriy ankor, swiyé ma lizye, ase, ma serse mouswar.

Anmenn mouswar pran donn li:
– swiye lizie, katite kou kapab en? Anpes sa ti dilo koule.

• Wi, mon pou swiye selman!

• E la, transpor pe vini pou pran marsandiz la, arete, swiy lizye, zot sa I serye, ou konnen kisisa sa ?

Soungoula I manze anndann.

• Donn mwan en transpor, mon pran mon konmision osi mon alé. Rod enn ti tiokrat, sers en transpor. Lontan ti mouenson bann zafer saret, ti napa bann bis, ni taksi ni kanmyon, saret. Al sers kat zonm, pou anmenm pake soungoula. Son sis disik, sis diri. Anmenm se li,

• Vie frer, la ozordi la, mwan ki pou konmann zot en. Pannan personn pou kapab domin mon lavi e mwan zot vin travay ek mwan, sa ki mon annan pou dir zot sanmenm. Pran sa pake kot mon war mon dir zot anmennen. Anmennen, zot pa kap annmennen, trennen, avat bez li anba sa ros ki zot war, ya ya ya ya, I apey sie mwan ya. Mon yandrwa ya.

Bann la I dir wi, ek soungoula, kot ou ale.

• Lev kamarad fodre enn I vin kot ou war mon reste.

• Lev enn son dalon.

• Zannmi get byen.

• Si ou kapab ou annan pou trenn li, anmenn li kot mon reste seyman, – wi, nou avar anmennen.

• Saroyé, saroye.

• Komien zot pran mwan?

• Mon pa konnen, sa boug ki ti laba dan brikol, in met brikol dan son likou, peski limenm li kin siport tou, mon sipoze nou zis nou apiye, be mon pa konnen akoz nou travay ek li, pa tou louvraz, limenm li ki fer pri apré I donn nou en larzan..

• Be, ya mmmmm! En efe, mwan ma donn zot, akoz zot, mon donn sakene, konmien zot I annnan ?

I annan kat nou.

• Oke, sakenn san roupi. Ki zot le bwar la prezan, enn ti araz latet . Mon dakor zot in arête. Mwan kot mon ete mwan, personn pa konnen.

Saler kot I reste, fodre tionbo rasin lafous pou desann avek, larg bal anba, la! Prezan I dir:

• Be wi, nal rod en pti bwar.

Anmenn mwan lo saret, al rod mwan de lake fey koko.

Bann la I ale I koupe. Lake fey koko.

Pik li deryer sa saret la. Sa I a kasiet li en pe soley.

Kabann fey koko lo li.

Annou ayé, ou sa ennki dan brikoy, ler in ariv anba kot ti aya mon kapa donn ou.

• Be wi, oke, pa traka.

• Mwan mon travay red mon dir zot. Desann, desann, desann, avan laboutik: Tini! Aret lanmenm, tionbo pa desann pli ba. Devan yamenm yaboutik mon al rod en pe bwar lanmenm.

An antran laboutik I komans plere.

• La mon sorti anler laba, mon pa konnen, mon bann pti frer pe gele. Pe demann mwan oli manman? Oli manman? Be mon leker I fermal.

• A ma frer, la ki’n arive ankor ? Mon fek donn sis bal diri, sis bal disik. La ou vin rode ankor, la zot soungoula, mon dir arête gele.

• Mon oir, mon oule arête gele, me selman sa ki oun’n fer, la zot.

• Soungoula, I annan dimoun la deor la, taler taler tande fer mwan gangnen kouyon ek lapolis, a soungoula.

• Dir mwan sougoula sa menm, sougoul, sougoul toulezour. Soungoula, la ki oule ma frer dir mwan?

• Ekoute mwan menm ma dir ou. Donn mwan sa enn laba ki pli… ki annan rozet dan likou, apre avek de pti soz la ankor.

• Ki sa lot ti soz la soungoula, la ma frer koze degaze taler…. Kamarad pe…. Soz… get deor…

• Zot laba laba, mon’n dir zot a esper mwan laba.

• Ma frer degaze, dir mwan sa enn ki annan rozet? Taler dimoun pe vin dan laboutik, tande dispit la kantite apre dir gard mon pe bat soungoula.

• Mon oule sa enn la saler la. Sa enn ki ann rozet dan likou.

• I plere menm).

• Ale gro boutey.

• Ma frer pou bwar la.

• Mon pou bwar lanmenm mwan. Selman…..

• Be ma frer sa bann …… sa kat laba, zanmi ki’n anmennen pou trenn diri laba, ki pou fer avek?

• Sa mon pa konnen mwan, koz ek zot oumenm .

• Ma frer mon pour dir, akoz en manman mwan. Sansan gard pou konnen.

• Be oke soungoula, ale al kriy sa dé zans, sa kat boug la dir zot vini mwan a done zot en pe bwar. Apre nou a arete. Soungoula souye lizie la. La ankor mouswar, oli sa pake mouswar mon’n donn ou?

• Monn kit kot mwan, mon pa’n anmenn mouswar mwan. Mon lanmen I zene mwan. (I Plere menm) pas laba lot kote laba I a koz ek zot kat laba, mon leker I fermal.

• Sa ….. sa ………… esper mwan zot kat la en, ma koz en kou ek soungoula. Soungoul mon dir ou ase fer tapaz, taler ou a fer sa kat dimoun kit la konnen ki arive la, konnen kisisa soungoula.

• Ler I fini bwar dir mwan apre nou ale. (I plere menm)….

• Asé?

• Oue, in ler pou nou ale la soungoula. A la I annan ankor en madanm in get mwan pou anmenm wit bal la, get keler I ete.

• Mon mont I an retar, me la selman I dizer.

• Saler midi.

• Donn mwan retar ankor sirlaplas, get sa, la mon bezwen al lapos I annan mon let, tousala, sa en martir sa.

• A mon frer, la nou pe ale anvil la, souiy ma lizie, byen byen byen, souiy labous byen. Ma zot, ki mon kapa donn toi pou ou arête sa.

• La kanmenm ou’n donn mwan bwar, mon pa ni menm bwar la.

• Oke soungoula, nou a sey desann.

• Annou.

• Ou pou anbarke?

• Mon pa pou anbarke mwan.

• Be a soungoula ou pé tard nou. Ou ti a’n dir nou koumsa poudir ou aste en pe bwar ou a donn ou a donn nou. Be ou dir nou vin bwar laba pou esper ou pou esper ou pou desann ek nou, la apre ou pa le desann, akoz? Ou dir ou annan ou let lapos, be kanmenm midi, kanmenm enner, ou dir la midi, me kanmenm enner.

• Personn pa’n dir ou poudir la midi, I ankor onzer la. Be zanmen soungoula. Be soungoula, be lontan nou konn ou soungoula, me rakont nou enpe ki ou pe gele.

• E ou la. Ou kapa konpran. Yer soir en boug nou vin zoue kart nou de, I dir mwan koumsa I annan vennsenk roupi ek mwan, mon pran mon vennsenk mon mete, konmien I arive, sey kalkile ou menm.

• I ariv senkant roupi soungoula.

• Anr, be sanmenm ou oir li pe matata, I pa oule mon dir gard. Sanmenm sa mon pe gele.

• Manman!

• Be wi, la mon annan mon larzan mon vin pran mon konmisyon I tir ankor senkant, konmien I fer.

• Be manman!

• Be oke, be sey dir mwan. Mon met ankor senkant lo la.

• Be ou ti’n gangn li ek kart?

• Wi, mon ti’n gangn li mon dir ou, gangn li ek kart.

• La, alor si ou ti’n gangn li ek kart ou ti met vennsenk, li I ti met vennsenk ou ti met vennsenk, be, antouleka bizwen fer ou senkant roupi. Be ou, soungoula, i’n tir ankor senkant lo ou bomaten, bann marsandiz ki ou’n pran, be la I fer …. Si in tir senkant, I fer san roupi. Mon leker I kapa pa fermal, be pou trounen, ale mon pa pou vini.

Ale, bann zans I desann zot al pran zot bann kours zot annan pou fer parey kanman pikep menm koman labitid komela. Lontan ti saret, konmela pikep. Ale zot. Bann zans pe travay menm.

I dir:

Oke soungoul en lot foi ler ou bezwen mwan dan ou servis ou a vin ankor.

• Oke zot, sanmenm sanmenm mon bezwen ou.

I ale I dir ek sa malbar. I bizwen lakaz pou li reste ladan. Kot I reste I koule. Son tol I perse, yer soir zot in anvoy bal lo la.

• Bann bandi ki’n fer sa, mon konnen sa, anvoy bal anler lo mon lakaz.

• Zot ma frer, manman.

• Mon diri in mouy net net net net, konpletman, pa kapa ni manze ni naryen.

Malbar I dir ek li.

• Mon a anvoy enn a vin tiek en kou sa bann zafer manze laba, a oir kanmanyyer in mouye.

• Pa bizwen, kot mon reste, mon pa oule personn.

• Be enposib soungoula.

• Non, non, non, non, parey ou war mon’n dir ou. Pa bizwen anvoy personn kot mwan. Kot mwan mon reste, mon pa oule person sié mwan ou. Aparyan zis mon bann dimoun ki savoy mon bal. Zis sanmenm sa bann. E ler ou war zot pe monte pa koz ek zot. Zot pou tap ou, zot pou touy ou.

• La mon dir ou.

• Sa bann zans pou touy mwan! Ma frer me ki ma fer sa bann zans, vini pran komision lanmenm la, saroyé, anmennen, la pou vire touyé mwan!

• Mon dir ou pa koz ek zot les zot.

Be li soungoula, ler I a dir pa koz ek sa bann zans, I a demandé kot soungoula I reste. Sa bann zans I a dir, I a dir I reste anba ros. Ler sa bann zans par pas laba I a vini kot soungoula, sarye pake pou al donn li en lakaz tol.

Ale sougoula.

• Be diri ine mouye.

• I pas partou dan kanton.

• – me frer! Me ser! Manman piti, tou sa ki annan ti zanfan, anmennen, mon annan manze la, pou mon pa zete,….. ou war mwan en bon boug, mwan mon dir zot,. Mon annan manze mon pa zete, mon partaz ek zot tou. Me selman fodre sakenn I anmenn en pti morso dimyel.

Zot kalkile kot pou al gangn dimiel pou donn sougoula.

• Kantmenm I annan ki napa dimiel pa fer narnyen, sa ki annan piti, sa ki napa mon a fer li balie laouete kot mwan.

Zot be sa lord soungoula la. Manman!

• Selman en sel keksoz mon dir zot, I annan bokou ki annan piti isi en! Si zot tronp piti mon pou konnen.

Be soungoula pa ni en boug ki annan pikiy ek li pou analiz sa disan, kot ou pou al konnen si en boug I annan piti ousoi si napa piti. Ale!

• La pou mwan soungoula……

• Pran en pe ladan, kokosie, pran enpe ladan dan kokosie. Disik partaz partaze, I annan ki napa piti pa pe vini, dibout dibout laba.