PRENSES ZORANZ

Mm. Paula Chetty

Ti annan en fwa dan en rwayonm byen byen lwen en lerwa ki ti annan Ii en sel garson. En zour ler sa garson ti’n ganny laz maryaz lerwa ti apel Ii e dir,”Mon garson in ler pour ou marye. Mon pa pou viv pour touzour. In ler pour ou rod en konpanny pour ou.”

Son garson ti reponn,”Papa isi dan sa lavil mon pa war okenn fiy ki mon a kapab marye avek. Mon pou bezwen fer en long voyaz pour mwan nobou rod enn pour wan marye.” La vreman prens ti pran son zoli seval blan e i ti ale. I ti voyaz dan lafore pandan en kantite zour ziska ki i ti war devan Ii en vye pti kabann. I ti desann lo son seval e tap laport. En vye tanti n ti sorti e ti demann li,”Mon garson ki ou bezwen isi?”

Sa prens ti reponn,”Mon bezwen en fiy pour mwan marye.”

Sa tantin ti dir Ii antre. Alors prens ti anmar son seval e i ti antre. I pa ti konnen ki sa tantin ti en vyey fe. Ler i ti’n antre sa tantin ti donn Ii en sez ek en latab. Prens ti asize e lo sa latab tantin ti met en soukoup, en kouto, en ver ek trwa zoranz. La i ti eksplik prens poudir sa bann keksoz ti en bann keksoz mazik e i ti dir Ii ki i pou fer avek. I ti dir li,” Retourn kot ou papa, al obor larivyer. La ou a koup sa premye zoranz avek ou kouto mazik e i a sorti en fiy ladan. Sa fiy pou tel man zoli ki i pou ebloui ou. Me konman i sorti fodre ou donn Ii pe delo pour bwar. Si ou pa donn Ii i pou disparet. Answit koup sa dezyenm zoranz e ladan osi pou sorti en fiy. Li osi i pou demann ou en pe delo. Si ou pa donn Ii Ii osi i pou disparet. Ou a koup trwazyenm zoranz e menm zafer pou arive. Si ou pa donn sa trwazyenm fiy delo ou pa pou ganny okenn fiy pour marye avek. Ou tande?”

Prens ti dir,”Wi, mon’n byen konpran sa ki ou ‘n dir mwan.” Salerla i pa ti ni rode akfer tantin ti’n dir Ii pou annan trwa fiy. I ti’n tel man kontan. La i ti anbras sa tantin remersye Ii e i ti pran semen retour pour al kot son papa. Ler i ti arive i ti al direk kot larivyer e i ti koup sa premye zoranz. Zot! konman i ti fer sa ti sorti en zoli fiy! Prens ti telman ebloui par son labote ki i ti bliye donn li delo. Nek i ti pe admir li menm zanmen fini. Me toutakou zis sa manmzel ti disparet devan son lizye. Se la ki prens ti realize sa ki i ti’n fer. Toudmenm i ti pran kouraz e koup dezyenm zoranz. Pa mank le kou ti sorti en fiy, enn pli zoli ki sa lot ankor! Zanmen prens ti’n deza war en tel labote. Nek i ti gete labous ouver e bliy net si i ti fodre donn li en pe delo pour bwar. Byensir fiy ti disparet. Pov prens. Ki pour fer? La i ti koup sa trwazyenm zoranz an dizan son lekor ki i pou fer sir ki sa voyaz i donn sa fiy delo pour bwar. Vreman konman i ti koup zoranz en fiy ti sorti e sa voyaz pa kapab eksplike kimannyer i ti zoli! I ti pl i pli zoli ki sa de avan. Me avan prens ti konmans admir li nek i ti donn li delo pour bwar e la fiy ti reste lanmenm e prens ti nobou admir li son kantite.

Prens ti deside pour anmenn li anndan dan pale me i ti dir avek li, “Ou rob pa ase bel pour anmenn ou dan pale mon papa. Fodre mon al rod en rob pour ou. Esper lanmenm la mon ava al dan pale rod en zoli rob pour ou. ”

Relman sa fiy ti dakor e prens ti ale. Me letan i ti ‘n ale sa fiy ti telman per kot i ti pe debout ki i ti mont anler lo en pye dibwa. Kot i ti ete anler son figir ti reflekte dan larivyer.

Preski o menm moman en negres ki ti travay kot en msye ti vin kot sa larivyer pour vin ranpli son kris. Letan i ti pe bese pour pran delo i ti war en zoli figir. I ti’n fini krwar ki sa ti son figir. I ti konmans kriye,”O ke ze swi zol i! O ke ze swi zoli! Ze swi bel, ze swi emab, ze swi si zoli! Kel prens ki pou kapab epouz mwan?”

Letan i ti pe dir sa sa zoli fiy anler lo pye dibwa ti konmans riye. La sa negres ti remarke ki pa ti kapab son refleksyon akoz pa li ki ti pe riye. I ti get anler lo pye dibwa e i ti war sa zoli fiy son zoli seve tou an dezord. Negres ti demann avek li, ” Manmzel ki ou pe espere la?”

Fiy ti reponn, “Mon pe esper mon prens arive. I’n al dan pale pour al rod en lenz pour mwan mete pour li kapab anmenn mwan dan pale.”

Sa negres ti dir avek li, “Ou seve i tou an dezord. Desann mon ava penny ou fer ou zoli koumsa ler prens i a vini ou a pli zol i ankor.”

Vreman sa manmzel ti desann lo sa pye dibwa e koste kot Ii. La sa negres telman i ti zalou labote sa fiy i ti pran en gro zepeng e i ti anfons dan latet fiy. Konman i ti fer sa nek sa fiy ti sanze degize e vin en zoli pizon blan. Pizon ti anvole anler dan Iesyel. Deswit nek negres ti grenp anler lo pye dibwa e pran plas sa fiy.

En pe letan apre prens ti traverse. I ti kriye,”Zoli fiy, zoli fiy oli ou?” Negres ti reponn,”Ze swi la lo pye dibwa anler.” Prens ti lev latet e ti war li. I ti dir,”Kwa? Ou menm ou mon zoli fiy ou? Non, mon pa krwar. Pa ou mon zoli fiy.” Me negres ti dir,”Mwan menm mwan. En vyey fe in pase i’n degiz mwan i’n fer mwan vin koumsa.” Alors ki ou a fer prens ti bezwen pran negres menm, fer li abiy dan sa zoli lenz ki i ti’n anmennen pour sa zoli fiy e anmenn Ii kot pale son papa. Me ler lerwa ti war sa negres i ti dir,”Mon garson ki ou’n anmennen?” e tou bann konviv, tou sa ki ti Ia ti vir ledo avek zot. Prens tou ankoler ti al dan son lasanm pour al dormi.

Saler negres li ti’n antre dan pale konmsi depi lontan i la e konmans konmann tou sa bann serviter. Zot tou zot ti’n fatige avek li. Kan a lerwa li i pa ti ni antren li e prens osi. I pa ti kapab kontan Ii akoz i ti toultan mazin sa zoli fiy ki ti’n sorti dan zoranz. Zanmen i ti oule krwar ki sete limenm Ii sa vilen negres. En bo zour letan negres ti pe asize dan pale i ti war apoze dan zarden sa pizon blan ki an realite ti sa fiy degize. I ti dir avek en serviter,”Ou war sa pizon blan ki laba? Pran touye, nou a fer en bon roti avek.” Vreman serviter ti al atrap sa pizon pour touy Ii pour al fer roti. Sa letan la prens ti anler lo son balkon pe get tou sa ki ti pe pase. Me i pa ti dir naryen. Letan serviter ti pe touy pizon trwa gout disan ti tonm ater. Konman zot ti tonm ater nek deswit ti pous trwa pye zoranz. Prens ti get lo pye zoranz e ti remarke ki ti annan trwa zoranz lo la. Tou le trwa ti byen mir. Prens ti desann e ti kas sa trwa zoranz e anmenn anler dan son lasanm. Ariv anler i ti pran son soukoup ek son kouto mazik. Apre i ti ranpli son ver mazik avek en pe delo. I ti koup premye zoranz. Sa premye fiy ti sorti me prens ti dir,”Pa sa ki mon oule,” e i pa ti donn Ii delo alors fiy ti disparet. I ti pran dezyenm zoranz. Dezyenm fiy ti aparet e prens ti fer parey. La i ti koup trwazyenm zoranz e son zoli fiy ti aparet. Deswit prens ti donn Ii en pe delo pour bwar.

Zot, konmsi i ti’n vin pli zoli! Prens ti dir,”Sanmenm sa ki ti pour mwan.” Prens ti konmans riye ek lakontantman. Son paran ti tande anba e ti tay anler pour gete ki ti ape pase. Zot ti tap laport lasanm e dir,”Be ou fou!” Prens ti kriye,” Non, mon pa fou, vin gete sa ki mon’n war.” Zot son papa ek son manman telman zot ti kontan ti donn li lanmen danse dan lasanm anler. Negres Ii anba pa ti konnen ki ti ape pase anler dan letaz. I ti pe konmande menm anba dan pale. Salerla zoli fiy anler ti pe rakont prens tou sa ki ti’n pase kimannyer negre ti’n anbet Ii e fer Ii degiz an pizon. Ler i ti tann tousala prens ti’n fini ankoler. I ti pe mazinen ki kalite pinisyon i ti pou kapab donn sa move negres vilenn. I ti al anba kot negres e demann Ii en pake kestyon. Negres ti reponn tou. Dernyen kestyon ki prens ti demann li ti, “Si en dimoun in fer kek krim, ki kalite pinisyon fodre donn Ii?”

Negres ti reponn,” Ler en dimoun in fer krim, be… son pinisyon, ou met Ii lo en lapel, ou alim ou four byen so, ou met Ii antye dan sa four.”

Ar, sa i zis gerizon! I’n dir pour limenm!” Prens ti dir. La prens ti mont anler dan letaz e ti redesann anba kot negres avek son zoli fiy ki i ti kontan. Ler negres ti war sa fiy, i ti konnen poudir ti sanmenm sa fiy ki i ti’n pik avek zepeng dan latet e ki ti’n sanz a pizon blan. I ti kriye,”Pardon prens, pardon prens.” I ti tonm azenou dan lipye zot tou pour demann pardon. Sa zoli fiy ki ti osi annan en bon leker ti dir zot pardonn Ii e gard Ii lanmenm dan pale konman en serviter. E vreman zot ti les Ii. La lerwa ek son madanm ti deside pour fer en pli gro maryaz ki ti’n deza annan dan sa rwayonm. Prens avek son zoli fiy ti marye e zot ti viv ere ansanm pour touzour.