MSYE PWASON

Mm. Jessy Hossen

Alors en zour ti annan en msye. Tou le zour i ti nek plennyen, “Arwi, akoz mon mizer koumsa? Mon ti a kontan vin ris. Akoz mon pa vin ris? Mon ti a kontan vin en lerwa. Akoz mon pa en lerwa?”

Dan sa menm landrwa, ti annan en bonnonm mazisyen ki ti kapab fer tou keksoz. I ti fatige tann sa msye plennyen. En zour son zorey ti’n fatige kornen e i ti forse demann avek sa msye, “Dir mwan, ki ou gannyen pour plennyen tou le zour koumsa?”

Zot konmsi ou ti’n ouver granmofonn, nek sa msye ti konmanse, “Ar wi, akoz mon mizer? Mon fatige mizer koumsa. Mon ti a kontan vin ris. Akoz mon pa vin ris? Mon ti a kontan vin en lerwa. Akoz mon pa vin en lerwa? Mon’n fatige avek sa lavi. Akoz lanmor pa pran mwan?”

Sa mazisyen ti ekoute e apre ti demann Ii, “Si mon fer ou vin lerwa ou a kontan? Ou ava aret plennyen?”

Sa msye ti reponn, “Be wi.”

Sa mazisyen ti dir, “Me selman, fodre ki sa ki mon a demann ou ou a donn mwan.”

Sa msye ti reponn, “Pa trakase. Mon a donn ou tou sa ki ou ava demande. Mon zis oule vin Lerwa. Fer mwan vin lerwa si ou kapab.”

De trwa zour apre, lerwa sa lavil ki ti’n vye, ti mor. Apre son lanterman, pep ti fer debrouy pour ganny en lot lerwa. Me sa kandida ti bezwen pas par en laport mazik. Si i pa ti kapab fer sa i pa ti kapab ganny aksepte konman lerwa. Plizyer kandida ti seye me zot pa ti reisi. Alafen premye minis ti kriye, “Dir mwan, eski napa okenn zonm ankor dan sa pei ?”

Mazisyen ti reponn,”I annan enn laba dan leo. Me i mizer e i sal.” Premye minis ti reponn, “Pa fer naryen. Al sers Ii.”

Vreman en platoun ven solda ti al sers msye Mizer. Kot i ti pe desann nek laport ti konmans grense. Zis konman i ti prezant devan nek laport ti ouver. Tou dimoun ti bat lanmen. Zot ti byen kontan ki alafen zot ti’n ganny en lerwa. Zot ti apel Ii Lerwa Alelouya.

Lerwa Alelouya ti renny byen. Ondire pa si i ti en zonm mizer. I ti marye avek en zoli prenses e enn an pli tar i ti ganny en pti garson. Wit zour apre nesans, mazisyen ti vin war Ii e i ti fer Ii rapel son promes.

Lerwa ti reponn, “Napa problenm. Demann mwan sa ki ou oule e ou a gannyen.”

Mazisyen ti reponn, “Mon rwa, mon ti a kontan ganny ou premye zanfan.”

Lerwa ti sezi, me ki ou a fer, en promes se en det e avek en lavwa tranble i ti reponn, “0.K.”

Mazisyen ti pran laparol e i ti dir, “Mon pa pou pran Ii, me mon pou kit Ii avek ou.”

Apre sa i ti beni piti e zis konman i ti ‘n fini fer siny lo Ii, nek sa ptibaba ti sanze e vin en pwason dan en gran kivet kristal. Mazisyen ti disparet. Lerwa ek Laren ti rod en nennenn pour sonny prens Pwason. Me Prens apre ki i ti’n ganny trwa an i ti koze malgre ki i ti en pwason. Ler i ti’n ariv 18 an, i ti dir avek son papa, “Papa, mon anvi marye.”

Son papa ti reste etonnen. Dan son leker i ti dir, “Zot! Lekel ki pou oule marye avek en pwason?” Toudmenm i ti anvoy demann maryaz kot en lerwa ki ti annan trwa fiy. Lerwa ti fer zot konnen ki son prens ti en pwason.

Sa lerwa ti fer apel son trwa fiy e i ti dir avek zot ki Prens Pwason in demann zot maryaz. Ki repons mon ava donn Ii ?”

Premye fiy i reponn, “Papa, mwan mon pa dakor marye ek en pwason. ”

Me trwazyenm fiy ti dakor marye avek Prens Pwason. Alor maryaz ti bat ater e sa prenses ti byen kontan son msye pwason.

Sepandan dan lavil ti annan en kaptenn ki ti apel Lidovik. Lidovik ti trouv madanm Prens Pwason byen atiran, e i ti profite letan ki nennenn ti anmenm Prens Pwason bennyen borlanmer pour li fer lakostaz. Li madanm Prens Pwason pa ti fidel avek prens ditou, e i ti dakor avek Kaptenn Lidovik. Sa ti ale pandan en bon pe letan ziska ki Prens Pwason ti remark keksoz. En zour, prens pa ti kontinyen bennyen e i ti dir nennenn anmenn li deswit kot li. Nennenn ti war sa drol akoz prens ti abitye pran bokou letan borlanmer. Li nennenn, i ti konnen ki komeraz madanm ti annan avek Kaptenn Lidovik. Letan zot ti war nennenn vini avek son kivet kristal, Lidovik ti sezi e i ti bezwen al kasyet anba lili. Ler msye ti arive, i ti dir avek madanm, “Mon santi en drol loder.”

Madanm ti reponn, “Ki loder! I annan zis mwan ek ou isi.”

Prens ti reponn, “Pa fer naryen. San an pour le voler, en zour pour le met.”

Son lannmen, prens Pwason ti al bennyen e parey labitid Lidovik ti vini. Sa zour prens Pwason zis ti tranp Ii en kou e sorti deswit. Ler Lidovik ek son madanm ti tann nennenn mont leskalye, i ti bezwen al kasyet dan larmwar. Prens Pwason ti dir, “Mon santi menm loder ki yer.”

Prenses ti reponn, “Mon pa konnen ki sa loder. I annan zis nou de la.”

Prens ti reponn, “Naryen. San an pour le voler, en zour pour le met.”

Lannmen letan Prens ti al bennyen, msye Lidovik ti arive. Sa voyaz prens Pwason pa ti arive kot larivyer, i ti fer nennenn tourn avek Ii. I ti mont drwat dan lasanm, e sel landrwa ki kaptenn Lidovik ti kapab kasyet sete dan granmofonn. Me son moustas ti pri e ti sorti anba kouvertir granmofonn. Prens Pwason ti apersevwar sa. I ti dir avek nennenn, “Met mwan obor sa latab la obor granmofonn.”

Nennenn ti obei. Msye Pwason ti dir, “Ozordi pour le met.” Nek i ti fou en kou-d-ke dan granmofonn. Granmofonn ti bat ater e msye Lidovik ti sorti. Anmenmtan prens osi ti tonbe e i ti sanze e vin en prens. I dir avek Msye Lidovik, “Sorti devan mon lizye e mon bani ou dan mon rwayonm.” I ti vire e dir avek son madanm, “Ou osi, sorti e retourn kot ou papa.” Apre sa, Prens ti deside pour Ii reste selibater tou son lavi.