SANDRIYONN ANBA PANNYEN

Alors en zour ti annan en madanm. I ti annan de fiy. Son msye ti’n mor, alor i ti marye avek en lot zonm. I ti ganny en lot fiy. Zot ti apel Ii Sandriyonn. Son de fiy ti fer martir sa enn ki pa ti menm papa avek zot. Sa madanm osi, ti pli kontan son de pli gran fiy. I ti aste zoli lenz ek zoli latwal pour zot.

Sandriyonn Ii, i ti bezwen fer tou louvraz. I ti bezwen al sers delo larivyer. Menm si son manman ek son bann ser ti dispit letan i ti tard en pe i pa ti antren. Zot ti dir ki ti annan dimoun ki i ti zwe avek letan i ti al larivyer. Menm sa zanmen i ti refize.

Sandriyonn Ii, i ti napa bon lenz pour mete. I ti touzour byen sal pe fer louvraz dan lakwizin. Letan konpannyen ti vin kot sa madanm sa pti fiy ti kasyet anba pannyen. Be Kok Ii in trouve. Kok ti mont anler lo pannyen e sante, “Kokoriko! Sandriyonn anba pannyen . Kokoriko!”

Bann dimoun ti rode lekel sa Sandriyonn. Alor sa madanm ti bezwen tir Sandriyonn anba pannyen.

Zot ti ale koumsa. Sak fwa ki konpannyen ti vini Sandriyonn ti bezwen al kasyet anba pannyen, e sak fwa Kok ti sante pour dir ki Sandriyonn ti anba pannyen. Alors sa madanm ti bezwen fer Ii sorti.

En zour Prens ti dir avek son papa ki i anvi ganny en fiy, en zoli fiy pour li marye. Son papa ti dir li rod sa fiy ki i ti ava kontan pour marye avek. Me Prens ti dir Ii ki kanmenm i rode i pa ankor war okenn fiy ki i kontan. La son papa ti dir li ki i ava donn en bal e i ava envit bann madanm avek zot fiy. Koumsa Prens ti ava kapab swazir sa enn ki i ti ava kontan pour vin son madanm.

Sa madanm ti aste zoli latwal e fer koud bann zoli rob pour son de premye fiy. Letan sa madanm ti’n fini koud lenz pour son de fiy i ti dir avek Sandriyonn, “Be napa bon latwal ki’n reste pour ou ganny en rob. Ou pa pou kapab al bal.”

Zot ti al konmans prepar zot pour zot ale. Be li Sandriyonn, letan ki i ti al sers delo larivyer ti annan en krab ki i ti abitye zwe avek. Sa zour Sanmdi, letan ki son manman ek son de ser ti pe prepar zot pour al bal, Ii i ti al sers delo. Letan ki i ti i pe zwe avek krab, krab ti dir avek Ii, “Tanto ou osi ou pou al bal.”

Sandriyonn ti reponn, “Be non! Mon pa pou kapab ale. Mon napa lenz. Manman in dir mwan i annan latwal zis pour mon de ser.”

Krab ti dir Ii pa trakase akoz i ti pou donn li en lenz. “Ler ou bann ser i fini pran zot ben, servi manze. Konman zot ale ou osi prepar ou. Met ou lenz ordiner, met ou soulye ordiner ki ou abitye mete apre debout dan lavarang. Veye si ou trouv en transpor ki vini. Konman ou war sa transpor, al kot laglas, pran ou levantay.”

Sandriyonn ti ekout tou sa ki Krab ti dir li. Anfen zot ti’n pare pour zot ale, sa madanm ek son de fiy. Sandriyonn ti reste kot lakour. I ti fer tou sa ki Krab ti’n dir li. I ti sanze, penny son seve e al debout dan lavarang pour li vey transpor. Krab ti’n dir Ii i pou donn li en lenz. I ti espere.

Konman i ti war transpor pe vini i ti tay kot laglas e pran son levantay. Anmenmtan i ti get dan laglas. Enkrwayab! I ti’n abiye dan en zoli rob, pli zoli ki i ti’n deza war dan son lavi. Apre i ti anbarke dan transpor e zot ti ale.

Ler i ti ariv laba, bal ti’n konmanse. Prens li, i ti pe dans avek sa fiy ki ti pli zoli parmi tou sa bann ki ti deza la. Sa dimoun ki ti pe veye obor laport ti reste sezi ler i ti war sa zoli fiy. I ti atrap Ii par son lebra, e anmenn li anndan.

Ler Prens ti war Ii i ti larg sa fiy ki i ti pe dans avek. Letan ki zot pa ti pe danse Prens ti met sa fiy asiz obor son papa ek son manman.

Minwi ti pres pour sonnen. Krab ti’n dir Sandriyonn ki fodre ki i ti kit bal avan ki minwi ti sonnen. I ti dir Prens ki ti’n ler pour li ale. Prens pa ti anvi i ale. I ti esey tenir Ii, me i ti sape e taye avan ki minwi ti sonnen.

Letan Sandriyonn ti ariv pres avek son lakaz, i ti debarke. Vitman i ti tonm dan son plas. Pa bokou letan pli tar son manman ek son de ser ti arive.

Lannmen bomaten zot ti koz zis lo sa zoli fiy ki ti dans avek Prens. Zot ti rakonte ki mannyer i ti ete, ki mannyer i ti zoli. Sandriyonn li, i ti fer konmsi i pa ti konn nanryen.

Lerwa li kot son pale ti demann avek son garson si i ti’n demann sa fiy son non.

“Non, mon pa’n demann li,” Prens ti dir.

“Ou pe rod zoli fiy ou pa’n demann li ki mannyer i apele?” Lerwa ti dir. “Be mon a donn ankor en bal. Sa voyaz fer sir ou demann Ii ki mannyer i apele.”

Dan kenz zour Lerwa ti donn ankor en bal.

Sa enn fwa krab ti dir avek Sandriyonn, “Ler ou pe ale pour anbark dan transpor pour retourn kot ou, sakouy ou kote lipye. Ou soulye i ava tonbe. Ou ale ou. Pa trakas ou. Prens Ii i pou tro kontan. I pa pou ganny letan pour demann ou boner ki mannyer ou apele. Zis i pou danse. I pa pou demann ou ou non.”

Son bann ser ek son manman ti ale e kit li deryer. Ekspre zot ti’n rakont li degre sa fiy ti zoli. Petet i ti ava vin ankor tanto. Pa bokou letan apre son transpor ti arive. I ti ale. Konman i ti arive Prens ti demann Ii pour danse.

Letan minwi ti pres pour sonnen Sandriyonn ti dir Prens ki i ti pou bezwen ale. Prens ti ser Ii pli for. I ti esey fer fason pour Ii kapab ale akoz sa bann dimoun ki ti anmenn li ti bann grenwir. Me Ii i pa ti konnen. Ler minwi ti sonnen sa bann grenwir ti pou ale. Zot ti pou kit Ii.

I ti profite letan en dalon Prens ti kriy Ii pour Ii ale. Ler i ti ariv kot transpor bann dimoun ti pe konmans prepare pour zot ale. I ti degaze, sakouy son lipye apre i ti anbarke. Sa kote soulye ti tonbe. Transpor ti ale.

Lannmen kot sato, ler travayer ti pe netwaye, zot ti anmas sa kote soulye. Zot ti montre Larenn. I dir, “Be get sa zoli soulye!” Larenn ti montre sa soulye son msye.

I ti dir, “Be sa pour sa fiy ki ti dans ek Prens, nou garson.”

Prens ti pran sa soulye e anmenn dan son lasanm. I ti mazinen ki son met ti pou bezwen vin rod son soulye. Me i ti veye, veye. Personn pa ti reklanm sa soulye.

Letan ti pase. En mwan, de mwan. Letan ti prolonze, me personn pa ti vin rod sa kote soulye. Prens Ii i ti kontinyen viv parey avan. Tou le zour i ti al pronmnen avek son bann kanmarad. En zour, letan zot ti pe marse zot ti war en pti lavil dan lwen. Dan vale ti annan enn de pti lakaz. Vi ki zot ti’n mars pour en kantite letan, zot ti asize pour zot bwar zot dite. Letan ki zot pe asize, enn bann soIda ki mars avek Prens ti war son lisyen pe pase avek sa kote soulye dan son labous.

Prens ti !eve pour gete kote son lisyen ti pe ale. I ti deside pour swiv son lisyen. Lisyen ti ale, Ii i ti swiv dousman deryer. Lisyen ti pas anba lapay, prens ti swiv li. Letan i ti’n ariv en distans i ti war en fiy pe anmas dibwa. Sandriyonn Ii tou le zour i ti al rod dibwa. Lisyen ti al kot Ii e donn li sa kote soulye apre i ti ale. Prens ti les Ii ale avan ki i ti apros sa fiy. I ti dir, “Sa soulye pour ou? Mon war mon lisyen in anmennen i’n donn ou.”

Sandriyonn ti reponn, “Be wi! Sa mon soulye ki mon ti al bal kot Lerwa. Ler mon ti antre dan mon kales mon soulye ti tonbe. La ou lisyen in anmase i’n vin donn mwan.”

Prens ti sirprann.

Apre i dir, “Ou ti al bal kot Lerwa. Be oli ou lot kote soulye?”

Sandriyonn ti dir li ki lot kote son soulye ti kot lakaz, me ki i pa ti pou kapab montre li akoz son manman ti telman pabon e i pa ti pou les Ii antre dan lakaz pour al serse. I ti pou dispit avek Ii.

Prens ti dir li ki son soIda ti ava al avek zot. Son manman pa ti pou kapab fer li nanryen. I ti met Sandriyonn lo son seval e diriz ver son lakaz swivi par son bann solda. Ler son bann ser ti war Ii pe vini dan lale lo seval Prens, zot ti ranpli avek zalouzi. Zot ti dir, “Get ou degenn! Ou zans pour mars ek Prens?”

Prens ti fer zot ferm zot labous e Sandriyonn ti al sers son kote soulye. Sa madanm, kantmenm i ti anvi anpes Sandriyonn antre anndan, i ti bezwen zis reste labous fermen. Papa Sandriyonn Ii i ti’n al travay depi bomaten .

Sandriyonn ti al dan lakwizin kot i ti fer tou son keksoz. I ti pran son rob ki i ti mete pour al bal kot i ti ‘n kasyet. I met son rob ek son soulye. I al dan lasanm son de ser e debout devan laglas pour penny son seve. Ankor enn fwa sa zoli fiy ti reflekte dan laglas.

Ler Sandriyonn ti retourn dan lavarang tou dimoun ti etonnen. Devan zot ti sa fiy ki Prens ti’n dans avek dan bal. Son bann ser ti demande kote i ti’n kapab ganny sa zoli rob, me zot pa ti oze koz for akoz solda ti’n antour zot. Prens li, i ti’n telman kontan. Nek i ti pran Sandriyonn, met Ii lo son seval e diriz dan direksyon pale son papa.

An arivan kot pale, i ti rakont son manman ek son papa ki mannyer i ti’n arive war Sandriyonn. Vi ki Sandriyonn ti sorti dan en fanmir pov, Lerwa ti bezwen deside si i ti pou otoriz son garson pour marye avek li. Finalman, i ti deside pour konsilte son bann konseye.

Prens li, i ti fer parey son labitid. Tou le bomaten i ti al fer son marse. Me depi ki Sandriyonn ti’n vin reste kot pale, avan ki i ti ale, i ti pas kot Ii pour dir li bonzour e koz en pti moman avek Ii.

Anfen, zour ti arive pour bann konseye enform Lerwa lo kwa ki zot panse i ti devret fer. Zot sef ti dir, “Mon Rwa, en garson konman ou Prens i devret marye avek en dimoun ki dan son ran. Sa fiy ki Prens i anvi marye avek i sorti dan en fanmir mizer. I pa pou kapab marye avek Prens. Toudmenm, pa bezwen pous sa fiy. I ava marye avek en garson ki dan son ran.”

Lerwa ti fer son rezon, apre i ti dir, “Be si mon dir mon garson sa, i pou ankoler.”

Me bann konseye ti dir Ii ki napa lot fason. Fodre ki Prens i marye avek en prenses. Alor, Lerwa ti donn lord solda pour anmenn Sandriyonn kot en lakaz ki ti andeor lakour pale royal.

Dan sa lakaz ti annan tou sa ki ti neseser pour Sandriyonn viv en lavi konfortab. Letan zot ti ariv kot lakaz, Sat, ki ti’n ganny met ansarz pour okip lakaz e pour fer tou sa ki ti devret ganny fer pour ki Sandriyonn ti viv byen, ti rankontre zot devan laport. Sandriyonn pa ti pou bezwen fer nanryen. Andeor baro ti annan soIda pour veye ki personn pa ti vin kot sa lakaz.

Ler Prens ti retournen sorti fer son marse, i ti al rod sa fiy, me i pa ti la. Tou dimoun ti dir ki fiy ti’n ale e ki zot pa ti konnen kote i ti’n ale. Pov Prens. I ti vreman sagren. I ti fer son rezon. I ti mazinen ki petet son papa ti ‘n anmenn sa fiy laba kot sa lakaz. I ti ale.

Vreman, letan i ti ariv kot sa lakaz ti annan solda pe vey baro. Zot ti fer li retournen. Alor i ti konvenki ki Sandriyonn ti la anndan. I ti al kot son papa pour esey plenny avek li pour larg sa fiy.

I ti dir, “Papa be sa i mal. Sel fiy ki mon kontan pour marye avek.” Son papa ti dir li pa trakase, ki Lil o Serf ti annan en lerwa. Sa lerwa ti annan en fiy. Prens ti ava marye avek sa prenses. Pov Prens, ki i ti pou fer? I ti bezwen ekout son papa.

Son papa ti envit sa lot lerwa ki ti reste Lil o Serf pour diskit maryaz son fiy avek son garson.

Li Sandriyonn, kot i ti ete, dan zarden ti annan en pye dibwa ki ti annan en balans. Tanzantan i ti al balanse dan sa balans. En zour, letan ki i ti pe balanse dan sa balans, en madanm ti arive avek en gro sak dan son lanmen.

Letan i ti ariv pres avek li i ti dir, “Ozordi ou maryaz ou pe zwe!” Sandriyonn ti reponn, “Be Madanm, mon pa pou marye mwan. Pa mwan ki pou marye.”

Sa madanm ti dir li ki wi, i ti pou marye sa zour e ki zot ti pou bezwen degaze.

Vitman, sa madanm ti prepar Sandriyonn pour son maryaz. Konman Sandriyonn ti’n fini pare dan son rob maryaz sa transpor ki ti anmenn li bal ti arive. Ladan ti annan en pti fiy. Sa pti fiy ti pou akonpanny li kot legliz. Sa madanm ti dir li ki i ti pou ganny son bouke fler kot legliz, me ki la zot ti pou bezwen degaze akoz Prens ti pe deza konmans mont mars peron.

Sa madanm ti dir, “Ler ki ou ariv laba, pou annan ankor zanfan pe esper ou. I annan enn ki pou donn ou ou bouke.”

Vitman Sandriyonn avek sa pti fiy ti anbark dan transpor e zot ti ale. Sa madanm osi ti ale.

Arivan laba ti annan en kantite dimoun kot legliz. Konman Sandriyonn ti debarke de pti fiy ti atrap son lake rob, en lot ti donn li en zoli bouke fler blan. Sa enn ki ti avek Ii ti pas devan Ii e gid Ii dan legliz.

Pandan sa letan, Prens ti’n fini pran son plas obor Prenses. Sa pti fiy ti al obor Prens e koz dan son zorey. Sa ti enteronp pret ki ti pe koz avek Prens ek son Prenses. Toudenkou sa dimoun ki ti pe zwe lorg ti konmans zwe sanson ki anons larive nouvel marye dan legliz. Tou dimoun ti vire pour gete ki ti pe arive akoz nouvel marye ti’n fini antre dan legliz e pret ti’n fini konmans seremoni maryaz .

O menm moman Prens osi ti vir deryer. I pa ti kapab reziste ler i ti war Sandriyonn, sa fiy ki i ti vreman anvi marye avek. Nek i ti vire, tay ver Sandriyonn e atrap li par son lanmen. Prenses li, i ti’n ganny sok. I ti tonm sek. Son fanmir ti degaze pour anmas li. Zot ti retourn avek Ii kot pale. Deryer kot legliz, Prens ek Sandriyonn ti marye. Personn pa ti kapab anpes zot marye.

Zis kan nouvo ek nouvel marye ti rantre dan zot lasanm en madanm ti aparet. I dir avek Sandriyonn, “Ou kontan ki mannyer mon’n fer pour ou? Mwan menm mwan sa krab ki ou ti abitye zwe avek. Mwan ou marenn fe. Ou pou viv ere avek Prens pandan tou ou lavi.”

Sandriyonn ti dir Ii mersi. Lannmen tou bann envite ti selebre maryaz sa Prenses avek kouzen Prens. Tou dimoun ti viv ere ziska lafen zot lavi.