Mizer

Alors en zour ti annan en zonm ki ti apel Mizer. I ti reste kot nou konnen konmela Lanmizer. Son metye ti forzron. En zour, zour lafet Sakreker, en zonm ti pas kot li e dir li fer en sabo pour son seval. Avek son dernyen bout feray ki ti reste, Mizer ti fer sa sabo. Pandan ki i ti dan laforz, i dir avek sa zonm: “asiz touzour.” Sa zonm ti asize ziska ler Mizer ti fini travay. Ler Mizer ti’n fini fer sabo e met anba lapat seval, i ti al deryer laforz pour lav son lanmen. Kan i retournen, napa ni seval ni sa zonm. En enstan pli tar, notre Senyer e Sen Pyer ti vin kot laforz pour met en sabo nef avek zot seval pour al lafet sakreker. Mizer, tou son feray ti’n fini. Alor i dir avek sa de zans, “mon napa feray. Me mon annan zis mon bouk sang ki mon ti ganny kado pour mon premier konminyon. Mon a fer avek sanmenm akoz zot in ariv la pour lafet Sakreker.”

Prezan notre senyer ti dir li, “ Bon, mon a donn ou trwa don. Demann sa ki ou oule e ou a gannyen. ” Mizer ti mazin sa zonm ki ti asiz lo son sez e i dir, “Mon oule tou sa ki asiz lo mon sez pa pou kapab leve san mon permisyon.” Sen Pyer i dir avek li, “Akoz ou pa ti demann en plas dan lesyel?” Mizer ti dir li, “Ki mon pou fer avek lesyel?” Me li Mizer i pa ti konnen si sa de zans ti notre Senyer avek Sen Pyer.

Pour son dezyenm don, i ti mazin ankor ki tou letan i desann anvil, ler i retournen, en ponm mir dan son pye napa. I dir, “Mon oule ki tou sa ki mont dan mon pye ponm pa pou nabou desann san mon permisyon.” Prezan Sen Pyer i dir avek li, “La ou dernyen don, demann en plas dan lesyel.” Mizer ti dir ki i pa bezwen okenn plas dan lesyel. O kontrer i dir, “Tou dimoun ki pase i pran mon taba san demann mwan. Mon oule ki tou sa ki atrap mon tabatyer pa kapab bouze ziska mon a donn li permisyon.” Ler tou le trwa son don ti’n akorde, notre Senyer e Sen Pyer ti ale, ti kit li.

Wit zour apre, Lisifer ti vin kot Mizer. I ti dir li, “Mon vwar ki mannyer ou pov, alor, mon a ed ou si ou dakor avek mon kondisyon.” La Lisifer ti dir li, “Mon a donn ou en sak. Ladan i annan ven pyes lor. Sak pyes i a servi ou pour pour enn an. Apre ven-t-an, mon a vin sers ou.” La prezan Mizer ti dir li, “wi.” Tou le zour Mizer ti fer parti avek son bann zanmi ; bwar, manze, diverti kontan. Son letan ti pas byen vit. Zour ti’n ariv son lepok, en demon ti vin kot li an dizan, “Mizer, sef i anvoy mwan vin sers ou.” Mizer i ti kalkile, prezan ki i ti mazin son sez. I dir avek sa demon, “Asiz touzour letan mon al prepar mwan.” Demon dan san konnen i asize. Zot! Mizer i pran en gro baton, i komans ansonm li. Sa demon i komans kriye, kriye. Ler Mizer ti’n byen donn li son konmisyon, i dir li, “Ale prezan. Al rakont avek ou sef.” Zot, sa demon i oubliye si i ti vin sers Mizer. Kan i ariv kot Lisifer, i rakont son maler.

Setfwasi Lisifer i dir, “Mon ava anvoy trwa demon.” Ler sa trwa demon i ariv anba, zot dir, “Mizer, sef in anvoy nou vin sers ou.” Mizer i dir avek zot, “Asiz touzour, mon ape vini.” Enn i reponn an dizan, “Nou pa ti vin isi pour nou asize, nou ti vin sers ou, degaz ou!” Mizer i kalkile, i dir dan li menm, “Zafer i sal, mon fouti sa voyaz.” Prezan i rapel son tabatyer, i dir, “Me pran en pti pris touzour.” Demon, tou le trwa, zot anvoy lanmen ansanm, me tou le trwa osi lanmen i pri. Ar…pa fodre dir ou ki Mizer in komanse. I’n bat zot son dekwa. Ler in fini i dir zot, “Ale prezan, al rakonte.” Sa trwa demon an senk minit zot ris zot kales. Ler zot rakont sa Lisifer, i’n fini bebet. I dir zot, “Me prezan, nou ava al nou tou. ” Alor i ralye tou demon e zot desann pour al sers Mizer. Ler zot arive, Lisifer i dir, “Mizer, prezan mon’n vin mwan menm. Annou ale, ou letan in fini.” Mizer i dir li , “Asiz touzour.” Lisifer i reponn, “Mon pa anvi asize.” Mizer i dir ankor, “Me pran enn pti pris.” Lisifer i dir, “Mon pa parey lezot, mon pa ni anvi sike ni asize. Degaz ou, annou ale.” Prezan Mizer i mazin son pye ponm. Ti zis la plen sezon e tou ponm ti mouste anler lo pye. I dir, “Zot, la mon pe ale, mon pou kit sa bann zoli ponm mouste anler – en regre sa en? Zis marten pou vin manze, akoz ou pa kas detrwa ou anmenn avek ou?” Lisifer i get anler e vreman tou ponm ti’n mouste, i dir avek Mizer, “Nou a kas detrwa sakenn, pa bezwen tarde akoz i annan parti tanto.”

Mizer ti reponn wi e Lisifer avek tou son bann demon ti grenp lo pye ponm. Zot! Mizer ti al koup li en gro baton pikan prin. Ler bann demon ti trouv li, zot ti komans per e kriye. “Ayoyo zot! Pardon msye Mizer!” Li Lisifer, i ti fer serman, i dir serman i pa pou vin ankor ditou. Me Mizer i fer konmsi i pa tann ditou. I mont lo pye ponm i komans bis zot. Mon dir ou! Ti fer lapenn gete. Ler i ti’n fatige, i dir avek zot, “Ale.” Pa fodre dir ou tou bann demon ti dir gran mersi e kot zot ti ale, pa bare dimoun vivan. Wit zour apre, Mizer son letan ti’n fini lo later. Alor i mont kot lesyel. Devan baro Sen Pyer ki ti garde. Zis kan i trouv Mizer i dir, “Pa isi, pa isi; mon ti dir ou demann en plas dan lesyel, ou pa ti oule. Al laba menm dan lanfer.” Alor Mizer ti bezwen al dan lanfer. Koman i ariv kot baro lanfer, i sonn laklos. Gardyen baro lanfer ti sa premye demon ki ti vin sers li lo later, ti ganny met asize lo sez e ganny bate. Alors sa demon i ouver baro admi e gete kisennla. Koman i trouv figir Mizer, i dir, “Mon lipye anmenn mwan.’ Fodre dir ou kan demon i tann non Mizer, tou dimoun fannkler, sakenn i fer sa ki pour li.

Pov Mizer, personn pa ti oule li, ni lesyel ni lanfer. Dan sa ka, i ti oblize retourn lo later, e ziska ozordi, nenport landrwa ki ou a pase dan lemonn, Mizer i lanmenm. I pa en vis me en klou byen rive.