SAT EK LERA I FER ZANMI

Jessy Hossen

Alors en zour, en sat ti fer konnesans avek en lera. Sat ti touzour pe koz lo sa lanmour ek lanmitye ki i ti annan pour lera ziska alafen, lera ti dakor pour vin reste avek li. Sakenn ti annan son tour fer louvraz lakaz.

“Fodre nou ranmas keksoz pour letan dir akoz si nou pa fer sa, nou ava mor lafen ek laswaf,” sat ti dir. “Ou pti lera, fodre pa ki ou al partou akoz ou kapab ganny pri dan tapet”.

Pti lera ti ekout byen sa konsey e zot tou le de ti aste en pti pe diber. Zot pa ti konnen kote zot ti pou mete. Alafen apre bokou dyalog, parey nou koze konmela, sat ti dir, “Mon pa war en pli bon landrwa kasyet ki dan legliz. Personn pa pour oze al vol sa laba. Nou ava kasyet li dan kwen e nou pa pour toµs li ditou ziska letan dir.” Alors zot ti kasyet zot pti po diber.

Me pa ti tarde pour sat ganny lanvi manz sa diber e i ti dir avek lera, “Mon’n bliye dir ou sa depi lot zour. Mon kouzen in ganny en pti garson, blan avek tas nwar, e i’n demann mwan pour vin marenn. Les mon ale ozordi, e ou okip lakaz ou tousel.”

“Byensir,” lera ti reponn,. “E kan ou manz sa bann bon fayo, mazin mwan. Mon ti a kontan ganny en grog diven batenm.”

Me sa pa ti vre ditou. Sat ti napa okenn kouzen e personn pa ti’n demann li pour vin marenn. I ti al drwat legliz, savir sa pti po diber e konmans lise ziska en tyer po ti’n fini.

Apre sa, i ti mont anler e pronmnen lo twa bann gran batiman, get peizaz, tir pares dan pti larder soley e bave letan i ti mazin sa pti po diber. Kan pti labrin ti fer, I ti retourn dan lakour.

“A, ou’n retournen! Ou’n byen pase?” lera ti demande.

“Wi, tou keksoz ti’n byen organize,” Sat ti reponn.

“Kimannyer pti baba i apele?”

“En Tyer,” sat ti reponn.

“En Tyer?” lera ti repete. “En drol non sa.”

“Kisisa ki drol? I pa pli drol ki vol dipen, parey ou fiyel i apele,” Sat ti reponn.

Enn de zour ti pase e ankor en fwa Sat ti ganny lanvi diber. I ti dir avek Lera, “Ankor en fwa, ganny labonte okip lakaz ou tousel, akoz ankor en fwa, zot in demann mwan pour vin marenn e akoz sa pti baba i annan en kolye blan toultour likou, mon pa kapab refize .”

Pov Lera ti dakor. Sat ti al dousman dan legliz, savir sa pti po diber e lise ziska zis en tyer ti reste. “Napa keksoz ki pli bon ki sa ki ou kasyet pour manze”. I ti byen satisfe avek sa ki i ti’n fer.

Kan i ti ariv dan lakour Lera ti demande, “Kimannyer pti baba i apele?”

“De Tyer,” Sat ti reponn.

“De Tyer, ki kalite non sa! Zanmen mon’n deza tande. Mon krwar pa si ou trouve sa kalite non dan liv.”

Ankor en fwa pa ti tarde pour sat ganny lanvi lise, “Ankor en bon nouvel,” i ti dir avek Lera, “Zot in demann mwan pour vin marenn ankor. Sa piti i nwar avek lapat blan. En kalite pti sat koumsa i ne zis en fwa tou le de an. Alor les mwan ale”.

“En tyer, De tyer,” Lera i repete. “Sa bann non i drol. Sa i fer mon reflesir,”

“Ou ganny en ta mazinasyon, akoz ou reste dan lakaz dan ou lenz sann ek ou long lake,” Sat ti dir.

Toudmenn lera ti netway byen lakaz, met lord. Pandan sa letan sa sat voras ti manz tou diber. Apre sa i ti retourn dan lakour byen satisfe. Lera ti demann li non sa trwazyenm piti.

“Tou in fini”, sat ti dir.

“Tou in fini,” zanmen mon ava krwar ki sa bann non i dan liv. Tou in fini, ki savedir sa?” I ti balans son latet, rakokiy li, e dormi.

Apre sa, personn pa ti demann sat pour vin marenn. Letan dir ti arive e lera ti mazin zot pti po diber. “Frer sat, annou al sers nou pti po diber ki nou’n kasyet dan legliz. En pe diber ti a bon lo nou dipen.”

“Be wi.” Sat ti reponn. “Pour bon parey ou.”

Zot ti al dan legliz e zot ti war sa pti po dan son plas me byen vid. “A, mon’n kler ou,” lera ti dir. “Mon konnen ki’n arive. Mon war ou en bon zanrni. Ou’n manz tou letan ou ti pe vin marenn; En tyer, apre De Tyer e prezan Tou in fini.”

“Reste trankil! ” sat ti kriye. “Si ou koz ankor mon pou manz ou.” San demande ki per i dir, nek i ti sot lo lera e anval li.

Ou war mannyer zafer i ete.