SOUNGOULA AVEK PAPA TIG

Gladys Nicette

En zour mon pe marse dan bwa mon zwenn avek Soungoula lanmen dan son pos, byen vantar. Mon demann avek li: „Kot ou pe ale?“ I dir mwan: „Mon pe al rod en travay, de zour mon lafen.“ En pe pli lwen i zwenn Papa Tig, Papa Tig i dir avek li: „Kot ou pe ale, Soungoula?“ I dir li: „Mon dalon, mon ape rod en travay.“ Papa Tig i dir li: „Ou pa pou kapab vin fer lekol mon senk zanfan?“ Soungoula i dir avek li: „Wi, msye, mon annan mon sertifika.“ Soungoula i enstal li byen se li, i konmans fer lekol bann zanfan: „ B – a – ba , B – o – bo, B – i – bi, B – e – be.“ Lannmen i santi li byen lafen. I dir dan li menm: „Mon a pran en piti mon a manze, Papa Tig pa pou ni konnen.“ Ler Papa Tig i vini i demande: „Mon kapab monte pour mwan vin vwar zanfan?“ Soungoula i dir avek li: „La zanfan pe fer leson, ou pa pou kapab monte, mon zis montre ou zot, reste anba.“ Soungoula i lev enn par enn anler i montre Papa Tig; i dir la enn, la de, la trwa, la kat, la senk. Sa ler i annan zis kat piti, i lev sa enn ki i’n montre premye an de fwa. Tou le zour Soungoula i fer parey, i manz enn. En zour Papa Tig i vini i vwar i reste zis enn. I pran kanmenm sa enn, i lev li an senk fwa. Papa Tig byen kontan i dir li: „Tou zanfan i byen, montre zot bokou angle.”

Ler i’n fini manz tou piti Papa Tig, Soungoula pa konnen ki i pou fer, i konnen Papa Tig pou okip son zafer. I pran tou sa bann sez avek latab, i met an dezord i asize i konmans gele. Ler Papa Tig i kriy li i pa tann li reponn, alor i monte i vwar Soungoula pe gele. I demann li: „Soungoula mon zanmi, ki ou pe gele? Ki’n ariv ou? Oli zanfan?“ Soungoula i dir li en bann zans in vin dan bwa, i’n vol zanfan. Alor Soungoula i al dan bwa i zwenn en bann zako, i dir avek zot: „Vini, mon bann frer, mon va rakont zot keksoz, apre mon a donn zot sakenn en lanmen bannann mir.“

Bann zako in tann bannann, zot vini, Soungoula i dir zot: „Zot tou zot va al dan laplenn, mon a fouy sakenn en trou, zot va asiz lo sa trou, zot va anter zot lake dan trou, mon a pran mon vyolon, mon a zwe. Mon a dir: „Sa ki ti manz piti Papa Tig? Zot tou zot reponn: Mwan sa, mwan sa, pour ganny lapo pour fer beleko-beleka. Mon a zwe trwa fwa.“ Tou bann zako byen kontan.

Alor Soungoula i retourn kot Papa Tig, i dir avek li: “Prepar ou byen, ou a konnen ki zot la ki ti manz ou piti.“ Tig i rod en kantite son bann zanmi, i fer zot kasyet, i dir avek zot: “Ekout byen. Ler Soungoula i va zwe son trwazyenm refren, zot a sorti, zot atrap tou sa ki’n manz mon piti.“ Ler Soungoula in pare i pran son gran vyolon i met dakor i konmans zwe, i sante: “Sa ki ti manz piti Papa Tig?” Tou zako i pran refren: “Mwan sa, mwan sa, mwan sa, pour ganny lapo pour fer beleko-beleka. ” Soungoula i zwe ankor i dir zot kriy pli for. Bann zako zot konmans sante pli for, pli for. Soungoula i dir avek Papa Tig: „Ou tande sa ki ti manz ou piti?“ Ler i zwe trwazyenm fwa, tou bann tig i sorti sot lo tou sa bann zako. Zot esey taye, en bann lake i kase dan trou. Soungoula i get isi get laba, i konmans pran lakours dan bwa pangar i va pase dan laparti manze. Ler mon zwenn li dan bwa byen fatige mon demann li kot i sorti, i konmans rakont mwan tou son forfe ki i fin fer, me Soungoula selman i malenboug, i demann avek mwan ki ou konnen dan sa zafer? I bat mwan en kou-d-pye, mon tonm dan trou zako.

Source :

Creolica, 26 juin 2007 – Sirandann ! Zanbaget ! Contes créoles des Seychelles, Sibylle Kriegel & Ingrid Neumann-Holzschuh (eds). Collectés par A. Bollée et I. Neumann-Holzschuh. pp. 8-9