POLEN EK POLIN

Lidvine Delpech

Alor en fwa ti trouv annan en garson e en fiy ki ti ser ek frer. Sa garson ti apel Polen e sa fiy ti apel Polin, me sa de zans ti kontan kanmarad, ki ler ou vwar Polen en landrwa, Polin osi i bezwen la. Zot pa ti kapab kit kanmarad en pa.

Alor en zour Polin i dir ek son frer : “Polen, akoz ou pa rod en fiy marye, parski mon ti a kontan ganny en konpanny ?” Polen i reponn li i dir : “Polin, nou pa i byen nou de? Kekfwa si mon marye, sa fiy a fer ou mizer.” Polin i dir : “Non, Polen, i pa kapab fer mwan mizer, mwan mon ti a kontan vwar ou marye.” Polen pa antren. Me tou le zour Polin’n apre avek li ki i deside pour li marye e pour fer son ser kontan.

Alor Polen i marye e Polin i byen kontan. Me Polen ti annan labitid ler i al travay e ler i antre dan lakour, premye dimoun ki i anbrase Polin, e apre i al anbras son fanm. Tou le zour i fer sa ki ou konnen ki son fanm in fini ankoler e i’n ganny rankin kont Polin e i’n fini ay Polin. Menm sa i gronny ek son mari, me Polen pa antren parski i kontan son ser plis ki son fanm. Ler sa fanm i get tou sa bann zafer ki pe pase, i pa dir naryen, me dan son leker i annan ketsoz, i dir dan li menm : “Okipe zot, mon pou gete si sa bann zafer pou mars konmsamenm ankor.”

Me Polen ti annan en pti lisyen ki i pa ti kapab kite. Partou kot i ale, sa pti lisyen i deryer li. Me ou konnen en zour ki Polin ti’n desann anvil, sa fanm i bag sa pti lisyen i touye. Polen ek Polin pa konnen. Ler Polen i arive, sa fanm i taye i dir : “Polen, get ki ou ser in arive fer, i’n touy ou zoli pti lisyen ki ou ti kontan en kantite.” Alor Polen i kriy Polin. Ler Polin i vini, Polen i dir : “Polin o, akoz ki ou’n touy mon lisyen ? Ou konn byen ki tou le zour i al lasas ek mwan dan bwa. La mon pou al mon tou sel.” Polin i dir : “Mon frer, pa met sa ditou dan ou leker ki mwan ki’n touy ou lisyen, ki mwan osi mon ti kontan sa lisyen. Ki mannyer mon ti a fer pour mwan touy li ?” Alor Polen pa dir naryen, ki i konnen ki son fanm pa kontan son ser, me li i ti touzour annan lanmour pour son ser. Fanm Polen i fini pran lakoler. I dir: “Me zot, ki mon pou fer pour mwan fer Polen ay son ser pour li kontan mwan plis ?”

Alor zot in la. Fanm Polen i tonm ganny en baba, me Polin ti kontan sa pti zanfan ki i pran i met dormi ek li dan son lasanm e li menm i sonny sa piti. Me en zour sa fanm Polen i fer son lespri travay, i veye aswar ler son mari i dormi, i leve dousman, i al dan lasanm Polin. Sa ler Polin, pov dyab, pe ronfle sonmey e sa piti osi. Ou konnen sa fanm degre ki i kriyel, i ale dousman, i trangle son prop piti. Apre i al dousman, i al dormi.

Me Polin ti annan labitid tou le bomaten ler i leve, i ale i lev pti baba, i kriy touzour: “Baba, baba, leve, lizour in fer!” E pti baba i leve, me sa zour i kriye ziska i fatige, piti pa leve. Me li, sa fanm, i leve lo son lili i tay dan lasanm Polin i kriye: “A Polen, mon mari, tou le zour mon dir ou ki Polin, ou ser, i pa bon, ou pa ti oule krwar mwan, get ozordi ki i’n arive fer. I’n touy nou sel piti ki nou annan. Ler mon ti dir ou ki Polin ki’n touy ou lisyen, ou pa ti oule krwar, me la ou’n vwar ou menm.” Sa fanm i kriye lanmen lo latet. Pov Polin ki ti telman sezi i dir : “Polen, mon frer, mwan zanmen mon a kapab touy ou piti, bomaten ler mon leve mon vwar li in mor”, e i konmans plere. Polen i dir : “Polin, mon pa pou kapab gard ou isi; premye ou’n touy mon lisyen, la ou’n touy mon sel soutyen, me si ou reste ankor, ou a bezwen touy mon fanm oubyen mwan menm.” Pov Polin i plere menm. Kanmenm i dir pa li ki’n touye, Polen pa konpran e i’n fini ay Polin. Son fanm i dir: “Polen, mon pa oule ou gard Polin isi. Anmenn li dan bwa, al touy li parski i en kriminel. ” Alor Polen i dir: “Mon a bezwen fer sa menm.”

Lannmen byen bomaten Polen i pran Polin ki an larm, i anmenn li dan bwa, lwen avek son lakaz, dan zete menm ki Polin pa pou kapab tournen. Me ariv dan en serten landrwa i dir : “A be Polin mon ser, mon pa pou touy ou, me mon pou koup ou de lanmen.” Alor Polen i pran son gran kouto i koup de lanmen Polin apre i pran son semen i ale. I kit Polin e son de ponnyen bennyen dan disan.

Pov Polin in marse dan bwa ziska ki Bondye in pitye li, son de lebra in byen e i manz zis legren dibwa. Me en zour lerwa dan son pronmnad dan bwa lo seval i rankontre Polin, la i demann ek Polin ki i ape fer dan bwa li tou sel. Polin ti en zoli fiy.

Alor la i konmans rakont lerwa ki mizer ki zot in fer li. Lerwa i plere e Polin osi i plere. La lerwa i konsol li. I dir: “Be mon pou anmenn ou dan mon sato e ou vin mon metres. Mon ti a kontan marye avek ou me ou napa ledwa pour ou met bag.” Alor lerwa i pran Polin i met lo seval ansanm ek li zot ale. Dan zot antre dan lakour ti’n deza en pe tar. Alor Polin in touzour la kot lerwa, me i reste touzour dan son lasanm, i pa al deor ditou. Alor Polin i arive fer en pti baba ki lerwa ti tro kontan, e ti en pti garson. Lerwa i dir : “Polin, si ou ti annan ledwa, nou ti a marye.” Anfen zot in la e Polin i arive ganny ankor en pti garson. Lerwa i pli kontan ankor. I touzour oule marye ek Polin me pov dyab i napa ledwa pou li met sa lalyans.

Alor la pour ariv en zafer, ki lerwa i arive ganny en let pour li fer en voyaz byen lwen e byen lontan. Ler i akont sa Polin, Polin i met a plere e lerwa osi ti sagren en kantite pour kit son zoli Polin ek son de zanfan. Alor lerwa i bezwen ale. Avan i ale i dir ek bann serviter: “Mon pou al fer en voyaz me mon pa konnen pour konbyen letan. Alor sonny byen Polin isi avek son de zanfan, e Polin i kont ganny en trwazyenm baba, alor vey li byen, pa fer li mizer ziska mon a trounen. Alor zot tou zot reponn : “Wi, mon rwa.” Alor lerwa i pran son depar byen sagren. Me Polin i reste touzour dan son lasanm avek son zanfan. Obout en mwan ki lerwa’n ale Polin i ganny en pti fiy, me lerwa ler i’n ariv laba dan pei i ekrir Polin isi, me Polin pa ganny let ditou. Bann serviter i pran let zot lir, apre zot desire, zot zete. Alor en zour Polin i dir ek bann serviter, i dir: “Get lerwa depi ler ki i’n ale i pa ekrir mwan ditou.” Zot reponn zot dir : “Dwatet lerwa in bliy ou.” Sa ler la zot ganny tou let ki lerwa i ekrir Polin. Zot ti ay Polin ki en zour zot ekrir let dan zot menm. Ladan zot mete konm si lerwa menm ki’n ekrir. Ladan i dir ki lerwa i tande ki Polin pe fer en kantite dezord dan son sato e ki Polin i annan en lot zonm, e i pe fer onte, e ki fodre pous li deswit, fer li ale avek tou son piti. “Fodre ler mon vini, mon pa oule vin zwenn li dan mon sato.”

Ler zot in fini ekrir, zot donn Polin pour lir, ler ki Polin in fini lir i konmans plere. I dir : “A zot, get ki lerwa i nobou ekrir lo mwan, ki mwan zanmen mon’n sorti dan son lakaz, mon’n touzour la ek mon trwa piti. Get ki ozordi i arive dir mwan.” Polin i dir : “Mon pa pou ale, mon pou esper li ziska ler i a vini pour mwan konn laverite.” Sa ler la lerwa pa konnen ki pe pase parski bann serviter i rann repons lerwa konm si Polin ki ekrir. Bann serviter i dir ek Polin: “Ou pa pou kapab reste, lerwa a vin touy nou si nou gard ou la parski i’n dir ou ale.” Polin i dir zot : “Mon oule ale, me ki mannyer mon pou fer pour anmenn mon piti, mon napa lanmen.” Serviter i dir pa trakase, nou ava aranz sa. Alor ki zot pou fer, zot anmar en piti dan sak kote Polin epi zot pran sa enr pli pti zot anvlop dan servyet e zot anmar lo son ledo. Alor ler ki zot in fini, Polin i ale pour li sot deor. Me ti annan en pti lisyen lerwa ki ti’n abitye avek Polin, i ris rob Polin deryer. Polin i al ankor pour sorti deor, sa pti lisyen i ris son rob, i met li asiz konm si i oule dir “Polin pa bezwen ale.” I’n fer sa avek Polin ki bann serviter in fini ankoler, i dir: “Polin, i’n ler pour ou ale.”

A be, Polin i pran son semen pour li ale ek son trwa zanfan e sa pti lisyen i swiv li par deryer. Alor pov dyab in marse, marse ziska i’n swaf. I zwenn en pti larivyer, i dir dan li menm: « A zot, mon swaf, me ki mannyer mon pou fer, mon napa lanmen.” Me toudmenm, zot, nou konnen laswaf mannyer i ete. Polin i bese pour li bwar ek son labous, me kan i ti’n bese, son piti ki ti lo son ledo i sape, i tonm dan delo. Zis Polin i kriye i dir: “A Sennyer, si mon ti annan mon de lanmen mon ti ava anmas mon piti.” Konman i fini dir sa Sennyer i donn li son de lanmen e Polin i anmas son de piti e i remersye Sennyer bokou.

Alor la Polin i kontiny son semen e son trwa zanfan e osi son pti lisyen deryer li. Alor i’n marse ziska i’n zwenn li en gran lakav ros ki i’n vwar ki i a kapab reste ladan avek son piti. Anfen Polin in abit la menm. I’n netoy anba sa ros byen prop e i’n rod en kantite bann feyaz pour fer baraz devan pour anpes lafreser ganny son bann zanfan.

Anfen pov Polin ti nouri zis lo patat maron e legren dibwa ansanm ek son piti. E pour zot lenz i ti bezwen aziste lakok dibwa pour zot mete. Me Bondye in pitye li ki son de garson n’ariv gran e zot kapab rod debrouy manze pour zot manman e zot pti ser. Be alor i’n si lontan ki lerwa laba deryer i’n kont arive. Ler i ariv dan son lakour i taye premye ketsoz pour li al vwar Polin e son zanfan ki i ti’n separe avek byen lontan. Ler i antre anndan lasanm Polin, napa Polin e ni son zanfan. Lerwa in rod lakaz antye me i pa trouv naryen ditou. Lamenm ler ki i demann bann serviter oli son metres Polin. Zot tou zot reponn: “A mon rwa, nou’n bezwen fer Polin ale parski i ti ape tro fer dan ou sato avek lot zonm e i ti tro fer onte, sa menm nou’n bezwen fer li ale.”

Alor lerwa pa dir naryen, i byen aflize ki son Polin n’arive fer sa. Me lerwa in pran en gran traka ki i pa reste ditou dan lakour. Tou le zour i fer lasas lo son seval e i mazinen ki en zour i a zwenn son metres. Tou le zour i fer sa semen me i pa zwenn personn. Me en zour bomaten i leve, i pran son seval me i dir ek serviter ki i pou rantre en pe tar. Alor i ale, ale lo son seval ziska ki lannwit i fer, me i pa trounen, i kontiny son semen ziska ki i vwar en pti lalimyer dan lwen. Alor dan li menm i dir : “Zot, mon pou swiv sa pti lalimyer pour mwan konnen lekel ki la.” Lerwa i swiv ziska ki i’n ariv pre e i antann lisyen. Me i rekonnet lavwa son pti lisyen. Alor Polin i anpes sa lisyen aboye e i tann en dimoun dir “Bonswar”. Polin i reponn “Bonswar” e lerwa i dir: “Mon lafen, sa menm mon ariv isi.” Polin in fini konnen pourdir sa lerwa, i dir: “A, mon byen regrete ki mon annan zis patat maron.” Alor lerwa i reponn : “Pa fer naryen, mon a manz sa menm.” Alor lerwa i antre, i asize e Polin i donn li son patat maron pour manze. Me lerwa pa manze, zis i ape admir Polin, me i pa kapab garde, i bezwen koze. I dir : “Madanm, eskiz mwan ki mon get ou konm sa, me i fer mwan mazin mon metres Polin. Me ou parey li de figir, e zis akoz ou annan lanmen e Polin ti napa lanmen.” Polin i reponn li i dir : “Be mwan menm Polin, la ou trwa zanfan pe dormi.” Vreman lerwa i vwar tou le trwa zanfan dormi. La i demann ek Polin akoz i’n ariv la; prezan Polin i konmans akont li tou sa ki zot in fer li ek son piti. La menm ler ki lerwa i dir li ki zanmen i’n ekrir li en ketsoz parey. Alor lerwa i plere.

Aswar menm lerwa i dir: “Nou pou ale nou tou dan mon lakour.” I lev tou le trwa son piti i met lo seval. Li ek Polin zot marse e pti lisyen deryer, e ti annan tors ek zot. Alor zot in marse ziska ki zot n’ariv dan lakour lerwa. Zot antre trankil dan sato, oken serviter pa tande, zot tou zot dormi.

Lannmen bomaten lerwa i leve, i fer Polin reste dan son lasanm ek son piti. Lerwa i kriy tou bann serviter devan li, i dir: “Yer swar mon’n al lasas, me mon’n zwenn en kantite manter.” Zot tou zot reponn: “Vre mon rwa!” Lerwa i dir: ” Mon oule pran en konsey ek zot. Ki i bon fer avek manter ?” Enn i reponn i dir: “Mwan mon rwa, mon pran li mon anmar li par son kartye ek de seval brit e mon fer desir li.” Lerwa i dir : “Vre!” Dezyenm i dir: ” A mwan, mon rwa, mon met li dan milye laplenn e mon fisiy li.” Lerwa i get zot menm. Trwazyenm i dir : “Mwan mon met en lakord dan son likou, mon pann li.” Anfen zot tou zot in dir sa ki pour li. Prezan lerwa i dir : “Mon a dir zot ki yer swar mon’n zwenn mon metres Polin ek son trwa zanfan. Ler zot vwar Polin tousala i tonm sek. Lerwa i lev zot, i dir: “Ekoute, pankor ler pour zot tonbe. Si mon ti ekout zot, konmela Polin ti’n mor ek son bann zanfan. Par zot lalang ki zot in koze e martir ki zot in fer li, pa vre.” Lerwa i dir: “Be la prezan mon pou fer zot parey zot in dir mwan fer avek sa bann manter. Sa ler zot pa ti konnen ki mon ti ape dir pour zot menm.” Alor la lerwa i touy zot tou e i marye avek Polin parski i ti annan ledwa pour met bag. La i ti viv ere avek Polin ek son trwa zanfan.

Mon ti ale pour mwan rod en pti plas travay, me lerwa ti pous mwan pangar mon a fer mizer Polin.

Source :

Creolica, 26 juin 2007 – Sirandann ! Zanbaget ! Contes créoles des Seychelles, Sibylle Kriegel & Ingrid Neumann-Holzschuh (eds). Collectés par A. Bollée et I. Neumann-Holzschuh. pp. 39-43