SONNY DANDOSYA

Informant: Mrs. Elina Brioche François, Anse Boudin, Praslin. 71 yrs. Recorded 25/07/2021. Researchers: Penda T. Choppy & Cindy Moka. Transcribed by Cindy Moka, Sept. 2021.

Ti annan en madanm. Li sa madanm, konmsi kot zot ti reste ti separe, konmsi lakaz. Parey lontan, mwan mon reste dan en lakaz, konmsi separ ande. Prezan dan son separasyon zot ti met makouti. Sa makouti la I met avek fey koko. Prezan sa makouti la, I vinn konman parey en rido.

Be prezan sa madanm li lot kote I ti sorsye. Sa enn son vwazen pa ti sorsye. Be tou le swar ler I dir ou dan bann 10 er diswar, I annan en dimoun ki vin la I ganny kou la anndan, I tann koze. Li bonner i a koz ek ou, I a dir ou I pe okip son pti manze, i a fini boner, apre I antre dan son lakaz. Be touleswar I annan en madanm ki vin la. Li I donn manze li sa madanm la li. Tou kou I anvoy manrmay laboutik dan bann 5 er pour aste enn pti bwat bef pour li. En pti bwat sepa kisisa. Be tou kou I annan en manze ki I prepare.

Be prezan en zour, nou pe get, konmsi nou pe get dan trou laba, konmsi nou pe ekart sa makouti, nou vwar sa dimoun I vini I antre. Be ler konmsi pour ou fikse li byen la konmsi, in bare ou a dir ou pe get dan lesyel. Ou vwar zis letan sa dimoun I antre, ou rekonnet pour dir en madanm. Prezan, la ki nou gete nou dir “Be kisisa”.

La li prezan I pe koze tou ek sa dimoun, be li I ti reste li tousel. Pret lizye, veye, be nou pa ganny en konpran. Nou konpran zis letan sa madanm I antre. Apre sa ki konmsi letan in arive, ki I pe koz avek li, ki I kapab, vwar ki fas a fas la ou pa konpran li.

La li I pran son manze apar ki I per okipe. I ti annan son pti reso. I pe kwi son manze dan sa pti aswar la pour li donn sa dimoun. Ou vwar sa dimoun pe manze, solman ou pa konpran lekel sa dimoun. Prezan nou tous kanmarad nou tou. Prezan nou dir “Be la ou a dir mwan lekel” (informan i koz dousman)

Prezan mon papa sonnyen I dir “Taler, mon pour al deor, nou a misouk nou a gete lekel letan I sorti”. Zot in la. Mon granpapa I pran en baton, mon granmanman I pran enn. Nou nou debout prezan deryer nou, pour nou veye. La konversasyon i…. zot koz en nespes langaz la zot de. Prezan nou dir la konmsi in ler pour ale in tar. Prezan nou dan kwe laport. Ler pour sorti, de tou mannyer, mannyer landwar I ete ki tou I bezwen vwar,

Mon sa ler mwan, mon pe tranble, mon pe atrap rob mon granmanman deryer.

Mon granpapa I vini. I sorti Dousman deor, I dir “Be ou, alor ki ou ti la”. Mon granpapa I lev sa baton, ler I lev sa baton pour li bat sa madanm. Mon pa konnen kote sa madanm ti ale. Prezan li sa tantin ki ti pe koze la anndan in sorti. I dir be ki arive la isi.

Prezan mon granpapa, I dir “E be anmas ou dandosya. Nou pa kapab reste kot lakaz, zis nou tann koze. Ou dandosye ou donn manze lizour, ou donn manze aswar. Ou dir nou, ou pe al fer ou pti repa. Saler ou pa dir nou si ou anna nou dandosya la annadan.”

I dir “Ou ler ou vwar keksoz dimoun, ou zis fer mannyer reste transkiL. Sa ki oun vwar I annan etern li o dibaget, sa ki oun vwar la gard li pour ou. Akoz ou pour pas dan en move kar der.”

Prezan mon granpapa I dir “Tousala ti annan?”.

I dir “Akoz vwar ou, ou lalang I long, ou. Ler ou vwar keksoz gard li pou ou akoz ou pou pas parey, sa enn”.

Be la son lannmen swar nou ti veye, nou pa ti vwar ankor li ditou. Solman I en madanm. Konmsi en nepes zafer, ou vwar konmsi son figir letan I antre. Solman li ler I pe koze anndan I pe koze parey mwan ek ou, ou pa rekonnet li. Solman manze I ganny kwi la pour donn li. Langaz zot koze. Be zot ti dir mwan, pour dir dapre mon konpran la. sa fiy ti pou en bann gran zans, sa fiy ti annan bokou bizou. Be li sa madanm I ti lave kot sa madanm. Prezan I ti anvi sa fiy donn li, I ti demann zano. Ler in vwar, konmsi dimoun I antre anndan kot ou I vwar ennde pti keksoz. La li in oule bizou sa fiy. Sa fiy ti vann li en per zano. Ler sa fiy ti vann li en per zano la, I pan zanmen pey sa fiy. Prezan li I ti fer lasanm. I ti reste la kot madanm. Ki li in fer li in anmas lenz sal sa fiy. Son soz pake soz la, zistwar, zafer soz la. I ti konmans konmsa, sa fiy I konmans pa vwar son peryod en mwan e zis fiy ti tonbe ti mor. Be li I ti fer mesante sa fiy. Sa fiy ti vin la kot li touleswar.

P. Choppy: Be pa in ganny louvraz prezan touleswar I bezwen don manze.

Mm. Elina: Wi touleswar I vin rod manze la kot li. Ou vwar; prezan lamenm ler prezan li aswar,

Koumsa. Zot ti bandi. Bokou sa bann dimoun I annan ki ti bandi. Prezan dan aswar kantmenm ou pe fikse kot son lakaz. Ou vwar sa dimoun solman ou. Ou vwar li a fas ler I antre solman ou pa vwar son bann transaksyon anndan. Prezan I vinn parey konman en nyaz, parey ler dimoun I dir ou in disparet ek I vini ek I pas lanmen dan ou figir.