Modita ek Sent Modita

Ti annan en fanm ki ti apel madanm Balot. I ti annan li de fiy enn Modita e lot Sent Modita. Tou le zour zot ed zot manman dan lakour. Kanman Modita pli grann fiy dan lakour Madanm Balot i kriy li e dir li, « Modita ozordi mon pou anvoy ou rod dibwa dan fore me selman pa anmenn ou pti ser ek ou, mon rekomand ou. » « Wi manman, » Modita i reponn me dan son leker Modita pe fer son plan pour anmenn son pti ser ek li. Relman Madanm Balot i pran son korbey i al bazar i dir avek Sent Modita, « Ou fer louvraz lakour kan ou ser Modita i al dan bwa, » epi i dir avek Modita  « Atansyon tonbe dan ros epi, fer byen atansyon zannimo feros. La mon ale, fer bon zanfan. » Kanman Madanm Balot i ale, vitman Modita i pran Sent Modita e avek en gran kouto zot ale. Semen ti telman pa bon ki zot ti ganny kantite difikilte pour ariv kot i annan dibwa e zot ti sot en kantite ros ki en moman zot ti pre pour tonm dan trou. I annan landrwa kot Sent Modita pa ti kapab pase e Modita son gran ser ti bezwen ed li, atrap son lanmen e fer li sote. Telman semen ti long e danzere zot ti’n fatige. Kan Modita ti pe esey atrap lanmen son pti ser zis Sent Modita i kriye, « Modita sov mwan ! » e salerla pov Sent modita in fini tonm dan en gran trou ros. Kanman sa pti fiy i tonbe en gro serpan byen lafen ti anval li antye. E salerla Modita ti’n trakase. I konmans plere e pa konnen ki i pour fer, kot i ete anler i vwar byen sa serpan dan trou e en pti moman apre i ti sant en sanson.

Sent Modita, manman avek papa i apel ou, tralala

E Sent Modita ki ti dan vant serpan vivan i reponn

Ou a dir manman ek papa anmenn disan bef pour mwan tralala.

Sa sanson ti repet trwa fwa. Alor Modita i ganny en pe kouraz i retourn se li an kouran avek larm dan lizye. Konman son manman i vwar li vini i konnen i annan keksoz ki’n arive akoz kan i ti retournen Sent Modita pa ti kot lakour e i ti doute ki i ti’n al dan bwa avek son gran ser. E Madanm Balot i dir avek Modita, « Ki’n arive avek ou pti ser Sent Modita, dir mwan mon piti ? »

Modita i reponn an pleran, « Manman, manman, Sent Modita in swiv mwan, e letan nou ti pe sot ros in tonm dan en gran trou, en gro serpan in anval li. Me i ankor vivan. Mon’n sant en sanson avek li, in reponn mwan, ‘dir manman avek papa anmenn disan bef pour mwan’. » Modita i dir « Ki nou pou fer manman ? »

Deswit Madanm Balot i degaze i al rod son mari Balot dan zarden. E li Balot i ti pe travay dir dan soley, soley for. Balot pa demande ki per, i dir i pran son gran kouto e i sot likou son sel bef ki i ti annan e i ranpli de seo avek disan e i komans taye e sot sa bann ros konmsi lapen. Ler lafanmir Balot ti’n ariv landrwa kot zot pti Sent Modita ti ete, alor Modita li i resant sa sanson e Sent Modita ki ti ankor vivan dan vant serpan ti reponn menm parol,

“Ou a dir manman ek papa anmenn disan bef pour mwan, tralala!

Pa tarde Msye Balot ki quick for duty i pran son seo e vid sa disan bef dan trou avek serpan. E pa dir ou serpan ki ti pe esper sanmenm i konmans ponp sa disan bef e lafanmir Balot ki ti anler e pe atann ki pou arive apre ti antann sa serpan kot pe bwar sa disan byen fre. Dis minit apre kan serpan ti’n fini bwar tou sa disan i rann bokou. Sent Modita ti sen e sof, e Msye Balot ki annan bokou leksperyans i ti’n anmenn en lakord dan trou e Msye ek Madanm Balot ek Modita zot konmans redi, bose, rise e alafen anmenn pov Sent Modita ziska anler san danze. Lafanmir ti byen kontan vwar Sent Modita ankor. Kantmenm zot ti byen fatige zot ti retourn deswit. Kan zot ti’n ariv kot lakour la zot ti fer miting de fanmir. Msye Balot ki ti’n byen araze vwar son sel malere bef ater i atrap Modita i donn li en bate ziska ler i ti ganny lafyev. Sent Modita osi ti ganny sa ki pour li e kan Msye Balot ti pe servi son roten i ti dir kan papa avek manman ti koz avek zot ekoute kar dezobeisans i koz touzour ou maler. (son roten ek gele)

E sa pti zistwar ki espesyalman pour zanfan ti ekri e anvwaye par J Ernesta Rivyer Anglez.