SOUNGOULA AZIR BYEN

Lor en zour ti annan en vye tonton. Pa dir en baye; en vye tonton ek en vye tantine. Me konmsi zot ti reste enn ti pe dan montangn koumsa. Me sa lepok mon ti oule dir ou, annan lepok ki loulou I mars vreman kantite parey tiangoman dan nou pei, tou zannimo I annan son sezon ki I revolte. Alor be bonnonm ek bonfanm I dir ek son de zanfan. I dir:

• Mon zanfan, mon kit zot la dan mon lakour, pa bizwen kit lakour, apsante pre. Be lisyen I per loulou, loulou I per lisyen.

Be I annan lisyen, lisyen I abway ek loulou I a sove.

I dir; oui ek son granmoune. Me dan lapsans son granmoune, sa de zanfan I konmans zoue boukannen, pike koumsa. Pik kanmarad. Lot I ale pik lot. Me letan pe ale. Me konmsi pe dekous lakour prezan. Ler zot fer konesans, zot in ariv tre lwen, lwen zot pa konnen si lakour I isi, si lakour I isi. Kot lakour I ete. Prezan komans mars aperd koumsa menm, mars marse.

En swar I arive, mont dan pye dibwa I dormi, lannmen bomaten, lizour I fer, pa konnen kot pe ale, lendividi koumsa.

Be en bomaten zot tonm dan en gran pye ponm zot pe manze, konmsi zot sitan lafen, mont dan pye ponm zot kase. I vine en vye tantine. Zot pa ankor konnen si sa viey fe sa lepok. Malgre zot ti a konnen en viey fe zot pa kone viey fe.

Tantin I dir:

• Ki zot pe fer dan mon pye ponm zanfan?

I dir:

Tantin, (I dir) nou lafen. (I dir) nou rod de ponm pou nou manze. I dir:

• Oke.

Fini manz zot vant byen plen. Alor tantin I ale I met zot dan en laferm. Tantine I swangn zot byen. Pli move ki dan zot lakour.

En sezour tantine I done zot manze pou en semenn I dir ek zot konmsi I pou al konmsi dan en landrwa pli tar I a vini. Saler tantin en viey fe loulou. I pou al sers son bann konfreri laba dan bwa, bann mal loulou, femel loulou pou vine manz, devor sa zanfan.

Abe, twa zour zot la dan lafore.

En bomaten I tann en lavwa ki koze deor, I dir:

Bonzour, bonzour zanfan!

I dir:

Bonzour,

I dir:

• Ki zot pe fer la anndan?

I dir:

• Be la, granmanman, granmer in met nou la , I dir nou in ale I pa konnen kan I pou vini, in kit dekwa manze ek nou.

Me sa lepok ti annan en pti bebet ki ti apel soungounla ki ti tre rize. Sa pti bebet I dir ek li:

• Me kat zanfan bet ki zot ete, ek sa ou panse krwar en manman, en loulou sa! I a manz zot!

Me soungoula tou son rize ki I rize pa konnen kot in pase, in kapa gangn en pti… ki mannyer nou apel sa? Lasir a meto

Alor soungoula in …. Sa… sans…….. I pran sa pti lasir a meto rage, rage I koup kadnan. Soungoula I dir:

• Be sa en loulou sa, I manz dimoune. I dir ale. I dir: fer sa larout la ki mon montre ou, pa sanz ou larout, samenm sa ki ou pou al kot ou. Ziskan ou pou al se zot. Fer samenn sa larout la. Ou a zwenn son may youyou, depi son fanm youyou, divers kalite youyou, sa ki piti, pli gran, I dir:

• – I pou kriy ek ou ayot. Sa ki pli piti I pou kriy: “tioukle koukou! Tioukle koukou.

• Reponn li, dir li:

• “kanba kenba sor manman (2 fwa)

Tianglouman glouman ou a trouve

Tianglouman ou a danse

Tianglouman glouman…..

I dir:

Sa enn danse loulou sa. I dir loulou pou danse. I dir solman kan ou kit zot ou pa bezwen vir deryer. Ou tann zot byen?

I dir:

• Wi.

Relman I ekout parol soungoula zot fer lalign. I dir:

• Koumsa, pa ni fer koumsa al dwat menm.

Soungoula I ale. I zwenn parey bann pti nengres sa grander, bann ti garson apepre sa grander la. Sote:

• Tiouke koukou, tiouke koukou

I bar zot piti

I bar zot piti I sant ek zot zot sanson loulou I dir:

• Kenba kenba son manman (2fwa)

Tianglouman gloman ou a trouve

Tianglouman glouman ou a tande

Tianglouman glouman ala I la…

Get bann pti loulou! Bann pe valse. Zot ale, zot bann apepre sa grander la koumsa parey ou grander la, alor I done ankor;

• Tioukle koukou, tioukle koukou.

Prezan sa piti I done li:

• Kenba kenba son manman (2fwa)

Tianglouman glouman ou a trouve

Tianglouman glouman ou a tande

Tianglouman glouman ala I la.

E! e! ou osi ou komans bare. Zot ale, bann gran tantine, gran tonton. Grannwanr I en ti pe pli gran, I annan plis lotorite!

• Tioukle koukou tioukle koukou

Piti I santé:

• Kenba kenba son manman (2fwa)

I fer zorey apik I ekoute.

• Kenba kenba son manman

Tianglouman glouman ou a trouve.

Tianglouman glouman ou a tande

Tianglouman glouman ala I la ……..

Sa tantine ek sa tonton I komans zot ale.

Ala prezan, zot al zwenn sa tantin ki ti met zot dan laferm la. Konmsi dan bann gran fanmir royal, gran fanmir royal loulou.

I annan sa ala, anmenm dan fitakon. Fitakon lontan. Pran lakord tres dan baton kat baton. De divan de deryer. De zonm divan, de zonm deryer! Lerwa loulou I ladan li. Krok lala !

Sa tantine I remarke poudir sa de zanfan ki sorti kot li, me I kalkile dan limenm, enponsib, pou sa de zanfan sorti, kot in met sa de zanfan.

• Tioukle koukou tiouke koukou

Piti I santé:

Kenba kenba son manman (2fwa)

Tianglouman glouman ou a trouve

Tianglouman glouman ou a tande

Tianglouman glouman ala I la. Tianglouman glouman…

Sa tonton dan fitakon I dir:

• Met mwan en kou ater.

• Dir sa piti santé. Letan sa piti santé bann loulou I antour li, pa pou manz li lewa I la. Piti I done zot. Letan piti I done zot piti pe al touzour. I dir:

• – lontan mon pa danse, lontan mon pa danse mon fouton.

Piti I bate. I ariv lao, laba, tantine dir bonzour, bonzour; I pa tann reponn. I dir:

• Bonzour, bonzour!

Saler li ek lakle, son lakle pou ouver, koman I ale pou ouver I koupe.

• Bonzour, bonzour!

Pa reponn. Get kot kadnan, kadnan in koupe. Prezan get anndan napa personn. Prezan san bann I kalkile kantite lwen zot in sorti zot in fatige. Bag limenm dan plas sa de zanfan.