Pa loulou ti touzour en gran travayer. Ine vey bien laline avan ine plant son maniok. Saler en karo maniok! Dépi La Digue ziska Praslin! Soungoula ek Zako zot pa oulé planté zot. En zour létan zot pé mars marsé dan boi, zot ariv kot pa loulou tine ouver son bitasion. Zot débout lamem é zot tone en kou:
Maman ! Pa Loulou sa lane ine met manze dan later! Pa zouzou!
Toudsouit zot move nidé I travers en kou dan zot latet. Soungoula pa kapab tini e I dir.
Konfrer Zako, ki manier nou a fer pour nou eskamot sa maniok?
La prézan, zot asiz en kou lo ros lameme obor é zot mazinen. Pou lémoman zot pa ankor tome dakor lo okene plan. Mé lo pti asoir, Soungoula I dir ek zako:
Mon kroir sa voyaz I a bon. Mone gangne en bon nidé.
Zako I répone:
Sey dir mouan, la oua!
Ekout bien. Anou rod nou détroi kabri é nou a fer nou ene dé bon tambour moutia. Ler nou a sof li, I a ronflé.
Alor zot ine rod lapo. Zot ine gagne é zot fer dé gro tanbour. Obor lameme kot pa loulou tine plant son maniok, ti annan ene son maman montagne. Laba meme ki soungoula ek zako zot ralié tou zot bane pti Zako ek zot bane pti soungoula. Pandan ene dé zour zot egzers marmay ki mannier pou santé é bar moutia. Sa létan li pa loulou dan son bitasion I a pé travay travay.
Ler Soungoula ek Zako I rémarké poudir marmay tine bien konpran, zot komans larg moutia.
Prémié kou pa loulou pa tro okip sa. I kontinien travay. Mé pli ler I pasé, pli dansé lot koté ine gou. I tane bane parol:
kainainaé,kainainaé, kaina béfenbé (bis)
kainainaé,kainainaé, kaina béfenbé
loulou I poz en kou son pios ater pou li ékout léko. Prézan ki lamizik ine opwen la anler. Zot ene ler pa loulou I bézouen anvoy lavoi:
I apros pli pré é letan I aprosé, I a pé done limeme. Prézan ki I sant pli for.
Bé ou konen prézan ki pa loulou I gagne lansman. Pli I dansé prézan ki I anvi dansé. Lapousier Iéve anba son lipié. Son senbou ti riské tonbé telman I a pé fer kontorsion
Soungoula ek zako sa moman zot ine kasiet dan touf kannel pé gété ki pé arive. Ler pa loulou ine fini dérobé, lézami zot dir:
Sémen ine kler. Anou al rékolté. Zot goni tine pare lameme lo bor bitasion.
Soungoula I arasé zako I kas rasine manioc I anvoy dan goni pou fer al pli vit. Apré zot kasiet zot goni dan lapay obor bitasion. Saler bane ti zako ek bane ti Soungoula pa aret sa lafet é Pa Loulou li osi son tour, I pa gagne lanvi arete. I tonm anba en pié latanien I dormi. Létan I pé dormi, zako, soungoula ek zot bane marmay zot al sers zot lobzé zot amene sé zot.
Saler tanto zansla pa pou dormi ditou. Prézan, ki pou enan lafet. Bane zako ek bane Soungoula ine asamblé dan lakour Soungoula. Sa ki plisé I plisé, sa ki rapé i rape, sa ki met sa anba lapres I mété, sa ki pile I pile. Epi zot vanen, zot tal lo plak so pou fer galet, koudpouen, moukat. Madame Zako I mazinen ki I anan en gran karang balo boukanen dan son lakuizine. I pa tardé I al sersé pou fer kari koko pou manz ek penpen.
Dan milié lanuit Pa Loulou I fer en rev. I soté dan son somey. I rapel poudir ine fek fini fer en drol rev: difé in e pran dan son bitasion. I pas lamen en kou dan son figir. I rémarké I pa vréman dan son bitasion. I sey mazinen ki ine ariv li.
Sameme sa ler laline I kas montagne é Pa loulou I al kot bitasion prézan. Ler I arive, I oir komsi siklone ine pas dan son plantaz. An meme tan I pas en siklone osi dan son vant. Ki I pou fer pov diab. I mont lo ros dan pti laklerté laline é komans kriyé. Telman ki I irlé, sousouri kot ti pé manzé lo pié lafous, I levé dan lanuit é zot sanz landroi.