MSYE SASER

Elina François (Grand Anse Praslin)

Ti annan en imsye saser. Partou kot i ti pase, i ti rod bann pti zwazo. En zour dan son pe marse, i bat ek en trou, koman en lafos. Ladan ti anna latet dimoun mor. Sa saser ti demande, « Ki mannyer ou’n fer pour vin la ? »

Latet i dir ek li, “Ou konnen, Lalang ki’n anmenn mwan la ! »

Relman Saser i dir, « Be Latet, ou koze?”

Latet i dir, “Wi!”

Saser i dan traka! Ki mannyer latet i koze? Be latet in reponn trwa fwa poudir lalang ki’n amenn li la! Saser in al kot Mon Rwa.

“Mon Rwa, mon’n war keksoz drol! Mon’n war en latet dan trou. Sa latet i koze !”

Lerwa i dir li, “Ase enbesil! Ki mannyer en latet tousel i kapab koze?”

Saser i dir, “Mon Rwa, annou ale mon a montre ou ! »

Lerwa i dir, « Ou konnen mon garson, i koute pour tir Lerwa se li !  Si napa latet laba, i annan latet ki pou sote !»

Vreman i apel bann solda, zot al laba. An arivan laba, vre latet i la. Prezan Mon Rwa i dir li, « Be fer latet koze ! »

Saser i kriye, « Latet ! »

Latet ndou!

“Latet!”

Latet ndou!

Mon Rwa i dir, “Ou oule dir mwan ou anmenn mwan la, prezan latet pa koze ? »

Saser i sipliy latet pour koze.

Latet ndou!

Mon Rwa i dir, « Mon garson, mon dir ou, ou’n gaspiy mon letan ! La mon donn permisyon mon solda, met sa saser lo de seval, sakenn dan son direksyon, desir li ! »

Ler tousala in fini, latet i dir, « Mon ti dir li lalang ki’n anmenn mwan la ! »

Mon Rwa i dir, « Me zot ! Vre latet i koze ! »

Me ti’n tro tar. Sa saser ti’n devret servi son moral.