Kont ek Lezann Volim 2. (1991) Lenstiti Kreol, Lans-o-pen. pp. 85-88
Alors en zour ti annan en msye ek en madanm ki ti annan en kantite zanfan. Parmi zot ti annan enn ki ti apel Misel. Misel li ti pli bon e pli entelizan ki tou leres e zot tou zot ti kontan li. I ti touzour pare pour rann servis nenport ki e i ti toultan honker e zantiy. Tou dimoun dan sa zalantour ti kontan li. I ti osi aprann byen lekol e son paran ti fyer. Misel ti annan en sel pastan – lapes. Sak fwa ki i ti annan en letan lib ouswa ler i ti dan vakans i ti pran pti bato son papa pour al lapes. Parfwa i ti retourn avek pwason e la i ti partaze si ti annan bokou.
En zour, Misel ti pran son pti bato parey labitid pour al lapes. I ti deside al en pe pli lwen ki labitid. Alors i ti depas Zil Koray, kot i ti abitye ale. Zil Koray ti en pti zil kot Misel ek son fanmir ti kontan al fer piknik annandeler . Laba ti annan tou sort kalite fri, mang, zoranz, tou kalite. Misel ti pe ale ale dan pti bato. En pti moman movetan ti deklare e divan ti komans soufle. Laroul ti bat dan pti bato e Misel ti komans per. Divan ti sitan for ki ti trenn bato e anmenn li lwen lwen lwen e zet li dan ros obor en lot pti zil. Sa pti zil la, personn pa ti kon nen si ti egzsite. Bato ti kraze lo ros. Misel ti nobou atrap en plans e naze ziska ater. Napa nanryen ki i ti kapab sove. Ti annan zis son pti kannif dan son pos. Ler i ti ariv ater i ti get partou. Ti napa personn.
Misel ti komans marse. I ti marse marse marse ziska i ti war en gro ros dan laform en lakav. I ti get byen ladan me i pa ti war nanryen. Alors i ti antre. I ti deside fer sa son lakaz. I ti al rod fey sek ek lapay pour fer en landrwa pour li dormi. Aswar byen fatige i ti tonbe dormi. Lannmen ler Misel ti leve i ti lafen. Ki pou fer? I ti dir dan limenm,
“La si mon ti annan en zalimet pa mon ti a alim en dife?” I ti mazin son paran ek son bann frer ek ser e i ti plere me ti napa nanryen ki i ti kapab fer. Kan i pou war zot ankor? I riske pa war son paran vivan ankor. Pov Misel. I ti aret plere e swiy son lizye. I ti mazinen kantmenm i ti pou plere sa pa ti pou ed li. I ti’n abitye en pti garson brav e i ti kontan get son papa pe fer keksoz. Toutakou i ti ganny en lide. I ti konnen kimannyer pour fer en dife.
I ti leve, rod en pe zerb sek e met ater. Apre i ti al rod de pti ros. Dan sa soley ros ti’n so. Misel ti komans frot zot ansanm parey i ti’n war son papa fer en zour. I ti frot frote. En pti moman nek i ti war en pti dife sorti. I ti frot ankor e larg dan ta lapay. Ti pran! Zot Misel ti oule kriye lakontantman. I ti anvoy ankor zerb. Prezan ki dife ti roz. Misel ti kontan. La ti annan dife, aprezan i ti bezwen rod pwason pour kwi.
Lo son latet ti annan en sapo parey sapo peser ki son papa ti’n fer fer pour li. Lo la ti annan en riban atase avek en zepeng. Misel ti tir sa riban e desire e azout ansanm pour fer parey en laliny. I ti detas sa zepeng e tourn li pour fer parey en lanmson. Apre i ti met dan bout son laliny. .I ti al mars marse pour rod bann pti krab pour fer labwet. Letan i ti’n ganny en bon pe i ti al asiz obor lanmer e komans lapes. I ti kros enn de pti pwason e i ti griye pour li manze. I ti anmas . bann legren dibwa e sa osi i ti manz manze. Aswar i ti tonbe e dormi.
En zour dan son pe mars marse i ti war en pti sours delo dou. I ti dir, “Zot Bondye pa i kontan mwan?” Depi sa i pa ti zanmen mank delo. I
ti bwar sanmenm e manz sa ki i ti war. Ale ale i ti komans abitye avek
sa nouvo lavi.
Misel ti la lo sa zil lontan lontan. Tou le swar i ti priye ki son paran ti ava war li, me sa pti zil ti paret ki personn pa ti konnen i egziste, kimannyer ti pou fer? Laba osi kot li tou le zour son paran vey li napa, vey li napa. Zot ti’n komans perdi lespwar apre de trwa mwan e zot ti zis plere. Son bann frer ek ser ti sagren akoz zot ti byen kontan li. I ti’n telman bon anver zot tou. Son manman ek son papa ti’n megri e vyeyi e zot ti pe viv dan en nespes defayans koumsanmenm.
Me ti annan enn son ser ki ti’n toultan pli kontan li ki lezot. I ti touzour viv dan lespwar ki en zour i ti pou war son frer. I ti dir sa son paran me zot ti dir li,
“Ar ase bet. Kot ou pou al war ou frer? I’n fini perdi!” Me i ti dir, “Non mon pou war li en zour!”
En ho zour sa fiy ti dir avek son paran,
“Annou al en kou lo Zil Koray. Lontan nou pa al en kou laba. Dwatet fri i an abondans. Nou al pran en sanzman ler.” Son papa ti war sa en hon lide, alor i ti rod pret en bato e zot ti ale. Letan zot ti ariv laba sa pti fiy ti dir avek son papa,
“Papa annou al en kou lo montanny. Ti a gou grenp en kou.” Son papa ti dakor e i ti al avek zanfan. Son madanm ti esper lanmenm lo lans.
Enn fwa lao lo latet montanny zot ti get partou. Bann keksoz ki zot ti war ti paret ptipti. Toutakou sa pti fiy kiti pe get dan direksyon delo sale ti war en keksoz ki ti paret li lafimen. I ti dir,
“Papa get laba. Konmsi ou a kwar lafimen!” Son papa ti get kot i ti pe montre e dir,
“Wi, lafimen sa, petet i annan kek bato ki’n pran dife.” Tou lezot ti gete. Konmsi ti lafimen menm. Papa ti get ankor byen e dir,
“Ou a krwar mon war montanny, konmsi en zil! Be zanmen mon’n tande ti annan en zil dan sa direksyon!” Sa pti fiy ti komans eksite. I ti dir’
“Papa si en zil kekfwa Misel i laba i pa’n mor.” Son papa ki ti pe mazin menm keksoz li osi ti dir,
“Petet. Annou retourn dan lakour. Mon a demann mon frer pret son bato lavwal e nou ava al gete.” Alors zot ti desann anba vitman e rakont zot manman sa ki zot ti’n war. I ti byen kontan e li osi i ti ganny en pti bren lespwar.
Lannmen, papa Misel ti al avek son frer dan bato dan direksyon sa zil. Manrmay ti’ oule swiv me i pa ti oule les zot. Zot ti ariv laba avan soley tonbe. Zil ti paret dezerte e zot pa ti war okenn siny ki ti annan dimoun la. Papa Misel ti tris me i ti dir, “Kantmenm napa personn annou sey al rode, kekfwa mon a war lekor mon pov piti.” Alors zot ti debarke e komans rode.
Anfen zot ti ariv dan en pti landrwa ranpli avek pye dibwa. Obor ater ti annan en per azenou pe priye. I ti annan labarb e i ti dan en lenz fer avek fey koko. Papa Misel ti apros li e demande dan en lavwa ki ti pe tranble,
“Mon per eskiz mwan, ou pa’n war en garson ki apel Misel?” I pa ti fini koze. Koman i ti dir sa nek sa per ti leve e tonm dan son lebra. Pa ti lot ki Misel limenm! Tou le de ti komans plere. La vreman son papa ti rekonnet li e i ti rakonte kimannyer i ti’n tonm lo sa zil; kimannyer i ti’n fabrik laliny ek lanmson pour li viv. I ti dir son papa osi ki kantite lapriyer i ti’n fer pour dimoun war li. I ti demande,
“Oli manman? Mon bann frer ek ser zot byen?”
“Wi zot byen,” i ti dir li e la i ti komans rankont Misel kimannyer son pti ser ti’n toultan dir ki i ti annan lespwar i pou war li ankor en zour e limenm ki ti’n war lafimen lo zil. Misel ti byen kontan ler i ti tann tousala.
La zot ti antre dan bato avek son tonton ki li osi ti’n byen sezi e kon tan war li e zot ti retourn dan lakour. Zot! Manman Misel ek son bann frer ek ser ti kapab tonbe avek sezisman ler zot ti war zot papa antre avek en zonm ki i ti dir zot Misel. Bann pli gran ti rekonnet li me bann pli pti ti annan ki pa ti konn li. Zot tou zot ti byen kontan e ti annan en gran rezwisans kot zot sa zour. Misel ti rakont zot son lavan tir e zot ti plere letan zot ti tande. I ti osi dir mersi son pti ser ki ti’n war lafimen e ki ti’n konnen ki en zour i ti pou war li ankor.
Misel pa ti’n bliy sa ki i ti’n aprann lekol e i ti toultan oule konn plis. I ti al travay e ed son paran e zot ti viv ere ansanm. Me i pa ti zanmen bliy sa pti zil e tanzantan i ti anmenn son bann zanmi ek fanmir vizite.