LOTER LANMOR SOUNGOULA

Nou tou nou konen poudir soungoula ek kok ti de gran dalon e parfoi kot ou oir ene ou bézouen oir lot. Bé la zot ti a pé travay tou lé dé kot léroi. Parfoi, kan kok ti sou soungoula ti fer li en kantité nis. Souvan, ler ine ariv ler dézenen, soungoula I kasiet lasiet manzé Kok é tanzantan I fer li kek malis. Apré en serten létan Kok li I ti népli kapab. I démane espélo.

Bé ler I ariv kot li I koz en kou son bonefame lo sa size, telman son leker ine plen. Koz ki koz, son bonefame I dir li:

• Pa bézouen fer li konpran narien. Zis envit li isi lot dimans.

Kok I tome dakor avek nide son bonefame. Mé li Kok I pli rizé ki son fame. I répran:

• – bé Selman, ler I a vini, ou a dir li mon likou ek en koté mon kartié ine al lapes. Fodré fer koumsa pou al sers bouyon fré.

• – Selman mon mari! Ou meme ou zome.

Ler Koki ine fini fer sa laranzman kot son lakour, I desane I al bor lamer akoz I bézouen koz ek en péser. I zouene Pa Katieng é I dir li ki dimans ki pé vini zis ler onzer I sonen, I a fer souélo lans son katiolo poison épi al sé li. Kok I done Katieng dis roupi épi I envit li vine boir en kafoul baka son tanto ler pti fernoir ine fer.

Apré sa Kok ti dir ek son fame:

• Avan ki soungoula I arive, ou a kasiet mouan anba panien. Lot I répone:

• Dakor. Pa bézouen trakas ou.

• Tou plan ine fer é prézan I resté zis pou esper soungoula.

Sa zour dimans, soungoula dépi gran maten ine lévé, ine débarbouyé, ine sanzé, ine pegnen, ine gréyé. Prézan I kriy ek son madame:

Ou touzour, ler nou pou al en lendroi, nenk ou a pé vir viré parey poul kine perdi nik.

• Bé la komsi ou lo labrez kafoul.

• Ou konen poudir baka ine pare laba. Zansla pé esper nou. Dépes ou. Anou. Mou a komans ferm bane laport an atandan.

Madame soungoula nek I fer manier vitman. I pas son gran zip ek son gran pénoir. Zot fer sir ki tou laport ine fermen avan ki zot ti alé. Saler laba, madame kok ine fini aranz tou zafer parey son mari tine dir li.

Ler soungoula ti ariv kot Kok ek son madame, madame Kok I anons zot poudir son mari pa la . I dir zot ine al lapes ek son likou ek en koté son kartié. Larestan son lékor I anba panien. Mé pti onzer son mari I a rétournen. Pou koméla, zot a tap tap ene dé pti kafoul baka ziska ler Kok I a antré. Ler onzer I sonen, soungoula I désidé pou al lo lans pou get sa zafer poison. An arivan laba, I zouene Kok bien gayar pé tir poison dan katiolo pé zet lo lans. Soungoula I dir ek Kok:

• Zot mon frer! Selman ou pa badinaz. Oune al lapes ou tousel é ou gagne tou sa poison?

Kok ti répone li:

• Be oui, mon frer.

Soungoula ti répran:

• Mon pa koir poudir ou ti al lapes ou tousel.

• Oui, mon ti mon tousel. Ou pa ti trouv mon lékor anba panien ler o ti al gété dan lakuizine? Mon ti al ek zis en koté mon lapat ek mon likou pou mouan nobou marsé é trouv kler.

Soungoula pa dir narien. I népli konnen ki pou dir. Mé I ti kontinyen ékout bien sa ki Kok ti pé akont li. Kok I esplik soungoula lo ki koray I ti al lapes. Soungoula pa fer okene remark mé i gard tousala antet.

Létan ki bane dimoune ki abit pré ek lans ine oir pirog poison. Zot ine kosté. Kok I ranpli dabor son pti panien madiroté avek méyer poison pou lakour. Mé telman ti anan, tou poison ti zoli meme.

• Lanbéli ine donen. Sakene pran sa ki I bézouen.

Kok ek soungoula I les sa bane dimoune lamem é zot alé.

Kot lakour, ler Kok ek soungoula I arive, zot oir madame soungoula ine asize pé pran ene ti kafoul é Madame I a pé gélé dan lafimen. An arivan Kok I fer en gro paké poison éi ofer madame soungoula. Li nenk I lévé I al nétoiy son poison. Larestan poison, I done son prop madame dan lakuizine.

Prézan Kok ek soungoula zot atablé é zot komans boir sa bon baka.

Vir ki vir , ine ariv pou dézennen. Dézennen madame Kok I bien bon . tou dimoune I satisfé. Mé li soungoula ek son madame I oulé oir fon kalbas é zot resté kot Kok ziska senker disoir. Epi ki zot désidé pou al sé zot. Zot ariv kot zot dan pti fernoir. Zit ine bien kontan pas en lazournen parey kot zot zami. Dimans prosen, I a zot tour envit Kok ek son madame kot zot.

Ti sanblé long mé alafen dimans ti arive é Kok ek son madame ti al kot soungoula.

Ler Kok ek son madame ti ariv kot lakour soungoula, son madame ti li tousel. Zot démane li oli son mari. Madame soungoula I répone zot ki ine al lapes. Kok I dir sa madame ki ava espéré ziska ler soungoula I ava rétournen. Létan I pasé é onzer I sonnen, mé napa soungoula. Kok I démane madame soungoula:

• Zot bé oli li? Tar pé fer. Ou a dir mouan I pankor oulé vini meme? Saler koumsa I tine dévret gagne bouyon. Dir dir mouan, ki manier ine al lapes?

• Avan ler I ti alé, ine fer koup son likou ek en koté son lazame pou li al lapes pare ou dimans pasé.

Kok dan son léker I dir zafer ine bon. I dir madame soungoula I dakor pou esper ankor en pé. Saler pli espéré, pli soungoula pa vini mem. Ene ti pé pli tar Kok I démane madame soungoula:

• Bé ki senela ki ti koupé?

• Bé mouan meme ki ti koup son likou ek son kartié!

• Bé madame! Ki bétiz oune fer? Sépa si ou pane touy ou mari? Montré mouan kot I été!

Pov bonefame, I al kot lakuizine presk asodlarm, I al ouver lakuizine. Koman I poz lipié dan lakuizine nenk I tane en sanson. Saler mous ver ine antour panien. Kok I dir avek li:

• Madame, ine mor meme. En senp bétiz ine kout lavi ou mari.

Mé Madame soungoula pa oulé bien bien bien kroir. I lev sa panien mé sa loder ki monté I fer li rémet panien dan son plas désuit. I tayé I désane ankouri bor lamer ek son dé zenvité derier li. Ler zot ariv lo lans, pa kozé, loder I vine zouene zot. Sa voyaz madame soungoula ti bézouen kroir ki son lizié ine oir. Kok I esplik li ki ine arrive.

• Madame soungoula o, les mouan dir ou ki ine arrive, oune touy ou mari ou meme parski ou lamen I pa parey lamen mon fame. Oune al fer kek maladres.

Dézormé, kok I a nobou travay an pé. Léroi ine met soungoula bien trankil anba kazou.