Mangio

Helene Esther, 44 ans

Ti annan en imsie avek son madanm. Zot tine marye. Sa madanm ti annan li en pti garson. Son pti garson nonmen Mangio. Me zot ine la, viv byen antre zot de. En zour asize ver seter diswar. Pti garson lanmenm obor manman ek papa dan salon. I dir avek son imsie.

• En ! Cheri; si mon arive mor. Si nou separ kanmarad ant nou de avan. Ou pou rod en madanm pour ou?

I dir:

• Non; Zanmen.

I dir:

• Mangio ou tande ki papa I dir.

I dir:

• Wi manman. Papa I dir I pa pou rod madanm.

Me bondie I antann sa parol. Me I pou pran fanm avan zonm. Pas en detrwa zour apre sa fanm I mor. Papa I ti en sier li. I ti reste la ek son piti. Piti I al lekol. I tournen I vini. Si I ariv avan papa, I met boulwar lo dife. I fer kafe papa. Byen papa ek piti.

Me I pas en senk, sis mouan koumsa; papa I al rod li en madanm. Sa madanm I annan li en fiy nonmen, Jacqueline. Mangio I la zot de Jacqueline; ser ek frer. I dir ek son piti:

• Zot de Mangio, zot a la parey ser frer.

Byen kontan. Me belmer , sitan pa bon I pa ti kontan sa pti garson son msie. En zour sanmdi, I dir avek Mangio ek Jacqueline. I dir;

• Mangio vini.

Mangio I vini, I dir

• La mwan belmer

I dir:

• Al la dan lakwizin, I annan en lera in tay dan sa touk, fodre nou tire , I pou manz manze ou papa.

I dir:

• Jacqueline pran sa detrwa servyet al lave larivyer.

Jacqueline I ale. Sa fanm, I fer sa piti kas foye, I pran la met sa piti I met dan foye. Ine la, ine la.

Papa I vini midi, I demande oli son garson. I dir I pa konnen ine anvoy li rod lapay dibwa piti pa vini. Veye, fernwanr I fer. Al lapolis. Demane avek Jacqueline si pa’n war Mangio. Jacqueline I dir I pa konnen. Manman ti dir ek Mangio al lakuizine pou kas foye. Me lendi I fer. Jacqueline I leve pou al alime dife. Me I pa ti abitie alime dife, son pti dalon ki ti abitie; I santé:

• Mangio mangio

Si mangio tia la tia alime dife

Mangio I repone li laba.

• Ou manman I en gran sorsie

I met mwan dan foye.

Jacqueline son lanmes I tengnen; I fer letour lakaz I ale I al fer en lot lanmes. Lanmes delwil koko. Parey lontan bann dimoun ti servi, lanmes delwil koko pou alime dife. Be denozour, sa bann zenes zis I pran petrol I ale I vid dan dife. Oswa sa ki annan son elektrik I al klat bouton. Lot ozordi I pran stov. Me lontan nou ti servi lanmes delwil koko pou alime dife avek. Tanmi. Ine la I al alime ankor. I fer letour lakaz I klat son lanmes.

• Mangio , Mangio

Si Mangio tia la tia alime mon dife

Mangio I repone li laba.

• Ou manman I en gran sorsie

I met mwan dan foye.

I kri:

• Boper, boper, vine ekout sa.

I dir:

• Kisisa mon piti

I dir:

• Boper mon tann en pti lavwa dan lwenten. Pe santé.

Boper I dir li:

• Sante mon piti.

I santé, I plere.

• Mangio, Mangio

Si Mangio tia la tia alime mon dife.

Mangio I repone li:

• Ou manman I en gran sorsie

I met mwan dan foye.

I dir:

• Boper, be la l la dan foye.

A ! Vini kas foye; piti I ladan. Demann li ki mannyer I ti fer, I met a rakont son zistwar.

I dir:

• Papa, belmer, nou tine fini fer louvraz. Ti dir avek mwan vini nou de Jacqueline. I dir Jacqueline anmas torson al larivyer. I dir mwan vine la lakwizine kas sa foye; I annan en lera dan touk dife, I manz ou manze. Papa mon kase, mon kase. Ler ine gangn en groser trou, belmer I dir mwan antre ladan. Mon antre, belmer I touf mwan la dan foye. Papa tou sa ki pase mon tande. Mon pa kapab repone. La lendi ler Jacqueline I santé, mon reponn son lavwa.

Tir li demann li ki I bon fer avek belmer.

I dir:

• Papa, si nek mwan pa fer li naryen.

Son fiy I repone. I dir:

• Papa, pran li met li dan en bato, pa touy li, pran met li dan en bato ek de lera blan. Kan manze I a fini, lera I a pers bato manman I a noye. La mauvaise femme.