PRENS LANSIV

Jessy Hossen

Kont ek Lezann Volim 2. (1991) Lenstiti Kreol, Lans-o-pen. pp. 91-98

Alors en zour ti annan en lerwa. Sa lerwa ti annan set madanm me i ti napa ditou zanfan. Tou le mwan i ti annan labitid fer lasarite. I ti donn bann pov set kalite keksoz. Sa bann keksoz ti distribye par set serviter. Letan zot ti pe distribye sa bann keksoz en bonnonm, touzour byen sal ti pase me zanmen i ti pran nanryen. Lerwa ki ti toultan sirvey sa bann distribisyon pa ti tarde pour remark konportman sa bonnonm.

En zour i ti fer apel li e demann li, “Bonnonm akoz ki zanmen ou pran keksoz parey tou lezot pov?”

Sa bonnonm ki ti apel Bonnonm Sarbon ti reponn, “Ekskize mon rwa, mon larelizyon i defann mwan pran keksoz dan lanmen koupab. Tou sa bann serviter, mon rwa se bann koupab. Akoz ou pa fer ou bann zanfan distribye ou lasarite?”

Lerwa ti reponn, byen tris, “Malerezman mon napa zanfan. Mon annan set madanm, me pa en sel zanfan.”

Bonnonm ti reponn, “Be ou a fer mwan krwar mon rwa. Akoz ou pa ti demann led? Demen mon ava anmenn latizann pour ou bann madanm e apre ou menm ou a rakont mwan kantyenm ek lepok.”

Lannmen byen gran maten bonnonm ti’n arive. I ti donn lerwa set pti pake latizann. “Bwi mon rwa. Si mon reisi, promet mwan ki ou ava donn mwan sa ki mon ava demann ou.”

Lerwa san pran plis letan pour reflesir ti reponn, “Wi, mon promet ou.”

Vreman en mwan pli tar, dokter ti anons lerwa ki tou le set son madanm ti pou ganny zanfan. Lerwa pa ti kapab kontrol son lazwa e i ti donn en gran festen. Wit mwan apre sa gran lafet, tou le set son madanm ti ganny zanfan. Sis son madanm ti ganny en garson, me son dernyen madanm, sa enn ki i ti pli kontan ti ganny en lansiv.

Zis kat dimoun ki ti konn sa sekre. Lerwa, larenn, dokter ek ners ki ti vey sa piti, plito sa lansiv. Lezot madanm ti etonnen war ki tou lezot zanfan ti plere, ti sorti deor pour zwe, me pa pour dernyen madanm. En zour ners dezyenm madanm ti demann avek ners setyenm madanm, “Me ptibaba sa madanm zanmen kriye, zanmen mon war li sotaye partou parey pour lezot, akoz?”

Sa ners ti reponn, “Ou pa krwar mannyer sa en bon piti. I touzour trankil. I kontan zwe anndan san fer tapaz.”

Sa lot ners ti war sa drol, me toudmenm i pa ti dir nanryen. Letan ti pase. Parmi tou son bann piti, lerwa ti pli kontan sa lansiv. En bo zour, en personnaz ti prezant devant laport sato. Ki sete? Devinen. Be wi, pa lot ki Bonnonm Sarbon. “Bonzour mon rwa. Mon war bann pti garson in gran. Ou sirman konnen ki mon’n vin rode.”

“Byensir,” Lerwa ti reponn, “Ou’n vin sers ou rekonpans. Ale koze.”

“Mon rwa, mon ti a kontan zanfan sa dernyen madanm. Sa lansiv.”

Lerwa ti reste etonnen e ti demann li, “Me kimannyer ou fer pour konnen ki zanfan mon dernyen madanm i en lansiv?”

“Bonnonm Sarbon i konn tou keksoz mon rwa.”

Lerwa ti reponn, “Mon konpran ou. Sa lansiv, sanmenm sa mon piti ki mon pli kontan. Me piske mon’n fer en promes, mon bezwen gard mon promes . Me mon sipliy ou, pran byen swen avek mon prens.”

“Pa traka, mon rwa. En zour ou ava kontan. En zour ou garson ava vin war ou limenm e sa zour ou ava dan en gran lazwa.”

Lerwa ti byen sagren pour war son piti lansiv pe ale e son madanm ti pli sagren ankor. Bonnonm Sarbon ti pran son lansiv, met li dan en zoli korbey ki ti’n anboufte avek velour rouz e i ti ale. Letan i ti’n ariv dan milye semen, i ti pran lansiv e fwet ater. En zoli Prens ti sorti. Bonnonm Sarbon ti dir li, “Mon piti, annou al dan lakour.”

La zot ti ale. Avan ariv kot zot, zot ti travers en gran laplenn. Zot ti war en kantite bann ros nwanr, long dan sa laplenn. Ou ti a dir konmsi bann dimoun ki ti pe debout. Prens ti dir avek Bonnonm Sarbon, “Tonton, sa bann ros, i drol, ou pa i war?”

Bonnonm Sarbon ti reponn, “Wi mon piti, ou annan rezon. Me tousala pa ros sa. Dimoun sa. Dimoun ki en move lerwa in touye. En zour kan ou ava pli gran, mon ti a kontan ou fer keksoz pour zot. Zot an retour, zot ava lager pour ou akoz tousala bann solda byen brav.”

Prens ti demande, “Me kimannyer mon pou kapab fer sa?”

Bonnonm Sarbon ti reponn, “Pa trakase mon piti. Ou ava konn larepons kan ler ava arive. Annou depese pour ariv dan lakour. Fernwanr pe fer.” Zot ti mars pli vit pour al kot zot.

Letan ti pase, Prens ti grandi. Bonnonm Sarbon ti edik li e kiltiv dan li sa bon santiman ki fer en dimoun vin brav me bon, zenere me zis, serye me kapab riye e fer fars kan i fodre. Ou konpran, sa Bonnonm Sarbon, ti an realite en lerwa, avek bokou pouvwar spesyal.

En zour Prens ti demann avek li, “Tonton o, akoz letan mon ti zwenn ou pour premye fwa, ou ti dan en lenz tou sal, me pourtan ou en lerwa? Get ou sato ki ou reste ladan. Akoz letan ou al dan en lot rwayonm, ou abiy ou konman en Bonnonm Sarbon?”

Bonnonm Sarbon ti reponn, “Mon fer ekspre, mon piti. I en fason pour mwan konnen lekel ki bon e lekel ki fer krwar i bon. Letan mon voyaz konman en lerwa, mon war tro bokou lipokrizi me letan mon voyaz konman Bonnonm Sarbon, la ki mon kapab dekouver loulou anba lapo mouton.”

Letan ti pase e prens ti grandi e vin entelizan e brav. En zour i ti dir avek Bonnonm Sarbon, “Tonton mon anvi al lasas.”

Bonnonm Sarbon ti reponn, “Tre byen mon piti. Me fer atansyon. Pou annan danze lo ou semen. La mon donn ou sa fwet. I spesyal sa. I a kapab menm lev sa bann solda ki nou ti war dan lafore e zot ava kapab lager pour ou si an ka ou bezwen zot. Ale mon piti. Mon swet ou bonn sans dan ou voyaz.”

Prens ti remersye son tonton e ti ale. Letan i ti pe fer lasas dan lafore, i ti rankontre de prens. Zot pa ti bon e deswit zot ti oule bat nou prens e fer li vin zot lesklav. Me prens avek son fwet spesyal pa ti pran tro bokou letan pour ganny lager. I ti met mark lo zot e apre donn zot zot laliberte.

Apre sa, i ti kontinyen son semen ziska ki ti ti ariv kot sato en lerwa dan en lot lavil. Sa lerwa ti annan trwa fiy me okenn prens pa ti ankor ganny lodas demann son fiy maryaz. Prens ti prezant li kot sato, degize konman en vye zardinyen. Gard kot baro ti demann avek li, “Kot ou pe ale? Napa byen byen dimoun ki vin isi.”

Prens ti reponn, “Mon oule war lerwa. Mon vin rod en plas travay.”

Gard ti reponn, “Napa plas travay isi. Deplis ki travay ou kapab fer?”

“Mon kapab okip zarden lerwa.”

Gard, pour li ganny en sel lape ti anons lerwa ki ti annan en vye tonton ki ti’n vin rod en plas travay dan zarden. Lerwa li osi, pour li ganny en sel lape ti dir gard donn sa tonton en plas zardinyen. Piske i pa ti oule ki i reste dan sato, i ti donn li en pti payot an fey laba dan fon zarden ki ti donn lo lafore.

Prens ti byen kontan e i ti konmans son louvraz. Lerwa ti gard li byen a lekar. Me dernyen fiy lerwa, sa enn ki ti pli zoli, ti pran lapenn pour li e letan i ti’n fini travay e pe repoze dan son payot, prenses ti anmenn dite pour li, en pti pe sa bann bon bon fayo ki zot ti manze dan sato. Bonnonm ti byen kontan. Tou le zour kan i ti pe travay dan zarden, sa prenses ti kontan vin avek li. Prens ti kontan sa prenses en kantite, pa telman akoz son labote me sirtou akoz son labonte. Fiy li i ti kontan sa bonnonm. Son leker ti dir li ki sa pa ti en bonnonm akoz en zour dan son pe pran en morso gato ki i ti’n anmenn pour li, i ti apersevwar en bag avek en gro dyanman lo la. Prenses ti dir dan limenm, “Ki kalite bonnonm ki kapab annan en bag koumsa? Sa pa en zardinyen sa. Sa en gran personnaz.”

En lot zour, i ti apersevwar en gro sennon ki ti parey sennon ki bann lerwa ti mete. Me toudmenm i pa ti dir nanryen . I ti kontinyen koz avek bonnonm. I ti kontinyen anmenn manze pour bonnonm dan son payot. Son bann ser ti sikann li, “Ar get li. I kontan en vye zardinyen, tou sal sal.”

Prenses ti reponn, “Les mwan. Se mon boner, se mon sans, se lavolonte.”

En zour zardinyen ti dir avek gard, “Mon oule war lerwa pour mwan demann maryaz son dernyen fiy.”

Gard ti sote e dir, “Me ou fou! Marye avek prenses! Me eski prenses pou oule marye avek en vye lakord konman ou? Sorti la ale.”

Bononm ti reponn, “Pa ou, ni lerwa ki ava dir mwan si Prenses ava oule marye avek mwan ou non. Les prenses limenm koze.”

Gard ti anmenn li devan lerwa. “Ki ou bezwen? Si ou pa satisfe avek ou plas zardinyen ou kapab ale.”

Bonnonm ti reponn, “Non mon rwa. Mon byen satisfe avek mon travay. Mon’n vin war ou pour demann ou lanmen ou fiy.”

Lerwa ti sote lo son tronn. “Kwa? En vye bonnonm konman ou? Lekel ki dir ou ki mon fiy pou oule marye avek ou?”

Bonnonm ti reponn, “Mon rwa apel prenses. Mon ti a kontan tann limenm dir ki i pa oule marye avek mwan.”

Lerwa ki ti sir ki son zoli prenses pa ti pou oule marye avek en vye bonnonm, ti dir avek gard al sers prenses. Me, kan prenses ti arive, lerwa ti kapab tonm latak letan i ti dir, “Wi papa, mon kontan pour mwan marye avek sa zardinyen. Papa se mon boner, se mon sans, se lavolonte.”

Lerwa ti ankoler me son prenses ti’n dakor e i pa ti oze dir nanryen akoz son bann size ti ava dir ki dan son rwayonm ti napa laliberte. Alor i ti bezwen bos plat. Bann ser prenses ti riy li. “Akoz ou pa marye avek en prens parey nou?” Zot ti dir sa akoz de prens ti’n fek demann zot maryaz.

Prenses ti reponn zot, “Zot sans. Mon kontan pour mwan marye avek mon vye zardinyen. Se mon sans, se mon boner, se lavolonte.”

Vreman zour maryaz prenses ek bonnonm ti arive. Pa ti annan okenn gran pipili. Per ti vin beni maryaz dan sato e apre sa prenses ti ale avek son vye zardinyen al viv dan son pti payot.

Lannwit ti arive e lerwa ti al dormi avek son lakoler. I ti telman ankoler ki i pa ti fer tro gran sonmey. Lannmen gran maten, i ti leve angiz i a vir kannon sato zis lo sa pti payot e fini avek sa de zans. Me oli payot? Lerwa ti ouver son lizye pli gran ki i ti kapab. Ti napa payot. Dan son plas, ti annan en keksoz ki ti pe klate.

“Kisisa sa?” lerwa ti demande dan limenm. I ti pran son binok me i pa ti ganny en konpran. I ti apel son bann serviter dan sato me zot osi zot pa ti ganny en konpran. La lerwa ti dir avek zot, “Annou desann, nou ava al gete.” I pa ti ganny letan sanze, i ti al dan son lenz dormi.

Ler zot ti ariv obor, zot ti etonnen war en zoli sato. Zot ti demann gard pour les zot antre e war lekel sa vwazen. Letan zot ti ariv anndan zot ti war prenses ki ti’n marye avek sa vye zardinyen. Lerwa ti demann avek li, “Me kimannyer ou’n ariv la? Pa ou ti’n al reste dan payot avek sa vye zardinyen?”

Prenses ti reponn, “Wi papa me payot in vin sato, mon vye zardinyen in vin en prens. I ti toultan en prens me i ti’n degiz li konman en vye zardinyen.”

O menm moman Prens ti aparet e salye lerwa. Lerwa ti demann leskiz Prens, e ti demann pardon son fiy. I ti ordonnen fer en gran maryaz pour tou le trwa son fiy. Sa de lezot prens letan zot ti war sa prens e remarke ki lerwa ti pli kontan li ki zot, ti dir avek lerwa, “Sa boug i en lesklav.” Lerwa ti soke e fer apel prens.

Prens ti dir avek lerwa, “Mon rwa, dir zot vin isi kot nou deswit e nou ava war lekel lesklav.”

Sa de prens san doute akoz lerwa ti’n apel zot ti vini tou deswit. Lerwa ti dir avek zot, “Zot pa i dir mwan ki sa Prens i en lesklav?”

“Wi mon rwa. Letan nou ti lager, i ti perdi e nou ti gannyen. Nou ti mark li.”

Prens ti dir avek zot, “Kote zot ti mark mwan?”

Zot ti reste bet pa konnen ki pou reponn. Prezan i ti dir avek lerwa, “Mon rwa dir sa de zans tir zot semiz e montre ou zot ledo.”

Zot pa ti kapab fer sa akoz zot ti dan festen e en ta envite-d-oner ti pe gete. Alor sa kat zans ti al dan en lasal akote. Lerwa ti ordonn zot tir zot semiz. Lo zot ledo, ti annan mark sa prens.

“Ou war mon rwa, se zot ki mon lesklav. La mon mark lo zot. Me les zot. Mon pardonn zot.”

Lerwa ti dir, “Bann manter ki zot ete. Akoz zot in marye avek mon de fiy mon pa a fer zot nanryen. Me zanmen aviz zot ankor rakont mansonz lo zot prosen.”

Letan ti pase e Prens ti viv ere avek son madanm. En zour zot ti deside pour zot al war Bonnonm Sarbon ou plito lerwa. Zot ti ale. I ti byen kontan pour li war son Prens Lansiv ensi ki son bel fiy prenses.

En zour i ti dir avek Prens, “Ozordi i’n ler pour ou al war ou vre papa.” Prens ti dakor e ansanm avek son madanm zot ti pran larout ver rwayonm son papa. Letan zot ti ariv kot sa gran laplenn kot ti annan en kantite ros nwanr pe debout, Prens ti mazin sa ki Bonnonm Sarbon ti’n dir li. I ti pran sa fwet e tap tou sa bann ros. Tousala ti revin solda. Zot ti remersye Prens pour delivre zot e zot ti promet pour lager pour li. En semenn pli tar Prens ti ariv kot sato son papa.

Gard ti anons lerwa ki en prens avek son madanm ek en gran larme ti demande pour war li. Lerwa ti dir li antre. Larme ti reste deor e Prens ek son madanm ti antre dan sato. Lerwa pa ti rekonnet son piti. Prens ti dir, “Bonzour Papa.”

Lerwa ti etonnen. I ti dir, “Me akoz ou apel mwan papa?”

Prens ti reponn, “Me ou menm ou mon papa. Mwan menm mwan ou dernyen piti. Sa ki ou ti donn Bonnonm Sarbon.”

Prezan ki lerwa ti rapel. I ti byen kontan. Larenn ti pli kontan ankor. Lezot larenn pa ti kapab sikann li ankor e montre li zot garson akoz li osi i ti annan pour li. I ti pli entelizan, pli bon e pli bo ki lezot prens. Son madanm osi ti pli zoli.

Prens ek son madanm ti reste kot sa lerwa pour plizyer mwan. Prens ti rakont son papa ki ti’n ariv li pandan tou sa letan. Tou dimoun ti byen kontan. Apre Prens ti retourn dan son rwayonm e i ti vin en lerwa byen pwisan, bon e zis.