Ar, be en zour dan bwa, Soungoula ti ape bat son lestoman , i ti ape dir Ii menm li zannimo pli vit dan sa fore. Tou lezot zannimo ti’n fatige tann Ii pe vant son lekor koumsa . Zot ti al kot Lyon, Lerwa lafore, pour demann li pour met en lafen avek tousala. Alor, Lyon ti apel tou zannimo dan lafore e lans en defi avek zot.
“Lekel ant zot ki pare pour fer en paryaz avek Soungoula?”
LekeI ki ou ti krwar ti avans devan pour reponn sa defi? Be pa lot ki Torti! I ti avanse kolopi kolopan . En lepa trennen par en lepa. Ler Soungoula ti get son demars, i ti tonm laba e mor riye.
Zot, ou menm ou Torti ou ki pou tay pli vit ki mwan? Kwe kwe kweeee!”
Lezot zanimo osi ti riye, parske vre ler ou get Torti kot i marse, ou a dir zanmen i a ariv kot i pe ale. Be defi ‘n lanse, e paryaz ti bezwen fer. Alors Lyon ti ordonn bann zannimo pour mark douz bit dan lafore depi komansman ziska finisyon.
Ar! Pour de trwa zour avan paryaz, zannimo nek ti war Soungoula pase konmsi zekler dan brousay! I ti pe met pare pour donn Torti en bon leson. I ti dir dan limenm ki ler i ti pou’n ariv kot finisyon paryaz, ti a an en zournen antye avan Torti i aparet. Zot, be pa i ti a riye! Torti li, i ti’n al koz avek son bann fanmir. Torti zot, zot tou zot ti parey. Kouzen, kouzin, manman , papa, tousala ti parey. Ou pa ti pou ganny en konpran lekel ki ti lekel. Torti alors ti’n aranze ek tou son kanmarad pour zot kasyet kot sak bit, e Ii, i ti a kasyet kot dernyen bit. Zot ti a donn Soungoula en bon leson. I ti ava arete fer vantar e fatig lezot zannimo ek son bann gran gran koze.
Zour paryaz, tou zannimo ti’n rasanble kot dernyen bit pour get paryaz. Bann ki ti kapab anvol anler oubyen naze pour ariv kot dernyen bit vitman, ti la kot premye bit pour war komansman paryaz. Lyon ti la
ir komans paryaz. Ler i ti donn sinyal pour paryaz ·komanse, nek Soungoula ti debouse parey zekler! Deryer li, Torti ti trennen dousman dousman. Soungoula ti get deryer li en kou e riy dan li menm .
Soungoula ti ariv kot premye bit, i ti etonnen pour war Torti pe esper li la. “Be! Ki mannyer ou’n ariv la ou?”
“Ou pa trakas sa ou! Mwan mon’n arive mwan!”
Be ou a dir mwan, ki mannyer Torti ti’n fer pour ariv avan li? I ti sir i ti’n kit son rival deryer, e personn pa’n pas li dan semen. I ti akselere. Taler Torti a pas li ankor. Me ler i ti ariv kot dezyenm bit, Torti ti la pe esper li! Be kot in pase? Soungoula i taye menm. Fodre ki i ti ariv avan Torti kot trwazyenm bit. E ou la! Kot trwazyenm bit Torti ti la ankor! Soungoula pa ti ni pran letan pour kestyonn li aprezan. Zis i ti taye menm. Me sak fwa i ti ariv kot en bit, Torti ti lanmenm!
Telman i ti’n tay vit, Soungoula ti’n fatige e menm en kote lipye i ti nepli kapab anvoy devan. I ti tonm ater e fer en pti sonmey. Ler i ti leve, nek i ti taye menm. Finalman, i ti war dernyen bit devan li. En kantite zannimo ti’n rasanble laba e zot ti ape kriye e sot anler. Soungoula ti ralanti en kou e tyek zot for. Be wi, la Torti la pe pas anler anler lo zepol. Soungoula ti aret lanmenm e fer aryer. I ti pe ale pour li sove avan ki bann zannimo ti’n apersevwar li. Me bann zwazo ti’n fini war. “La i la!” zot ti kriye.
Avek sa, tou bann zannimo ti tay deryer Soungoula pour donn li en bon sikannen. Me kot zot ti pou zwenn li? Soungoula ti taye, pli vit ki menm ler i ti ape fer paryaz. Me selman omwen, pour en pe letan, i ti ferm son labous e i ti nepli bat son lestoman pour dir ki se li zannimo pli vit dan bwa. Kanmenm i ti oule sey dir ki i’n bezwen annan kek trik, i annan ki ti’n war li pe dormi pandan paryaz. Ki i ti pour argimante? Pour enn fwa, Soungoula ti bezwen aksepte defet!