MAKAYA

Ti annan en manman. Sa manman ti annen son trwa fiy. Ti annan son nyes. Kantmenm i fer parti sa fiy pa ale. I anmenn zis son trwa zanfan. Son nyes i reste kot lakour. Alor kot lewa i donn en bal en zour. Son manman i ale i anmenn son trwa fiy. I kit sa enn – son nyes – lot lakour, konmsi i napa manman, li i mizer mizer.

I mars mars marse al kot gran-manman: Gran-manman i demann li i dir: “Makaya,” i apel Makaya. “Makaya me ou pa anvi al danse?” I dir: “Be gran manman, kantmenm mwanvi [mon anvi] al danse, kot mon pou ale! Kot mon pou ganny? Zot tou zot ´nale i kit mwan la kot lakour.” Li i la kot lakour ler zot ale. I okip kannar, okip poul. Ler zot sorti dan parti fodre zot vin zwenn sa … dite tou zafer, louvraz in fer. Zot vin zwenn zot bodfas [break-fast]. Be … alors en zour zot ´nal danse leswar. Li i mars marse, i al kot gran-manman. Gran-manman i dir: “Be Makaya, ou pan. [pa: a nazalize] anvi al danse?” I dir: “Be gran-manman, kantmenm mwanvi [mwan = mon a ! a nazalize; mwanvi = koupir repetisyon „an“: mwan anvi] al danse, mwan napa neseser. Kot mwan pou ale? Sa ki pou donn mwan?” Granmanman i dir: “Dir mwan si wanvi [ou anvi].” I dir: “Mwanvi, granmanman. Be kot mon pou gannyen [ganny neseser: lenz, soulye….]?” Granmanman i dir: “Be mwan donn ou sa tabatyer. Tou sa ki ou bezwen demann sa tabatyer.” I dir “Selman … bomaten ler ou vini – pa esper lizour pou ou sorti dan sa bal. Konman ou tann kok [sante] sorti dan bal. Pran ou enm kote soulye zet an deor baro.”

Be Makaya ´nabiye, ´n [i´n] sanze, ´n pran son seval i´n ale. Makaya i al danse. Zot pa konn ditou si sa Makaya. Pourtan i ek zot … sa dimoun tou lezour. Makaya yariv [i ariv] dan bal. Zenn zan pa met li ater ditou. Makaya pa asize. Makaya i danse, danse, danse, danse. Ler … k´man kot i fer we-r! Makaya i sorti, baro i dir: “Alon medmwazel, annou fer ankor en lot parti, ar.” I dir: “Non, non, il fo partit.”

La Makaya i pran son seval i ale. I zet son kote soulye lan´enm. Zot danse ziskan lizour. Makaya i tir sa bann zafer ki ti loli yal [i al] kasyet. Pa kit la kot lakour. I´n kit li la kot lakour i´n fer li konmsi servant, i fer li mizer. I pran tou sa la i al kasyet. I dir: “Par laverti mon taba granmanman ti don mwan, mon ´le mon rob pli sal ankor.” Lenz pa ni donn li pou mete. I sal. Makaya yal pran tou sa la i kasyet. I fer son louvraz: donn manze kannar, donn manze poul, fer zot diri met pare.

La li vini ek son trwa fir. I akonte i dir: “Zot yer swar ti vin en manmzel dan bal, nou pa konnen ki sa manmzel.” Saler Makaya. Zot pa rekonnet ditou.

La garson lewa yanmas sa soulye. I [lewa] dir: “Selwi ki sa soulye ki sa soulye yale dan son lipye”, lewa i dir: “Be sa pou marye ek mon fir sa [non] ek mon garson. Pou marye ek mon garson.”

Pase, pase, pase. Pase, ariv dan kanton laba kot Makaya. Mezir dan lipye tantin. I dir tou pa ale. I mezir dan lipye [sa] trwa fiy, pa ale. Aprezan i dir be sa ki laba. “Ar! Be pa kapab. I tro sal.” I dir: “Kantmenm … Les li ou.” Konmen i met soulye dan lipye Makaya, soulye i bon. Prezan i´n onte, ´n kanmi. Donn Makaya en lenz, okip li, debarbouy li, sanze, anmenn, Makaya laba kot lewa.

Lewa i dir fodre ki marye ek son fir [ek son garson plito]. La … i´n la, i fer maryaz. Non. I pran en son fir la – sa madanm la – prezan i pran enn son fir. Non Makaya … Makaya ´n marye. Makaya ´n marye ´nal kot son imsye laba. Aprezan in reste … de trwa mwan koumsa. Son imsye i dir: “Be Makaya, en zour sey al war ou tantin.” Konmsi Makaya pa oule byen byen ale. Makaya osi – in foupanmal zot. I dir: “Be Makaya al war ou tantin.” Makaya yale li tousel. I´n ale pou al war son tantin.

Ariv laba ki zot fer ek Makaya? Pran en zepeng detet … I dir: “Makaya, vini mon a rod ou en lipou.” Pran en zepeng detet pik dan latet, dan milye latet Makaya. Aprezan pran enn son fir anvoy laba kot Makaya – kot Myse Makaya.

Aprezan li …. kan´enm li fir i vin la, i pa konn mannyer Makaya …… i fer ek sonm ´sye. I pa abite, i pa konnen.

Alor i´n la. Soz … zardinyen yal aroz fler. Makaya in vin kato. I´n vin … Makaya yanvole, in vin dan zardin. I demann [sante plito]: Zardinyen zardinyen

Ki bonn i fet lewa?

Ki lewa i fet bonn?

A! Zardinyen pa okipe. Lannmen ankor zardinyen i vini:

Zardinyen, zardinye

Ki bonn i fet lewa?

Ki lewa i fet bonn?

Alors sa … zardinyen i ale i dir: “Mon Wa, i vin en kato dan zardin, i demande `Ki bonn i fet lewa? Ki lewa i fet bonn?´” A soz … ar … mon wa i dir: “Alor don!” I dir: “Wi, mon wa.” Alor mon wa i ale. Kato i lan´enm. Kato i vini, apoz lo zepol … sonm ´sye. Alors sonm ´sye pran Zwazo anmenn laba dan son losanm, tat tate, i war en zepeng de tet pike dan son milye latet. Tir sa zepeng, la i vin Makaya.

Aprezan … sa lot la, i la sa madanm. Kantmenm li la, lewa pa okip li, [i] pa konn son mannyer. Be … be … Makaya i la. I demande ki pou fer ek sa … sa … son kouzin la. Pa konnen. Alor lewa i koup likou. I koup likou anmar dan en … [non] met dan en bon pla. I dir ek Madanm … [non] i dir ek Boy: “Al donn sa Madanm [manman sonnyen Makaya] dir tanto mon pou vin din … dinen prepare.”

Ar [Madanm] in pran lasyet ´n met laba, ´n kontan. I dir son fiy in ganny msye lewa. Ou konnen manze pa koze pe okipe menm. Pe fer lakwizin menm. I´n la la la. Ou konnen zanfan … nou zanfan … i reste de zanfan, enn in sorti – sa ki´n ganny koup likou … manrmay tazantan oule al gete [al get sa ki annan da sa pla].

Manrmay i al get … i ouver … delarg pla gete i war latet zot ser. I dir: “Manman! Vin get latet nou ser.” Li [i reponn]: “E! Akfer zot ´nal dekouver sa? I kapab latet zot ser sa! I kapab latet zot ser sa!” I dir: “Manman! Vin get latet nou ser.”

Alor manman i ale. Manze saler pa koze! Manze ´n gro menm. Konpannyen pou vini. Al gete relman latet son piti. Aprezan plere. Kot dimoun i manze i pa konnen.

La zalouzi sa. Konmsi pa ti neseser pou Makaya ganny sa plas mannyer zot ti fer ek li. I dir ou ´nandeler kan ou fay dimoun pa get ou. Mhan! Han! Han! [riye]

Sours lenformasyon e lezot detay

Enformater: Madanm Théophilie ROSALIE / Marie ADRIENNE (Non fiy)

Laz: 82 an.

Ladres: Belle Vue, LA DIGUE

Dat lanrezistreman: Le 20 Me 1980 ek le 12 Oktob 1980

Anketer: Marcel ROSALIE, Gabriel ESSACK (ek Abdourahamane DIALLO)

Transkripter: Marcel ROSALIE

Dat transkripsyon: Septanm 1985