Informant: Mrs. Elina Brioche François, Anse Boudin, Praslin. 71 yrs. Recorded 25/07/2021. Researchers: Penda T. Choppy & Cindy Moka. Transcribed by Cindy Moka, Sept. 2021.
Be dan bann lontan parey mon pe akonte. Ti napa bann zafer televisyon se pe kisisa, zistwar. Sa ti enn nou bann keksoz ler nou fini manze. Sanmenm sa ki pour detann ou. Lot, lot I akont isi. Lot I akont laba.
Be li sa madanm toultan letan I tonm kot bann gro gro lakaz, sa bann letan bann dimoun ki ti annan, ki ti annan radyo. I pase enn defwa in pas kot lakaz en myse I tann radyo pe koze. Prezan li ler I tann radyo pe koze I debout I ekoute.
Prezan I dir “ be kisisa sa?” prezan ler in ale I akont sa avek son msye. I dir “ be mon ti desann kot sa imsye laba, mon tann en keksoz anndan ki pe fer enta tapaz konmsi, I pe akont en kantite bann keksoz. Be konmsi parler I fer ou per”.
Be la prezan sa imsye I dir,”kwa sa:”
I dir “ mon mari mon pa konnen”
“be demen bomaten nou a desann ansanm”
Be li sa msye I ti travay. Be kot sa imsye ti travay li, li osi son bourzwa ti annan radyo. Ler li I desann prezan la I ariv vizavi ek sa lakaz. Radyo I pe ouver I pe akont enn de bann keksoz ki pe pase.
I dir “ mon myse ou tande?” I dir” be konmsi ou a kwar mon tann li nonnm non ende bann dimoun tou”. Prezan I ekoute, I dir pa koste obor laba. Keksoz wa kwar konmsi I grav”. Prezan sa imsye I dir “ mon tande”.
Prezan I dir “ be ou ale, al travay, mwan mon pou retournen mwan”
Reelman, prezan sa msye I ale, I al travay kot son bourzwa laba. Be konmsi kot son bourzwa osi I annan radyo. Ler li in fini travay deor li konmsi. Son bourzwa I kriy li pou li al netway park lisyen. La prezan la konmsi ler I ariv dan lakaz imsye radyo pe koze pe nonmen konmsi bann, lanons bann nouvel enn de bann keksoz. Prezan I ekoute I dir sa wa dir menm zafer ki mon fanm ti dir mwan. Prezan ler I pe netway park lisyen I a pe netway vitman, vitman konmsi I enpe per. Ler I fin netway park lisyen reelman in fini I anmas son sak. I al kot lakaz. Ler I ariv kot lakaz laba I dir avek son, son madanm I dir, “ Be ou konnen kot mon travay I annan sa soz la, monn tann li pe fer tapaz, I pe akont en bann keksoz.
I dir” be mon mari, lotan monn dir ou, ou pa oule ganny en konpran mwan ou.” Prezan I dir “ be ou tasyon ler ou al kot sa msye ou al dan problenm”.
I dir “ be mon fanm, mon tandem wan ler mon pe lav park, letan mon pe lav park lisyen.” Mon tann zot nonm non en de dimoun se pa ki isi, sepa ki laba,” I dir “ Be mon kwar si I kontinyen koumsa mon pour bezwen kite.” I dir “ be mon pour ale mon demen. Mon a get ankor si keksoz I parey”.
Prezan son madanm I dir ek li “mwan mon pa pour vin ek ou mwan. Ou ale ozordi” li I reste kot lakaz. I ale I fer son louvraz parey labitid.
Be konmsi ou a kwar son bourzwa ti pe fer son panse. Anndan kot li ti annan en kantite keksoz. Son bourzwa I dir ek li anvanler ou ale pas kot mwan I annan en pti keksoz pour mwan donn ou. I annan en koze pour nou koze. I dir “ wi msye”. Prezan kantmenm li in dir wi imsye. I a pe ekoute menm laba anndan laba li. Reelman in fini in fer son netwayaz laba deor. Ler I fini I debout, debout enpe lwen.
Msye in fini dezennen tou. I dir “ ou pe ale la?” I dir “ wi bos” I dir “ be I annan en koze, pour nou koze la.” I dir vini. Be li kantmenm in dir li vini la. sa radyo sa imsye ti ouver pe donn nouvel, pe donn, donn bann zafer. I mont ek en bann lafreyer. Prezan dan son leker I dir ki pe arive. Sa ta tapaz ki mon tande, sa ta soz ki pe fer anndan. Prezan Gran msye ti pe kriy mwan, pa pour al perdi lavi la anndan ozordi.
C. Moka: Be pa i pe kit travay
Mm. Elina: Prezan sa msye I dir li, asiz la. I dir “ Asize, mon pour koz ek ou en kou nou pour dyaloge.” I dir “ Wi msye”. Solman ler I asiz konmsi i asiz enpe
C.Moka: san pozisyon?
Mm. Elina: konmsi elwa niye. “ Be ki arive? Konmsi ou per?” I dir “ Non msye, konmsi mon pe tann en soz la.” I dir “ Be oun travay ek mwan, mom kontan ou servis” I dir “ imsye pour fer ou kado en keksoz”. Be sa le msye pour donn li enn pti radyo. I dir “ Msye pour donn ou en keksoz akoz ou en bon travayer.
I dir “ Be ki kalite keksoz msye?”
I dir “ Ou pour war taler, mon pou fer ou kado en pti radyo.” I dir “ Msye ki pour fer ek sa pti radyo” I dir “Ou pa tann mwan pe koze” “ msye radyo” I dir li wi. I dir “be kisisa sa. Sa msye I antre anndan I al sers sa pti radyo.” La ou kado lapenn ki ou fer mon louvraz byen. I dir be Msye” sa pa I fer dimal dimoun sa”. I dir “ e ekoute sa pa fer dimoun dimal, sa lola ou pou ouver ou pour ganny tou ou lenformasyon, tou nouvel” Prezan msye I dir li “ get mwan byen ou ouver sa pti bouton ki la. “ I get li, solman li I gete. “ Sa I pa touy dimoun sa. I a touy dimoun I pa fer narnyen sa. Ou pou ganny tou ou lenformasyon, ou pou ganny nouvel, I kapab zwe pti sanson tou ou kapab danse.”
“Msye, vre sa?”
I dir li wi. Msye I montre li ki mannyer pour ouver I montre li ki mannyer pour fermen. I pran I met dan son pti bwat tou I fermen I donn li. Be taler keksoz pour ariv kot lakaz. Ler tantin pa ankor konnen kisisa li I tay radyo laba.
Msye I vini byen vantar I met son pti radyo dan son sak. Msye I konpran enpe. Ler I vini, myse pa ankor dir tantin narnyen. Prezan tantin I dir li “ ki mannyer ou pase ozordi?”. Monn ganny kado ozordi. I dir” ki kado oun gannyen?”. I dir “ ou rapel de fwa, kot nou ti pe pase laba. Ou ti dir pour dir ki bannla I annan en nespes zafer ki fer dimoun per. Pe taye pe koz for napa lenformasyon. I dir “ Be I annan enn la dan mon sak.”
I dir “ kwa”.
I dir “ I annan dan mon sak”.
I dir “ Non tantin, be ekoute pa tay konmela”.
I dir “ la ankor, ou pe al met mwan dan en bann problenm. Mon fek dan problenm, monn taye laba kot ti annan sa bann zafer la ou vinn anmenn ankor kot mwan.”
I dir “non ekoute, mwan ava esplik ou.” Prezan konmsi I ouver sa radyo, ler I ouver sa radyo tantin I demare. Tantin I taye, prezan li I tay deryer tantin ek radyo.
C.Moka: Be I pour tay plis non.
P. Choppy: picture ou pe fer ilistrasyon sa zistwar.
Mm. Elina: taye mon dir ou. Prezan zot tou lede tantin I kriy lasasen. Toulede taye kot n’arive, n’ariv kord gard. Tantin I antre anndan dan kordgard, prezan msye osi I antre. Gard I demann ek sa madanm. “ be ki I arive?” be konstab ou le fer mwan kwar, I annan en soz ki fer mwan per, I touy dimoun. La in pran enn in anmenn kot lakaz I oule touy mwan avek. Prezan gard I dir be tyanbo en kou prezan.
Prezan sa msye I dir. “ I dir I dan enn pti bwat konstab. I dir ler ou ouver I fer en ta tapaz, mon per prezan. Prezan, ladan in nonm non dimoun. Tou bann zafer. Sepa kisisa.
I dir ekout en kou. I dir msye antre. Sa madanm in vin fer konplent kont ou, pour dir ou annan anmenn keksoz ki disturb li. Prezan konstab I dir avek li be kwa sa.
I dir “ be konstab en radyo. Mon fek ganny sa ek mon bourzwa. I dir mon osi mon ti per li mon pa ti konn zwe. I dir mon bourzwa mon travay byen kot li. I dir mon bourzwa in fer mon kado sa pti radyo”.
I dir “be ni mwan ni li person pa konnen”. I dir” be mon bourzwa in ed mwan, in esplik mwan. Prezan mwan monn ouver radyo pour nou ganny nouvel kot lakou”r. I dir “be mon madanm I taye”
. La prezan gard I dir ekoute. La mon pour esplike la. I dir “ madanm, mon konnen pour dir sa I en keksoz ki pa tou dimoun ki annan. I dir sa ou konnen ki mannyer I apel, sa I apel radyo. I dir ladan ou ganny nouvel, ou ganny lenformasyon, I zwe sanson, ou pour kapab danse ou pou met kot ou lakaz. Ou ganny tou sa nouvel ki ou konnnen I pa touy dimoun, I pa dezoner. Fodre ou konpran”.
Prezan I dir “ konstab pour mwan asire. Sey ouver ou menm mon ava ekoute?”
La prezan Gard I pran radyo I ouver, met li lo pos. I dir” be koumsa I zwe, koumsa, I zwe koumsa. Apre la ler ou fini…”
I dir “Anr, alors, koumsa”
I dir “ wi”
Zot ale zot de, pran ou radyo. Ler ou anvi ouver li, ouver li zot a ganny zot lenformasyon, ou a ganny ou nouvel. I pa touy dimoun sa. Pa taye pa fer sa bann zafer, radyo sa”.
“ Ar, konstab,la prezan monn kwar dan ou pou dir ki sa…anr li menm li radyo li.”
I dir “ wi ladan ou anmenn kot ou lakaz ou a ganny lenformasyon.”
Prezan letan mwan…
Zot ti sorti zot toulede, zot anmenn zot radyo. La prezan zot ganny en konpran pour zwe sa radyo. Prezan mwan, mon ti napa enn. Ler mon pas laba obor li mon dir li “ be fer mon ganny en pti radyo. Mon osi mon anler lo montanny. Mon ti kapab ganny en pti radyo pour mwan ekout tou bann lenformasyon”.