NANM LAVAN

Georgine Robert

Ogisten, alyas Tinwanr, ti reste dan leo Kapisen. Personn pa ti konnen kote i ti’n ganny sa non. Tinwanr limenm pa ti rapel. Petet ti akoz son kouler fonse. Me sa pour li pa ti en problenm. Antouka sa pa ti anpes dimoun kontan li. Okontrer i ti en zonm popiler. Akoz? I ti en pti bonnonrn ki ti kontan ede. Me i ti annan de vis. I ti en bwarer baka e en zwer matouloumba. Ou ti war li dan pti senk er pe al lo si-z-er diswar devan laport madanm entel, asize lo peron madanm lot tel, pe apiy pye frisiter en lot konmsi i ti pre pour tonbe, pe esper enn, de, trwa boutey. I pa ti konn son tonaz. Lapliparditan i ti ganny peye avek baka pour bann servis ki i ti rann lakominote. I annan de fwa i ti ganny larzan. Me sa ti fini dan lapire ouswa matouloumba. Byen rar i ti balye. Preske toultan i ti pi. Me ler son bi ti monte i ti fete.

Son madanm ti’n kit Ii byen lontan. I pa ti kapab siport sa kalite lavi. Sa baka ti donn son labous en loder pa nonmen. Granmersi zot ti napa zanfan. Ti pou en laont pour en zanfan pour war son papa dan sa leta. Dan son vant byen ron ti annan en ronfleman konmsi vannswet ti’n vin en keksoz permanan lo son teritwar. I ti kasyet son laont ler dimoun ti dir li akoz i pa ti aste en pe manze. I ti reponn an dizan si sa bann zengredyen dan lapire pa ti manze menm. “Lantir, ponmdeter, tousala pa manze? Ki ou vey mon zafer? Ou napa lokipasyon?” Apre sa i ti endik zot ki zot ti pour fer olye vey en grannwanr parey li.

Plizyer fwa i ti’n tonm sou dan rigol obor semen. Enn de fwa gard ti’n aret Ii e ferm Ii dan kaso. Me i paret ki ti napa okenn lefe. Si i ti ganny sans ariv kot Ii i ti zis tonm lo son kad labous ouver e larg bann gro gro ronfleman ki ti telman for ou ti kapab tann Ii en bon distans avek son lakaz.

Aze karant an Tinwanr ti resanble en dimoun dan en swasantenn lannen. Me akoz i ti’n mal anmenn son lavi, lavi ti’n mal anmenn Ii. Lavi pour Ii ti deroul tou le zour dan menm fason ziska zour i ti ganny son mark arete.

Lafen mwan Novanm i peryod lavan dan legliz katolik. Dan sa lepok lavan ti letan kot bann nanm ti marse. Sa ti form parti lezann Sesel. Tou dimoun ti krwar sa e zot ti per nanm lavan ki ti sipoze kas brans dibwa par lao zot latet si zot ti mars aswar, pour zot get anler pour nanm rekonnet zot. Tinwanr ti okouran sa bann detay me i pa ti fatig son latet. Karenm, lavan, nwel, lannen, tousala ti deroul dan deloryonm baka ek lapire.

Tou dimoun sa letan ti obzerv lavan. Zot ti asiste lanmes Dimans, kot pret ti abiy an mov e bann bal asosye ti ganny anvoye pour Nwel ek Lannen. Lavan ti pas dan trankilite. Akoz Novanm i en mwan kot soley i kous boner dimoun ti raporte ki bann rankont ti fer ant si-z-er diswar e senk er bomaten. Ti napa bokou ki ti marse apre sis er diswar letan lavan. Manrmay, zanmen ou ti pou zwenn zot sa ler. De ki laklos si-z-er ti sonnen tou zanfan ti fer sir zot ti’n ariv kot zot.

Levennman ki ti sanz lavi Tinwanr ti deroul en zour Dimans le 30 Novanm, anviron kat-r-er bomaten. Lavey, son Sanmdi, Tinwanr ti’n al pas lazournen kot son ser Dalya, sel dimoun ki ti pran son zentere. Ti annan en festen laba. Granmaten i ti’n ed son ser pour touy e plim trwa gro poul ki ti servi pour dezennen. De semenn davans i ti’n kraz lantiy. Sa disik rouz ti’n fer Ii formante move kalite. Sa, zis de kafoul ti ase pour anvoy ou anba. Dalya ti’n aste en bon diri bengal byen angren. Dan son leker i ti priye ki Tinwanr pa ti tay kot bidon tro souvan. Ti telman annan kantite keksoz pour fer.

Ver wit er bomaten senk lezot zonm ti’n arive. Lakaz Dalya ti pouri. Festen ti’n fer pour rekonstriksyon sa gran lakaz an plans lo de, borde ek lat e kouver ek fey latannyen. Sa senk zonm enkli Tinwanr ki ti la zis pour fer sa travay. Tou materyo konstriksyon ti la, dibwa, fey, lat. Ti annan bokou pour fer. Dekouver, koup dibwa, kari, retir dibwa pouri, borde e rekouver, tousala aroze par enn de kafoul ki ti met laganm e fer travay mars pli vit.

Dan pti midi dezennen ti’n pare; kari poul byen for, salad kokonm e sa bon diri bengal angren. Kwiyer pa ti servi. Lanmen ki ti koze. Kafoul ti ganny ranpli sak fwa zot ti vid. Apre vant plen zot ti asiz dan lonbraz en gran pye bodanmyen kot zot ti larg bann fars dir. Dalya ti per pangar zot ti a lager. Me sa ti sis bon zanmi. Zot ti vwazen. Zot ti konpran kanmarad. Ti napa problenm.

Ti napa ni problenm lapli. Soley ti tap for. Zot ti repran travay. Lakaz ti reste zis pour kouver. De zonm ti mont anler. De lezot ater ti anfil fey dan krok en baton e fil anler avek kouvrer. Ki ti koste zot ansanm e atas zot for avek treng. Lakord vakwa ti sel keksoz apropriye pour anpes fey glise pour delo pa traverse. Zot ti pran byen ka, sirtou ler zot ti kas fey lo fetaz. Menm si zot ti’n bwar en pe sa pa ti afekte travay. Antouka zot ti bann profesyonel. Dalya ti satisfe.

Travay akonpli, kouvrer ti desann e tou le sis ti tonm dan bidon baka, ziska ti reste zis lanmar. Zot ti demann Dalya en bout tanmi pour zot pers lanmar e bwar sa dernyen fon. Avan zot ti ale Dalya ti remersye zot. I ti donn zot senk roupi sakenn. Ti anviron si-z-er. Zot ti donn randevou pour tanto anba ros lavarang, ti pou lo la. Sakenn ti pou anmenn en kontribisyon en boutey bwar for, en labouzi, san bliy zalimet. Tou dimoun ti pou ariv dan wit er.

Tinwanr ti’n fek aste en pake kart kot tonton sinwan. I ti pou anmenn son kart pour plis lasans, akoz sak fwa son bann dalon ti anmenn sa ki pour zot i ti pi. Sa voyaz i ti pou bezwen balye en kou. Tou sa pti senk roupi ki Dalya ti’n partaze ti pou vin dan son pos. I ti riy tousel. “Tanto, zot pou kanmi!” En madanrn ki ti pe pase ti get li en drol fason. Lanmenm ler Tinwanr ti remarke i ti pe koz tousel. Kanmi, i ti depese e pran direksyon son lakaz pour li al prepar li pour pran sa gro lo. Me avan i ti pou bezwen al rod en pe manze. I pa ti konnen ki kantite letan lanmizman ti pou dire.

Ler Tinwanr ti koste lakaz, son madanm Sarlot ti pe debout obor pye zak, pe esper li. “Ar wi, senyer,” Tinwanr ti dir dan limenm. “Sa fanm dyab in arive. La ki kankan i’n vin fer?” Me i ti dir for, “Sarlot, ki sa divan ki’n pous ou isi? Oubyen ou’n vin anons mwan mon lanrnor?”

Sarlot ti’n vin anmenn mesaz sorti kot per laparwas. “Koze mirak pa lafresisan, Tinwanr, me selman mwan ki anmas tou dan ou plas letan mon al legliz. Mon’n anmenn konmisyon mon per. I dir mwan repet son mesaz byen. La la kimannyer i dir. Pa krwar letan ou mor ou pou pas legliz. Ou pou al direkteman simityer parey gro karang. Si ou pa kapab vin avek ou lipye, personn pa pou anmenn ou letan ou’n mor. E pa li osi ki pou siny ou paspor. La la! Ou pa onte Tinwanr!”

“Ki mon pou onte?” Tinwanr ti reponn . “Ou kanmi! Tou lazournen ou dan zip per. Per Ogisten i krwar ou en bon keksoz. I pa konnen ou pas tou ou letan kot bonnonm dibwa!”

Avek sa Tinwanr ti vire pour li antre anndan. Sarlot ti sezi son semiz par deryer. “Apre Tinwanr, donn manze ou sat!” i ti kriy dan son zorey. ” I’n vin manz tou mon pwason. Sansan mon pou donn li en koudmayos. Ou tande! Fer ou sir!” Avek sa i ti balans son zip, fer en “tyouk” e diriz dan direksyon son payot .

Laraz ti pe ser lagorz Tinwanr. Sa fanm, kanmenrn zot pa ti reste ansanm, ti toultan trouv en fason pour fatig son lavi. Sak fwa i ti vin kot li i ti fer li pran lakoler. Saler komansman zot ti telman byen. Kimannyer tou keksoz ti’n sanze koumsa?

I ti ankor pe mangonnen letan i ti antre anndan. Ti zis en dezord. Ti annan en lod er pwason toufe partou. Bobiskoum ti’n manz tou pwason. Zis bann pikan latet karang ki ti reste fannen partou anba latab. Pourtan i ti’n pez son kouvertir marmit avek karo. I ti fer son rezon si i pou touy Bobiskoum oubyen non. I ti’n fer Ii ganny dezagreman avek Sarlot, an plis i ti’n manz tou son pwason.

Menm letan ki i ti pe fer son rezon Bobiskoum ti antre, fer son ledo ron, e frot frot avek son lazanm.

“Miaou!”

“Sel zanmi ki mon annan,” Tinwanr ti mirmire. “Bobiskoum, ou’n manz tou mon pwason. Ki mon pou manze? Mon krwar mon pou bezwen vann ou.” I ti met Bobiskoum dan en sak vakwa e ser lagel. Sat ti debat. “Tinwanr larg mwan!”

Tinwanr ti pre pour larg tant. “Ase bet!” I ti dir dan limenm. “Sat i kriy dan en fason ki toultan ou krwar zot pe koze. Taler mon a larg ou!” I ti dir an riyan. “Taler tonton sinwan a donn mwan mon senk roupi, e ou, ou a demerd ou.”

“Ale ou,” sat ti reponn, avek sa son dan nennen ki tou dimoun i konnen. Tinwanr ti antre dan laboutik sinwan.

“Tonton mon’n anmenn keksoz pour ou.”

Tonton ti’n fini konnen kwa. I ti pran tant avek Tinwanr e donn Ii en biye senk roupi.

“Demen pase. Mon ava anmas keksoz pour ou.”

Tinwanr ti glis son biye dan son pos e retourn kot Ii an santan. I ti poz en friyapen lo labrez kafoul, dekok en koko, alonz lo en goni anba pye mang letan i ti esper son dinen bwi.

“Pov Bobiskoum!” Prezan ki leker Tinwanr ti fermal. ” Mon pov sat.”

Tanto zafer ti pou bon. Anndan ti annan en demi lit ronm. Dan son pos ti annan de biye senk roupi. Tanto son bi ti pou bezwen monte.

En pti sonmey ti pran Ii. I ti sot zis atan, akoz si i ti’n dormi en pe pli lontan friyapen ti pou’n brile. I ti asize avek sa gro friyapen zonn ek koko sek. Ler i ti fini ti reste zis bann lakok nwanr . I ti anvoy sa dan ta lapay. I ti pou bezwen bouze akoz ti’n deza tar.

Tinwanr ti ariv an retar kot ros lavarang. Son senk dalon ti byen enpasyan. Lontan zot ti’n ariv la. Zot pa ti’n kapab komans zwe akoz ti tour Tinwanr anmenn kart. Krwar mwan, zot pa ti kontan ditou. Zot ti’n larg enn de betiz avan ki Tinwanr ti fer son laparans.

De labouzi ti pe klere akoz zot ti pou bril de par de pour donn ase laklerte e pou dir en bon pe letan. Tinwanr ti prezant son leskiz. Son bann dalon ti dir Ii ferm son labous, an gros term, akoz deza i ti’n gat ase letan. Tinwanr pa ti tande ki zot ti pe dir Ii. I ti brod en pe bann deroulman depi i ti’n kit lakaz Dalya. Son bagar avek Sarlot e Bobiskoum ki ti’n manz tou son pwason toufe.

Son dalon Gaston ti pran laparol. “Be Tinwanr o, ou pa kapab donn Sarlot en mark arete? Ou oule dir mwan i’n kite avek ou selman i pe fatig ou lavi koumsa!”

“Mon pe les Ii gra!” Tinwanr ti dir, pour kasyet son lakanmizri. “I annan zour i pou repete. Limenm ki pou dir ase.”

“Ase rabase parey bann vye lanm!” Giyonm ti’n fini fatige. “Ki ler zot pou konmanse? Kok sante?”

“Pas boutey Tinwanr. Nou a aroz lagorz avan sa premye parti.”

Sakenn ti pran en lagorz dan demi lit Tinwanr, e alim en sigaret dipei. Zot ti is en bos. Lanmen abil ti bat kart avek en lavites.

“Demande !”

Kart ti ganny poze ater.

“Koupe !”

“Fanm anba de!”

“Gannyen, en roupi!”

“Perdi fanm!”

“La ou la! La i monte!”

“Oli Ii? Oli Ii? La i la. Mon pa ti dir ou! Gannyen anba de. Donn mwan mon roupi!”

Sigaret apandan lo bout lalev, bann boug ti bate, koupe, demande, enn deryer lot. Ti napa ni lager, ni dispit. Tanpi konnen lekel ki balye, lekel ki perdi. Larzan ti sorti dan en pos, al dan lot e retourn ankor. Boutey i monte tanzantan pour aroz lagorz e zonm ti zet bout sigaret zis ler lalev ti konmans brile. Zot ti’n perdi kont letan. Personn ti napa mont, alor zot ti les sante. Tinwanr ti’n fini perdi senk roupi. Saler trwa boutey labwason for ti’n vid e zot ti dan en nespes deloryonm. Sa menm letan kot Tinwanr ti pe mazin son senk roupi ki i ti’n perdi, en sat lo ros zis par lao zot ti kriye.

“Tinwanr ale, Tinwanr.”

Seve Tinwanr ti drese. Son bann dalon osi ti’n tande. Enn ti dir dousman, “Tinwanr, pa Bobiskoum ki ou’n vann avek Sinwan sa?”

Malgre zot lafreyer, zot ti get kanmarad an misouk e riy dousman pour sat pa tande. Ti reste ankor en pe bwar. Larzan ti ankor annan. Zot pa ti pou al koumsa zis pour fer plezir sat. Dan leksitasyon zwe, gannyen perdi, dan soulezon e lespri enbibe par lalkol, zwe ti’n vin otomatik. Annan sat, napa sat, zot ti’n tanpi konnen. Langaz matouloumba, ki en ta dimoun pa ni menm konpran, ti rezonnen anba ros lavarang. Kart ti anvole, larzan ti sanz lanmen, fars ansyen ek nouvo ti sorti e riye ti anforsi.

Menm ler en pti grenas ti fannen, personn pa ti bouze. Delo zanmen ti pou traverse anba sa ros. Ti en lavarang natirel. Sel keksoz ki ti pou kapab tir zot la se si labouzi ti tennyen. Me labouzi ti annan en ta. Antouka zot ti pou kapab ale pour en bon pe letan.

Matouloumba oubyen demande, i en zwe ki enn fwa i’n poz son grif lo ou, i ser ou dan son latrap. Debat kimannyer ou oule, ou pa pou sape. Okontrer i pou ser ou pli for. Tinwanr ti’n pri. I ti konnen, me i pa ti kapab sape. Menm avek son kart nef ki i ti’n anmennen, i ti pe perdi.

Dan zot soulezon zot ti’n konpletman bliy sat, menm Tinwanr. Pli zot ti sou, pli zwe ti pli eksitan. Dan de-z-er bomaten labouzi ti pe dir orevwar. Zonm ti komans baye. Ti’n ler pour ale. Boutey ti’n sek, pos Tinwanr ti vid, labouzi ti pe tennyen. Tinwanr ti ranmas son pake kart.

Tou le sis ti fer en bout semen ansanm. Kot en gro pye sandragon, zot ti separe. Trwa ti pran en direksyon, de ti pran en lot, e Tinwanr ti al Ii tousel dan pti lalin kler. Olye pran semen lakaz i ti pran semen legliz. Dan son deloryonm i pa ti remark diferans. I ti driv isi, driv laba, bat isi, laba, koz tousel, gel Bobiskoum, ziska ler i ti zwenn en group zennzan pe zwe boul. Dan pti laklerte lalin Tinwanr ti sey etidye zot. Ti paret annan en diferans laz, me zot ti preske menm grander e byen abiye an blan, kannson long, semiz lanmas long. Tinwanr pa ti konnen ki kantite letan i ti’n debout pe obzerv zot.

Menm si i ti sou Tinwanr pa ti kapab tir son lizye lo sa bann zwer. Zot ti pe zwe boul menm fason ki li i ti’n zwe letan i ti lekol. Sa ti fer li mazin le bon vye tan. Son leker ti sere, enn de gout larm ti koule. I ti mazin son papa, son manman, son vye mis. Tousala ti’n kit later en bon letan pase. Zot tou zot ti’n defen.

Boul ti sorti kot enn e anvol kot lot avek en lavites. Tinwanr ti ganny difikilte swiv zot mouvman, me son lizye ti paret annan en lavolonte pour zot menm ki ti an kontras avek son lekor. Ti pas li en lanvi zwe, pour zwenn ansanm avek bann zennzan e pas en bon letan. I pa ti ni fatige, ni ansonmey.

Boul ti sanz mouvman. Tou dimoun ti debout dan en serk e boul ti fer letour. Boul ti sorti kot enn “Ola”. Sa ki ti gobe ti reponn “Olala !” Litani ti ale “Ola, Olala!, Ola!, Olala!” Pa konnen ki ler Tinwanr ti’n sot dan milye serk. Prezan, olye boul fer letour, li ki ti pas boul avek sak zwer. Lezot ti kriy “Ola!” Li i ti reponn “Olala!” I ti driv isi, driv laba, apiy isi, apiy laba, me zwe ti kontinyen. Tinwanr pa ti konnen. Ti kat-r-er bomaten. Premye kok ti sante. Tinwanr byen fatige ti get toultour li ebete. Ti napa personn. “Napa en nanm!” Tinwanr ti mirmire, ” Kote zot in ale en pti kou?” “E bann la,” i ti kriye “Oli zot annou zwe!” Me personn pa ti reponn. Ti annan zis lanmizik grele. Boul ti’n reste dan son lanmen pare pour anvoy avek en lot. En sel kou i ti frisonnen. I ti tann dimoun koze. Per Ogisten ti pe desann prezan ki Tinwanr ti rekonnet ki i pre avek legliz. Bedo ti pe al ouver legliz pour mon per ekout lakonfesyon avan lanmes si-z-er. Dan lot direksyon kat madanm ti pe vin konfese.

“Granmersi i pa’n war mwan,” Tinwanr ti mirmire ler per ti’n fini pase. Toultan i annan en koze mirak rezerve zis pour mwan.”

Me bann madanm ti pou rekonnet li. Zot ti tro zaksyon pour zot pa war li.

“Granmersi nou’n ariv kot legliz. Anmar mwan pour marse aswar tousel letan lavan. Mon ser krwar mwan ki si nanm lavan ti pe esper mwan, zanmen i ti pou pare.”

“I ankor femwanr, Oreli. Ferm en pe ou labous. Ou bon zis fer tapaz!”

“Ou osi ou per Sisi. Mon remarke ou pli per ki mwan. Me selman nou’n fini arive. Nanm lavan pa pou vin obor legliz, tou nanm i per lakrwa.”

“Zot fermen zot de. Swadizan zot pe al konfese. Zot pa kapab mazin sa ki zot pe al dir. Zot konnen kimannyer sa per i ete. Si ou konmans tatonnen i pou krwar ou’n kasyet keksoz.”

Zot ti’n ariv pre kot Tinwanr ki prezan ki kapab tann tou sa ki zot ti pe dir. Enn ti dir “Lekel sa?”

Lot ti reponn ” Be pa Tinwanr. Ki i pe fer kot legliz sa ler? I pa ni menm abitye vin legliz.” I ti get Tinwanr ki ti pe debout ebete. Son boul dan son lanmen. “Kisisa ki dan son lanmen?” enn ti demande.

“En boul,” lot ti reponn.

“Mon ser pa ti en boul sa. I annan en drol laform. Ou a dir kisisa sa?”

Akoz partou ti tris , Tinwanr ti tann konversasyon byen kler. I ti get dan son lanmen. Olye boul ti en koksis latet trou lizye vid, ledan ti pe riye. Tinwanr ti larg en leokri. En lisyen, pa konnen kote ti konmans irle. Bann madanm, leker dan gozye, ti large drwat dan legliz avek Tinwar ki ti’n fini desoule zis lo zot talon. Per Ogisten anndan dan sakristi pa ti tann tou sa deroulman. Bedo ti pe met delwil dan lalanp sen sakreman. I pa ti tro enterese. I ti pe dir dan limenm ki bann fanm ti zis pe fer zot letalaz.

Per pa ti oule krwar son lizye ler i ti sorti dan sakristi pour al dan konfesyonal e war Tinwanr azenou dan ban. I pa ti okouran ki Tinwanr ti’n fer son premye rankont avek nanm lavan. Eski ti pou son boner ouswa son maler?

Depi sa zour, lavi Tinwanr ti sanze. I pa ti rankontre ni nanm lavan, ni nanm baka akoz i ti dir adye bwar. Detrwa zour pli tar i ti rann en vizit per Ogisten. Zot de per zot ti asize anba lavarang. Tinwanr ti anbarase. I pa ti konnen kot pour konmanse. Me Per ti esper li fer son rezon avan. Ler i ti’n pare i ti rakont tou sa ki ti’n pase. Per ti ankouraz li, donn li en benediksyon e pli tar i ti al konfese. I ti ‘n telman krwar ki per ti pou maltret Ii ki i ti’n sezi. Per Ogisten pa ti en tro move boug ler ou ti konn Ii byen. Petet avan ti zis bwar ki ti’n ebloui son lespri.

Per Ogisten ti fer apel Tinwanr en Lendi bomaten. Tinwanr ti en pe ezite, me i ti ale pour fer plezir per. Bedo ti malad. Per ti pe rod en dimoun pour ranplas li. Tinwanr ti konmans travay Lendi menm . I ti ouver legliz bomaten, fermen aswar, sonn laklos, alim lalanp sen sakreman. Per ti bezwen en zardinyen. Tinwanr ti pyose, plante, aroze, rekolte. Per Ogisten ti annan konfyans avek Ii. I ti menm les Ii vann legim e gard kont larzan. Ler Sarlot ti war Tinwanr pe debrouye, i ti konmans fer lakot. Tanzantan i ti vin netway lakaz mon Per. Zot ti ganny sans fer en pti koze san maltret kanmarad.

Tinwanr ti donn manze bef e tir dile dan bomaten pour pret ganny dile fre. Tou le zour i ti koken en sopin pour Sarlot son doudou, e son leker ti sot dan son lagorz ler en zour Sarlot ti anbras Ii lo son lazou e dir dan son zorey, “Akoz nou pa retoumen?”

Byensir Tinwanr ti pe esper sa depi lontan, me i pa ti’n oze pangar Sarlot ti a fer Ii kanmi. Sa zour letan i ti retourn kot li kat-r-er i ti fer en netwayaz konplet. Me kantmenm ti paret annan en keksoz ki ti manke. I ti grat son latet, me i pa ti kapab mazinen kwa. Menm letan Sarlot ti vini.

“Lolot, get anndan. Ou a dir i annan en keksoz ki manke. Mon pa konnen kisisa.”

Sarlot ti get li. I ti mor riye. “Tinwanr i mank Bobiskoum. Oli li?”

”I’n perdi, Lolot.” I ti manti.

“Les li. Mon annan en sirpriz pour ou.”

Sa sirpriz ti en pti Bobiskoum nwanr, lake ponpon. Ti napa koman Tinwanr. I ti rezwenn Sarlot, son doudou, e Bobiskoum son sat, gras a “Nanm Lavan”.

Me Sarlot ti gard byen son sekre. Sak lannen, mwan Novanm, Tinwanr ti zwe boul avek nanm lavan dan son sonmey. I ti larg sa gran leokri ler i ti dekouver dan son rev ki boul ti en koksis, lizye de trou e ledan pe riye. Enn ler dan son kosmar boul ti menm koze, en lavwa dan nennen, “Ou boner koman ou maler!” Pour Tinwanr ti tou le de, boner, maler. Pour Sarlot i ti zis boner.

Me Seselwa i ankor pe demande, “Vre nanm i marse letan lavan?” Ki ou krwar?