PTI ZAKO

Ti annan en léroi… Léroi Sésel. Dan sak péi I anan en léroi. Ine maryé, son madame ine arivé mor. I tine fer dé zanfan ek son madame. Ine fer pti Zan, ine fer Heléne.

Mé li sa léroi Sésel la, tou sa péi ki ou konnen I pour li. Tou lé zour I bézouen ale vizit tou sa péi. I kit sa fiy ek sa garson la konmsi ek son bane serviter dan lakour, ek son solda. Tou lé zour I alé, ler I vini son fiy I bien meme.

En zour I alé. Zis konman I débarké I get anler lo barzar I trouv lafis. “Son fiy ine an vwa-d-famir”. Léroi I dir “Kisasa, pou moi en roi, sa gro laonte pour moi. Ki manier mon fiy ine kapab an voi-d-famiy. Mon ti kit li bien. Dan lakour pa pas persone plis ki mon solda é mon serviter”. Ler I désane ankouri kot laboutik, manman ine garni partou lo pié koko. I tap dan son kales I met anba. Léroi ine bébet ine mésan move kalité. I monté.

Ariv lao vréman I oir son fiy ine bel. I ti meg. Koman I vini I get son fiy, I is en kou son sévé, I tir en bren, I zet ater. Ine mésan. Fiy I vini I dir bonzour papa. Pti Zan I dir bonzour. Léroi I dir ek Pti Zan. “Pti Zan ale laba, pran mon fizi ou konnen mon fizi. Pran ou ser anmene li dan boi. Fizié li anmene son leker pour moi fer mon sos blan pou mon dézenen”. Pti Zan I alé. I dir:

• “Hélène, anmas ou pti lenz nou pé al dan boi”.

• Ki pou fer dan boi”.

• “Apré mon a dir ou, annou. Pa fer papa oir sa lenz, kasiet zis ene pour ou ale mété, apré larestan mwan mon a anmenen. Tanto mon a anmenen.

Relman zot monté zot dé, marsé, marsé, zot zouene en bon trou ros. En zoli kavern ros. – “Helène, mon met ou la, mon ser, pa bezouen per, kanmeme asoir mon pou vine konpagne ou mwan. Mon a vol en pti payas ek en zoryé mon a anmennen. Mon a anmene en pé manzé pour ou. Mon a rod en pé dité mon a vine done ou. Kanmeme bomaten mon a gagne en pti lanbéli mon a anmenen. I dir: – “Mon frer mon per”. – “Papa I dir mouan touy ou, anmene ou léker pour li, mé mon pa pou kapab fer sa.”

Relman bondié I pitié li, I pas en kabri maron, koman I viz lo sa kabri, I gagne li meme. I touyé, I ouver kabri, I tir léker. Léroi osi pa kone loder kabri. I anmenen I dir: – “Papa lala”. – “Ale done kouk lala dir li fer en bon lasos blan pou mouan dézenen”. – “Kouk, papa I dir ou fer en bon lasos blan avek sa léker pour son dézenen. Ti Zan I balans latet I dir: – “Sa en papa feros alor”. Kouk relman I fer. I démane kouk – “Ine pare? Kouk I dir li – “Wi”. Serviter I met lo latab tou. Pti Zan I pran son gazet anndan I lir.

Prézan I dir ek serviter ale dir ek prens Zan manzé ine pare. Pti Zan I dir, – “Dir papa mon a pé fini lir mon gazet, taler ki mon a vini.

Prémié pla I pou ale sanmene, I asizé I manz tou sa léker. I pa pou done pti Zan, I manz tou li meme. Pti Zan I get sa I dir dan son léker. “Alor vré I ti a manz léker mon ser”.

Pti Zan I pran son gard manzé, I pran son manzé. I pa pou manz la li, I pou manz zot dé son ser. I pran tou son zafer I met dan son sak, I bate. I anmenen I donn son ser anba ros. Zot manzé zot dé. I dir li: – “La mon bézouen pa tardé, mon bézouen alé, tanto vey mwan. ”

Son ser I dir – “Mon per”. – “Pa bézouen per. La monn anmenn en gran kouto avek mwan, mon a koup kat pti fours mon a fer mon kadréman, en pti tartar, tanto ler mon a vini mon a rod détroi baton mon a met lo la, mon a met sa pti payas lo la, nou a dormi.

Relman dan pti never, pti Zan I traversé ek son payas, zoryé, tapi. Gran kouto, I alé, laline I kler, I koup détoi morso diboi ron. I met lo la atraver en longer, zot tonbé zot dormi. Bebet I ronflé I kraz pié diboi, zansla I la. Pa manz zot ditout. La I dir ek li mon pa pou kapab tardé, koman kok I santé dir moi, si mon pa tandé. Ou, ou pa pé renté, moi ki pé renté, moi pé anmene manzé pou ou. Vey bien.

Vréman en ler I tane kok pé santé. I dir pti Zan kok pé santé. La I tayé an désandan. “Taler papa pou rod moi”. I arive, I pa dormi I asize dan fotey I lir son gazet meme.

En ler son papa I kriyé, “Pti Zan. “Oui papa”. “Ki ou pé fer?” “Mon apé lir”. “Mon ti kroir ou pa la”.

Tou lé zour koumsa. Nenene I dir ek léroi, “Me prens Zan tou lézour kot I dormi”? “Akoz”? “Me lili bomaten ler mon vini I touzour bien parey mone aranzé”.

Léroi I démane pti Zan. Zan kot ou dormi”? “Mon papa, isi meme, I dir “bé akoz”? “Mé lili tou le bomaten i parey”.

“Mé non, ler mon lévé, moi asize mon lir mon gazet, mon narien fer mon aranz mon lili, I moins lafatig pou nennene”…

En zour, I oir son ser I bel meme, komsi I onté, I pa kapab dir en parol ek son ser. Mé son ser personn pa pas la, sa en keksoz bondié kine anvoy pou li sa.

En zour I vini, I vine anmene manzé, I trouv en pti zako blan, piti son ser, sa zako I tayé koman I vini, I dir – “Manman, la tonton pé vini”. – “Mouan tonton zako, é ! ou !” Zako pé may dan son lipié, I pé alé pou tape, son ser I dir li:

“A, Pti Zan pa tap li, mon piti sa”. – “Helene mon ser, pti zako”? I dir “oui”. “Mé sa mirak sa”. Sa pti zako I dir – “Mé pa mirak tonton, tonton konman mon pé dir ou, ler ou monté tanto anmene moi en kes zouti”. I dir: ‘E, ou la, pti kouti, ki ou pou fer ek zouti, en zour kouti I travay”?

“Bien relman mon kontan oune done moi en non kouti. Mon bien kontan. Tanto anmene mon kes zouti ou tandé”. Pti Zan I dir oui mon pou anmenen zouti, tanto. I alé kot forzron I tay sa bane bout feray, I ranpli en kes tou son kouraz, I dir la moi done zako zouti. Saler zako pé espéré laba.

Relman I monté ek son kes féray. Koman zako I trouv li ine bien kontan. “Tonton oune anmene mon kes zouti”? I dir: “Oui mone anmenen mon boy. Annou ariv laba mon a met ater. Ler I met ater zako I gété. “Ar ! mé sa zouti, mé tonton, bane féray tayé mon pa oulé moi”. I pran tou I zété.

“ Bé pa toupé ankor, bé ou kone zouti, bé pa sanmeme zouti”. – “Be sa zouti sa, napa ni en lars ladan, ni teryer, ni galer, ni en four mon pa trouvé”. Pti Zan I kalkilé, mé sa en gran malen, alor, mé demen moi anmene zouti. Si I pa kone zouti ma done li en bon bate”.

Relman demen I asté li en bon kes zouti, divers kalité. Zako I dir “Manman la tanto, si tonton pa anmene mon zouti, I pou gagne louvraz nou dé”. I tayé, I ale zouene: – “Bonsoir tonton”. ‘Bonsoir”. – “Oli mon zouti”. “Oui mone anmenen”. “Anr oune anmene parey ou ti anmenen yer. La oune ale sers salté anba laba ou vine met la ankor, prezan moi mon a tir salté akoz moi mon pti pti, mon a nétoy lakour ankouri. Ou sa lakour ou a resté ou tousel mon pa resté la dan sa salté koumsa ditou. Tonton I vini, I après meme, I tionbo dan kanson. “Ou a désir mon lenz”. “Met ater mon a gété”.

Ler I mété I tionbo I dir: A sa oui, sa zouti tonton. La oui mon konpran prezan ou en ome ou konpran zouti”. I dir “Bé ou zako ki ou konpran dan zouti”. “Mon zako mon pa kone naryen dan zouti, bé bon, tonton la ou pou ale, kan ou pou désane kot gran papa anba”? “Be ou annan granpapa ou”? “Mwan, wi, bé kan ou pou désane? Dir moi, ou pou vine dormi tanto”? “Oui”. “Demen ou pou vine ankor, démen ler ou pou vini ou pa pou oir mwan ou, mon pé ale pour en an en zour”. “Ki ou pé al fer”? – “Mon pé ale fer mon sato, mon a tir mon manman anba sa ros, en zour mon a dir ou bonzour”. Ki sa zour”? I véyé, I dir: “Manman tonton pe vini, mé si i vini mon apé alé mwan”.

Son landemen tonton i arivé. “Tonton la mon pa gagne létan zwé la, mon dir ou bonzour, la mon alé, pour en an en zour, mon a fer mon lakaz’. Pran son zouti, i lévé li meme i anmenen lo son latet.

O, i mars lo dé lapat. Alé, i alé dan fore son gran papa meme, propriété son gran papa. I batiy li en labati, en sato, pli bel ki pou son gran papa, tou défréyé ladan.

Gagnen son en an en zour, i vini i dir “bonzour manman”. Manman I pléré, ine kroir son piti ine mor. I dir: – zako kot ou sorti”? – “Kot mon sorti, mon sorti fer mon lakaz. Tonton pa ankor arivé”? – “Pa ankor”. “Pa pou tardé, mon vine sers ou pour nou alé”. “Vine sers mwan ankor, kot ou pé anmene moi lakaz dimoune, ou kone fer lakaz dimoune”. “Pa lakaz dimoune lakaz, zako. Mon esper tonton.

Koman tonton i traversé. I tayé i al zouene li dan simen. “Tonton oune oir mon lakour”. “Ou gagne lakour koté” “Dan mon é ou pou per pou antré ladan, mon vine sers manman, sa pti manzé sal ki sorti anba pa pou pasé kot mon lakaz, manman pa manz sa ditou ozordi, ditou”.

Relman i fors manman pou alé. Manman pa oulé kit son ros, ine abitye ek son ros, I dir: “anmene li fer li gagne pousé dan lakaz dimoune”. I dir manman mon dir ou annou”. “Mon bezouen anmas mon lenz”. ‘Sa bane pti lenz pouri mon dir ou zété, pa pou anmenen sa bane fimien dan mon lakaz non. Pez son pti payas. “Ditou, mon dir ditou, ou pou anmene bane bebet, zensek sé moi, sa zet laba meme. Manman i pléré, en pti moman, bis i monté la anba sa trou ros e lev sa gro manman. I dir: “Tonton annou mon a anmene ou montré semen”. “Bé ou kot ou pé anmene moi ou tour taler gran papa a pé anba”. Relman zot alé.

Fine ariv laba son maman i get sa lakour i tonm febles. Dokter en pti kou ine arivé. I tir li la met li anler dan sétieme létaz. En pti moman ine lévé. Koman i fini lévé osi, servant ine pare laba dan dous, tou kalité santi bon ki ou konnen i annan. Madame pti moman ou pa konnen ine klaté, klaté, pa annan pli zoli madame ki ti la anba ros i ti vié vié.

Prezan pti zako fer en dinen. Konmsi batem son lakaz, i bat lazeneral, tou zensek, noir vine manzé lo son loner son lakaz.

Li sa léroi, gran papa, I santi sa loder manzé, I dir ek son solda marsé ale démandé koté sa loder manzé ki mon konpanyen, nou pa kapab manzé, nou resté nek boir délo, mon vant I plen.

La solda I marsé, marsé, I suiv sa loder, I oir en lalé, fler zoli, anndan I klaté ler I get anler. Prezan I vini, I annan set portie bare, prémié portié I kriy solda. Solda I vini, vine gété ki I annan, pangar kapab anmene lager. I dir ki annan. “Mon oir en solda kine arivé la ki I vine fer? Demane li. “I démandé ki ou vine fer isi”. “Mon roi I anvoy démandé kot sa loder manzé I sorti, li ek son konpanyen I pa kapab manzé”.

“Alé dir sef pti zako lao”. Dernien portié I alé. “Fer moi oir oir sa garson la”. I vini I tir son figir, I dir “bonzour imisié”. “Bonzour imsié zako”. ‘Ki ou vine fer sé moi”? “Mon roi I anvoy moi démandé, kot sa loder manzé I sorti, li ek son konpanyen pa kapab manzé, I resté nek boir délo”.

“Alé dir li mwan, son pti zanfan, mon imsié zako kine pran prosésion sé li, si I pa kontan mont limeme prézan” . Alé dir sa laba. – “Kot sa loder I été”? “Mon roi en pti pti zako I dir moi dir ou li imsié zako ine pran posesion sé ou, si ou pa kontan mont ou meme”. I dir – “En ! pa posib”.

Léroi I get en taksi déor. En pti moman taksi I roulé déor. Ene pti kou I ariv laba. I get sa laklerté, I tournen. Son fiy I pé promnen anler. I bate sa lenz ki lo li pa vo pou antré la.

Ariv laba I dir ek son ménazer, son metres. “Sa lakour pa kapab antré”. “Bé ki ou vine fer”? “Mon vine rod ankor en lenz mon a met lo mwan, mon lenz pa vo”. I alé, I ale fouyé, kankréla ine manzé, évit tou manzé, sanmeme ki I gagnen pou ale lao laba.

I alé. Ler I ariv laba, I tane kannon kot pé salié, térib, I tonm febles. Pti zako I vine zouene li, I dir lévé, mwan ou pti zanfan, pti zako kine dres bord sé ou, la ozordi, mon prens zako moi.

Sey ouver lizié pou gété, I tonbé. I dir pa tonbé, mon prens zako. Dokter I mélé, anmene li lopital lao. I ouver lizié get ankor, I tonbé, I lev li ankor. I pran konesans.

I dir: – “Be la kot mon été”? kot ou été, ou kot zako, mwan prens zako. Ki manier mon manman ti resté anba ros”? “Bé ou sa, sa fiy sa”? “Bé li meme”, mon démane en gran ekskiz, mon pa konen ki mone fer, pardone mwan pti zako é meme ki mon kapab resté ek ou”? “Mon pa bézouen ou sé moi, ou annan sé ou, ale sé ou”. “Bé ou ki manier oune pran posésion sé moi”? “Monn mon vine pran par mon maman, mon resté lo par mon maman”. Léroi I alé. Son tonton I vine ankor, I vine kot son maman, I esper son tonton.

“Tonton mon dir ou bonzour ankor, la mon alé, mon ale pou en an en zour. Mon ale rod en mari pou mon done maman prezan. Maman napa en mari mon ale rod ene pou done li”.

Son maman I dir: “Pti zako kot ou pé alé”? – “Maman, mon pé ale rod en mari pou mouan done ou, ou a démane moi kot mon pé alé, ou resté la, ou napa en mari”. Relman I alé.

I ale kot léroi, Ariv laba kot sa léroi, Prens pé pas pasé dan lari I trouv pti zako I dir: – “Mé zot mé get sa pti kouki, mé I zoli”. Zako I répone “Kouki I zoli, mon vine rod en plas pou moi travay”. “Mé ou ki ou pou kapab fer”? “Mé tou sa ki dimoune I fer mouan osi mon a fer sanmeme”. “Papa mé get sa pti kouki.” “Kouki”? “Mon roi bonzour”. “Mé kot ou sorti”? “Mon sorti isi meme, dan ou péi, mon resté dan boi, zako pa I resté dan boi, mon vine rod en plas pou moi travay , mon mizer”. “Ki ou kapab fer”? “Kanmeme fer lakuizine, mon kapab fer”. Prézan Prens I dir “Non papa, pa gou pou met li dan lakuizine, en zoli pti zako I dévré met li o salon, I tro prop”.

Prézan met li dan salon, ou kone zako ek sa malelvé, létan konpanyen I vini, I sot lo latab, pran manzé, frot frot dan figir, anvoy dan figir prens. Prens I bézouen siporté, prézan prens nek I la, “Sa malelvé fodré ou kite ou oir ler mon pou ale par la, mon pa oulé ou sivré mouan”. “Mon pou vini moi”. Saler I oulé gagne prens pou anmene kot son manman. Prens pa konnen li.

Ti annan en lot léroi, léroi Bourbon. I ti annan en zoli manmzel, zoli zoli, pli zoli ki, I annan sis prens dan sis péi. Tou lé sis ine vini pou démane maryaz. Prens kot zako ti resté I a fer set prens. Li pti zako I kontan suiv dimoune, Prens pa oulé ki pti zako I suiv li, I pé ale demane maryaz sa fiy. Koman prens in pran son kales, li prézan I dir: “Prens anmene moi”. “Non ! mon pa pou anmene ou, ou tro malelvé, mon pa pou anmene ou. Alé, ou, ou pa pou anmene moi, moi gété kot ou pou alé”. “Lekel ki pou anmene ou”?

Zako ine kasiet dan kales dan en kouen sak kot persone pa pou trouv li. Zot ine alé. Koman I débarké kot Bourbon, zako I tay dan lakuizine. Persone pane oir li. I kasiet li dan ene pti kouen. Dan kouen ti anan en pilon, I mont pilon ine déviré, li ine antré anba la, pilon ine apiy ek lakuizine zis pou li gagne ler.

Prémié prens I vini I done senk san roupi kuizinien, I done en fiol poizon pou met dan manzé prens pou touy li akoz I pou maryé ek sa prenses. Tou le sis prens I vini zot fer parey. Kuizinien I pran larzan I met dan tiroir.

Prézan I fer dinen pou léroi. Fiy I o milié. Tou sa zene, sétaki ine sakene son koté. Ine asiz obor sa ki I ti pli kontan, I ti kontan prens Sésel. Sa prens ti apel prens Sésel, parey gran papa pti zako. En lot prens lanmeme abor. Tou I oulé gagne koté fiy mé zot pa pou gagnen. Koz kozé lo latab. Lot I dir servi, servi komsi zot kanmi pou kozé. Fiy pov diab I lévé I servi. Prémié manzé li meme. Koman I avalé, I tom sek. La prézan sa sis prens I dir Prens Sésel ine touy sa manmzel.

Léroi I dir kisasa, I tionbo li I met li dan kaso noir. Zako pé get bien zafer manier pé pasé.

Asoir zako I sorti I alé. I suiv masone, suiv masone, I trouv en bon trou I pas ladan. I antré. Arivan, laba, prens Sésel ine sézi. “Pti zako oune ariv isi?” “Ariv isi? Ou pa ti oulé anmene moi, mé ou konnen ou pou mor ou.” Pti zako ki manier mon a fer pou mwan mor”? Saler pti zako ine mars ek son papié, fountain pen tou dan pos. I dir ek li fer testaman mon a sov ou lavi, pou ou maryé ek maman”. “Pti zako ki testaman mon apé mor”. “Mon pou dir ek léroi ou meme ki ti touy sa mamzel ou konnen si ou pa pe maryé ek maman”. “Pti zako mon dan lapene”. Ki lapene, mon apé tir lapene dan ou figir, dir moi si ou pou maryé ek maman”. Pti zako I fer konmsi I alé. “Pti zako vini”. “Mon dir ou kozé ene foi”. “Oui”. “Bé ki oui, ki manier pou fer. En, la papié siny testaman”. I fer en bane baton lo papié, I done zako. “Ki ou kroir mon pa kone lir bé sa pa en testaman sa pa bon. Mon pou dir léroi ou meme kine touyé, ek sa mon apé kasiet ou défo, ou ti ansame pou touy fiy”. Pti zako I sorti pou li alé. “Demen dernien zour ou pou mor ou konnen”. “I dir pti zako vini. Zako I vini. Sa voyaz I fer en bon testaman. I dir oui. Pti zako I dir, “Mon manman I zoli nova, ler ou a oir sépa si ou a lé kit li, pa pou lé les li marsé, en vilen boug koumsa mon apé sov son lavi”. I fer testaman tou I done pti zako. Pti zako I alé I antré anba son pilon. Prézan sa kuizinen asoir I vol manzé I done prens Sésel dan kaso. Asoir pti zako I ale ankor. “Bé ki dir I pou bon meme, sa zafer, mon alé, moi montré léroi testaman, ou meme ki ti touy fiy. Mon dir bag ou meme”. “Pa fer sa pti zako, mon a maryé, mon pa kapab ni manzé”. ‘Bé ou pa pou manzé meme ou dinen”. La dernien meme dir moi. “Oui”, pti zako maryé”. La zafer I so meme, ziri ine arivé. Landeman ener I ale tir li, tou bane gro gro abitan ine arivé, bane sé mésié, monté, sa sis pretan osi ine arivé. La pou touy li. Met bando tou, koman pé al tap laklé, I oir ene pti zako I sorti, tik, tik, ine arivé. Tou dimoune ine bet, zako kot I sorti? Zako kot I sorti? Zako kot I sorti, I sorti lanmeme.” “Bé bon mon roi avan dimoune I touy son kanmarad pa bézouen ziz li avan”.

Léroi I lévé. “Avan ou kondane li ou a bézouen ziz li avan, ou ti zizé sa zafer”? Léroi I dir li non. “Bé alor ou a bézouen zizé”. “Bé ki manier nou pou ziz sa zafer mon fiy ine mor”? “Bé ou ti oir ler I ti touyé, ou pa ti oir? Mwan ki ti oir les mwan akont ou. Ale get laba lakuizine, ou a oir en ta larzan ine mété, I pey akout senk san roupi pou touy sa fiy, pa ti pou touy sa fiy ti pou touy prens Sésel. I anan sis fiol poison, alé ale gété”. Alor relman tire, sa ki ti donen”? Sa sis prens. “Sa ki ti mété”? Kuizinien . Li touy kouzinien, touy sis prens.

Prens Sésel prézan I ganny large, I fay, I pa kapab marsé. Met li dan son kales zoko prézan I ansame. Dan simen zako pé koz touzour, “La prézan ki ou dir, pou ale en kou kot manman”? “Zako mon ale en kou dan lakour, mon pa kapab marié”. “Mé dan lakour I annan tou keksoz. Laba ou a pli bien ankor, dokter tou sa la lanmeme, kot maman? Ou a trouvé ki zafer ou a gagnen ek moi”.

Ariv kot li I dir bonzour maman ek papa, I dir pti zako pa rakont sa ki fine arivé. “Pa akonté, si ou pa vine dan lakour ou a gété si mon pa pou akonté, mon pou montré papié. Alor zot boir dité tou, dormi. Zako I la ek li lo lili, “Zako les mon dormi”. “Annou alé”. “Demen”.

Landemen bomaten pti zako ine arivé, “Nou pou alé oubien non”? “Espéré”. “Mon roi…”. “Pti zako pa fer sa”. I fer sa pou fer per prens Sésel. Apré I dir, “abé, ekskiz moi, mon ti pé kri prens Sésel, mone obliyé mone kriy ou”. “Pti zako mon a done ou en larzan”. “Mon pa oulé larzan mwan, mon vine rod en mari pour done maman, mone dir ou mon oulé larzan? Mon dir ou, mon oulé ou pour done mon maman”. “Mon pa ankor oir ou maman”. “Mé ou a ale oir li laba meme mon dir ou”. “Soley pé kousé, mé la ki ou dir prens Sésel ou alé ou pa alé”? “Zako asézer isi, kot nou pou alé”? “Sa voyaz pa kapab, mon pou ale kriye mon roi meme”. Pti zako pé pasé pou ale kot léroi. “Pti zako pa dir naryen”. ‘Bé annou alé, degaz ou, mon dir ou, mon a fer léroi tenny ou, ou konnen”.

Relman I ale get sa fiy ki pti zako touzour pé anmerde li. Baté dan kales, zako divan. Ariv laba I oir fler zako ine zoli , zoli komsi son lenz pa vo. I pé kas en fler. Pti zako I done li lo son lanmen. “Kit sa pa ti pou ou sa, ou ti pé fer ou granoir, pa ti dir mon maman I Vilene. Get mon maman anler”. Ler I get anler nek I tom febles. “Léve pa tonbé, I done ou zoli fiy ou a tonm febles, lévé”.

Pran anmenen, dokter I mélé. Ariv laba sa fiy I traverse, maler, I tonbé meme. “Ki ou ti kroir, ou ti kroir I parey sa vié manmzel ki laba, mon maman I Vilene. Maman zako en zour I kone vilen, pli bien ki ou manman laba”. I lévé, pti zako I dir: “Manman la mone anmene en mari pour ou la, ki ou dir, ou kontan ou pa kontan”?

Son maman I dir: “Bé oui pti zako mon kontan”. “Mone anmene en konpagne pou ou la, ou kroir mon pou resté ek ou ankouri, mon pou alé moi”. “Pti zako kot ou pou alé”? “Soign bien sa zome, la mon dir ou, ou osi soign bien mon maman, mon pou alé mon kit ek ou, la mon lakour tou. E fiyansé pangar a sové, pa pou ale ankor anba ou, done ou tou keksoz isi, done ou tou lenz, tou zafer ou pou gagnen”. Pti zako I done tou son zafer I fiyansé, pey lafis, maryé, lenvitasion en kantité, lazénéral ine baté, kantité dimoune ine vini, léroi I pou monté I tane sa loder manzé. I kone landroi prézan I a monté, I vine gété. I tane nek kannon partou. Léroi I vini, I démandé ki annan.

Zot dir li maryaz ozordi, pti zako ki fer maryé son maman ti en par pou léroi. I fer konnen ki li imsié zako I a fer maryé son maman. Léroi pa ti kapab fer maryé son maman, li I a fer maryé son maman.

Léroi I vini, I asisté maryaz. Persone bane fiy pa oulé dans ek pti zako. Ou tane: – “Mon pa dans ek zako moi”.

Zako I dir: “Ki fer zot pa dans ek moi”. I dans ek son maman, I tionbo lanmeme dan lanmoitié leren kot I arivé zako I dans lo ene kartié, lake I balans deryer, marmay I riyé. I dir: “riyé zot”. Ler ine ariv minwi zako I mont anler lo latab rone, latab I viré. Son maman I tayé, I dir: – “A zot, la mon piti I krazé”.

Ler I sorti anba latab rone, pa annan pli zoli prens o mone, son vetman ki ine mété, manman, I oulé kas lizié. Tou zene fiy prézan, zot get sa zoli garson. I dans ek zis son maman meme. Ene I dir: -“Madame, prêt moi en kou kavalié.” Zako I dir- “Ditou, taler mon ti pé rode dansé, pa ti oulé moi, mon pa pou dans ek zot, ditou”. La ler I fini, zako I dir bonzour son maman, son boper, zako I disparet. I mont droit dan lesiel. Zot get li kot I alé, I perdi pa oir li osi ditou.