Bonswar bonswar a tous. Nou prezant zistwar Kreol. Tanto nou zistwar i apel “En Pti Zwazo E En Pti Souri”.
Ti annan enn fwa ti annan en pti zwazo e en pti souri ki ti de gran zanmi ansanm. Zot ti reste dan en vye pyedibwa. Tou le zour, zot al rod manze e zot partaze. Zot manze ki zot ti rode ti prensipalman legren. En zour sa pti zwazo ek sa pti souri ti’n ranmas en kantite legren, plis ki tou lezot zour e etan ki zot ti napa naryen pour fer, zot dir avek kanmarad, “Annou zwe partaze, enn pour mwan, enn pour ou.”
Tou le de ti’n byen dakor e zot ti konmanse. “Enn pour ou, enn pour mwan. Enn pour ou, enn pour mwan.”
Zot in ale koumsa ziska ler ti reste zis en lagrenn. Koman pour partaz sa enn dernyen? Alor pti Souri i dir, “Mon a pran sa enn akoz mwan mon’n travay plis ki ou pti zwazo. Mon’n fouy later e la mon grif i fermal.”
Me Pti Zwazo pa ti dakor. I dir avek souri, “Non, sa dernyen lagrenn pour mwan parske mwan ki’n travay plis. Mon’n anvole pour mwan al rod lagrenn partou e ziska prezan mon lezel i ankor fermal.”
Afors diskite, dispit, sa de zanmi i konmans lager. Ki zot lager? En pti lagrenn! Zis en pti lagrenn ki pou fer zot gat zanmi. An mezir sa pti zwazo ek sa pti souri i lager, zot fer tapaz, zot dispit e sa tapaz ki zot ti pe fer, tou zannimo dan zot vwazinaz ti antann. En pti kou, zot lakour ti’n plen avek geter. En moman apre, en vye lisyen i vin tir lager e i demande si napa okenn lot zannimo ki a oule vin avoka dan sa zafer akoz li in pare pour ziz sa zafer. Li, i pou vin ziz.
Dek ki lisyen in fer sa sizesyon, i sorti en koson. Sa koson i dir, “Mwan, mon a vin avoka tou le de.”
Vye lisyen i dir avek sa koson, “Me non. Ou a vin avoka pour enn ant souri ek zwazo. Ou pa kapab vin avoka tou le de.”
Koson in komans dispit ziska en lot lager in leve, e set fwa, vye lisyen ek koson, ziz ek avoka ki ti lager. Letan sa vye lisyen ek sa koson pe lager, i fer en koudloraz ek en koudzekler e sa pti souri ti’n telman per, i taye i al kasyet anba en ta lapay. En pti kou lager ti arete parske tou zannimo ti per zekler ek loraz. Zot rod souri partou pa vwar li. Zot ti krwar zekler in bril li e alor zot tou zot taye an dizan, “Si nou reste la, zekler a bril nou osi. Annou sove.”
Letan zot pe taye, ziz lisyen i may dan en brans sek, i bat ater. Li i ti devan akoz i tay pli vit. Prezan ler li i tonbe, koson i vin par deryer. I may lo li e li osi i tonbe. I kas trwa son gran krok. Tou zannimo ki vin apre sa, zot may lo kanmarad, zot bat ater, zot tonbe e dan tou sa pake dibri, pti zwazo pe le esey fer zot konpran napa naryen pour per parske detanzantan dan bwa ou antann loraz e vwar zekler. Me ti fodre zot tou zot ti’n bat ater e preske pa kapab leve pour zot antann sa pti zwazo pe esey koze pour fer zot konpran ki dan bwa, dan lafore, souvan kan lapli i tonm for, ou antann loraz e osi i annan zekler.
Ler tou keksoz ti’n en pe trankil e ki zot tou zot ti’n konpran, pti souri e tou lezot zannimo ti finalman dakor ki sa lagrenn an plis pa ti devret pour pti souri. Sa lagrenn an plis ti devret pour pti zwazo ki pli malen ki zot tou. Zis li ki ti kapab dir zot poudir dan lafore souvan i annan loraz ek zekler. Alor la tou lager ti arete, tou dimoun ti tonm dakor. Pti Zwazo ti ganny selman en lagrenn an plis ki Pti Souri e zot ti kontinyen zanmi, reste ansanm e rod lagrenn tou le zour pour partaz avek kanmarad.
E avek sa nou ariv a lafen nou zistwar pour tanto, ki nou espere zot in byen kontan. Fotespere Dimans prosen zot a ekout ankor.