SOUNGOULA EK LELEFAN

Suzanne Bistoquet

Alor ti trouv ti annan Soungoula avek Zako. Me Soungoula i touzour malen li! Zako i touzour nenbesil. Alor prezan lerwa ti annan son lelefan. Toultan i ti met li konmsi dan gran fatak, ki nou apel sa fatak lelefan, menm pour manze. Me lelefan in fatige. Alor prezan i dormi. Be Soungoula i dir avek Zako, i dir: “Be la! Nou napa en pe lavyann. La nou napa ni manze. Be ki mannyer nou pou fer?” I dir: “Be sa ki laba la! Sa bon lavyann sa! Ek sa nou napa traka, ler nou’n fini nou kab ganny plas pour dormi.” Zako i dir: “Kote?” I dir: “Me sa i bon sa” i dir “dan lelefan! Ou’n deza antre?” I dir: “Mon pti, si ou antre ou a oule reste, ou pa oule sorti ditou.” Alor prezan Zako i dir: “Vre sa, frer Soungoula” i dir “wi”. Alor Soungoula i ale. Ler lelefan i dormi, lelefan i dormi, ahhh, i gra, nek Soungoula ek Zako i antre dan son labous. La Soungoula i konmans manz anndan. Konmsi ti annan lapann i gra. I konmans manze, manze. E li Zako i bet me i pli voras. Soungoula i annan lespri. Ler Soungoula in byen manze, Soungoula i sorti. Li Zako i dir: “Frer Soungoula, be ki sa? Ou’n ase? Annou manz ankor!” I dir: “Non, mon frer. Mwan, mon al bwar delo prezan. Mon a ale pran ler, i so anndan. Mon vant i plen. Mon a ale, mon al rod en dibwa, mon al dormi. Be ou manze! Taler mon a vin ankor.”

La Zako i krwar. Me Soungoula i pli malen ki li. Alor la prezan Zako in manze manze ziska ler Zako in al tous leker. Ler i’n al tous leker i’n mord morso leker. Lelefan i sape, i tonbe i mor! Li, ki i pou fer? I tay dan blad … dan blad pisar lelefan! I pa konnen kot i pou sorti, prezan. Lelefan in frenm labous, i’n fini mor. Li Soungoula i mazinen ki i pou fer.

Prezan lerwa i dir i al anmenn gran spesyalis deviner pour gete, fer letopsi ki lelefan in gannyen. Prezan i gete, dokter, i gete, i dir: “Mon pa war naryen, konmsi i’n toufe. Ketfwa i’n dan soley, ketfwa i’n bwar delo an plis, ketfwa i annan zerm.” La prezan Soungoula li osi in sanze, i’n al laboutik, i’n sanze, i’n met en resanz dokter. Ler i’n vini i dir: “Bonzour, mon rwa.” “Bonzour.” “Mon’n tande ou annan ou gro zannimo in mor. Alor mwan mon vin gete.” I dir: “Be kote ou sorti?” “Mwan mon sorti dan sid.” I dir: “Be ou, ki ou non?” Soungoula i dir: “Avan ki ou konn mon non dokter, mon bizwen vin fer letopsi avan. Avan ou donn mwan mon sertifika, apre mon a dir ou mon non.” La reelman lerwa i dir: “Wi, gete!” I dir: “Mon rwa, mon a dir ou en keksoz. I annan en bebet ladan ki’n fini manz anndan ou lelefan.” I dir: “Vre?” i dir “pangar!” I dir: “Mon dir ou san poursan! Annou mete si ou oule!” I dir: “Zot! Vre, mon a donn ou lanmwatye fortin.” I dir: “Wi.” I dir: “Mon dir ou sa, i annan en bebet. Me gete, me sa, mon mazinen, i’n kapab manz leker! Ler i’n fini leker, i’n kab al dan blad pisar”. La i fer letopsi, ouver, war tou keksoz in manze. La i vini rod, me Zako in la dan blad pisar i dir: “Mon pa’n dir ou? Gete!” La prezan i pran Zako, amare, pour bate.

Me apre letan ki’n pran pour anmare, Soungoula i dir: “E ou, Frer Zako! Mon pe rod ou de zour pour vin travay, sa ler ou dan vant lelefan!” La alor prezan Zako i dir: “Me non, mon ti la, be frer Soungoula, nou pa i ti ansanm?” “E ou la, pa dir mon non! Sa ki mon pou gannyen mon a donn ou en pe. Ou pa dir mon non, si ou a dir mon non, i a konnen mwan Soungoula!” Sa ler li, Soungoula, i dir li: “Pa nonm mon non, mwan mon a dir ou: ler i’n pran lake, ou dir sa pa mon lake, lake lafous! Me zot a large, zot al atrap lake lafous, ou a taye. Ou konpran?”

Prezan, ler Soungoula ti’n dir sa, lerwa i dir: “Dokter! Me ki nou devre fer avek li?” “Kondanm li, anmar li avek lafous! Anmar li avek pye lafous! Laba kot sa bann dibwa ki annan lake la, apre ou a derasin sa menm sa lake, ou a bat li avek.” La reelman i pran Zako, i met laba. Li, Zako, ler zot pe atrap son lake: “Eh, sa pa mon lake, lake lafous!” E zot prezan, bann zonm la i larg lake Zako, Zako mapay kot i ale, lipye lo ledo. Laprezan zot pe lager Zako. Lerwa i dir: “Oli? Ah, non, i’n ale. Nou ti’n atrap lake lafous.” Soungoula i dir: “Ou war sa en move zannimo, a be mon rwa! Ki ou a fer? La nou a fer nou kondisyon.” La lerwa i donn li son lanmwatye fortin. Soungoula i byen kontan.

Source:

Creolica, 26 juin 2007 – Sirandann ! Zanbaget ! Contes créoles des Seychelles, Sibylle Kriegel & Ingrid Neumann-Holzschuh (eds). Collectés par A. Bollée et I. Neumann-Holzschuh. pp. 6-7