MARTIN I MOR

Kont ek Lezann, Vol. 9, Lenstiti Kreol (2008), Stories told by Jeanne Lemiel. pp. 21-23

En bo zour ti annan en Rwa. Sa lerwa ti annan en prenses, me ti napa dimoun o monn ki ti rakont zistwar plis ki sa prenses. En zour Lerwa ti bat lazeneral ki si ti annan en zenn onm ki ti rakont zistwar plis ki son fiy, alor i ti a marye avek son fiy. Me okenn garson ki ti vin rakont zistwar e ki pa ti kapab rakont plis ki son fiy, ti pou ganny koup likou.

En kantite garson ti perdi zot lavi akoz li sa manmzel, sak fwa ki i ti pou rakont en zistwar, ti vin en sat ki ti tenir son labouzi. Sa zistwar ti rakonte pour trwa zour.

Dan sa lavil, ti annan en nonmen Zan. Zan ti deside pour li osi al rakont zistwar letan ki i ti konn byen zistwar. Toudmenm, zour ti’n ariv ler pour Zan al kot lakour Lerwa, i ti en pe per, me son nennenn ti dir li esey son lasans.

“Ler pour ou ale, vin kot mwan!” tantin ti dir li.

Arivan laba, son nennenn ti dir avek li, “Zan mon pou donn ou en pti souri. San sa sat, sa manmzel pa pou kapab rakont zistwar.”

Nennenn ti kontinyen, “Tanzantan, letan i pe rakont zistwar, ou pas lanmen obor ou pos e dir ‘Pas’. Sa pti souri a sorti. E sa sat, enn fwa ki i pou vwar sa souri i pou zet sa labouzi e pou tay avek sa souri. Tanzantan fer sa. Manmzel pou derobe e alor ou, ou ava rakont zistwar plis ki li. I pa pou ganny letan pour li al rod larepons sa zistwar.”

Alor, Zan ti ale. Letan i ti pe ale, son manman ti donn li en penpen ek en boutey delo. I ti bezwen mars en bon zistans pour li ariv kot sa manmzel. Dan semen, Zan ti lafen, me i ti mazin sa manmzel. I ti pran en bout sa penpen, i ti donn son seval avan ki i ti manze. E la, son seval ti sape, ti tonbe ti mor.

Zan ti dir dan limenm, “Ar get manman! I met pwazon dan sa penpen pour touy mwan.” Me son manman li, ti’n fer sa akoz i dir ki san fwa i touy son piti ki son piti i al mor kot sa prenses akoz sa prenses ti napa dimoun ki ti rakont zistwar plis ki li.

La i ti pou bezwen mars avek son lipye, san son seval. Dan son marse, i ti komans perdi lespwar akoz i ti napa nanryen pour li manze. I ti desarz son fizi anler e la i ti tann en kriye ek en Tonbe. I ti’n tap en leg. I ti ouver vant sa leg e ti tir de pti leg. Vi ki i ti annan en pake papye gazet, i ti griy sa de pti leg e i ti manze.

La Zan ti dir dan limenm, “Sa i en bon zedmo pour mwan al dir sa fiy.”

Alor, Zan ti ale. An arivan laba, Zan ek manmzel ti rakont zistwar. Rakonte, rakonte e tanzantan, Zan ti pas lanmen obor son pos e dir ‘Pas’. Ler i ti dir ‘Pas’, pti souri ti sorti e sat ti tay avek li. Ale koumsa, ale koumsa, manmzel ti dispit avek nennenn, “Be Nennenn, ou pa’n donn manze mon sat ozordi? Ki mon sat i gannyen?”

Ler souri ti fatige fer sat taye, souri ti retourn dan pos Zan. Zot ti ale koumsa, dezyenm nwit parey.

Trwazyenm nwit, Zan ti dir avek manmzel, “Manmzel, de zour mon’n ekout ou rakont zistwar, me mwan, mon pa ankor rakonte.”

Manmzel ti dir avek li, “Oke Zan! Prezan ou tour.”

Zan ti dir avek li, “Manmzel, mon napa en zistwar pour mwan rakont ou, me mon annan en zedmo.”

Manmzel ti dir, “Dir mwan ou zedmo!”

Zan ti dir, “Martine est mort, tuer ce qui n’est pas vu, mange ce qui n’est pas nee, cuire par parole en parole.”

Sa fiy ti dir, “Kwa!”

Tizan ti dir li ankor, “Martine est mort, tuer ce qui n’est pas vu, mange ce qui n’est pas née, cuire par parole en parole. “

Sa fiy ti rode. I ti fouye dan tou son liv, me i pa ti vwar larepons. Alor, i ti demann Zan kenz zour ankor pour li rod sa larepons. Zan ti akord li kenz zour. I ti rode, rode, rode partou dan liv; rode partou me ti napa repons.

A lafen kenz zour, manmzel ti oblize dir ek Zan ki i ti’n perdi paryaz. “Mon napa larepons pour mwan rann ou. Donn mwan larepons.”

Alor Zan ti dir, “Lo mon semen, mon seval ti mor. Mon ti desarz mon fizi e mon ti touy en leg ki dan son vant ti annan de pti leg. La mon ti griy sa de pti leg ki mon ti griye e manze avek en papye gazet ki ti avek mwan. Se sa mon zedmo. ‘Martine est mart, tuer ce qui n’est pas vu’ akoz sa leg mon pa ti vwar li. Mon ti pe desarz mon fizi. ‘Mange cequi n’est pas nee,” mon ti lafen, alor mon ti manz sa de pti leg ki pa ti ankor ne apre ki mon ti’n ouver vant zot manman. ‘Cuirepar par parole en parole,’ i sa papye gazet ki mon ti servi pour alim dife pour mwan kwi lavyann sa de pti leg.”

La Zan ti get manmzel e dir, “I korek Manmzel ?”

Manmzel ti oblize dir wi. Alor Zan ti’n ganny paryaz e manmzel ti aksepte pour marye avek li. Zot ti ganny trwa zanfan e zot ti viv ere ansanm tou leres zot lavi.