PRENS MAZENGAV

Antoine Abel, (1977) Contes et Poèmes des Seychelles. Paris : Editions Pierre Jean Oswald. pp. 11-

Translated from French to Kreol by Penda T. Choppy, 22^nd April, 2021

Ti annan son letan ki Soungoula li osi ti pas en bon moman avek son fanm, Danm Sounga, ek zot bann pti goula. Sa letan la, Soungoula ti ranpli ek limazinasyon. Vwala enn bann zistwar ki i ti rakont son bann pti goula avan zot al dormi.

Alors dan en pei, ti annan en zoli larenn ki ti apel Pipangay. I ti annan zis karannsenk an. Son msye, Lerwa, ti’n mor depi en dizenn lannen. Larenn ti annan trwa zanfan. Prens Mazengav, Prenses Manztou ek Prenses Fatak. Prenses Manztou ti byen gra e pti parey en pti boul. I ti pas son letan nek grinyote tou lazournen. I ti kontan gato ek lezot gonaz. Prenses Fatak li, i pa ti preski manz nanryen pandan ler repa. Ler ou get li, i ti parey en leskelet vivan, telman i ti meg. I ti parey en bren zerb.

Pipangay nek ti dispit ek zot tou lazournen parske zot ti vreman fatig li. Kanta Prens Mazengav, li i ti touzour pe esey fer plezir son manman. Larenn ti kontan li en kantite e prefer li ki son de fiy, ki ti touzour pe boude e dan move limer.

En zour Prens ti arive fet son laniverser venteen an. Larenn ti anvoy sers li. I ti demann li,

“Ou annan keksoz pour dir mwan?”

« Mon napa nanryen pour demann ou, mon manman. Se ou ki’n fer mwan vin kot ou. »

« Ou’n byen koze ! » Larenn ti dir. « Ou konpran Zengav, i annan en keksoz ki pe fatig mwan. »

« Ale, koze Manman. Mon pe ekout ou. »

« E byen, mon pa pou tard plis ki sa. Mon krwar in ariv ler pour rod en fiy pour ou marye. »

« Mon napa nanryen pour dir lo la. Se ou menm ki desid tou dan rwayonm. »

« Ekout sa ki mon pe dir ou. Ou ava al aletranze, ou ava rod en zoli fiy ki serye pour ou marye. »

« Dakor. »

« Mon ava prepar tou sa ki neseser pour ou voyaz. Fer atansyon mon garson, parske ou konnen poudir mon annan en sel garson. »

« Pa trakase, Manman. Mon pou retournen sen e sof. »

Sa menm swar, Prens ti kit lavil lo son seval, akonpannyen par son serviter fidel, Maypous. Zot ti anmenn bann sak larzan ek ase provizyon avek zot, pour sa gran voyaz. Byento zot ti ariv kot en lotel ki ti port sa non : ‘CEUX QUI ENTRENT N’EN SORTENT PAS.’

Prens ti reflesir en moman avan antre dan sa batiman. Apre i ti antre e aste keksoz pour li manze. Zot ti anmenn son manze dan trwa lasyet. I donn lord Maypous pour met tou sa manze lo en sel lasyet e donn seval. Seval zis i santi loder i tonbe mor. Prens i koup en morso sa seval mor e i anmenn avek li. Toultour sa lotel, ti annan en nyaz korbo. Sa bann korbo ti war kadav sa seval ater e kat zot ti apoz ater pour en repa gratwit. Zis premye bouse e zot ti tonbe mor ! Prens i anmas sa kat korbo e i kontiny son semen zot de Maypous.

Zot in marse pour en pake letan. Par ler zot in asiz o bor semen pour repoze. Lannmen bomaten ler zot ti pe ale, kat voler ti bar zot semen. Pour sov zot lavi, Prens i dir avek son serviter donn tou larzan ki zot ti annan avek sa bann voler. Byen kontan, sa bann bandi ti sifok sa Prens ki ti pou bezwen vwayaz san en sou dan son portmonnen. Apre zot ti sot lo zot seval e galope dan en nyaz lapousyer.

Sa menm zour, lo apremidi, Prens ek son serviter ti ariv dan en gran vilaz. Ler zot ti pe aprose, zot ti apersevwar en menye. Zot ti lafen, me zot ti napa nanryen pour manze eksepte sa kopo lavyann seval ek sa kat korbo mor. Zot ti ouver sa pake ki ti annan zot lavyann ladan e montre sa menye. Sa menye ti pa lot ki sa sef bandi ki ti fek atak zot. I ti dakor pour donn zot en pe lafarin an esanz pour zot lavyann.

Prens ti fer karannde boulet avek sa lafarin. De ti zis lafarin pir, me tou lezot ti annan lavyann sa bann korbo mor ladan. Ti paret byen apetisan. Pa tro lontan apre sa, sa de vwayazer ek sa karant voler ti retrouv zot dan menm landrwa. Sa voyaz, Prens ti envit zot pour manz en keksoz ek li, pour fet sa rankont. I ti donn zot sa karant boulet e zot ti devore avek lapeti. En pti moman zot ti roule ater e zot ti mor, an kriyan ki zot ti swaf.

Sa de konpanny ti realize poudir byento zot ti pou travers lafrontyer pei vwazen. Zot ti remakrke ki lenz bann dimoun dan sa landrwa ek zot fason fer ti diferan ek sa ki pour zot. Zot ti apros en vyeyar o bor semen e adres li poliman.

« Bonzour Msye. Eski lanmenm la pei Mazet ? »

« Me wi, bann msye. Byento zot pou lo later mon pei. »

« Ou kapab dir nou kote pale Lerwa i ete ? Eski i lwen ek lafrontyer ? »

“Msye, isi nou napa lerwa. Larenn Banbara i rennyen li tousel, avek son sel fiy, Bigorno. Pale i ven minit avek lafrontyer. »

« Mersi bokou, Msye. »

« Padekwa. Mon kontan pour rann zot servis. Zot ava trouv pale deryer sa kolin a drwat. I fasil pour rekonnet li, i en bel batiman. Bonn sans ! »

Ven minit pli tar, zot ti’n ariv kot pale. Larenn Banbara ti byen resevwar zot. I ti ofer Prens en zoli lasanm e dir li fer konmsi se li. Sa swar, Prens Mazengav ek Maypous ti byen repoze. Zot ti’n preski bliy tou sa fraka ki zot ti’n pas ladan pandan zot voyaz.

Ver ne-v-er diswar son lannmen, larenn ki ti kontan zedmo, ti demann son bann envite pour fer paryaz ek li. Prens ti pou komans premye. Si i pa ti konn larepons zedmo, Larenn ti pou kapab gard li prizonnyen oubyen menm koup son likou.

Larenn ti komanse avek trwa zedmo. I ti dir,

“Poul deplimen i al voyaze”.

Prens ti reponn, “En koko deplise dan sak en vwayazer. »

Larenn ti kontinyen, « Zour mon nesans, personn pa konn mon grander, personn pa konn mon pwisans, personn pa konn mon latay, personn pa konnen akoz mon touzour zwaye. Ki mon ete ? »

Prens i reponn, « Zekler ! »

Larenn ti komans vin rouz. Me i ti kontinyen. « Lekel sen ki pa zanmen met lipye legliz?”

Prens ti fer en pti souriy e reponn, « Senbou. Nou servi li koman en lenz pour fer bann gro travo. »

Apre sa, ti tour lezot envite pour zwe bann diferan zwe. Prens ek Maypous ti fer parey lezot e zot ti al dormi minwi.

Lannmen swar, zot ti reini ankor en fwa dan gran lasal devan tou bann gran personn sa pei. Larenn ti poz Prens son katriyenm e dernyen zedmo.

« Trwa pandi pandan ; trwa veni venan ; trwa dormi dorman. Si sa trwa pandi pandan pa lev sa trwa dormi dorman a tan, zot pou ganny devore par sa trwa veni venan. »

Prens ti reflesir en moman. Ler son larepons ti vini, konmsi i ti eklate dan sa lasal. « Ti annan trwa ponm anpandan ki ti tonm lo latet trwa vwayazer e lev zot, sankwa zot ti a’n ganny manze par trwa bebet feros. »

La, larenn ti’n konpran poudir i pa ti pou kapab ni met Prens dan prizon, ni koup son likou akoz i ti’n ganny son paryaz. I ti propoze ki Prens aprezan i poz li bann zedmo. Me Prens ti dir i fatige e i ti propoze ki zot ti anvoy sa leprev pour lannmen. Ankor en fwa, tou dimoun ti anmize ziska tar, apre zot ti al dormi.

Ziska prezan, Prenses pa ti ankor ganny permisyon pour asiste sa bann sekans. Me sa zour i ti la. Ler ne-v-er ti sonnen, Maypous ti arive li tousel. zot ti demann li oli Prens Mazengav, me i ti dir i annan sis erdtan i pa vwar Prens. A ler aktyel, i pa ti konnen kot i ti été.

Zis ne-v-er edmi, Prens Mazengav ti arive. I ti’n met li en zoli labiyman e lo son latet, ti annan en zoli bonnen oranz konmsi ponm zako. I ti pran son plas labitid, me i ti reste debout tandis ki Maypous ti asize, en pti souriy malen lo son lalev.

Prens ti demann silans, e tou dimoun ti obeir. Son lavwa ti rezonnen dan tou bout sa lasal e i ti dir, « La sa dernyen zedmo ki zot pou tande sa lannen. Epi i ti tourn ver larenn, e i ti dir, “Mazeste, pwiske mon’n riske mon lavi pour reponn ou bann zedmo, aprezan permet mwan ganny lanmen ou fiy an maryaz, si ou pa reisi reponn zedmo ki mon pou poz ou. »

Larenn ti aksepte, e Prens ti komanse. « Ler mon ti kit mon manman, nou ti a trwa. Parmi sa trwa, enn ti pou mor. Sa enn ki’n mor i touy kat lezot. Sa kat kadav pou masakre karant dimoun. Ler mon retourn kot mon manman alor, nou pou a kat. »

Larenn Banbara ti reflesir. I ti reflesir plis i ti’n zanmen deza reflesir avan. Larepons pa ti vini menm ! Senk, dis ven trant minit ! Ti napa larepons menm. Letan ti pe pase. Finalman Larenn Banbara ti admet ki i ti’n perdi paryaz. Son figir ti’n rouz ek lakanmzri, e i ti sove dan lasal.

Byen zwaye, Prens ti deside retourn se li aswar menm. I ti antre se li avek Bigorno, sa zoli prenses, Maypous, e Retif ki ti seval larenn.

Pandan ki Soungoula ti pe rakont sa gran zistwar, bann pti goula ti’n dormi enn par enn eksepte sa enn pli pti ki’n ekout zistwar antye. Me la sonmey ti’n komans pran, e i ti plak en zoli bizou lo lazou Papa Soungoula avan ki Manman Soungoula ti anmenn li dormi.