SA MARK LAVERITE

Alors en zour ti anan troi ser: Baset, Daset et kaset. Tou lé toi ine grandi é zot ine ariv laz mariaz. Mé sakene I oulé fer keksoz ekstraordiner zour zot ane marié. Baset li prémié I dir:

• Mouan, ler moua ale marié, mon pou kui mouan zis en ti marmit diri ki mon pou met lo mon latab é tou dimoune I a manzé é I a resté ankor diri. Koumsa mon pa pou bézouen fatig mouan tou lézour.

Daset I pran laparol son tour:
– mouan, ler moua ane marié, mon pour anpli ene ti gargoulet plen en délo pou mouan met lo mon latab. Tou dimoune I a boir é I a resté délo dan gargoulet koumsa mon pa pou bézouen fatig mouan pou al larivier tou lazournen.

Kaset, li ki ti pli zene, I ti koz an dernié. Mé sa ki I ti dir ti fer drésé sévé son dé ser lo zot latet. I dir zot:

Mouan, ler moua ane marié, mon pou fer mouan dé piti:ene ti fiy eke ne ti garson. Mon fiy pou anan laline lo son fron tandiki mon garson li I ava anan en zétoil lo sa ki pou li.

Létan I pasé, lé dé prémie ser I marié é zot réisi fer sa ki zot ti oulé fer. Prézan I resté troizieme ser. Li ine marié é apré kek tan, I ti rétrouv li an void famiy. I bien kontan. Ler I akous, I gagne li ene ti garson ek ene ti fiy é son dézir I akonpli: ti garson I né ek zétoil lo son fron é ti fiy I annan lalin lo sa ki pou li.

Linet et zéto, sa de zanfan kaset, zot komans grandi prézan. En zour, Daset I vine rane vizit son pti ser. Létan I la, I rémarké poudir ki sa dé banben zot dé zoli zanfan. Alors, lazalouzi I né dan son léker, I mazinen ki I bézouen fer kek ketsoz é sa santiman zalouzi I grandi meme anedan dan son léker. I ti resté détroi zour kot son ser é en bozour, koman son ser tine sorti, I profit lokasion pou li pran sa dé pti piti pou li al zété. I met zot dan en boit é les zot désane dan kouran délo. Li Daset saler ine gagne li dé pti lisien, ine met zot dan plas sa dé zanfan é toudsuit I pran son sémen I foulkan…………..

Par movez sans, mari Kaset I rétournen; sa meme sa zour dan son sorti en voyaz dan en péi déor. Dek ki I ariv kot li, I zet lizié lo son madame é I konpran poudir ine gangnen son baba. Ler I al get dan ber, I oir dé pti zanimo pé dormi. I resté étonen. I pas lamen lo son lizié détoi foi mé la dan ber I pa oir lot ketsoz ki sa dé pti lisien. I santi en lakoler monté ek li. Ki I pou fer? I a bézouen démane son madame en bon lesplikasyon lo la. Son madame pa kapab done li en bon léklersisman parski li osi I pa fiti konnen ki ine arive pandan son labsans. Son mari pa tardé I amar li ek en gro lasene ek en pié diboi obor lakaz. Sa msié li saler I ankor pé kroir ki son madame I bien kone sa zafer. Antrétan, sa boit ine désane lo délo é en vié bonfame ki ti pé lave lo bor larivier ti pran ene ti baton é lapes sa boit. I ti kroir ki en lot ketsoz ki ti ladan – pétet ene ti larzan. Mé ler I dékouver sa ki ti ladan, I resté ébété. Bonefame, koman I ti anan en bone ker, ti désidé sov lavi sa dé pti inosan. I anmene zot sé li é elvé zot koman son prop piti. Saler li I ti napa okene zanfan.

Sa dé zanfan zot ti grandi kot sa madame ziska zour zot ti désidé pou kit lakour sa tantine. Zot tine gangne lanvi al dékouver ki ti anan dan lémone. Linet ek zéto. Mé li tantine ti san konsolasion ler zot tine alé.

Linet ek Zéto zot komans marsé. Zot marsé zot. Fernoir I fer, zot tonbé zot dormi telman zot ti fatigé. Lanemen bomaten ler zot lévé, zot trouv en gran zome ine débout dévan zot. Sa zome tine bien abiyé, en séval lo bor li éi ti pé tionbo en fizi dan son lamen. Marmay zot, zot tonnen. Bé saler zot pa konen poudir sa zome li meme li zot papa é li I pa ti kapab dévinen poudir sa son dé zanfan parski tou lé dé tine amar en serviette lo zot fron. Zot papa I dir zot:

• Eé marmay! Bé koté zot pé alé koumsa?

Zot répone:

• Nou pé mars mars en pé. Nou pa meme konen kot nou pou arive.

• I paret ki zot pé al dan meme direksion ek mouan ……

Bé dan sa ka mont lo mon séval é mon ava amene zot pli vit.

Pa meme lontan apré, sa dé marmay ti lo séval. Zot alé zot troi. Zot alé zot. Ene erdtan I pasé. Fore ki zot ti a pé traverse I komans vine pli kler. Zot kontinié zot sémen lo sa séval pou en bon boudtan. Ler soley ine bien pran lapant, zot ariv obor en gran lakaz. Pou prémié foi, linet ek zéto zot oir sitan dimoune pé marsé partou. Zot anvi poz kestion mé zot gard zot lalang o so.

Dan ene ti moman, sa kavalié I aret son séval. I sot ater premié é I fer désane ene apré lot. Létan sa zome ine al met son séval dan lékiri. Ene sa zanfan ine al dan bor lakaz é ine oir en dimoune amaré ek en gro pié diboi. I fer signe ek son ser pou li vini; la prézan zot dé zot ine oir meme soz.

Vini, zot a vine manz en pé. Zot doitet bien lafen pa I vré?

Marmay I suiv li dan lakaz. Pa konen kéler latab ine pare. Mé sa de zanfan zot réfizé pou manzé prézan. Sa msié pa gagne en konpran. I démane zot akoz zot pa oule manz sa bane bon bon fayo. Zéto I koz prémié é i dir:

• Avan ki nou a manzé, dir nou akoz oun ansene sa madam ek sa pié diboi?

I pa kapab done sa dé zanfan en répons ki kourt. Alors I met a rakont zot tou sa ki li I konen konsernan zistoir son dé zanfan. Ler ine fini rabas son bout, sa garson I démane li si I pa ti kapab tegne tou bane lalimier dan lakaz akoz I anan en sirpriz pou li. Relman sa zome I obéir li. Apré, linet ek zéto ti délarg sa serviette otour zot latet é nenk lalimier I anvaï sa lasame kot zot ti été. Zot papa I tranblé dan son kannson. Linet ek son frer I obliz li al larg sa madanm kot tine ansenen. Ler zot rétourn anedan, sa madame I dir:

• Zot la mon dé zanfan! Gété zot anan laline ek zétoil lo zot fron.

Sa msié ine fini konpran ki pé pasé. I tome lameme azénou dévan son madame é I démane li mil pardon pour tou sa soufrans ki ine fer li pasé. Son madame telman ki I tine kontan révoir son dé zanfan ine tou pré pou pardone son mari é I dir li :

• Sa kine pasé ine bien pasé. Mouan mon kroir ki tousala ine fini. Aprézan, nou a viv trankil isi koman en bon famir.