MARI EK LANMAL LAPO BOURIK

Mm. Paula Chetty

Enzour ti annan en mesye ek son madanm.Zot ti annan en fiy ki ti apel Mari.

Mari ti parey son manman. En zour sa madanm ti arive mor e sa msye ti byen sagren.

En zour i ti dir avek son fi y, “ Mari partou kot mon‘n pase dan lemonn zanmen mon’n

mon’n war en fi y zol i parey ou manman. Mon war zis ou menm . Mon ti a kontan pour mwan

marye avek ou. Ou telman parey ou manman e mon telman kontan ou!”

Mari ti reponn li, “Papa kondisyon ki mon marye avek ou fodre ou fer tou sa ki mon dir ou.”

La sa msye ti dakor. Mari ti dir li, “Mon ti a kontan ganny en rob kouler soley.”

Son papa Li i ti annan en bourik mazik. Ti en zoli bou rik blan. I ti al direk dan lekiri e dir avek son bourik, “Par laverti mon bourik mon oule ki mon fiy i ganny en rob kouler soley.” Vre, konman i ti fini dir sa i ti ganny en zol ki rob kouler soley. Sa msye ti al donn sa son fiy ki ti byen kontan.

Lannmen ankor i ti dir avek son papa, “Papa , aprezan mon ti a kontan ganny en rob kouler lalin. Si ou pa donn mwan mon pa pou kapab marye avek ou.”

Alors ankor en fwa son papa ti al dan lekiri e ti dir avek son bourik,”Pa laverti mon bourik mon oule ki mon fiy i ganny en rob kouler lalin.” E deswit i ti ganny en rob kouler lalin pli zoli ankor ki sa enn premye. I ti al donn sa son fiy. Mari ti byen kontan. Menm sa i pa ti ankor satisfe. Son lannmen i ti dir avek son papa, “Papa ozordi mon oul en rob kouler zetwal.”

Son papa ti al ankor dan lekiri. I ti fer son demann avek son bourik mazik e i ti ganny en zoli rob kouler zetwal! Ti telman klate e zoli ki ti kas lizye ler ti gete. I ti al donn sa Mari ki ti tre tre kontan. Son papa ti dir li, “Mari aprezan ou ava marye avek mwan?”

Mari ti dir, “Non pa ditou, pa ditou Papa. I annan en lot keksoz pour mwan demann ou. Laba dan lekiri i annan ou zoli bourik blan. Mon oule ou fer en zoli lanmal pour mwan avek son lapo. Apre mon a marye avek ou.”

Son papa ler ti tann sa ti telman tris pour li touy son zoli bourik blan, me menm sa i ti oblize fer sa ki son fiy ti’n dir li. I ti retourn dan lekiri e dir avek son bourik, “Par laverti mon bourik mon oule ki ou ranpli en lasanm antye pour mwan avek lor.” Ler ti’n ariv sa i ti dir ankor, “Par laverti mon bourik mon oule ki ou ranpli en lot lasanm avek larzan.” Vreman bourik ti ranpli en lot lasanm avek larzan. La apre, sa msye ti deside touy sa bourik e avek son lapo i ti fer en lanmal pour son fiy. Pa bezwen dir ou Mari ti dan en kontan son Ianmal! I ti met tou son lenz, tou son bizou ladan. Son papa ti mazinen ki aprezan Mari ti a bezwen dakor pour marye avek li.

Me sa swar Mari ti deside sove dan lakour son papa. I ti dir ki i ti ava al lwen dan en lot pei. Alors letan ki son papa ti pe dormi Mari ti mont Io son lanmal e dir, “Pa laverti mon lanmal mon oule al dan en lot pei kot i annan en lerwa.” Vreman konman i ti’n dir sa, lanmal ti monte avek li e anmenn li dan en lot pei kot ti annan en Ierwa, byen lwen avek lakour son papa . Sa Ierwa li ti annan Li en garson. Ler i ti ariv dan sa landrwa, sa fiy par laverti son Ianmal ti degiz li an en vye tantin, vye vye tou frize. I ti nepli sa zoli fiy ki ti’n kit Iakour son papa. I ti’n abiye dan en penwar, en zip, e i ti tou sal sal, tou devergonde. La i ti al kot pale lerwa.

En serviter ti war li e ti demann li, “Lekel ou e ki ou vin rode isi vye tantin?”

I ti reponn, “Mon apel Zann e mon’n vin rod en plas travay.” I pa ti oule donn son vre non. Sa serviter ti dir, “Telman ou’n vye ki travay ou nobou fer isi?” Tantin ti reponn, “Kantmenm balye lakour, lav kastrol dan lakwizin mon kapab fer.”

La serviter ti al koz avek lerwa e lerwa ti sorti. I ti get sa vye tantin e dakor pour donn li en plas dan lakwizin pour lav kastrol. Tantin ti konmans lav kastrol. I ti fer tousaIa byen klate. Ler ti ariv aswar lerwa ti donn li en pti payot en pe lwen avek pale pour li al reste. I ti ale avek son Ianmal. Ler i ti’n ariv dan son pti payot i ti dir, “Par laverti mon lanmal mon oule ki dan sa payot i ava annan pake ek lezot keksoz ki dan lakour lerwa napa.” Vreman dan en pti moman payot ti ranpli avek zoli zoli meb, lalimyer e Iezot keksoz ankor. Parmi ti annan en gro pandil! Zis minwi pandil ti sonn douz kou. La sa tantin ti degiz li an sa fiy ankor e abiy li dan son zoli rob kouler soley.

Pandan sa letan ti annan en gard ki ti pe fer patrol deor e ler i ti get dan direksyon payot i ti war keksoz pe klate. I ti dir dan limenm, “Zot me ki i kapab annan dan sa lakaz ki klate koumsa?” I ti apros payot e get par lafnet e la i ti war, olye en vye tantin, en zoli fiy abiye dan en zoli rob kouler soley. I ti get toultour payot e i ti war tou sa bann keksoz. Alors la i ti doute ki sa tantin ti kek dimoun mazik. Gard dan son leker ti dir, “Zot sa si prens i war i pou oule marye avek li!” Me toudmenm i pa ti dir naryen personn. I ti deside pour li vey ankor.

Lannmen bomaten fiy ti degiz li ankor an vye tantin e i ti al pran son travay parey labitid dan lakwizin. I pa ti konnen si ti annan dimoun ki ti’n war tou son zafer lavey. I ti lav son bann kastrol byen prop san dir personn naryen. Son aswar i ti retourn ankor kot son pti payot e zis minwi ankor i ti degiz li me sa voyaz i ti met son rob kouler zetwal. Ankor en fwa sa solda ki ti lo patrol ti war li me i ti gard son lalang ankor e dir dan limenm, “Prens i a war pour limenm.”

Trwazyenm swar ki tantin ti’n la lalin ti kler. Prens sa zour ti deside al fer en pti pronmnad. Ler minwi ti sonnen i ti tann en pandil sonnen e ler i ti get dan direksyon payot, i war keksoz pe klate. I ti dir dan limenm, “Kisisa ki kapab pe klate koumsa? I ti leve e al gete. Salerla fiy sa letan ti’n abiy li dan son zoli rob kouler zetwal! Ler Prens ti ariv kot payot, i ti get par lafnet e la i ti war en zoli fiy, pli zoli ki i ti’n deza vwar. Telman i ti zoli ti kas son leker. I ti doute ki ti pe arive me ki i ti pou fer? I pa ti konnen ki mannyer i ti pou dir son manman ek son papa. Lannwit antye i ti mazin zis sa manmzel menm e lannmen bomaten i ti tonm malad osi e i ti reste zis lo son lili. Ler son manman ek son papa ti vin war li i ti dir zot, “Dir Zann fer en gato pour mwan. Fodre limenm li ki fer e pa lot dimoun ankor.”

Ler larenn ti tann sa i ti dir, “Akoz ou oule Zann ki fer sa gato? Sa telman i sal, i pi, ou anvi manz son gato?” Me prens ti ensiste. Alors larenn ti al dir Zann ki prens ti oule i fer en gato pour li. Vreman Zann ti fer parey larenn ti’n dir li. I ti fer en gato e tou sa ki i ti servi pour fer avek ti vin par laverti. Depi son lafarin, son rezen, tou keksoz. Ler i ti’n fini ti en zoli gato. Zanmen dan pale lerwa ti’n deza annan en si zoli gato. Ler lerwa ek larenn ti war sa gato zot pa ti oule krwar. E son loder! Ti telman santi bon ki son loder ti ranpli lakour lerwa ek zalantour antye. La Zann ti al anmenn sa gato dan lasanm prens. Ler prens ti war sa zoli gato, i ti’n fini tonm anmoure avek sa vye tantin. I ti dir li, “Lizour ou fer ou vye tantin, aswar ou en zoli manmzel.”

Zann ti sirprann. I ti demann avek prens, “Kimannyer ou fer pour konnen mon en zoli manmzel aswar?” E la i ti tir sa vye sifon lo son latet e les desann son zoli seve. Prezan ki prens ti kontan li. I ti pas mouswar lo son figir pour tir sa bann makiyaz e montre prens son figir. Apre i ti kit lasanm e i ti ale. Pov prens ti anvi dir li reste me kimannyer i ti pou fer? I ti anvi dir son manman ek son papa sa ki i ti’n war me zot pa ti pou oule krwar li. I ti deside esper aswar.

Sa swar tantin ti al ankor kot son pti payot me sa voyaz prens ti swiv deryer. I ti get par trou e i ti war li. Deswit prens ti al rod lerwa ek larenn e zot tou le trwa zot ti retourn kot pti payot. Ler zot ti arive prens ti fors laport e zot ti antre. Nek prens ti pran sa fiy dan son lebra e anmenn li dan pale. La Mari ti dir zot son vre non e ti rakont zot tou zistwar. Lerwa ek larenn telman ti kontan Li ti deside fer en gro maryaz deswit. Zot ti envit tou sa dimoun dan zalantour. Mari pa ti bliy son papa e premye dimoun lo lalis ti limenm. Ler son papa ti war son fiy pe al marye avek en prens i ti byen kontan e la tou le de ti demann pardon kanmarad.