NOUVELMARYE DANDOSYA

Informant: Mrs. Elina Brioche François, Anse Boudin, Praslin. 71 yrs. Recorded 25/07/2021. Researchers: Penda T. Choppy & Cindy Moka. Transcribed by Cindy Moka, Sept. 2021.

Be prezan osi ti annan enn osi ki sa fiy ti kontan en garson. Ti kontan sa garson. Be sa madanm ti annan en lot garson avan. In menaz en de trwa fwa avek sa madanm. Prezan li en zour swar I pran en desizyon ek sa madanm I dir I bezwen al marye.

Prezan sa madanm I dir ek li “Be I annan, sepa konbyen letan nou’n menaz ansanm, ou pa’n zanmen dir mwan annou marye. La ozordi ou dir mwan ou pour kit mwan pour ou al marye, be akoz ou pa marye ek mwan.

I dir “Mwan non, mon pa anvi marye avek ou. Nou a fer sakenn pour li.”

Reelman sa madanm pa dir narnyen li. Be li osi I ti reste obor semen li, gran lakaz obor semen. Prezan son lavarang a vir afas ek grannrout dan en mannyer ler ou ou pase, nenport ki keksoz ki pase ou pou war. Sa garson I kontan sa fiy, I fer bann preparasyon pour maryaz. Maryaz I an mars.

Li sa fanm I pe fer tou sa bann trazaksyon, pa dir zot narnyen. Son de trwa mwan apre zot fiyanse. Dan son senk mwan, apre pour al marye legliz. Be li kantmenm in ti’n kite ek sa madanm li. Zot ti byen, zot ti koze. Zot zwen kanmarad, I dir “Demen mon pe al marye”.

I dir, “Ale, mon swet ou bonn sans.”

Li I pa konnen li. Reelman sa zour bomaten in leve. I kwi manze boner. Sa madanm I fer tou son preparasyon, I pran son fotey I met anba lavarang. Bann la in suit up byen, prepare, in kare kare. Pe desann pour al legliz. En fason ki ler sa maryaz I pase, sa menazer, I war li. Maryaz desann pour al legliz. Laba zot in fer zot zafer, beni maryaz tou zafer. Serenad. Monte avek serenad. Li sa enn menazer I tande kot maryaz pe vini.

Zis, ki ler I ariv vizavi ek lakaz sa madanm ti annan en gran pye koko. Ler ti annan en sanson ki ti pe zwe, zis konman I tonm la. en koko I sorti anler. Mazin ou, I tonm bwat lo latet nouvel marye. Konman I tonm lo son latet, fiy tonmbe en sel kou. Prezan tou dimoun dekonsetrte, anmase. Mor.

P. Choppy Wi akoz koko sorti sa oter.

Mm. Elina: Prezan taler ki ou pou tann zafer. In fini anmas li. In fini anmas sa fiy. Dan son lenz maryaz tou.

Be prezan zot sa bann dimoun lontan zot, zot ti annan zot en lide en mannyer zot. Aswar menm bann la in fini al fer tou demars.

C.Moka: Prosedir lanterman.

P. Choppy: Non, lot kalite demars,

C. Moka: Anr, demars, demars…

Mm. Elina: Wi bann demars, bann tranzaksyon mazik.

C. Moka: Pour relev lanmor.

Mm. Elina: wi, fini fer. Prezan zot ti al kot de grannwar, prezan sa de grannwar, I dir li “ ou madanm pa’n mor. Ou madanm I vivan. Solman ekout sa ki mwan mon pe dir ou.”

Son lannmen fini fer lanterman tou. I dir abiy li dan tou son zafer pa tir narnyen lo li. Tou dimoun in plere in soke. Be toule swar. Premye swar menm ki li ti antere. Premye zour sa fanm I pase. Ler sa fanm I pase. Sa fiy ki ti pour marye ek li la. kote ou kwar I ale, I al kot sa madanm. Kot sa madanm son menazer, ki li I ti ale la. I pase tou le swar. De zour..

C. Moka: be I al rod son manze laba, parey sa enn taler.

Mm. Elina: prezan sa msye I dir li, I dir li mon ava donn ou sa. I dir “demen”, I dir “fer sir en”. Ek sa garson sa. I aranz sa garson.

I dir li “veye ler ki ou war sa fiy pase, pa bezwen ni tyanbo li sepa ki mannyer, zis tous li”.

Reelman, in fini aranz sa garson tou. Menm ler ki sa grannwar I dir, sa fiy I pase dan son vwal, dan tou son bann zafer. I vini. Ler i vini, konman I vini, sa garson I anvoy lanmen lo li. Konman sa garson I anvoy lanmen lo li, sa fiy I swiv li. Konman sa fiy I swiv li. I pa ale kot sa madanm li. Prezan sa garson la I al kot sa msye ki ti dir li tous sa fiy. Zot ale, ler I ale I swiv li. Konman I arive granwar I atrap sa fiy I met anndan. Konman I met anndan Grannwar I tir tou sa bann zafer lo li I konmans benny li.

Ou war ler grannwar pe okip sa fiy, pe okip anndan la. De zot pe antre laba, pe le kas laport; pour vinn pran. Bann gran sorsye sa. Sa tonton pa tann narnyen, sa tonton pe okipe menm pe benyen. Benny li pe fer tou bann zafer zistwar avek li. Prezan sanmen sa grannwar I ti malen li osi. Kot son lakour pa ti antre bonnavini. Zot, zot antre ziske devann laport. Anndan non. La fimen partou pe monte, ben pe koze. Fini benny sa fiy byen. Fini donn li son dite. Ler fini donn li son dite. Fer li asiz anndan, fer li kouver li anba en gran drar blan. Grannwar I sorti avek son roten.

Sa granwar I konmans fwet sa de boug ki ti la deor. Zot ki ti ensiste. Ti annan en ladan zot ti dir li, Fransis Wayaya. Li I ti koz pti lavwa li. I bat enn. I bate disan pe koule I trennen pour ale. Sa enn I ankor pe, reziste. Sa boug I kit roten I al pran bato. I batonn li sa boug I mars katpat. Gran bomaten, 6 er bomaten dimoun pe al travay. Sa boug I la lo peron la. li I ti anvi, konmsi I oule war laresistans, be sa enn ki la I pli for ki li. Sa boug I bat li, mon dir ou. Ler I sorti la I trennen. Zis disan. La ler in fini i sort i ale, sa fiy ek sa garson ki ti marye anmenn li kot lapolis al fer deklarasyon, akoz ti’n fini met li lo soz… I la li en fer en ta zanfan. Solman mon pa konnen si li in.

P. Choppy: Konmsi zot in nobour tir li dan sa leta zonmbi.

Mm. Elina: wi ti tir li. Ler in fini tir li anmenn li dan, anmenm li prezan. Anmenn li kot lapolis fer deklarasyon. Prezan tou dimoun in reste bet. Ler fini, prezan al war dokter. Ler in fini war dokter. Dokter i konsilte li.

P. Choppy: I vivan, i byen.

Mm. Elina: Wi vivan i normal. I byen parey mwan avek ou. I koze tou zafer. Nou fer son re-tou zafer maryaz, fer zanfan tou. E si mon pa trope sa madanm i ti en dimoun La Digue li.

Be dapre sa ki mon konpran ler en dimoun i fer sa, zot pran ou nanm zot anblouz ou. Prezan ki ou war soz ki zot dir en dimoun pa kapab koze se akoz. Be toultan mon ti demann bann la, “Be akoz nou dir en dimoun i en dandosya. Sa ki nou dir en dimoun i en dandosya akoz nou pa ganny en konversasyon avek zot. Akoz zot in met en zepeng anba ou Lalang. Sa keksoz i anba ou lalang i atase pour pa repet keksoz pour ou pa koze. Keksoz ou a fer ou pa pour kapab koze. Prezan sa bann dimoun si ou malen. Zot met sa keksoz anba ou Lalang pour pa repet keksoz. Zot al derap sa keksoz i konman en zegwir konman en keksoz zot atase.