Santan pour le voler en zour pour le met

Dimans ki vini si zot de madanm ti a la nou ti a vin pronmnen kot zot savedir mwan ek mon bonnfanm Layza parske dan Dimans nou la annwiye nanryen fer. Kousoupa i dir li, “ me wi si zot kapab nou de bonnfanm osi tya byen kontan pour vwar zot in pronmnen dan lakour Dimans ki pe vini.” Zot dir bay bay kanmarad e zot al se zot. An arivan kot lakaz Soungoula i dir ek son bonnfanm, “ Layza mon fanm nou’n ganny envite avek msye Moukate e son lenvitasyon mon asir ou ki i pou grave ki mannyer ki in esplik mwan son pozisyon ki i viv se li.” I dir avek Layza “ met pare mon enn menm ki mon annan dan mon fon lanmal, pas byen karo lo la e ou osi pa bezwen bliy ou sa ki pour ou.” Layza li osi in byen kontan. Koman son mari Ranmazwar i anons li sa lenvitasyon i dir Ramazwar par son pti non gate, “Razwar mwa met pare ou touboul e mwa kanz mon kazak byen en mannyer. En nou a fyer nou tou le de sa zour en.” Soungoula i dir avek li, “me selman tasyon ou bliy prepar mon fouro lake en.” Layza i dir, “pa traka ou Razwar mwa mazin tou ou lekipman e mwa met tou pare pour Dimans.” Dimans i arive, byen granmaten Ramazwar i leve i kriy son bonnfanm an dizan, “Iza Iza leve annou met nou pare.” Layza i leve i dir, “wi Razwar annou debouy nou byen boner parske zot pe esper nou laba.” Layza i al ouver sa vye lanmal ki Soungoula ti’n met tou son bann vye lekipman ladan, i tir sa enn menm vye touboul vole son bonnonm Ramazwar, i enstal byen son fouro lake ki i mete kan i fer en gran sorti pour anpes son lake paret dan son konnson e an menm tan sa fouro i en proteksyon an ka son vye konnson ya kapab defonse e son lake ya sorti deor parski personn pa ti konnen si en Soungoula vantar koumsa i kapab annan lake parey zannimo e alor Layza li osi i pa ti’n obliye kanz son kazak parey Ramazwar ti’n dir li. Ler i ti’n fini prepar tou zot lekipman, i dir avek Soungoula, “Razwar, la mon keker tou zafer in pare.” Ramazwar avek tou sa pake lapousyer ki ti lo li i nek anbark dan son bann dokiman ki Layza ti’n prepare pour li. Ler i ti’n fini anbark dan tousala an kontan son fouro lake. I dir avek son bonnfanm, “Iza mon fanm get mwan byen divan deryer si mon vreman kare kare.” Layza i get li byen e i dir, “la be wi Razwar mon mari, ou resanble pli zenn ki en garson ven-t-an.” Ramazwar i demann avek Layza, “eski ou’n verifye byen deryer mwan si mon lake in al byen dan fouro ? I pa paret gonfle pour dimoun letan mon marse pa remarke si mon annan lake ? ” Layza i pas byen son lanmen lo fon konnson Soungoula i dir, “me non Razwar napa okenn pti laparans si ou annan en lake ou par dir si ou annan lake ek ou.” Soungoula i dir, “oke alor, tou zafer i korek, annou ale.” Alor la zot al kot msye e madanm Kousoupa. An arivan laba Soungoula ki ti pe fim en vye pip ki i ti’n vole pour konper zako i kriye, “bonzour bonzour msye madanm, pangar lisyen.” Madanm Kousoupa i get deor i war tou le de in kare kare deor. I dir avek son bonnonm Moukate par son pti non gate, “Keke mon loulou konpannyen in arive byen bomaten.” Moukate ki pa ti pe mazinen si konpannyen tya kapab vin kot zanmi ki’n envit zot si granmaten koumsa i dir avek son bonnfanm dousman. “Zot Sikatris mon fanm deza zot in arive si granmaten koumsa sa ensinifyan sa. Zot tya’n donn nou letan prepar nou e met en pe lord kot nou lakour ki ou dir Katris ? ” Son bonnfanm Sikatris i reponn li i dir, “ me wi Keke, sa i plis ki ou annan rezon pour pran lakoler, ni menm mon koson mon pankor donn manze ankor si ti ankor dan ne-v-er, di-z-er koumsa me gran si-z-er dimaten !” Toudmenm kanmenm zot a esey dispit anba anba ki wa fer konpannyen in arive zot bezwen al rankontre zot e fer zot antre. Konman Soungoula i tonm dan en gran fotey dan salon i nek anvoy son kas lo son sou, i soufle en kou, konmsi i fer so. Madanm Kousoupa i vwar li fer sa i dir avek li, “msye Ramazwar si ou santi fer so tir ou palto met anpandan dan salon.” Me an dizan sa ti’n vin koman en sok pour Soungoula. Son leker i sote, i pe mazinen ki anba son palto i annan son semiz ki’n desire ki annan trou dan ledo, i reste zis plastron devan. I dir avek madanm Kousoupa, “tir ou palto apre ki ou’n marse e transpire i en pwazon pour ou lasante parski dokter in defann mwan fer sa depi ki mon ti fer en gran maladi depi dernyen ger mondyal ler mon ti’n fek demobilize dan larme koman kolonel.” Madanm Kousoupa i demann avek li, “msye Ramazwar koumsa ou ti en solda dan letan lager ou ? ” Soungoula i reponn li i dir, “sertennman madanm, mon ti premye kolonel dan reziman komandos e depi ki mon’n demobilize mon’n repran mon metye konm ekspert dan bann zafer lapes.” Ler Soungoula ti pe koz son bann pake manti son bonnfanm Layza ti pe dir dan son leker ‘ou pa ase donn back ou’. Ler Soungoula ti’n fini koz manti, msye Kousoupa i pran laparol. I demann avek li, “msye Ramazwar koumsa ou ti en gran boug ki zanmen mon ti konnen.” Soungoula i dir, “ar wi, lontan mon’n ekspert dan bann zafer lapes mwan me selman mon pa vantar parey agogo pour mwan pibliy mon metye partou kot mon pase.” Letan ki i pe dir sa, son move lespri malen i pas dan son latet. I dir, “ tou kalite pwason mon konnen ki labwet ki lapes zot avek.” An dizan sa i ti’n ganny lanvi manz bekonn. I dir, “la tel ki angi ki anba sa bann gro gro ros anba larivyer, sa ou lapes zot ek labwet bekonn.” Me Kousoupa ki dan son malen boug i ti pe rann li bet. I demann avek li, “ki mannyer i lapes angi avek bekonn?” Soungoula ki ti krwar i bokou malen, i dir, “sa i byen fasil. Ou zis anmar detrwa slays bekonn dan en bout laliny,ou fil sa laliny anba sa bann gro ros kot angi i reste, ou esper zot ler zot in byen anval sa bann slays bekonn epi la ou ris ou laliny anler dan en fason ki ler zot in byen anval sa labwet dan zot pans ki zot pa pou kapab sape dan laliny e ou a bezwen ris zot anler. Angi i vann ser konmela. Mon konn en gran msye ki pey a koud dis roupi pour en angi akoz i kontan kari angi li.” Kousoupa i ankor pe rann li bet. Letan ki i malen, i dir ek Soungoula, “me bon alor mon zanmi demen mwa al esey lapes en angi e mwa fer parey ou’n dir mwan.” Soungoula i dir avek li, “ me selman fodre ki ou al lapes byen bomaten koman i ankor labriz parske ler soley in for zot pa morde.” Kousoupa i dir, “oke alor mwa fer sa ki ou’n dir mwan. Mwa komans demen byen bomaten.” La apre sa zot in byen dezennen ansanm e tap detrwa grog ki Soungoula ti’n byen sou ler i retourn se li. An arivan se li i dir avek son bonnfanm, “si mon pa rin sa de zans fodre pa mwan Ramazwar.” Me pov son bonnfanm Layza ki ti touzour krwar sa ki son bonnonm Soungoula ti dir li i reponn. I dir, “si ou kapab fer sa pa tya move parske zot lour sa de zans.” Letan ki Soungoula pe dir ek Layza ki i pour rin Kousoupa, lot kote Kousoupa osi pe dir ek son bonnfanm, “Sikatris, sa Ramazwar i krwar ki i malen. I krwar ki akoz i toultan site dan zistwar e ki zanmen perdi dan tou sa ki i fer ya vin fer nou krwar lizour pour aswar ! Mwan Moukate mwa dres son pti lagel mwan e ya respe mwan pour leres son lavi. Bekonn ki i oule rin nou avek. Si sanmenm ya ganny son dekwa e petet menm tro.” Son bonnfanm Sikatris i demann avek li, “me ou a dir mwan ki ou a dres lagel Soungoula, ki mannyer ou pour fer sa ?” Moukate i dir avek li, “ler mwa fin fer li la wa konnen ki mannyer mon’n fer parske pa bon koz ou zafer ki ou pour fer avan ler sankwa si ou koze ou pa pour fer li e alor i meyer reste ou trankil ziska ou’n fini fer sa ki ou annan pour fer.” Alor lannmen maten, Kousoupa i pran detrwa trans bekonn i anmar dan en bout laliny. I al granmaten dan sa gran larivyer i fil son laliny dan en gran trou ros kot Soungoula in tranpe anba ros pe esper sa bann trans bekonn pour li manze. Konman sa bekonn i ariv dan fon ros Soungoula i bwar li. Kousoupa in fini konnen ki trik ki Soungoula pe zwe avek li. I fer konmsi i pa konn nanryen. I les son laliny tranpe en bon pti moman dan larivyer pour li donn letan konper Ramazwar manz son bekonn. Ler i konnen ki in fini manze la i ris son laliny. Soungoula dan son leker i dir ‘mwa rin ou si ou kontinyen reste Kousoupa gran zorey koumsa.’ Kousoupa i retourn se li i dir avek Sikatris son bonnfanm, “Katris mon fanm, mon pe les Soungoula manz ankor en pe plis nou bekonn pour li vin en pe pli gra epi mwa kros li.” Li Soungoula an arivan se li i dir avek son bonnfanm, “Liza, Liza mon fer sir demen mwa fer debrouy pour mwan ganny plis bekonn konmsa mwa kapab anmenn detrwa trans pour ou osi parske mon’n zwenn en Kousoupa gran zorey e mwa rin li si i kontinyen ekout tou mon trik ki mon dir li.” E alor Soungoula i al kot son bon zanmi Kousoupa e i dir avek li, “ki i dir mon zanmi ? ” Kousoupa i reponn li, “mon byen mon zanmi.” Soungoula i demann li, “me ou ti al esey lapes ou angi parey mon esplik ou ? ” Kousoupa i dir, “me wi zanmi me selman mon pa’n ganny sans pour kros enn.” Soungoula i dir li, “mon konnen akoz ou pa’n kros okenn angi parske mon asir ou ki ou pa’n met ase labwet bekonn dan ou bout laliny parske bann gro gro angi koumsa fodre ki ou anmar en pake bekonn antye dan ou bout laliny e ler ki en gro angi i anval en pake bekonn antye, sa i a pri dan son lagorz. Ler ya’n byen anvale e alor sa i pa pou kapab sape dan ou laliny.” Kousoupa ki pa ti bet e ki i ti pe fer krwar ki pe dormi ek pei i dir avek Soungoula, “oke alor demen mwa anmar en pake bekonn antye dan mon bout laliny e mwa ava espere ki sa voyaz mwa kapab kros enn sa bann gro angi.” Ler Soungoula i antann Kousoupa dir sa voyaz i a kapab kros enn sa bann gro angi Soungoula i sote i dir avek li, “ki oule dir pa wa kros enn pangar ou pe mazinen ki fodre ou met keksoz ek ou labwet dan ou bout laliny pour kapab kros en angi en parski gro angi pa krose sa ou zis ris li anler ler in byen anval ou labwet me mon konn tousala tre byen parske mon en gran ekspert dan bann zafer lapes.” Kousoupa i dir, “me mon pa pe mazin sa mwan me mon pe mazin pour mwan fer absoliman parey ou’n dir mwan fer.” Soungoula i dir, “tre byen alor si ou fer sa ki mon’n dir ou fer aval tou.” Kousoupa i dir li, “mon espere ki ou labous ya beni e ki mwal tou.” E Soungoula dan son leker i dir ‘en si ou antete reste gran zorey parey mon war ou mwa rin ou zot de ou bonnfanm Sikatris.’ E Kousoupa dan son leker i dir ‘en si mwan Moukate mon pa kros ou Ramazwar demen me pa mwan ki la.’ Alor Soungoula i kit son zanmi Kousoupa. I dir ek li, “bye bye my friend I’ll see you later.” Kousoupa i dir ek li, “bye bye my friend.” Zot fer tatar kanmarad e Soungoula i retourn se li. An arivan se li i kriy son bonnfanm i dir avek li, “Liza mon ser demen fye lo mwan mon pou fer ou manz bekonn ziska ler ou a relase. ” Layza i reponn li i dir ankor ou. Alor Kousoupa i lev granmaten i pran en bon mannyer lanmson i antour en pake bekonn toultour sa lanmson i al fil dan sa gran trou ros dan sa larivyer. Salerla lontan konper Soungoula in arive anba ros i pe esper son pake bekonn. Konman sa laliny i tous dan larivyer anba sa ros nek Soungoula i anvoy son lanmen i atrap sa pake bekonn i met dan son labous pour li koup en gob ek son ledan pour li anmenn en pli pti bout pour son bonnfanm Layza. Konman i met sa pake bekonn dan son labous zis koman i ale pour koup en gro gob avek son ledan, Kousoupa i ris laliny en kou for parey ler peser pe pik pwason ler i tous dan lanmson e an menm tan sa lanmson ki ti’n antoure dan sa pake bekonn i travers lalev Soungoula. Soungoula i esey debat anba sa gro ros pour li kapab retir sa lanmson ki’n travers dan son lalev me i pa kapab. I esey mont lo en ros epi larg son lekor anba an krwayan ki son lalev a desire e ya va tay se li. Me malgre ki i esey fer sa son lalev ti’n korde. Salerla letan ki i pe esey fer tousala son zanmi Kousoupa pe mor riye anler lo gro ros. I pe get li kot i pe danse anba dan son laliny. Ler Soungoula ti’n byen fatige e ki son lalev ti’n tro sansib ek lanflir ek douler e osi lafyev, Kousoupa i dir avek li, “granmoun touzour ti dir ki sa ki pa ariv dan san-t-an i ariv dan en zour e san-t-an pour le voler en zour pour le met.” Ler Soungoula i antann lavwa son bon zanmi ki pe koz ek li anler lo ros, i esey fer son dernyen debat pour li sape dan sa lanmson pour li tay se li pour li dir pa li ki ti la anba sa ros. Me sa voyaz konman i esey ankor son dernyen zefor, i nek tonm lanmenm dan larivyer ek sa douler ki ti lo li. Letan ki i ti pe ronfle ek lafyev ek douler dan larivyer anba ros, tou sa ki i ti kapab dir, “mwan Soungoula mon’n touzour vante dan zistwar, mon’n touzour anbet mon kanmarad e vol zot keksoz me sel boug ki’n arive vwar mon bout zis sa kousoupa ki apel Moukate. ” I kriy en kou byen for avek en dernyen lespwar. I dir , “Moukate mon bon zanmi sov mon lavi parski mon rekonnet ki mon’n mal fer.” Moukate i reponn li i dir, “si mon sov ou lavi la kot ou’n arive zanmen personn lo sa later ya kapab rakont en zistwar pour dir ki en Soungoula in deza ganny son mark arete dan zistwar e si mon les ou sape la kot ou ete, ou ava kontinyen anbet ou kanmarad e fer zot krwar lizour pour aswar e alor si ou santi ou’n mal fer parey ou fek dir mwan, sel konsey ki mon kapab donn ou se nek pran ou semen lanfer e mwan ek mon pake bekonn mwa touzour zwe mon makonn.” E de minit apre Soungoula i mor dan larivyer e dan lanmson. E sa ti premye Soungoula ki kanmarad ti donn li son mark arete.

Sa set en zistwar par Samuel Accouche, Santan pour le voler en zour pour le met.