Si i mank seren i a may Bengali

La zistwar si i mank seren i a may Bengali par Samuel Accouche.

En pe lontan de sa ti annan en zonm ki ti apel Marselyen e i ti ganny sans marye avek en fiy ki zot non ti koresponn ansanm. I ti apel Marselyenn. Apre de-z-an ki zot ti’n marye son madanm i ganny en fiy e zot apel li Marzolenn. Trant an apre Marselyenn i ganny ankor en lot fiy e setfwasi zot apel li Albertin. Telman ki Marselyenn ti kontan ki in ganny en dezyenm fiy. Trant an apre nesans Marzolenn i dir avek son bonnonm Marselyen par son pti non gate, “Sese o.” Marselyen i osi reponn li par son pti non gate, “La mwan Yenyenn.” Marselyen i dir li, “Nou a fer sir ki nou dezyenm fiy Albertin i nou dernyen zanfan parske nou pe avanse an az e mon sir ki nou pa pou fer ankor zanfan. Alor mon panse ki ou ava dakor avek mwan, ki nou a fer en parti brizakase zour batenm Albertin. Nou a bwar nou a sou, nou ava sante parske lanmor i voler e nou pa konnen ki kapab arive demen.”

Son bonnonm Marselyen i reponn, li i dir, “Mon vye leker, tou sa ki ou dir mwan mon pa pou depler ou parski mon kontan tou mon leker.” Zour batenm Albertin msye ek madanm Marselyen i kriye i dir, “Ar wi Sese mon doudou, me ti gou lontan en.”

Sese i reponn li, i dir, “Yenyenn ase nonm mwan lontan, ou fer mwan mazin dan mon zenn tan, ar wi lontan.” Anfen zot ti byen fete sa zour, e alor Albertin in kontinyen grandi ziska zour i ganny laz vennkat-r-an e i ganny demann maryaz par en garson ki ti apel Virzil. Kan Albertin ti’n ganny son vennkat-r-an son gran ser Marzolenn ti’n ganny li senkann kat-r-an. Konman nou tou nou konnen ki dan sa lepok okenn garson pa ti ganny drwa demann en fiy an maryaz par zot prop lide me ti fodre absoliman ki manman ek papa garson ti fer laranzman avek papa ek manman fiy e ou garson kantmenm kontan ou non, ou annan pour marye me non pa pou dezobeir sa ki ou de granmoun in deside dan zot komite prive. E konman Virzil ti’n deza dir avek son manman ek son papa ki in ganny laz vennkat-r-an edmi e i anvi marye, alor pour sa rezon ki en zour Madanm Vaval son manman ti apel son mari akote e demann avek li dousman dan zorey i dir, “Vaval mon bonnonm, lekel fiy ki ou ti a kontan war nou garson Virzil marye avek? Vaval i reponn li, i dir avek son madanm Sezarin , “Zaza mon vye ker tan ka mwan mon ti a kontan war nou pti garson Virzil marye avek Albertin, fiy Msye ek Madanm Marselyen ki reste dan penpen laba. Parske sa pti fiy Albertin, sa zanmen ou war li pe marse avek sa gran gran bann e i en pti fiy byen rezonnab e respektab. Kot ou zwenn li dan semen i touzour pe dir bonzour bann granmoun ki i zwenn dan semen, e napa ler ki ou a travers devan laport son papa e son manman ki ou pa vwar li pe fer son krose oubyen son pwendmark. Alor mon ti al laba pour war Virzil marye avek Manmzel Albertin fiy msye avek Madanm Marselyen parske Virzil li osi i en garson ki annan son metye dan son lanmen. I konn byen plante, i konn en pe zwe vyolon, i konpran travay en bon sarpantye e plis i konn fer byen kapatya ki plis en sel denozour. Dimans apre msye ek madanm Vaval zot al an sekre kot Msye ek Madanm Marselyen. An arivan se zot, Madanm Vaval i dir, “Bonjour, bonjour.”

Zot ti reponn li, “Bonjour mon ser.”

Madanm Marselyen i demann avek zot, “Me ki sa divan ki’n anmenn zot isi ozordi.” Sezarin i dir li, “Mon ser sa ki mon annan pour dir zot, mon pa pou kapab dir zot la deor, parske kourpa ozordi i annan zorey. Annou antre anndan nou al blage.”

An arivan dan lasanm Madanm Vaval, Sezarin i koz lavwa bas i dir, “Mon ser mon vin vwar zot pour nou fer laranzman si zot dakor ki zot fiy Albertin i oule marye ek nou pti garson Virzil ki fek ganny vennkat-r-an edmi. Marselyenn i dir avek son bonnonm Marselyen, “Ki ou dir Sese? Nou pa pour kapab rann zot en repons final komela, pa vre. Parske nou a bezwen al vizit se zot avan, epi fer nou konsey de fanmir antre nou bann zanset apre sa nou ava kapab rann zot en repons final, si nou dakor ou non ki nou fiy i marye avek zot garson.”

Apre ki ki Msye ek Madanm Vaval ti’n retourn se zot, isi deryer Msye ek Madanm Marselyen zot al konsilte zot bann vye zanset e mont en konmite konsey de fanmir osize sa maryaz. Granpapa Totor ki ti osi la dan sa konmite i demann avek zot, “Eski zot garson ki zot dir mwan i apel Virzil, i en garson i annan metye sa? Eski i konn fer kapatya? Zot krwar ki i a kapab rann Albertin erez parey en lera dan ratyer?” I dir, “Sa i fodre mon war li mon menm dan mon de lizye, pour mwan kapab donn zot en bon desizyon lo sa zafer maryaz. Parske mwan en nonm ki annan leksperyans tousala.”

Madanm Marselyen i pran laparol i dir, “Mwan osi ki ou a dir, mon pa kapab donn en bon desizyon konmela lo sa size parske mon pankor konn byen sa bann fanmir Vaval ki mannyer zot viv zot e ki zot larelizyon e menm mon pa konn li sa Virzil la.” Alor komite i fini. Dimans answit Msye ek Madanm Marselyen a konpannyen par bonnonm Totor zot al rann vizit de famille Msye ek Madanm Vaval. Letan ki zot ti pe fer zot konsey de famille Totor son lizye pa bate lo Virzil ki ti’n asiz lwen dan en bout lakaz pour li pa tande ki bann granmoun pe konverse. Toudmenm apre konsey de fanmir tou le de kote ti’n tonm dakor ki Mamzel Albertin i a marye avek Msye Virzil e osi fer laranzman pour Virzil li al rann son premye vizit chez Msye ek Madanm Marselyen pour li konn son pretan fiyanse. Kantmenm i a kontan ou non dapre lalwa bann granmoun i annan pour li marye parski zot ki’n swazir e deside. Dimans le kat Oktob Madanm Vaval i dir avek Virzil, “Mon pti, la ou resanz diswar ki mon’n fer koud, an kontan en palto senk bouton, mete e mwan ou papa ek ou granpapa Zozef nou ava anmenn ou rann ou premye vizit ou pretan fiyanse e an menm tan ou ava vwar li pour lapremyer fwa.”

Pov Virzil tou sa ki i ti annan pour dir, “Wi manman,” e deswit i anbark dan son resanz tisor ek son palto senk bouton. Son manman Sezarin li osi in abiy li dan son zip Volant e in tap son frilez lo latet, napa konman li. E pa bezwen ou bliy par Vaval ek granper Zozef zot de osi zot ti’n kare kare dan zot palto ki ti’n boutonn ziska dan likou avek zot gran lesarp rouz otour zot leren e zot al anmenn Virzil rann son premye vizit. Ti fodre vwar zot pe ale e menm zour zot ti fer lezakor e zot retourn se zot. Apre lezakor kan lafanmir Vaval ti’n retourn se zot isi deryer Marzolenn gran ser Albertin i an pler. Marselyenn son manman i demann avek li, “Me ki ou gannyen ma fiy ki mon vwar ou enkonsolab nek mon war larm pe sape tousel dan ou lizye. Marzolenn i reponn son manman an pleran i dir, “Manman tou sa letan ki mon pe reste avek zot de papa ozordi mon en pti fiy senkannkat-r-an lo mon latet. Zanmen mon’n deza mank zot respe, mon’n touzour fer bonn fiy e zanmen zot de papa zot in deza esey fer en pti debrouy pour fer mwan marye. Laz ki mon’n arive taler mon a kaye lanmenm e get mon pti ser Albertin ki annan zis vennkat-r-an zot in nobou al fer laranzman antre fanmir pour li marye e mwan ki’n iz senkannkat-r-an pe vin kong lanmenm avek zot.”

Me granper Totor ki ti pe ekoute kot Marsolenn ti pe fer son konplent i dir, “Me, me selman Marselyen i vre sa ki Marzolenn pe dir, i annan rezon repros zor parski nou lontan nou ti touzour adopte sa sistenm ki dan en fanmir lene fiy i dwatet marye avan dezyenm e relman lapreferans maryaz i dwatet pour Marzolenn.” Ler Marzolenn i antann sa son leker i retourn en pti pe dan normal e konman lontan zot ti touzour obeir lord ki sa ki pli vye i dir. Msye ek Madanm Marselyen osi zot ti’n dakor avek konsey granper Totor e zot in deside ki zot a fer Marzolenn ki annan senkannkat-r-an marye avek Virzil avan Albertin ki annan zis vennkat-r-an. Me aprezan, ala zafer Albertin aprezan son tour pour konmans plere. I dir avek son gran ser Marzolenn, “Ou’n fer manman ek papa tir mon manze dan mon labous ou, ou nabou tap mon lanmen pour al marye dan mon plas. En, hi hi hi mwan ki ti dir ou pa ganny maryaz ziska ou’n vye ? Sa en keksoz pour fer, ek sa maryaz i rar konmela, hi hi hi hi. Mon ti’n ganny silin pentard Virzil e ou al sipliy avek manman pour fer mon pretan marye avek ou, hi hi hi hi. Sa dimoun i fer antre ser sa hir ir ir.”

Marzolenn i dir li, “Ase dispit mon ser. Donn mwan sa sans. Les mwan marye. Ou, ou ankor zenn e ou ankor annan sans ganny en maryaz pli tar.”

Toudmenm Albertin pa reponn li plis ki sa, i al anba lakav e i al plere e i dormi san manze sa swar, e son lannmen i kontinye plere menm ziska son lizye ti’n fermal e anfle. Pov dyab, la apre i ti kapab arete. Apre ki tou granmoun ti’n dakor pour fer Marzolenn lene fy marye avan son pti ser Albertin. Lendi bomaten letan ki bonnonm Marselyen ti pe asize dan son gran fotey lapo bef anba lavarang e fim son pip, i fer son lespri i dir, “Yenyenn o.”

Marselyenn i reponn li, “La mwan Sese.”

Marselyen i dir li, “Me sa zafer maryaz ki nou’n sanze pour fer Marzolenn marye avek Virzil avan Albertin, pa pou ariv en katastrof sa ? Eski ou krwar Msye Virzil etan ki i ti’n kontan son pretan Albertin i ava dakor aprezan pour fer sanzman pour li marye avek nou vyey pti fiy Marzolenn ki’n ganny laz senkannkat-r-an?”

Marselyenn i reponn li i dir, “Sese ou pa bezwen trakase pour sa ou, mwan mon konnen ki rol mon pou zwe pour mon kapab aranz sa zafer. Ou kapab montre vye senz fer lagrimas ou ?”

Zour Marzolenn ek Virzil pour al marye biro Marselyenn i al vwar grefye, i dir li ki son pti fiy pe byen soufer avek malodan e dantis in ordonn li pour reste kouver anba tapi depi son latet ziska son lipye. Alor si sa grefye i dakor vin marye zot se li menm apre son ler travay e i ava pey li pour sa. E ver senk er apremidi grefye in arive e Msye Virzil osi in arive. Marselyenn i dir avek Virzil, “Msye Virzil mon byen kontan ki ou’n arive pour marye avek mon fiy me selman i regretan ki ou pa pou ganny sans vwar li akoz i pe soufer terib avek malodan, dantis i dir ki i annan san enn degre lafyev avek li. E i a oblize marye kantmenm i anba tapi parske maryaz pa bon anvoye i port mofin. Vizil i reponn li i dir, “Wi mon byen konpran sa ki ou pe dir mwan Madanm Marselyen parske mwan osi mon konnen ki si sa malodan, me sa pa pou fer nanryen kanmenm i a reponn anba tapi sa ki grefye i a dir li dir. ”

Alor madanm Marselyen in fer rantre grefye avek Msye Virzil. E i dir avek zot, “Ganny labonte antann mwan de minit, mon ava al dir mon bonnonm poudir in pare e mon ava apel granpapa Totor avek en lot temwen pour vin asiste maryaz pour zot sinyen koman temwen.”

Letan ki Marselyen ti al anndan pour li al asiste maryaz i dir avek son madanm en pe dousman, “Be tantin o, ou pa krwar ki pli tar kan virzil a’n konnen ki i’n marye avek Marzolenn olye Albertin pou ariv en gran sebastopol sa ?”

Marselyenn ti’n tap son detrwa grog i dir, “Be Sese donn mwan lape don, les mwan kas mon lakle koumsa, ler i a krwar i pe may seren saler in may Bengali ek letan si pa kontan i ava al raport kot Ako Lanmizer.”

Alor tou dimoun in arive an kontan grefye pour marye Msye Virzil avek Manmzel Marzolenn olye ki Manmzel Albertin san ki Msye Virzil pov dyab i konnen.

E la grefye i konmans fer son seremoni maryaz. Ler i ariv kot sa pti sapit ki Virzil pour repete apre li ki dir mwan Virzil mon aksepte pour pran Marzolenn pour ma femme et mon épouse. Avan ki grefye i al pli lwen, Virzil i ekout byen, i pas konmsi en kouran e si dan son leker i kalkile dan li menm i dir, ‘Kwa Marzolenn !’ I dir ek grefye, “Ou pa’n tronpe ou, pa Albertin olye Marzolenn ?”

Grefye i dir li, “Mon garson, “Mon pa fou mon. Mon fer mon seremoni dapre non ki mon’n gannyen par papa ek manman fiy. Son non i Marzolenn, mon pa kapab dir Albertin parey i ou pe dir mwan.”

Virzil avek sa kouran esi ki ti’n pas dan son leker, i pa demande ki per ti dir. Kan i panse si vreman menm ki i pe al marye avek sa vye Marzolenn senkannkat-r-an. Nek i lev sa tapi ki ti’n kouver Marzolenn avek. Ler i gete ki si sa. Marzolenn ki’n tranpe anba la pour vin son madanm. Virzil i dir, “Marzolenn mon ser ou papa ek ou manman i tronpe si zot ti krwar ki mon Virzil mon ti pou vin ou nennenn dan ou vyeyes. Olye mon vwar zot esey fer en lot debrouy pour ou maryaz. ” Virzil i kit zot tou dan salon an kontan grefye i sot deor i dir, “Bye bye pour touzour Msye ek Madanm Marselyen, petet zot a may en lot Virzil, me pa mwan Virzil.” I dir mon lipye anmenn mwan dan lakour.

An arivan se li son granper bonnonm Zozef i demann avek li, “Mon pti ki mannyer gran boner koumsa mon war ou arive isi? Nou lontan kan nou ti marye biro nou ti pas en demi zournen avek papa ek manman la fille avanler ki nou ti retourn dan lakour e anmenmtan nou ti ganny letan pran en pti lasante ansanm. Me mon vwar i drol ki ou gran boner ou’n ariv dan lakour.”

Virzil i reponn li i dir, “Granper zafer dimoun i pa ou zafer, me i zafer menm. Ou kapab krwar ki mwan en Virzil gran zorey, zot ti oule fer mwan marye avek zot vyey fiy gran zorey dan plas Manmzel Albertin ki annan zis vennkat-r-an. Granper ou konnen sa proverb ki dir, si met la pour may seren, ki si a mank seren, a may Bengali, me pa avek mwan Virzil. E i pa ti zanmen ganny lanvi marye ankor.

Sa zistwar ti ekri par Samuel Accouche.