SEN DISPARET

Kont ek Lezann, Vol. 9, Lenstiti Kreol (2008), Stories told by Jeanne Lemiel. pp. 50-56

Alors en fwa ti trouve annan en vye bonnonm malbar. Me sa bonnonm malbar ti pas son letan zis al dan bwa, koup dibwa pour li fer sarbon. En bo zour, letan i ti pe koup dibwa dan en fore, i ti tann dan sa pye dibwa ki i ti pe koupe sonnen. Sa bonnonm malbar ti kontinyen koup sa pye dibwa e kan sa pye dibwa ti tonbe, i ti war en bwat. Sa bonnonm ti ouver sa bwat. Dan sa bwat ti annan en sennon. Pandan sa letan, ti napa sennon dan pei. E la sa bonnonm malbar ti deside anmenn sa sennon pour al vann kot Lerwa.

An arivan kot Lerwa, telman sa sennon ti zoli, Lerwa ti deside pour aste sa sennon pour son fiy. Sa manmzel tou le swar ti tir son sennon dan son likou avan i ti dormi.

En bo zour, i ti bliye tir son sennon avan i ti al dormi. Pandan lannwit, letan ki i ti pe dormi, i ti tann en dimoun touse obor Ii. Manmzel ti sote dan son sonmey. I ti get partou. Obor li, i ti vwar en garson pe dormi. Manmzel ti demann avek li, “E ou la, kote ou sorti? Ki ou fer la?”

Garson ti dir avek li, “Manmzel, se ou papa ek ou manman ki’n anmenn mwan la.”

Sa fiy ti dir avek li, “Kote ou ti war Manman ek Papa pour anmenn ou isi? Mon papa ek mon manman pa’n zanmen anmennn ou isi.”

E la sa garson ti dir avek manmzel, “Manmzel, oli ou sennon?”

Sa fiy ti get son bwat… napa sermon! Tous otour son likou… napa sennon.

E la sa garson ti dir avek li, “Sa sennon ti mwan. Ou papa in aste mwan, i’n anmenn kot ou.”

Manmzel ti vwar sa drol, me sa garson ti la e son sennon pa ti la. Apre tou, vre ti son papa ki ti’n donn li sa sennon. Sa garson ti tre zantiy, an plis i ti en zoli garson. Sa fiy ti tonm anmoure. O bout en tan, sa manmzel ti trouv li ansent. I ti ganny en pti garson. Me larenn li, ki pa ti zanmen pas kot son fiy, akoz son fiy ti annan son nennenn ek tou son keksoz pa ti konnen si son fiy ti’n ganny baba.

Apre ankor en pe letan, Manmzel ti ansent pour en dezyenm fwa. I ti ganny ankor en pti garson. E ler Manmzel ti ganny en trwazyenm baba, i ti ganny en pti fiy.

En zour, ler Larenn ti pe asize, bann zanfan ti pe tap boul anler. Boul ti sorti anler ti tonm lo lazanm Larenn anba. Larenn ti demann dan li menm, “Be kote sa boul i sorti Rwa? Pa dir mwan, mon fiy! Mon krwar pa si i zwe boul!”

En lot zour ankor, manrmay ti pise. Pisar ti tonm lo Larenn. Larenn ti santi e i dir, “Me, pisar! Me kwa? Me ki i arive?” Toudmenm i pa ti antren.

En lot zour ki larenn ti pe pronmnen anba dan zarden, i ti tann zanfan gele. I ti ekoute. Konmsi sa gele ti sorti anler kot son fiy dan letaz. Son fiy ti dan setyenm letaz. Larenn ti deside pour al gete ki ti pe pase. I ti mont dan sa setyenm letaz. Kan i ti ariv anler, i ti bat avek en pti tonton dan leskalye ki ti pe anmas son boul. Larenn ti dir avek sa piti, “E ou la, kote ou sorti?”

Sa pti garson ti reponn, “Kot Manmi.”

Larenn ti demande, “Lekel li ou manmi?”

Pti garson ti dir, “Me la i laba.”

Larenn ti get dan direksyon kot sa pti garson ti montre. I ti vwar son fiy pe donn tete en pti baba

“Be, kote ou ganny piti?”

E la son fiy ti dir avek li, “Manman, zot de Papa ki’n anmenn sa garson isi.”

Larenn pa ti konpran, alor i ti demande, “Be ki mannyer nou’n fer pour anmenn sa garson isi?”

La sa fiy ti eksplike. E finalman larenn ti konpran ki sa garson ti sa sennon. Alor ki pou fer? Lerwa ti akord sa garson pour li marye avek son fiy, me sa garson ti dir avek zot, “Promet mwan ki zanmen zot pou demann mwan ki mannyer mon apele”‘

Lerwa ek larenn ti dakor. Alor, prenses ek sa garson ti marye. En bon pe letan apre ki sa de zans ti’n marye, kiryozite larenn ti vin tro for pour li reziste. I ti konmans demann son fiy pour demann sa garson son non. Me toultan son fiy ti dir non. Ale, ale, larenn ti kontinyen persiste avek son fiy pour demann sa garson son non. En zour i ti dir avek son fiy, “Sa garson i bezwen annan li en move keksoz ki i’n fer akoz i pa oule ki nou konn son non.”

Finalman sa fiy ti demann son mari son non. I ti dir, “Akoz ou pa oule dir mwan ou non? I bezwen annan en move vis dan ou latet, oubyen kek keksoz ki ou’n fer.”

Me son mari ti dir li, “Si mon dir ou mon non, ou pa pou zanmen trouv mwan ankor.”

Son madanm ti demann avek li, “Ki mannyer ki mon pa pou war ou ankor? Ou pa oule dir mwan ou non ki fer ou dir mwan sa!”

Sa garson ti dir avek Ii, “Eski ou vreman anvi konnen ki mannyer mon apele?”

Son madanm ti dir avek Ii,”Wi! Tou dimoun i annan en non.”

E la sa garson ti dir, “Si ou vreman ou oule konn mon non, mon ava dir ou mon non.” Alor sa garson ti anbras son trwa zanfan ek son madanm. E la i ti dir avek son madanrn, “Mwan, mon apel Sen Disparet.” Konman i ti dir son non, sa garson ti disparet devan son fanm. Sa madanm ti plere. I ti konnen ki ti en fot ki i ti’n fer pour demann son mari son non. Lerwa ti fer bat lazeneral. Selwi ki ti trouv msye son fiy kot i ete i a ganny lanmwatye son rises, me personn pa ti zanmen konnen kot sa garson ti’n ale.

En zour, menm bonnonm malbar ki ti anmas sa sennon dan pye dibwa, dan son pe rod dibwa menm dan fore, i ti war en bef avek en kabri pe manz zerb. Ti en zoli bef ek en zoli kabri. Bonnonm malbar ti tay avek sa bef ek sa kabri. Sa bef ek sa kabri ti antre anba en ros. Bonnonm malbar ti antre anba sa ros Ii osi pour gete kote sa bef ek sa kabri ti ale.

Anba sa ros, ki ti paret en lakaz, sa bonnonm malbar ti war Sen Disparet. Toudmenrn, i pa ti kapab sorti dan kavern akoz laport ros ti fermen avan ki i ti kapab sot deor. I ti pou bezwen esper lizour pour Ii sorti. Alor i ti maske dan en kwen ki ti en pe nwanr.

Letan fernwanr ti fer, Sen Disparet ti fer son lapriyer e demann avek son sandelye, “Mon sandelye, ou a dir mwan si mon madanm ek mon trwa zanfan i byen.”

Son sandelye ti reponn Ii,”Ou madanm ek ou zanfan i tre byen, selman ou madanm i an pler. Me tou le swar nou abitye dormi a kat, ozordi nou pou dormi a senk.”

Sen Disparet pa ti pran son sandelye o serye. I ti mazinen ki petet kek zannimo ti’n antre avek son bef ek son kabri.

Lannmen bomaten, bonnonm malbar ti tyonbo lake bef pour Ii sorti ansanm avek bef ek kabri letan zot ti sorti. Konman i ti ariv deor, i ti tay tou son kouraz ziska kot madanm Sen Disparet. I ti dir, “Madanm, mon’n vwar ou msye.”

Madanm ti dir, “Mon msye! Me kote i ete?”

Bonnonm malbar ti dir, “Annou ale mon a anmenn ou.”

Ler zot ti ariv laba bonnonm malbar ti dir avek madanm ki zot ti pou bezwen esper aswar letan bef ek kabri pe antre. “Ou tyonbo lake bef, mwan mon a tyonbo lake kabri.” Madanm ti dir wi; alor zot ti espere.

Vreman, letan labrin ti pe al tonbe, bef ti fer, “Mour! Mour!” I ti donn son sinyal pour Ii antre dan kavern zot de kabri. Madanm ti tyonbo lake bef e bonnonm malbar ti tyonbo lake kabri e la tou le de ti antre dan kavern.

Anndan, madanm ti vwar son mari. Toudmenm i pa ti al kot Ii. Son mari ti fer son lapriyer e parey i ti abitye, i ti dir avek son sandelye, “Mon sandelye, mon sandelye, ou a dir mwan si mon madanm ek mon trwa zanfan i byen.”

Sandelye ti dir avek Ii, “Wi, ou madanm ek ou trwa zanfan i tre byen, me ou madanm ozordi i kontan. I dan lakontantman ou madanm. I pli pre avek ou ozordi. Me tou le swar nou ti abitye dormi a kat, ozordi nou pou dormi a sis.”

Sen Disparet pa ti oule krwar sa ki son sandelye ti pe dir Ii. Alor, trwa fwa i ti demann son sandelye menm kestyon. Letan ki sandelye ti reponn kestyon pour la dernyen fwa, madanm pa ti kapab reste kot i ti ete. I ti sorti e tay kot son mari.

E la Sen Disparet ti dir avek li,”Ki ou pe fer la? Demen i zour pour mwan ale. Mon pe kit sa later. Mon pe mont ver lesyel.” Sen Disparet ti kontinyen, “Demen wit er bomaten ou a war i vin en fotey dife. Mon pou antre dan sa fotey avek mon sandelye. Anpandan avek lapat fotey. Ler nou ariv dan lesyel, ou a reste anba fotey. Pou annan en lafet pour mwan dan lesyel. Bann lanz pou fete. Bal pou gou, me pa lev ditou pour danse. Selman ler i zwe vals mon a vin lev ou. Dans zis vals e zis avek mwan.”

Vreman lannmen bomaten, bef ek kabri pa ti sorti ankor. Zis wit er, lesyel ti ouver e fotey ti desann. Sen Disparet ti antre dan fotey avek son bef, son kabri ek son sandelye. Madanm ti tyonbo lapat fotey e fotey ti kit later. Sa landrwa ti bwaze, e pov bonnonm malbar ki ti’n vin anmenn nouvel ti pri e mor anba ros.

An arivan dan lesyel, Sen Disparet ti debarke. En gran lafet ti’n organize pour son retour. Sen Disparet ti krwar ki Bondye pa ti konnen ki i ti’n marye lo later e ki i ti’n anmenn son madanm dan lesyel. Alor, i ti zwenn bann lezot lanz dan zot selebrasyon. Sak fwa ki ti zwe en vals, i ti lev son madanm pour danse. Zot ti ale koumsa. Ler ti’n ariv minwi, en pti lanz ti dir avek enn son kanmarad, “Mon santi loder vivan. Ou santi ou?” ·

Sa lot ti dir, “En, en!”

Sa pti lanz ti dir, “Mon dir ou i annan vivan parmi nou.”

Sa lot lanz ti reponn, “En, en! Mon pa santi.”

Sa pti lanz ti dir avek son dalon, “Veye. Veye letan pe zwe vals si ou pa santi loder vivan.”

Vreman ler vals ti zwe, Sen Disparet ti lev son madanm. Sa pti lanz ti tous son kanmarad e dir, “Ou santi loder vivan?”

Son dalon ti dir, “Wi! Mon pou al dir mon met poudir i annan vivan la parmi nou.”

Alor sa de pti lanz ti al dir Bondye, “Mon Met si nou pa tronpe, parmi nou i annan vivan.”

Bondye ti dir avek zot, “I annan vivan? Zot in santi ki i annan loder vivan?”

Zot ti dir wi. Alor Bondye ti dir zot ki si ti annan vivan zot ti pou bezwen war Ii sa vivan. Danse ti kontinyen. Ler ti zwe en lot vals, Sen Disparet ti Ieve e lev son fanm. Zot ti danse. Apre trwa vals, Bondye ti vini e tyonbo Sen Disparet lo son zepol letan ki i pe valse. I ti dir, “Sen Disparet, ki ou’n anmenn isi?”

“Ar mon met! Eskiz mwan! Mon’n fer en fot.”

Bondye ti dir avek Ii, “Kan mon ti anvoy ou lo later, mon ti anvoy ou marye?”

Sen Disparet ti dir avek Bondye, “Non Mon Met. Ou pa ti dir mwan marye, me mwan par mon dezobeisans ki mon’n marye.”

Alor Bondye ti dir avek Ii, “Kan mon pe dir ou, tourn lo later ou avek ou fanm. Al sonny ou trwa piti ki ou’n fer lo later. Tournen! Mon pa oule vwar ou dan paradi ankor. Pa met ou lipye isi. Tournen, ou’n dezobeir mwan. Ou’n al marye lo later, alor mon a sas ou dan mon paradi.”

E la Sen Disparet ti bezwen retourn lo later, Ii avek son madanm. Zot ti viv ere tou leres zot lavi.