Folklore

Folklore

Filter By Category

Fairy Tale
Miscellaneous
Legend
Supernatural
Trickster
Tizan
View Mix Category

Share Link On Social Media

SAPLA PASYA

Summary :

A magician leaves his home in the hands of his mother in law while he and his wife go to help a friend. The mother in law, who is also a magician, tries to take over the house, but the owner has put a guarantee and she is chased round the house by a spirit, crying, ‘Sapla Pasya!’ Knowing that something is wrong, the magician comes back and whips the old sorceress with a magic rod and she flies off like a bird.
Theme Group: Witchcraft
Character Hero: Man
Origin: Sey
View Story

SAPLA PASYA

Summary :

A magician leaves his home in the hands of his mother in law while he and his wife go to help a friend. The mother in law, who is also a magician, tries to take over the house, but the owner has put a guarantee and she is chased round the house by a spirit, crying, ‘Sapla Pasya!’ Knowing that something is wrong, the magician comes back and whips the old sorceress with a magic rod and she flies off like a bird.
Origin: Sey
Character Hero: Man
Theme Group: Witchcraft
View Story

All Right Reserved To UNISEY & CI

error: Content is protected !!

SAPLA PASYA

Informant: Mrs. Elina Brioche François, Anse Boudin, Praslin. 71 yrs. Recorded 25/07/2021. Researchers : Penda T. Choppy & Cindy Moka. Transcribed by Cindy Moka, Sept. 2021.

Be, ti deza annan en msye. Sa msye ti annan son madanm. Be li sa msye la I ti en dimoun enpe serye. Me I ti en mazisyen tou. I ti annan enpe bann, bann lespri avek li. Konmsi I kapab fer en bann keksoz avek ou. Be prezan li sa myse li, I ti annan kontak avek enn de bann dimoun ki annan larzan, bann gro, gro lakaz, lot, lot koumsa. Be detanzantan sa bann dimoun I fer li desann vin kot zot komsi, si I santi keksoz pa pe marse kot son lakaz. I kontakte li, i vini.

Be ti annan enn son dalon. I kontakte li. I dir li vini. I dir “mon pa tro tro byen konmsi, keksoz pa pe marse”. I dir “wi napa probelnm”. Be li son msye ki mon ti pe dir ou, pou dir; ki sa bann dimoun ki toultan I annan sa bann keksoz ki bezwen vwar li konmsi, ki i bezwen al kot lakour dimoun. Si kekfwa kot ou lakour pa tro, tro anord, lot lot bann zafer… Konmsi i ti parey konman en dokter, konman en soz.

Prezan I dir avek son madanm koumsa, I dir “Be met ou pare. I annan en landwar kot nou pe ale, kot enn nou dalon konmsi pou al get enpe problenm kot son lakour.” Be sa madanm i ti annan son manman. Son manman li osi I ti en mazisen li. Prezan son zann I koz ek li, I dir li “Be oke, nou pou sorti, nou pou al anvil, kot sa msye, nou a kit lakaz ek ou. Ou konmsi ou pou ansarz nou lakour, ou a vey nou lakour letan nou pa la. Be li osi li, in byen kontan. Be ti annan en lespri avek li ki ler sa msye pour deplase I pour ale… li mon pa konn son lespri par deryer, kwa ki I ti pe mazinen.

Reelman sa msye I sanze, met pare. Me solman sa bann letan pa ti annan ni transport. Ki zot transport zot, zonm pour anmenn zot dan en pirog. Pran pirog, netwaye e garni tou. Konmsi ou konnen bann gran personaz. In fini garni pirog tou. Pran myse leve met dan pirog pour li al dan son landwar kot I ti pe ale. Be deryer lakaz, I avek son belmer. Li imsye ler in ariv laba kot son zanmi anvil in byen kontan. In antre bannla in resevwar li byen pour li rod problenm sa bann dimoun ki problenm in arive, ki kwa.

Be li sa madanm deryer li I annann en keksoz ki li in fer kot sa lakour, kot sa msye li. Prezan madanm I pa ni manze, I pa pe ni kapab dormi; zis I marse I fer letour lakaz. Depi premye nwit, premye zour ki sa msye in ale la. Li konman in antre dan lakaz. Konman in fini sorti dan lakaz in al deor. Me solman ti annan en tizon dife dan son lanmen. Prezan li zis I pe fer letour lakaz li. Zis I ape koz en nespes langaz I a pe dir “SAPLA, SAPLA, PASYA, SAPLA, SAPLA, PASYA”. Fer nwar I fer, ek I koumsa menm ek I pe fer letour lakaz partou. Prezan sa imsye…

P. Choppy: Madanm sa msye? Oubyen…?

Mm. Elina: Non, son belmer.

P. Choppy: Son belmer. Arn oke.

Mm. Elina: Manman son madanm.

Prezan li sa msye laba kot li I ete li laba, in fini konnen pou dir ki sa madanm pa pe dormi, I dan problenm laba kot li. Prezan I dir ek son madanm aswar, I dir li “Nou pa pour tarde isi, nou pour bezwen retourn kot lakaz.” Prezan son madanm I demann li, i dir “be akoz?”. I dir “be I annan problenm kot lakaz.” Prezan son madanm I a tout fors pour konnen ki problenm ki I annan kot lakaz. I dir “Seri dir mwan ki problenm ki annan kot lakaz?” I dir “Ler nou ale, ou a konnen. Solman met ou pare, demen bomaten, pour ou okip ou pou nou retourn kot lakaz.” Li sa ler gran tantin li, in fer en nwit ek son sapla, sapla, pasya menm. Pe fer letour lakaz ek son tizon dife sapla, sapla, pasya. I dormi tousel ek I pase I la “sapla, sapla, pasya”.

Son bomaten menm zafer menm. I fer tou zafer; ek I fer letour lakaz avek sa tizon dife. La sa msye I fer bann prosedir. I fer vinn anmas li, rod pirog pour retournen, menm direksyon ki zot ti fer pour desann, fer parey pour mont kot lakaz. Ler n’arive, nariv kot lakaz, son belmer pa konnen si son zann in arive, ni son fiy. Zis I pe konsantre, zis dan sa sapla, sapla pasya. Prezan ler son fiy I vwar son manman. Fiy I konmans kriye. I dir avek, son msye, “Be ki ou’n fer li?” I dir “Mon pann fer li narnyen.” I dir, “Arwi, mon manman pe mor”. I dir “I pa por mor li”. Zot in antre zot in met tou zot bagaz anndan. Son msye I dir li met boulwar lo dife, fer en tas kafe pour li. Li tantin deor, li I pa ganny en konpran menm li. Be I pe konmans feb, en nwit, en lazournen, I pa’n manze, zis en tizon dife dan son lanmen nek i pe fer letour lakaz, i ape koze, nek i la, “Sapla, sapla. Pasla.”

Sa msye I bwar son kafe. I fini bwar son kafe ti annan li, en gran ployan. I tonm dan son ployan I dir ek son madanm al sers son pip anndan. I pran son pip I tal son taba ladan. Ou konnen zot lontan zot ti finm dan pip. I bos son pti lafimen. I redi son lekor. Konmsi I ape mazinen, I al atrap sa tantin prezan I pe demann li ki’n arive ki I koumsa. Madanm pe plere menm, pe dir arwi zot manman pour mor. Msye in la in fini rilaks son lekor. I antre anndan, be kot li I ti ete li ti annan son, ti annan son pti landwar kot I ti met tou son bann zafer. Ladan ti annan roten, bann roten tou sord laz. Bann baton, nenport ki kalite keksoz ti annan anndan la. Bann laglas. Tou sa bann zafer ti dan en bout parey konmsi. Ti parey konman dan en biro. Sa msye I antre, I ris en roten. I atrap son roten I sorti, prezan son madanm pe plere, I dir, “Ou pou al bat manman?” Msye pa reponn. I vini I atrap li I dir, “Belmer. Ki’n arive ek ou?”. “Sapla, sapla, pasya sapla, sapla, pasya,”. Sa msye I pran sa roten I fou li de kou lo son deryer. Iiiii (enforman i riye). I pa tande nek I pe kriy sapla, sapla, pasya, menm. I donn li trwazyenm kou. Prezan son madanm I kriye I dir, “Arwi mon mari, ou a touy manman”. I donn li katriyenm kou. Ler I fini donn li ktriyenm kou. I larg li. Tantin I anmas son de lipye I ploye, I plannen parey zwazo. Wi; I plannen parey zwazo I anvole. I ale.

Be la prezan. Sa msye I antre dan lakaz. Prezan zot konmans diskit sa zot de son madanm. Be prezan I dir “Akoz?” Konmsi pour ki rezon ki n’ariv sa. Prezan I dir, “Ou manman I en sorsye. I en mazisyen parey mwan. Be solman I pa ti konnen ki mwan mon annan plis lespri ki li. Alors, se sa ki ou war mwan mon pran sa roten monn fwet li. Prezan mwan, ler mon fini fwet li I pa pe kapab marse lo son de lipye. I pour bezwen plannen pour li ale. La apre ki lanmenm sa madanm in ale. Zot zot in kontiyen reste dan lakaz. Sa bout zistwar I fini lanmenm.

Prezan mwan mon pase, mon dir, “Tasyon ou osi, ou fwet mwan ek sa roten parey ou ti fwet sa madanm”. I dir mwan. “Non, mon pa pour fwet ou, akoz ou pa’n fer narnyen ou pa’n fer keksoz move”.