PARYAZ NAZE SOUNGOULA EK TORTI

Soungoula zot de Torti zanmen zot lo en bon term. Tou le de zot krwar zot pli vayan ki kamarad. En zour, dan pe diskite, torti I dir ek soungoula:

• Kanmenm ou labous I dir ou pli bon dan tou zafer, mon asire ki ou pa kapab anpandan ek mwan lo naze!

Soungoula I reponn li:

• I kapab lo later, I kapab lo lanmer, ou pou toultan mon boy.

• – soungoula, ou labous toultan I annan bokou pou dir. Nenport kwa, ou ki fer pli byen. Prezan, si ou oule war poudur mon naz plis ki ou, demen met pare nou a sorti isi Ladig nou a naz ziska Mae.

Soungoula I reflesi en pe. I byen konnen poudir I pa konn naze. Me I pa oule ki Torti I boufonn li. I dir:

• Demen senker bomaten mon a zwenn ou lasose, nou a konmanse. Pa fer mwan espere apre ou pa vini.

Torti I dir:

• Demen, depi katrer mon pou’n arrive. Mon a pran pasyans mon a va esper ou ziska senker. Apre, sa ki a arrive, sanmenm.

Olye ki paryaz I komans senker, I konmans katrer edmi bomaten. Denk ki soungoula I ariv lasose, torti I dir:

• Annou konmans konmela menm, nou a fini pli boner.

Soungoula I dir:

• Be ki ou pe espere ankor? Annou ale.

Torti I lanse. Soungoula I pran ler I sote, I al reponn lapel zis lo ledo torti ki ti a pe ouver delo kot I ale. I pa ni santi sa fardo lo son ledo. I pa ni gete si soungoula pe vini deryer li. Pli laroul vann swet I bombard li, pli torti I al pli vit. Soungoula li in graponn torti dan de kote. Son lizye in komans rouz laroul pe biyard li. Enn de fwa in preski mank lespirasyon. Apre en bon moman, torti I kriy:

• Soungoula, oli ou?

Soungoula I reponn dousman:

• Pa rod mwan, ou mon frer. Mon pe tape menm obor ou.

Torti pa vir deryer ditou. Prezan ki I pers sa bann gro gro laroul. In byen krwar ki in kit soungoula en bon zistans deryer li, kan saler I tann soungoula koze lanmenm obor li. Toudmenm, pa perdi konfyans. I glise menm, son ledo ora delo. Saler soungoula son latet I komans vire konmsidire I oule gangn maldemer. Malgre sa, I ankor annan otan lafors pour atrap torti. Arivan obor kot Ros Kayman, torti I kriye:

Soungoula I reponn dousman:

• Ou ale! Pa rod mwan akoz mon lanmenm la obor ou!

Koman soungoula I fini dir sa, torti I sey tou son zefor pou akseler en pe plis. I pa mazin vir deryer pou gete si vreman soungoula pe vini menm deryer li . Torti I dir dan limenm: “Zot! Zanmen mon ti krwar soungoula I kapa naze koumsa! La fodre mon perse menm, sankwa si I ariv avan mwan, I pou tro koze”.

Tou sa letan soungoula li I a pe priye kan zot pou ariv Mae. Lakranp pe anglouti li. De fwa in vomi e nenport ler I kapab gangn maldemer ankor. Sa detrwa bon gorze delo sale ki in bwar in fer li swaf. I dir dan limenm:

“Pa ankor ler pou ariv Mae?”

Semen I ankor long menm. Arivan ek manmel Torti I kriye:

• Soungoula, oli ou? Pa dir mwan ou lanmenm obor mwan.

Safwasi soungoula pa reponn li. En gro laroul in mank derap li lo ledo torti. Sa lafreyer ki’n mont ek li ti pres pou fer li tann sa ki torti in dir li. Malgre i’n tande kanmenm dan sonm, soungoula I deside pa reponn. Torti i kriy ankor en kou:

• Mon frer soungoula, kot ou ete? Ou pe vini menm?

Torti I tann zis tapaz lanmer otour li. Soungoula I reste trankil kot I ti’n graponnen. Li torti, in fini krwar poudir in kit soungoula deryer en bon zistans. I gangn plis kouraz pour al ankor en pe pli vit. Deplis, ler I remarke poudir I pe pros Mae, torti I glis pli vit ankor. Zis avan torti lasose mae, I kriy ek tou son lafors:

• Mon frer soungoula, oli ou? mon’n arive mwan! Ou pa pe noye deryer ?

Saler, soungoula ler in get lasose devan li, i’n gangn plis kouraz, son latet ti nepli vire; alor I sote I ariv lo lasose. Koman I ariv lo lasose I reponn;

• Me zot! Be torti, prezan ki ou arive? Mon’n gangn letan al ater kot lakabiz Dauban, mon’n tap de pti pti! La mon ti a pe fer rezon pour vin depay ou akoz mon’n doute poudir ou pa en bon nazer e ou ti a riske noye.

Torti pa oule krwar ni sa ki i war ni sa ki i’n tande. I pe rod repons pour en pil kestsyon ki toutakou in antre dan son lespri. Ler i mont lo lasose, degre son lizye in vin nwanr avek sezisman.

Torti I dir:

• Soungoula, oli ou?

Soungoula I reponn:

• La mon la mon frer. Lontan mon’n arive mon a pe esper ou. Si mon ti oule, mon ti a’n kapab naz ankor ziska Ladig, mon ti a’n retourn ankor isi Mae e ou, ou pa ti a ankor traverse. Torti, get sa, ou mars dousman, ou naz dousman, be sey anvole petet ou ava nobou apresye en pe lavites!

Torti I bes son latet. Ler i lev son latet, i get soungoula, torti i komans riye. I dir ek soungoula:

• Prezan annou fer paryaz depi isi ziska ladig. Si ou bat mwan ankor, ou a pli kapab boufonn mwan.

Soungoula pa tarde i reponn:

• Annou konmans konmela menm si ou oule.

Torti I dakor. Soungoula I dir li:

• Al avan. Mon a donn ou en pti zistans:

Torti I obeir. I desann dan delo. Koman I konmanse naze, soungoula I sot lo son ledo. Sa voyaz I santi poudir son pwa in anforsi e I konnen akoz. Selman, I fer konmsi I pa konn nanryen ki pe pase. Degre I pe mazinen I pou dres soungoula, torti I bliye ki I swadizan dan en paryaz e alor fodre I naz vit. Dek ki I depas far, torti I pran fon. I konmans manz anba. Pandan en bon pe letan I naz anba menm. Apre I monte pou pran en pe lespirasyon. Koman I ariv par lao delo, torti I kriy:

• Mon frer soungoula, oli ou?

Soungoula saler son lizye pres pou sorti. I pe konmans rann delo sale ki in anvale kan torti ti a pe manz anba. Dan son feb I gangn kouraz reponn:

• Kwa? Kanmenm ou’n naz anba delo ou ankor lanmenm la obor mwan! Be initil ou naz anba delo ankor. La si ou al pet fyel laba dan fon, ki kont mon pou al rann letan mon pou ariv Ladig ? Nou pe fer paryaz naze la. Me nou pa pe fer paryaz touy lekor.

Torti pa dir soungoula nanryen . Dan son leker I dir: “I annan ankor pe vini, espere, mon frer!” Zis koman torti I santi poudir I pe apros en landrwa kot I annan bokou gran koray, I pran fon ankor en kou. Avan ler son lipye I tous ek bann gran gran ledan koray, torti I vir son lekor e I konmans naz par ledo. Ler son lakok I tous ek koray, I pa santi nanryen e laplipar ditan koray I kase. Me soungoula li I dan en move ben; son lekor antye I ansan; son pti kannson in tou desire; I pe bwar gran gran gorze delo, son fyel I oule pete! Prezan ki torti I kontignen naz par ledo.

Letan nepli annan koray devan li, torti I deside mont anler pou pran en pe ler. I devire, I konmans monte. Zis koman son latet I pet delo I kriy:

• Frer soungoula oli ou?

Apre ki soungoula in respire en pe , I vinabou reponn:

• Mon frer, mon lanmenm la obor ou. Me selman in ariv mwan en move zafer. Mon lestoman in konmans brile ek sa, par lola en lot maladi pe deklare avek mwan. Be la mon frer, mon a bezwen sot lo ou ledo ou a retourn ek mwan Mae, mon a al war en dokter.

Torti I dir li:

• Be la kote ou ete? Pa ou lo ….?

Avan ler torti I fini koze, soungoula I reponn:

• Mon fek sote, mon’n ariv lo ou ledo.

Torti I dir:

• Mon pa pou retourn Mae la kot mo’n arive. Mon a degaze mon a anmenn ou Ladig. Me selman fodre mon naz anba delo. Vey ou byen, la mon ale la!

Soungoula pa gangn letan dir torti nanryen. Okontrer I konmans anval gorze delo sale enn deryer lot ziska I santi poudir I pe perdi son lafors vitman. Ptigin par ptigin son lanmen I sape kot I ti’n agrap avek torti. En pti moman, dan son deloryonm, soungoula I santi poudir I nepli lo ledo torti, me I pe desann volonter pli dan fon. Son fyel pa tarde I pete e lekor soungoula I komans monte dousman, dousman, ziska ki i flote zis par lao delo. O menm moman, torti i pet delo en zistans pli devan. Ler i pa santi okenn pwa lo son ledo, I kontignen naz alaflot ziska Ladig san pran okenn ka ki direksyon kouran pe trenn lekor son dalon.