PRENS SABOUR

Alors ti annan en lerwa ki ti annan li trwa fiy. Me dan tou la bann I ti pli kontan sa enn dernyen. Sa lerwa ti kontan navige. En zour avan i al navige I demann avek son trwa fiy:

“Sa ki kontan mwan isi?”

Zot tou zot reponn ansanm:

“Papa mon kontan ou.”

I demann avek son premye fiy:

“Be ou ki mannyer ou kontan mwan?”

I dir:

“Papa mon kontan ou koman dimyel.”

Son dezyenm fiy I dir:

“Papa mon kontan ou koman disik.”

Son dernyen pti fiy ki I ti pli kontan I dir:

“Papa mon kontan ou koman disel.”

Son de ser I profite I dir avek zot papa:

“Gete, kanmenm ou pli kontan nou pti ser, nou, nou pli kontan ou ki li parske nou kontan koman dimyel avek disik e li I kontan ou koman disel. Ou pa servi ou latet. Ou devret kontan nou plis ki li. “

Zot papa I reponn:

“Mon pa konnen mwan zanfan. Be I dir mwan I kontan mwan koman disel. Petet I annan en rezon akoz I dir mwan sa. Me la mon pe ale, ki kado mon pou anmenn pour zot.”

Premye fiy I dir:

“Papa anmenn en rob kouler letan pour mwan.”

Lot I dir:

“Papa anmenn en bel bwat lapoud.”

Sa enn dernyen I dir:

“Papa ou kapab anmenn en sak labour pour mwan akoz mon oule fer mon kousen avek labour.”

Zot papa relman I anbarke I ale. Ler I ariv dan por avan I retourn se li I al aste en rob kouler letan pour son premye fiy ek en gro bwat lapoud pour son dezyenm fiy. I mars partou ziskan ki I ti’n fatige, me I pa ganny okenn labour. Zis avan bato leve I mazinen poudir I pa kapab antre se li san sa bal labour. I retourn ater e I al dan en lotel lanmenm obor, I demann avek sa met lotel:

“Eskiz mwan msye eski ou vann labour isi? “

Sa boug I dir:

“Wi, me la monn fini vann tou sa ki ti annan. Mon krwar I reste mwan zis en bal dan kwen.”

Lerwa byen kontan, I aste sa bal labour pour li anmenn pou son deryen fiy. Ler I ariv kot li I donn zot tou zot kado. Dernyen pti ser I ganny son bal labour. Li osi I byen kontan. Son de ser I riy li. Zot dir:

“Me sa I fol. I fer papa sorti sepa ki kote avek labour koko pour anmenn pour li.”

Me sa zenn ser I dir:

“Wi, mon kontan mon labour koko pour mwan al fer mon kousen.”

Toudmenm I pran son sak labour koko I anmenn dan son lasanm. En zour swar I sote dan son sonmey. I sezi ler I get dan plas son sak labour e I war en zoli garson asize. I asize lo son lili e I koz ek sa garson. I dir:

“Be ki mannyer ou fer pour ou la?”

Sa garson I dir avek li:

“Ou ki’n fer anmenn mwan la. Ou ti fer demann aste sa sak labour. Me mwan menm sa sak labour. Mon apel prens Sabour.”

Sa fiy ti’n deza tann nonm en prens Sabour. I dir:- Alors ou menm ou prens Sabour?

Sa garson i dir:

“Wi, e mon pe demann ou ou lanmen an maryaz. “

Sa fiy ki ti’n fini kontan sa Prens I leve lannmen bomaten e I dir avek son Papa:

“Papa monn ganny mwan en garson pour marye avek.

Lerwa osi byen dakor komans fer preparasyon pour maryaz. Prens Sabour I al dan lakwizin e I fer domestik prepar diferan pla. En pla kari ki’n met disel ladan, enn ki’n met disik e enn lot ki’n met dimyel. Ler ou pas atab envite I vini pour gout sa bann pla. Zot tou zot tay lo sa enn ki annan disel. Ti annan osi en pla kari ki ti napa ni dimyel, ni disik e ni disel ladan. La Prens Sabour I demann avek bann envite:

“Lekel pla kari ki pli bon dan sa kat pla?”

Tou dimoun I dir sa enn ki annan disel I pli bon e zot pou manz zis sa enn. La Prens Sabour I dir:

“Me mon panse ki sa fiy ki mon’n marye avek I pli kontan son papa ki son de ser.”

La bann envite I demande akoz I dir:

“Li I ti kontan son papa koman disel, son premye ser I kontan li koman dimyel, son dezyenm ser koman disik.”

Me lekel pli bon parmi sa trwa? Pa nou’n trouve poudir tou dimoun I pli kontan sa pla ki annan disel? Sa ve dir sanmenm ki pli bon.

La relman zot marye byen kontan tou le de . Zot pa ti al reste dan pei Prens Sabour akoz sa fiy pa ti oule kit son de gran ser avek son papa. I ti tro kontan zot pour li reste lwen avek zot. Me sa de ser in ganny en gran laenn pour zot pti ser akoz zot ti pli gran e zot pa ankor ganny maryaz. En zour, telman zot laenn ti’n for, zot zwenn kanmarad pour diskite. Sa enn pli gran I dir:

“Annou touy mari nou pti ser.”

Lot ser I dir:

Be ki mannyer nou pou fer? Akoz papa pe vey zot konmsi zot de pti poul tann. I pou difisil pour fer li en ditor.”

Gran ser I dir:

“Annou pran boutey nou a kraze, nou a met dan son matla. Ler I a vini sorti lasas I pou tonm lo son lili telman I pou‘n fatige. Sa bann ver boutey I ava antre avek li partou .”

Relman sa de zans zot kraz zot boutey byen fen e zot met dan matla sa de zenn marye. Prens Sabour koman I vini I dir avek son madanm I ava al alonze akoz I en pe fatige. Koman I ariv dan son lasanm nek I kas son lenz lasas I anvoy laba e I larg son lekor tou son longer lo son lili. Tou sa ver boutey I antre avek li partou dan son ledo. Sa bann ver boutey ti sitan fen ki pa ti kapab tire dan son ledo. I tonm bokou malad. En zour dan son maladi I dir avek son madanm:

“Mon ava retourn dan mon pei mon ava al sonnyen. Isi personn pa pou kapab sonny mwan. “

Relman sa garson I al dan son pei pou sey al rod gerizon. Son ledo ti’n preski pouri antye. Son madanm I reste dan pei son papa. En zour letan I pe dormi aswar I reve son defen manman ki dir li:

“Mon fiy, koup ou seve an garson. Met ou en labiyman dokter. Esper fernwanr fer e al dan lavil Atar. Marse e ou a konnen kote ou mari ete.”

Sa fiy bomaten I leve e telman I ti trakas son mari I ti al fer koup son seve san mazinen ki I pe fer. I abiy li koman en laskar, I sove, I ale. I marse pour en bon pe letan ziska ki I ti’n fatige. I tonm anba en pye dibwa I dormi. Enler I sote dan son sonmey. I get anler I war de marten vini, en konper avek en konmer, zot sorti dan nor. Tou le de I apoz lo en brans.

Konper I dir:

“Bonswar konmer.”

Konmer I reponn:

“Bonswar konper”.

Konper I dir:

“Kot ou sorti?”

Konmer I reponn:

“Mon sorti en pe lwen.”

Konper I dir:

“Bokou lwen?”

Konmer I dir:

“Wi be mon’n pas dan lavil. Mon tann dimoun pe dir ki I annan en garson ki pros pou mor. In ganny blese avek boutey dan son ledo e son ledo pe pouri. Me napa en dokter ki kapab sonny li.”

Lot I dir:

“Vre?”

Konmer I reponn:

“Wi mon dir ou. Me I senp li ganny gerizon. Ou war nou plim ki tonm ater ler nou pe pennyen, I ti ava anmase, griye e bat avek delwil koko. Apre I ti a pran I ti a pas lo son ledo. Ou ti a trouve si I pa ti a geri.”

Konper I dir :

“Vre?”

Lot I reponn:

“Wi! Zot mwan mon ase koze. Taler dimoun I a vini I a tande.”

Tou le de I dir bonswar kanmarad e zot ale. Li, sa manmzel, in reste trankil anba pye dibwa e in ekout tou sa konversasyon ki pe pase anler, in mark dan son karnen. I anmas enpe plim ki’n fek tonbe, I met dan son sak I ale. I ariv dan sa lavil e I demann met lotel en plas dan lotel. Sa met lotel I get li epi I demann li:

“Ou pa i en dokter laskar ou?”

Sa madanm i reponn:

“Wi, mon kapab sonnyen.”

Met lotel i dir:

“Be mon annan mon garson ki’n arive sorti dan en lot pei me i malad en kantite. Napa en dokter ki kapab sonny li.”

Sa madanm I reponn:

“Mon a sey sonny li petet mon ava reisi. Be mon ti a voudre war sa garson avan.”

Ler I antre I war son mari in dormi vant anba. Son ledo ti’n abimen. Ou ti menm kapab war anndan partou. Sa madanm pa dir nanryen. I anmar leker. I al dan lakwizin I griy son plim zwazo, I kraz byen fen e bat avek son delwil koko. I anmenm dan lasanm I pas lo ledo Prens Sabour. En pti moman apre ledo in fini geri.

“Mon’n sonnyen ou garson.”

Sa msye ti’n telman kontan I dir:

“Ki rekonpans mon kapab donn ou? Mon a donn ou mon lotel avek tou mon byen. “

Sa madanm I dir:

“Non, rekonpans, ki mon ti a oule ou donn mwan se sanmenm sa garson ki mon’n sonnyen.”

La sa met lotel I ale I al dir avek son garson ki kalite rekonpans sa dokter ki’n sonny li in demande. Sa garson I dir: – Me, ki mannyer mon pou fer? Mon ti oule mon gerizon pour mwan al war mon madanm.

Sa dokter ki ti’n sivre met lotel dan lasanm I dir

• Be ou konnen poudir mwan menm mwan ou madanm?

Sa garson I sezi, I dir:

“Be ditou, mon madanm son seve ti long. .Kanmenm ou figir I resanble li, mon madanm pa en dokter”

Sa sa dokter I dir:

“Be get dan mon ledwa. Ou rapel ou bag ki ou ti donn mwan?”

Ler I get sa bag I war son non grave lo la. Sa dokter, I tir son sapo e deswit I war poudir sanmenm son madanm marye. Sa garson I reste tonnen me I ti byen kontan. La prens Sabour I dir li ki zot ava reste la dan pei son papa, zot pa pou retourn ankor kot sa de kriminel. Son papa osi byen kontan, e zot viv ere zot tou ansanm.